Marcos 11
11
Ko Jesús tyëkë jam Jerusalén
1Ko tmëwinkoontë ja Jerusalén kajpn ets jyajtë ma ja Petfagé kajpnën ets jam ma Betania kajpnën, Olivo kopkwinm, jam ja y'ijxpëjkpë nimäjtsk tkäjxë'ky, 2ets t'ënëmaay:
Nëjkxtë xim kajpntum, ko jam mja'tëty, ënät tu'uk ja krukts yä'äy ayääkë xypyaata'antë kuwëëny mëti'ipë ka'anëm pën tuk'u'unyënëm. Nëjkx mëkäjëtë ets xyajmintëty. 3Ets ko pën myajtëwëtëty tii ko jëtu'un m'ëtë'ëtstë, jëtu'un xy'ënëëmëtëty ko yë'ë Wintsën tsyojkpy ets ënätyë jatëkok tyajmina'any.
4Tääts ja y'ijxpëjkpë ojts nyëjkxtë ets ja krukts yä'äy ayääkë tpatë jam tëjk'ëkë'ëm ets tmëkäjëtyë.
5Ënet ja ja'ay tyajtëëwtë mëti'ipë ënety jamëtyën:
¿Tii mtuuntëp, tii ko yë krukts yä'äy xymyëkäjëtë?
6Tääts yë'ëjëty y'ëtsoowtë ijxtëm ënety ja Jesús të y'ënë'ëmxëtën; ets jam tsyo'ontë. 7Ënet tyajtso'ontë ja krukts yä'äy ets ja Jesús ojts tukninëjkxtë. Ojts ja wyit tukjëpä'äntë ets ja Jesús tukwä'tspejty. 8Nimay ojts ja ja'ay ja wyit tyä'äptë tu'ujoty, tam mëti'ipë ujts xe'enty pyëjktaktëpën tu'ujotypë tpaatën. 9Tääts wintuuy jëxkë'ëy yaxpë jojkpë tyëjkëtyë, ets y'ënantë:
Wintsën miimp, Wintsën miimp. Oy ko Dios kënu'kxën tyäky mëti'ipë miinpën Wintsën xyëëwkyëjxm.
10Wintsën miimp, Wintsën miimp, mëj jaanty ja Dios tsajpjotmëpë.
11Tääts ja Jesús tyëjkëy Jerusalén ets jyä'äjty ma ja mëjtsajptëjkën, je'eyë ojts jap y'ijx'ëwtity kyoow'ëwtity. Ënet jatëkok tsyo'ony ets ojts nyijkxy ma Betania kajpnën mëët ja nimajkmäjtskpë ja y'ijxpëjkpëtëjk. Tëë ënety tsyu'ujënë.
Ko Jesús tkajpxpoky ja higo kepy
12Komjëpom ko tsyo'ontë jam ma Betania kajpnën, ënät ja Jesús yuu pyätë. 13Tä tu'uk t'ijxpaty ja higo kepy jam jëkäm, tam ja y'ääy yaj'ixy. Tääts ojts tninëjkxy ets t'ixa'any pën jam ja tyëëm. Ko t'ijxy nitu'uk kyatëëm je'eyë ja y'ääy, jä'ä ko ka'ap ënety nixëëwëty. 14Ënet ja Jesús t'ënëmaay ja higo kepy:
Nijëna'a pën mkaniminëtëty ets tjë'kxëty ja mtëëm.
Ko ja Jesús jëtu'un y'ënäny, myëtoowtë ja y'ijxpëjkpëtëjk.
Ko Jesús twojpëtsëmy ja to'kpë yajkpë ma ja mëjtsajptëjkën
15Tääts jyajtë jam Jerusalén. Ko ja Jesús jyä'äjty ma ja mëjtsajptëjkën, ënät t'ëxwojp pëtseemtaay ja ja'ay mëti'ipë ënety jap to'ktëp yajktëpën, ojts ja ja'ay ja tyo'kpäjn tjijtë'ktaayë mëti'ipë wyinkukoontëpën ja meeny ets näjyëtu'un ja pak to'kpë y'u'unyääypyäjnëty. 16Ka'ap ja Jesús tkupëjky ets pën ja tooky tmënaxëty ma ja mëjtsajptëjkën. 17Ets ja Jesús tyëjkëy yaj'ijxpëjkpë, jëtu'un y'ënäny:
Jëtu'un ja Dios ja y'aaw y'ayuk kuja'ay myiny: Yë ntëjkës jä'ä wya'anëty Dios ëwtajtakn. E miitsëty, jëtu'un xywyanëtë ijxtëm yë mä'tspë tsyënaaytyaknën.
