Genesis 27
27
B'ajtan lo'lanel jumasa sk'u'lan ja Jacobi
1Ayxa lek sk'ujol ja Isaac ja tup ja sati, mixax yila k'inal. Ja'yuj, jun k'ak'u spaya ja Esau yunin b'ankilali, 2Ti yal yab'a:
—K'elawil kala kerem, ja ke'n ayxa lek jk'ujol, b'a'y xta jun juts'in oj chamkona, —xchi ja Isaaki. 3Ja'yuj i'aj wa pulte sok ja sni' jumasa, ka'ax b'a wits, ila jas oj ja yam jan ki. 4Chapaki, jun sek' jwa'el b'a jastal wax k'ana ja ke'n, i'aj jan ki b'a oj kab'i. B'a jach' oj ka'wi, ja slekil jk'ujol ja janek' me' la chamyoni.
5Jaxa Rebeca yab' ja jas alji yab' ja Esau yuj ja Isaaki, yajni waj ja Esau b'a witsi. 6Ti waj yal yab' ja Jacobi:
—Maklan ja jas oj kala wab' kala kerem, wantox ch'ak jmakla ja slo'il wa tat yal yab' wa b'ankili. Wa'n sk'anjel 7jun yal chante b'a k'ul b'a oj chapyi jun sek' swa'el b'a jach' oj ya'yi ja jas tsa'ub'al yuji. 8Ja'yuj makla lek ja jas oj kala wab'i, cho k'u'lan spetsanil ja jas oj kala wab'i, —xchi ja snan ja Jacobi. 9Ka'ax ja b'a'y ja chante'i, i'ajan ki chab' yal chivo b'a tsamal lek. Ja ke'n wax na'a lek ja jas wa sk'ana oj yab' wa tati, jach'ni oj chapyi'a. 10We'nxa oj ja wi' ochyi b'a oj wa'uki, b'a jach' we'n oj ya'wi, ja slekil sk'ujol tsa'ub'al yuj ja janek' mitox chami.
11Jaxa Jacobi, ti yal yab' ja snani:
—Yuxta ja jb'ankili, ay stso'otsil b'a spetsanil sb'ak'tel, jaxa ke'n miyuk. 12Yuj k'a jak syam'on ja jtati, oj yal yuj lom wa'non yixtalajel. —A'nima oj yil'onike lek kechan oj le'a jastal mi lek oj yil'on—
13Ti jak'jiyi yuj ja snani:
—Kala kerem k'u'lan ja jas wax kala wab'i. Ja we'n i'aj jan ki ja yal chivo wax kala, yuj k'a mi lekuk ja jas oj sk'u'luk a wi wa tati, —A'nima ti sk'u'lan ki ke'n ja jas mi lek ay b'a sk'ujoli.
14Jaxa Jacobi waj yi' jan ja yal chivo jumasa, waj ya'yi ja snani. Jaxa ye'n schapa jun sek' wa'el b'a jex ajb'ani, jach'ni jastal wax k'ot sk'ujol ja Isaaki. 15Ti' waj sle' ja lekil sku' wa slapa ja Esauji, ya slap ja Jacobi. 16Ti'xta'a, yi'aj ja sts'ujmil ja yal chivo jumasa, spotsoyi ja sk'ab sok ja snuk' ja Jacobi. 17Tsa'an ti ya'yi ja Jacob ja wa'el sok ja waj schapa. 18Jachuk ti waj ja Jacob ja b'ay ja stati, ti yala yab'a:
—Kala tat, ¿oj ma b'ob' ochkon?
—Ochan jani, —xchi ja Isaaki—. ¿B'a schab'il ja kuntikili, mach'aya ja we'n b'a?
19Ke'non ja Esau wa wunin b'ankilali, —xchi ja Jacobi—. Jk'u'lanta ja jas a k'anaki'i. K'e'an, la wa'an sb'aj ja jas jmila jana wi'i, b'a jach' oj ja wa'ki ja slekil wa k'ujoli.
20Jaxa Isaaki, sjob'oyi:
¿Jastal lek jel juts'in a ta'a ja chan jaw b'a? —xchi ja Isaaki.
—Ye'n wa Dyos ja ti ya'a b'a ek'yoni, —xchi ja Jacobi.
21Ja'yuj ti alji yab' yuj ja Isaaki:
—Jitsan jan kala kerem b'a jach oj b'ob' jyam'a. Wax k'ana oj na' ta meran we'n ja kunin Esauji, —xchi ja Isaaki.
22-27Jaxa Jacobi, ti och mojan sok ja stati, yajni chak smasi, ti sjob'o yi'a:
—¿We'nama meran kunin Esau? Ja wa k'ab' jumasa, ja'ni sb'a Esauji, jaxa wa k'umali, ja sk'umal ja Jacobi, —xchi ja Isaaki.
—Meran, ke'non ja Esauji, —xchi ja Jacobi.
Jaxa Isaaki, mi sna'a sb'aj ja Jacob yuj ja ay stso'otsil ja sk'ab' jastal sb'a Esauji. Ja'yuj ti yala ja Isaaki:
—Kala kerem, i'aj jan ki ja chan it a yama jani, oj wa'kon sb'aj, oj cho ka'wi ja slekil jk'ujol tsa'ub'al kuji.
Jaxa Jacobi, yi'aj ochyi ja swa'eli, wa' ja Isaaki; cho yi'aj ochyi ya'lel ts'usub' yu'ajni'a. Yajni ch'ak wa'uk ja Isaaki ti yala yab'a:
—Ja ya'n kala kerem, jitsan jani, la ujts'anon.
