Lucas 21

Ko ku'ooktyo'oxy ja myeeny tyoxy

1Tam ënety tëkok ja Jesús t'ixy ko ja kumeenyjyä'äytyëjk t'apëkëtë ja meeny jap apëjkënjoty, 2ënät näjyëtu'un t'ijxy ko tu'uk ja ku'ooktyo'oxy t'akonë ja jyä'ä, mäjtsk ja mutsk pujxnmeeny. 3Tääts ja Jesús y'ënäny:

Tëy miits nëëmëtë ko yë ku'ooktyo'oxy, yë ëyoopëja'ay ni'ik may yë myeeny të t'akonë jap apëjkënjoty këtiinëm yë ja'ayëty mëti'ipë jap yë jyä'ä të t'apëkëtën. 4Yë ja'ayët aakyë'ë meeny y'ako'nëtëp mëti'ipë natëjkëpën e yë ku'ooktyo'oxy, yë'ë të t'akonë mëti'ipë nimëjaaw pyätypyën ets mëti'ipë ënety nätyukjëjp'ijxëpën ma jyuuky'ajtënën.

Ko ja Jesús tnikäjpxy ko ja mëjtsajptëjk kyutëkoyä'äny

5Jam ënety tëkok ja ja'ayëty tnimëtya'aktë ja mëjtsajptëjk ko janty tsuj kyëxë'ëky mëët ja tsaa mëti'ipë myëët'ajtypyën ets näjyëtu'un mëti'ipë ja ja'ay yojxtëpën ets oy ja tsajptëjk yaj'ixëty. Tääts ja Jesús y'ënäny:

6Mëti'ipë yaa m'ijxtëpën, pyatäämpy ja xëëw jëmëjt ko nitu'uk ja tsaa kyawë'ëma'any, tu'kë'ëyë jyijta'aja'any.

Ijxpäjtën ko ja naaxwiinyëtë kyëxanë

7Ënet ja Jesús tyajtëëwtë:

Wintsën, ¿jëna'a jëtu'un jyata'any kyëpäta'any, ets tii ijxwë'ëmën mëët yajtuknijawëp ko ënety jëtu'un jyatanë?

8Ets ja Jesús y'ënäny:

Näkyëwent'atëtë ets këtii pën mnätyukwin'ëënëtëty. Yë'ë ko nimay ja ja'ay myina'antë ets y'ëna'ana'antë: Ëjts jëtu'un Kristë ets Tëë ja tiempo tpatnë. Miitsëty këtii xymyëpëktëty. 9Ko xymyëtoy'atëty ja tsip tyunyë ets ko ja ja'ay nyänyipëtë'ëkyë, ka'ap mtsë'ëkëtëty; jëyëjp ya'atë tyuna'any jyata'anyë naamka'anëm ënety ja nyixëëw tpaaty ets ja naaxwiinyëtë kyëxëty.

10Tääts ja Jesús jyaak nëmaayëtë:

Tsiptunaanp ja naax kajpn mëët ja wiinkpë ja mëj kajpn. 11Yu'kxaanp yë naaxwiinyëtë, itaanp yë yuu xëëw, pa'am ëyo'on oymyaajëty, ets jam tsajpjotm atsë'ëk ajawë jam yaj'ixa'any.

12Naamka'anëm ënety jëtu'un jyäty kyëpetynyëm, ko nëjkx miits myajmatstë, myajpajëtijta'aktë, myajkë'ëyaktë ma ja tsajptëjkën ets myajtsumtë ets myajmënëjkxtë ma ja yajkutujkpëtëjkën jä'äkyëjxm ko ënety miits të mëpëktë ma ëjtsën. 13Ko jëtu'un tyunëtëty jyatëtëty, jyëkyejpy xynyimëtya'aktëty ja tëyajtën ëjtskyëjxm. 14Këtii xymyëmay xymyëtajtëty wi'ix m'ëtsowtëtyën. 15Ëjts miits ja winma'any ets ja ayuk nmo'ojantëp wijypyë kejypyë mëti'ipë mkajpxtëpën këtiipë ja mmëtsip mëmëta'akëtëty ets këtiipë wyinma'anypyaatëty wi'ix myaj'ëmonëtëty. 16Yë'ëpaat nëjkx yë mtaak mteety mkë'ëyakëtë, näjyëtu'un yë mjëëky mmëku'ukëty ets mëti'ipë mëët mnämyäyëtën ets tam mëti'ipë nëjkx myaj'ookëtën. 17Ni'ëmukë ja ja'ay m'ëxëëk'ixa'anëtë, jä'ä ko ënety ëjts xymyëpëktës. 18E miitsëty nitii mkajata'anëtë, nitu'uk ja mwaay kyaka'aja'antë. 19Aamëk jotmëk näpyëjkta'akëtë ets ja nitsokën xypyaatëty.

