Lucas 12

Ma ja Jesús tuk'ijxpëkyën ja ja'ay ko yë Farisejë ja'ay wyin'ëëntë

1May ja ja'ay nyëëpäjtë, nëkooyë nyätyij nyäkyojtënëtë xim yam. Tääts ja Jesús ja y'ijxpëjkpëtëjk tmëëtmëtyaktso'ony jëwyiin:

Näkyëwent'atëtë, ijxkëm ko mtukpaatëtë ja fariseë ja'ay ja wyinma'anyëty, yë'ëjës ntijpy ko je'eyë wyin'ëëntë. 2Tu'kë'ëyë mëti'ipë kuyu'utsy ijtpën, nikëxë'kp ok, ets tu'kë'ëyë mëti'ipë ijtpën nipëky nituny, yajpatp yë'ë. 3Mëti'ipë të xynyijawëtën ayu'utsy, yajmëtowëp yë mayjyä'äyjoty; ets pën tii miits mkajpxtëp ayu'utsy ame'tsyë ku'ëtuky tëkoty, yajkajpxwa'kxëp yë'ë jam tëjkkëpajkm.

Ko Jesús tnikäjpxy pën yajtsë'ëkëpën

Mt 10:28-31

4Jëëkytyëjk mëku'uktëjkëty, tyam nëëmëtë ets ka'ap xytsyë'ëkëtëty ja yaja'ay'o'kpë, ka'ap yë m'anëmë y'ookëty oy ja mni'kx mkopk ënety jya'ooky. 5Yë'ë ntuk'ëwaanëjantëp pën mëpaat xytsyë'ëkëtë. Tsë'ëkëtë ja Dios. Ko ënety tëë ja mni'kx mkopk y'ooktë yë'ë yajkutukäämpy pën mnëjkxtëp ëyoowtaknjoty ëkë ka'ap.

6¿Këtii yë joon yajkujuy mëët mäjtsk yë meenywyä'kxyë? Nitu'uk yë Dios kyaja'atyëkoyë. 7E miitsëty, mwaaypyaat yë Dios mëtyoy tyaj'ity. Paaty ka'ap mtsë'ëkëtëty, wäänëni'ik miits mtsoowpaatë këtiinëm yë joon.

Pën ka'ap tuktsëtyuntën ja Jesús ma ja'ayën

Mt 10:32-33; 12:32; 10:19-20

8Tyam miits nëëmëtë, pën oy xynyikajpxpës ma ja'ayëtyën, näjyëtu'un oy yë naaxwiinyëtë ja'ay yë y'U'unk nyikajpxëtëty ma Dios yë y'anklësën. 9E pën xykyuyu'tspës ma ja'ayëtyën, näjyëtu'un yajkuyu'utsa'any ma Dios yë y'anklësën.

10Dios pyokymyä'kxäämpy yë ja'ay mëti'ipë ënety tëkatsy nyimëtyäkpyën yë naaxwiinyëtë ja'ay yë y'U'unk; yë'ë ka'ap tpokymyä'kxa'any mëti'ipë yë Kënu'kxymyëkajtën myëkajpxtëkoopyën.

11Ko pën myajnëjkxëtëty ma ja tsajptëjkën, ma ja kutuunktëjkëtyën ets ma ja tëytyuunpëtëjkëtyën, ka'ap xymyëmay xymyëtajtëty wi'ix m'ëtsowtëtyën ëkë pën tii mkajpxtëp; 12jä'ä ko ënety mkajpxa'antë, yë'ë ja Kënu'kxymyëkajtën nëjkx mwinma'anymyo'ojëtë ets mkajpxtëty oy.

Wi'ix kyutsë'ëkëty meeny atsojk

13Tääts tu'uk ja ja'ay ojts t'ënëëmë ja Jesús mëti'ipë ënety jamën mayja'ayjotm:

Wintsën, ënëëmë yë nmëkä'äxës wä'änës xymyo'oy ja kuma'ayën mëti'ipës xypyaat'ajtpën.

14Ënet ja Jesús y'ëtsooy:

Mëku'uk, ka'apës pën të xypyëjktä'äky yajkutujkpë ets naaxkijpxwa'kxpë.