Jaxa Jacobi, och mojan sok ja stati yujts'an. Jaxa Isaaki yajni yab' ja yik'il ja sku' swexi, jel tsamal ja jas yal yab'i:
—Kala kerem ja a wi'oj ja yik'il
ja wits it jel lek wax yila ja Dyosi.
28—Ja Dyosi, jel oj ya jakuk a wi ja ja'i,
sok ja lu'um b'a jel leki—
—A ya'wi jitsan lek ja sat trigo
sok jitsan lek ja ya'lel ts'usub'i—
29—Spetsanil ja swinkil ja niwak chonab' jumasa
oj ya'teltaya oj cho skis jan lek—
—Ja wa moj alijel jumasa;
oj snujts'uk sb'aje a mok,
—Oj sna'e yuj we'n niwan a wa'tel yujile—
—Jel wokol oj ek' yujile ja ma' mi lek oj sta'a ti'i—
—Jel lek oj ek'yujile ja ma' lek oj sta'a ti'i—
30Yajni ch'ak ja tsamal lo'il ja Isaaki, elumxa ja Jacob b'a yoj snaj tojb'el sok k'u'uts ja stat ja yajni k'ot ja Esauji. 31Jach'ni ja ye'n cho schapa jun sek' wa'el b'a jex ajb'ani, yi'aj och yi ja stati, ti yal yab'a:
—K'e'an kala tat; la wa'an sb'aj ja jas jmila jan a wi'i, b'a jach' oj ja wa'ki ja slekil wa k'ujoli.
32Ti sjob'jiyi yuj ja stati:
—¿Mach'aya ja we'ni?
—Ke'nani ja Esau wa wunin b'ankilali, —xchi ja Esauji.
33Jaxa Isaaki och k'itk'unuk, spetsanil sb'ak'tel, ti yal yab'a:
—¿Machunk'a smila jan jun chan b'a k'ul yi'aj jan ki b'a? Ja ke'n wa'yonta, jaxa we'n mito la juli, cho ka'tayi ja slekil jk'ujoli. —Ja slekil jk'ujol jawi, mixani oj b'ob' ka eluk, —xchi ja Isaaki.
34Yajni yab' ja Esau ja jas yala ja stati, ti' och awanuk ok'ela, jomel lek ja sk'ujoli, ti yal yab' ja Isaaki:
—Kala tat, cho a'ki ja ke'n ja slekil wa k'ujoli—
35Jaxa Isaaki, ti sjak'a yi'a:
—Jakta wa moj alijeli, slo'layonta, ja'yuj ka'ta yi ja slekil jk'ujol it a b'aj we'n ajyi, —xchi ja Isaaki.
36—Ti yala ja Esauji:
—Ay k'a sb'ej ja lom Jacob sb'i'ili, yuj jun tan lo'lanum, —Ja'xa schab'il majke wa slo'layona— Mi kechanuk sjapaki ja jas jb'aj yuj ja ke'n b'ankilaloni, jaxa ya'n mi jas yakan ki ja slekil jb'aj ke'n ajyi. ¿Mi' ma oj cho b'ob' a wa'ki ja slekil wa k'ujol ja ke'n b'a?
37Ti jak'ji yi yuj ja Isaaki:
—¿Jasunk'a oj k'u'luk a wi kala kerem? —Kalata yab'i ye'n ja niwan ya'tel oj ajyuk a wuji; cho kalata yab'i spetsanil ja wa moj alijel jumasa ti oj a'tijuk sok ye'na, kala yab'i a ajyuk yuk yuj jitsan ja sat ja trigo sok ja ya'lel ts'usub'i—.
38Jaxa Esauji, kechan och ok'uk tsats lek wax awani, ti cho yala'a:
—Kala tat, —cho a ki' ja slekil wa k'ujol ja ke'n— ¿Kechan ma june ja slekil wa k'ujol b'a?
39Ti'xa alji yab' yuj ja stati:
—Elan najat yuj ja lekil lu'umi,
cho ka'ax najat yuj ja ja' oj jak b'a satk'inali.
40Ja oj ja kolta b'aj sok
ja yej wa punyali,
cho ti' oj a'tijanan sok wa moj alijeli,
jaxa yajnixa ta'a lek jastal oj ajyani,
ti oj elan ja b'a yib' sk'ab' ja ye'na—
Spaka ja Jacob yuj ja Esauji
41Ja Esauji, je stakla ja Jacob yuj ja lom japji yi ja slekil sk'ujol ja stati, sok yala ojni smil ja yajnix cham ja stati. 42Yajni k'ot schikin ja Rebeca ja jastal wa'n sna'jel oj sk'u'luk ja Esauji, ti sjeka spayjel ja Jacobi, ti yal yab'a:
—Ja wa b'ankil Esauji kechan wa'n smajlajel b'a oj smil'a. 43K'u'an ja jas oj kala wab'i, elan ja ili, ti' la waj b'a snaj ja jmoj alijel Laban b'a Harani. 44Ti la ajyi tiw man oj ek'uk ja stajkel wa b'ankili. 45Yajnix ch'ay sk'ujol ja jas a k'u'lunej yi'i, ti oj jek a payjel ja yajni ojxa b'ob' kumxani. —Mix k'ana oj ch'ay sna'jel ja chab' kuntikil b'a jun ita k'ak'u.
46Ti waj ja Rebeca waj yal yab' ja Isaaki:
—Ja hitita jumasa iti, jexa axwelon yujile— Yuj k'a sok hitita oj nupanuk sok ja Jacob ja il jastal ja it jumasa, —ti'xa oj cham kona.
Currently Selected:
Genesis 27: YABD
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México 2021