20Ko xy'ixtëty ja Jerusalenkajpn ko tëë ja myëtsip yajnatukyë, yë'ë mtuknijawëtëp ko tsojk ënety kyutëkoyä'äny. 21Ko jëtu'un tyunëtëty jyatëtëty, wä'än kopkjotm nëjkxtë mëti'ipë jam Judea yajpatëpën ets wä'än ënätyë tpëtsëmtë mëti'ipë jamëtyën Jerusalén. Mëti'ipë jam kamjotm yajpatpën, këtii nëkoo tyimwinpitëty ma kyajpnën. 22Jä'ä ko ma tääpë xëëwën ëyo'on jää itaanp, jää y'atëwa'any ijxtëm ja Dios ja y'aaw y'ayuk y'ënä'änyën. 23Mon tuk ja to'oxytyëjk yajpaatë mëti'ipë ënety ja u'unk jää nyëkëjxm'ajtëpën ëkë mëti'ipë ënety jää yaj'u'unktsi'tstëpën. Jä'ä ko mëj këjää ja pëjkën ato'onën jää y'ita'any ets ja mëj tsaatsytyu'unën ma ja naax kajpnën. 24Tam mëti'ipë nëjkx yajkupuxyën, mëti'ipë nëjkx yajtsumy yajmatsyën wiink naax wiink kajpn; ets ja mëtsip jëtu'unyë nëjkx t'ateeny tukteeny ja Jerusalén kajpn koonëm tpaatëty ja nyixëëw ma ënety të yaj'akäjpxyën.

Wi'ix wyimpita'anyën ja naaxwiinyëtë ja'ay ja y'U'unk

Mt 24:29-35,42-44; Mc 13:24-37

25Yaj'ixaanp jam winë ma xëëwën, ma po'ojën ets ma ja matsa'ajën; ets naaxwiiny jëtu'unyë nëjkx ja naax kajpn myoonkëta'ak tyujkëta'aktë, ko y'ënaanta'akëty ja mejy ets nëë o'pky nëkooyë pyëtë'knëty, nëjkxëp tsyë'ëkëtë. 26Jëtu'unyë nëjkx ja ja'ay kyëtawtë kyëpiptë mëët ja jotmay ko tnijawëtëty ja naaxwiinyëtë kyëxa'any; jä'ä ko yë'ëpaat yë tsajpjotmëpë nëjkx yajxijtyu'kxtë. 27Ënet yaj'ixa'any jam tsajpjotm tsyoony yootsjotm ja naaxwiinyëtë ja'ay ja y'U'unk mëët ja mëj'ajt oyajtën. 28Ko jëtu'un tsyo'onta'akëty ja ëyo'on, akujk jotkujk mnäjyawëtëty, jä'ä ko yë'ë ënety wiinkoonp ja nyixëëw ja nitsokën.

29Ojts ja Jesús tnimëtyä'äky näjyëtu'un tu'uk ja ijxpäjtën:

Ixtë ja higo kepy, ëkë oymyëti'ipë kepyëty. 30Ko y'ääy pyëtsimy, jëtu'un yajnijawë ko tsojk ja anpë myina'any. 31Näyjyëtu'un ko xy'ixtëty ko tyunëtëty jyatëtëty mëti'ipës të nkäjpxyën, jëtu'un xynyijawëtëty ko wiinkoonp ja Dios ja kyutujkën.

32Tëy miits nëëmëtë, jatëp jëtu'un ka'anëm ënety ja ja'ay y'o'kta'atë mëti'ipë jää tyam juuky'ajtëpën. 33Këxaanp naxaanp yë naax tsajp, e yë n'aaw n'ayukës nijëna'a kyakëxa'any.

34Näkyëwent'atëtë, këtii xy'atsoktëty ja nëë ju'uky, këtii m'uuktëty mu'ukëtëty, këtii yë'ë xymyëmay xymyëtajtëty ja naaxwiinyëtë naaxkëjxypyë yajtukjuuky'ätyën, këtiipë ja ëyo'on ajotkumonë mtukja'tëtëty, 35jëtu'un tä ja jëyujk yajxokyën. Jä'ä ko minaanp ma tëkokyë ja naaxwiinyëtë ja'ayën. 36Jëjp'ixy xëmë myajpaatëty, ja'amyätstë ja Dios janaam jatsojk, jëtu'un ka'ap montëty mtuktëty oy ja ëyo'on jyatunyë, ets akujk jotkujk xywyinkuwa'akëtëty ja Jesukristë.

37Winjëpom ja Jesús ijty yaj'ixpëky ma ja mëjtsajptëjkën ets koots nyijkx ma ja Olivo Kopkën. 38Jopyëp, tsojk ja ja'ay ojts nyëjkxkojtë ma ja mëjtsajptëjkën ets tmëtoow'ita'antë mëti'ipë ja Jesús nyikäjpxypën.

Currently Selected:

Lucas 21: QUETZMIXE

Highlight

Copy