15Näyjyëtu'un y'ënäny:

Näkyëwent'atëtë ets ka'ap tii xy'atsoktëty, ka'ap yë'ëjëty yajjuuky'äty ko tii may'äämpy yajmëëtëty.

16Tääts tnimëtyäky ya'atë ijxpäjtën:

Jää ijty tu'uk yë ja'ay kumeenypë. May ojts ja pyëjktä'äky tyajpëtë'ëky kyamjotm. 17Ënet ja kumeenyjyä'äy myäy tyäjy: ¿Tiis ntunëp? ka'apës nmëëtëty maajës npëjkë'ëkëty yë npëjktä'äkyës. 18Tääts jyaak'ënany: Tëës nwinma'anypyääty tiis mtunëpën. Yë ntëjkës mutskpë yë'ëjës nyajpëtë'ëkëp ets nkojëtyës jawäänë mëjpë, japtsës yë mpëjktä'äky npëjkë'ëkëty mëti'ipës nmëët'ajtypyën. 19Täätsës kë'ëm näy'ëna'anëtëty: Mëku'uk, tap pëjkë'ëk winë may xyaj'ity mëti'ipë myajtunëpën kanaak jëmëjt; po'kx, kay uuk ets tukxon je'eyë ja juukyajtën. 20Tyam ënety jëtu'un y'ënä'äny ko ja Dios y'ënëmaayë: Winma'anytyuk, tyam koots ënät m'o'knëty, ets mëti'ipë jap të xypyëjke'ekyën, ¿pën jyä'ä'atëp? 21Jëtu'un jyäty yë ja'ay mëti'ipë winë may nyipëjkpejtypyën, jam ma Tiosën, ëyoopëja'ay jam nyäxy.

Wi'ix yë Tios tkëwent'atyën mëti'ipë y'u'unk'ajtypyën

Mt 6:25-34

22Tääts ja Jesús t'ënëmaay ja y'ijxpëjkpëtëjk:

Jä'äkyëjxmës jëtu'un n'ëna'any këtiipë xymyëmay xymyëtajtëty tii mtukjuuky'atëp, tii mkaytyëp m'uuktëp ets tii mwit'at mxox'atëp. 23Yë juukyajtën tsoowpatp ni'ik këtiinëm yë kääky uuky, ets ni'kx kopk tsoowpatp ni'ik këtiinëm yë wit xox. 24Ixtë yë jooky, ka'ap nyi'iptë ets ka'ap pyëjktä'äky tyajpëtë'ëktë, ka'ap jë'kxy pëky tnipëjkpätë ets ka'ap tii nyätyuknipëjkë'ëkëtë; e yë'ëjëty, Dios mooyëtëp ja jyi'kxy pyikyëty. Miitsëty wäänëni'ik ja Dios winë mo'oja'anëtë, jä'ä ko wäänëni'ik mtsoowpaatë 25Näyjyëtu'un ënät, oy pën jënu'un tjamëmay tjamëtajy ja jyuukyajtën, ka'ap tjëkyepy pën tyajyonëty ja jyuukyajtën ets jeky jyuuky'atëty 26Pën ka'ap mayëtë yiinpë wäänpë, ¿tii ko xymyëmay xymyëtajtë ja këjääpë?

27Ixtë yë pëjy wi'ix yontë jyiitstë; ka'ap tyuntë, ka'ap pyiitë. Jëtu'un n'ënëëmëtë ko oy ja yajkutujkpë Salomón ni'ik ja mëj'ajtën tjamëët'ajty, ka'ap jëtu'un oy nyäxyojxë ijxtëm yë pëjyën. 28Pën Dios xyojxyp ja aay ujts mëti'ipë tyam yoonpën aayjoty ujtsjoty ets ko jyëpom'atëty tëë nyatëtstnë, ¿këtii jëtää ja Dios miits mxoxëtëtyë? Miitsëty tim wäänë oy mmëpëktë. 29Paaty nëëmëtë: këtii xymyëmay xymyëtajtëty tii mkaytyëp m'uuktëpën. 30Yë'ë ko ya'atë jëtu'un yë ja'ay myëmaay myëtajtëp mëti'ipë ka'ap yë Dios t'ixy'atën; e miitsëty mëët'ajtëp tu'uk ja mteetyëty mëti'ipë nyija'apën tii myajmëyajtëp. 31Miitsëty, jam xypyëjkta'aktëty ja mjot mwinma'anyëty ma xypyaatëty ja Dios ja kyutujkën ets myajmo'otëty tii mkaytyëp m'uuktëpën ets tii mnätyukxoxëtëpën.