18Ko jëtu'un tmëtoowtë ja teety wintsëntëjk mëët ja tsajptëkotyëtë yaj'ijxpëjkpëtëjk, tääts t'ixtaaytyë ja winma'any wi'ix tyaj'ooktëtyën ja Jesús, yë'ë kë'ëm tsyë'këtëp ja Jesús, jä'ä ko ja mayjyä'äy oy tmëtowtë wi'ix ja Jesús yaj'ijxpëkyën. 19Ko ojts tsyu'ujënë, ënät ja Jesús mëët ja y'ijxpëjkpëtëjk tsyo'onëtë jam ma ja mëj kajpnën.
Ko ja higo kepy tsyi'itsy
20Komjëpom jam nyajxtë ma ja higo kepy tyänën ets ojts t'ixtë ko tëë tyëëtsë'knë tyiktsjotypyaat. 21Ojts ja Pedro tja'amyetsy ets ja Jesús t'ënëmaay:
Wintsën, ix, tëë ja higo kepy tyëtsnë mëti'ipë ojts xykyajpxpokyën.
22Tääts ja Jesús y'ëtsooy:
Mëpëktë Dios. 23Tëy miits n'ënëëmëtë, pën nyëmääpy ya'atë kopk: kä'äk jää, tëkë mejyjoty ets ëmuumtu'ukjot jëtu'un t'ënëëmë ets ni'ikyë y'ënä'äny ko jëtu'un tyuna'any jyata'anyë, janty tun janty jatëtëp jëtu'un. 24Paaty miits n'ënëëmëtë, pën tii Dios m'amëtoowtëp jëtu'un mmaytyë tajtë ko myajmo'ojantëp, ets myajmo'otëty. 25Ko miits yë Dios xyjyä'ämyätstëty, pën jam pën tii xytyukmëtsip'atë, nimä'kxtë ets näjyëtu'un ja mteety tsajpjotmëpë mnimä'kxëtëty. 26Pën ka'ap xynyimä'kxtë, näjyëtu'un ka'ap ja mteety tsajpjotmëpë mnimä'kxa'anëtë.
Ja Jesús ja kyutujkën
27Tääts jatëkok jyajtë jam Jerusalén. Tap ënety ja Jesús jyëtity ma tsajptëjkën, ko ojts nyiminëtë ja teety wintsën, tsajptëkotyëtë yaj'ijxpëjkpëtëjkëty ets ja mëjja'aytyëjkëty. 28Tääts ojts yajtëwëtë:
¿Pën mooyëp ja kuttujkën ets jëtu'un winë xytyunëty, pën të m'ëne'emyë?
29-30Tääts ja Jesús y'ëtsooy:
Näjyëtu'un miits nyajtëwa'antë: ¿Pën kyäjx ja Juan ets yajnëëpätëty, Tiosë ëkë naaxwiinyëtë ja'ayë? Pën xy'ëtsoowinpijtëpës ënät ntuk'ëwaanëtëty pën yäjkpy ja kuttujkën ets jëtu'un winë ntunëtyës.
31Ënet aakyë'ë ojts myäytyë tyajtë: ¿Wi'ix n'ëtso'owmëty? Ko ënät n'ëtso'owmëty:
Dios ojts kyexyë, tsojk xy'ënëmä'ämyëty:
¿Tiixë ko ojts xykyamëpëktë? 32Näy ka'ap tjëkyepy nëmä'ämyëty ko naaxwiinyëtë ja'ay ojts kyexyë. Tsyë'këtyëp ja ja'ay jä'ä ko myëpëjktëp ja mayjyä'äy, ko Juan Dios käjpxynyajxpë. 33Ënet t'ënëmaaytyë ja Jesús:
Ka'apës nijawëtë.
Tääts ja Jesús y'ëtsoowëtë:
Nen ka'ap yam ntuk'ëwaanëtëty tiikutujkën mëët ya'atë winë ntunyës.
Currently Selected:
Marcos 11: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