Ja juukyajtën tsajpjotmëpë

Mt 6:19-21

32Këtii mtsë'ëkëtë, oy miits mja'itë ijxtëm niwäänëpë ja kupixynyën, ja Dios mëët ja y'oyjyot y'oywyinma'any tëë tuknipëjktaakë ko mo'oja'anëtë ja kyutujktakn. 33Tooktë tiijaty jam mmëët'ajtëp ets xymyo'otëty yë ëyoopëja'ay; jëtu'un xypaatëty mëti'ipë jam tsajpjotmën, mëti'ipë ka'ap kyixy nyäxyën, ma ka'ap ja mä'tspë tyëkën, ets ka'ap tii waany tyuktëkëty. 34Jä'ä ko maa ja mwit mmeeny yajpaatën, nän jam ja mjot mwinma'any yajpaata'antë.

Ko Jesús y'ënä'äny ets nnäjyëjp'ijxëmëty

35Jëjp'ixy mnäyaj'itëtëty, xoxy pëky ets kutë'kxy. 36Jëtu'un ijxtëm ja tuunpë tjëjp'ixyën ja wyintsën mëti'ipë të y'otsyën mëkääpyë ma pëjkpë ukpën. 37Akujk jotkujk yajpaatë ja tuunpëtëjk mëti'ipë wijy kejy yajpatëpën ko ja wyintsën jyä'ty. Tëy miits nëëmëtë ko kë'ëm ja wintsën nëëmëja'any ja tyuunpëtëjk ets nyaaxwäätstëty ma kaaytyaknën ets ja wintsën kë'ëm ja ka'ayën ukën t'apëkëja'any. 38Akujk jotkujk yajpaatë ja tuunpëtëjk mëti'ipë wijy kejy yajpatëpën, oy ja wintsën tyimja'tëty tsu'umkujk, ëkë jopyëp ëkë koots. 39Ets yë'ë näjyëtu'un mnijawëtëp: Ko jeexyë tu'uk ja kutëjk t'ëknijawë jëna'a ja mä'tspë myina'any mä'tspë ma tyëjkën; a'ixy jëjp'ixy jeexyë nyäyaj'ityë këtiipë pën tyëkëty tyëkoty. 40Näyjyëtu'un miitsëty, apaatë myajpaatëty, jä'ä ko ja naaxwiinyëtë ja'ay ja y'U'unk jää myina'any ma ënety ka'ap xyjyëjp'ixtën myinëty.

Ja tuumpë mëti'ipë oy tuunpën ets ka'apë oy tyunyën

Mt 24:45-51

41Ënet ja Pedro tyajtëëy ja Jesús:

Wintsën, ¿ëëts je'eyë xytyukmëmëtyaktëp winë mëët yë ijxpäjtën, ëkë näjyëtu'un wiinkëtypë ja'ayë?

42Tääts ja Wintsën y'ënäny:

¿Pën jëtää oy myëtuumpy ja wyintsën, mëti'ipë ja wyintsën tuknipëjkëpën ets tkëwent'atëty ja jëën tëjk, ets tyajkayëty tyaj'uukëty mëti'ipë jam yajpatëpën? 43Akujk jotkujk ja tuunpë yajpaaty ko ja wyintsën pyaatëtëty tam tpatuny wi'ix tii winë të tyuk'ëne'emyën. 44Tëy miits n'ënëëmëtë ko yë'ë ja wintsën tukmëwë'ëmanëp tiijaty ënety myëët'ajtypyën. 45E pën tääpë tuunpë, mëët ko myäy tyäjy ko ja wyintsën ka'ap tsyojkmina'any, ets niwa'akëty ja tuunpëtëjk ye'etyëjkpë to'oxytyëjkpë, twopëty tka'atsëty; ets tyëjkënëty ukpë mukëpë. 46Ma ënety ka'ap ja wyintsën tjëjp'ixyën myina'any ets jää myinëty mëk nëjkx tyiytyunyë; jëtu'un jyata'any kyëpäta'any ijxtëm ja ja'ayëtyën mëti'ipë ka'ap tii oy të tuntën.

47Ja tuunpë mëti'ipë nyija'apën wi'ix ja wintsën tjatsoky je'eyëp ko ka'ap tjëjp'ixy ets nän ka'ap tmëmëtoy wi'ix të y'ëne'emyën; yajxon nëjkx yajtsaatytyuny ets kanaak ok nëjkx yajwopy. 48E pën ja tuunpë ka'ap timnyija'apë pën wi'ixtëm ja wintsën tjatsokyën ets ka'ap tjëjp'ixy ets ka'ap jëtu'un winë tuny ijxtëm jyapaatë'atyën, wäänë yajktukëpätëty; ka'ap nëkoo yajtukwopëty. Pën tii may yajmoopy, näjyëtu'un yaj'amëtowëty may'äämpy. Pën tii wäänë yajmoopy, näjyëtu'un wäänë yaj'amëtowëty.

Jesús yajnäwya'kxëp ja ja'ay

Mt 10:34-36

49Yë'ës të nniminy naaxwiiny etsës ja jëën nyajmëjëty, njatsojkpyës ets ja jëën jeexyë jam tyooynyë. 50Kopkpëky koos n'ëyo'onpaata'any ets njotmaypyaata'any, mëkës n'ëyoy koos njëjp'ixy jëna'a jëtu'un jyata'any. 51¿Wä'än jëtää miits maytyë mtajtë koos yë'ë të nyajminy ja jotkujk'ajtënë? ka'ap jyëtu'unëty, yë'ëjës të nyajminy ets ja ja'ay nyäwya'kxëtëty. 52Tyam tsyo'ontä'äky ets jëtu'un tyu'uye'eyä'äny, nimëkoxk ja ja'ay nyämyëtsiptsoona'anëtë ma tu'ktëjkpën; nitëkëëk tnipëtë'ëktëty ja nimäjtskpë, ets nimäjtsk nipëtë'ëktëty ja nitëkëëkpë. 53Nämyëtsip'atëtëp ja u'unkteety mëët ja myaank; ja myaank mëët ja tyeety; ja u'unktaak mëët ja nyëëx; ja nyëëx mëët ja tyaakxyäkxy, ja tyaakxyäkxy mëët ja xyäkxy ets ja xyäkxy mëët ja tyaak.

Ko ja'ay tkawinmëtowtë mëti'ipë Tios tyuunpyën

Mt 16:1-4; Mc 8:11-13

54Näyjyëtu'un Jesús t'ënëmaay ja ja'ayëty:

Ko xy'ixtë ja yääk pyëti'iky ma ja xëëw kyëtä'äkyën ets m'ëna'antë, tu'ujaanp yowë; janty jajtp jëtu'un. 55Ets ko ja jëënpoj myiny ets m'ëna'antë ko y'ana'any; janty aanp. 56Miitsëty, oyjyä'äy mnätyijëtë ets ka'ap jyëtu'unëty. Pën mnija'awëtëp wi'ix xyajkajpxtëty yë naax ets tsajp, ¿wi'ix ko xykyanijawëtë ja xëëw jëmëjt mëti'ipë miimp këtakpën?

Näyaj'oyët mëët ja mmëtsip

Mt 5:25-26

57¿Tii ko kë'ëm xykyamëmay xykyamëtajy mëti'ipë oyën? 58Ko pën mni'ëënëtëty ma kutuunkën, mëmëtya'ak jëyëjp mëti'ipë mni'ë'ënëyëpën naamka'anëm jam mja'të ma kutuunkën; jä'ä ko jam mnäyaja'tëtëty ma kutuunkën je'eyë nëjkx mnitujkënë ets myajtsumëty. 59Tëy mijts n'ënëëmë ko jäänëm nëjkx mpëtsemy pujxn tëkoty ko xykyëpäjta'ajëty ja mpoky ëkë ja mnu'kxy.

Currently Selected:

Lucas 12: QUETZMIXE

Highlight

Copy