Juan 9
9
Ko ja Jesús tyaj'ijxë'ëky mëti'ipë wiints mëxu'unk'ajtën
1Najxp ënety ja Jesús ko t'ijxpaty tu'uk ja ye'etyëjk mëti'ipë wiints mëxu'unk'ajtën. 2Ets ja y'ijxpëjkpëtëjk yajtëëwëtë:
Wintsën, ¿tii ko ya'atë ye'etyëjk ojts myëxu'unk'aty wiints? ¿Tyaak tyeety jëtää poky myëët'ajtyp ëkë kyë'ëmpoky jëtu'un kyujajtëpë?
3Ënet ja Jesús y'ëtsoowëtë:
Ni kyë'ëmpoky ets ni tyaak tyeety jëtu'un yë pyoky tkakujajtëyë. Yë'ëkyëjxm jëtu'un yajpaaty ets yaj'ix yajnijawëty pën mëpaat Dios myäyë yajtso'okëtëty. 4Ma tyam jyaakxënyëmëty, kopkpëky ko ntu'unmëty ja tyuunk mëti'ipës të xykexyën. Miimp ja kootsajtën ma ka'ap t'ëkjëkyäpnëtyën ets pën tyunëty. 5Maas njaakyajpaatynyëm naaxwiiny, ëjts jëtu'un ijtp ijxtëm ja kutë'kxnën.
6Ko jëtu'un ojts y'ënä'äny ënät ojts nyajtstsujë naaxkëjxy ets ja mo'onts wäänë tyaj'o'ky ets ja wiints tukwinkuja'axëy. 7Tä t'ënëmaay:
Nëjkx jam mwinpujy ma ja Siloé nëëjën. Jä'ä nyiwijy Kexyye'epyë.
Tääts ja wiints ojts nyijkx winpujpë. Ko wyiinpujtaay, ënätyë y'ijxë'ky. 8Ja myëjëën myëtëjk ets mëti'ipë ënety të t'ixtën ko t'amëtoy ja ayajk ako'onën, jä'ä näyajtëëwëtë:
¿Këtiijën yë'ëjëty ya'atë ja'ay mëti'ipë ijty ja ayajk ako'onën y'amëtoopyënë?
9Jënaakën y'ëna'antë:
Jä'ä yë'ë.
Wiinkpë y'ëna'antë:
Ka'ap jyä'äjëty, oy jëtu'un jyakëxë'ëky.
E yë'ë jëtu'un kë'ëm y'ënä'äny:
Ëjts jëtu'un.
10Ënet tyajtëëwtë:
¿Wi'ix tyam m'ijxnë?
11Ets ja ja'ay wiintspë y'ëtsoowëtë:
Ja ye'etyëjk mëti'ipë Jesús'ajtpën, yë'ëjës mo'onts të xytyukwinkupëkë, je'eyë wäänë të tyaj'ooky mëët yë tsyujy ets nwiinës të tukkuutsy ets të xynyëëmës: Nëjkx mwinpujy ma ja Siloé nëëjën. Jamës të nnëjkxy ets koos të nwinpujta'ay, täätsës të n'ijxë'ëky.
12Ënet yajtëëwëtë:
¿Maatsën tääpë ja'ay ënät?
Ets yë'ë y'ëtsooy:
Ka'apës nijawë.
Ko ja fariseë ja'ayëty tyajtëwtë wi'ix ojts tsyo'okyën mëti'ipë ijty wiintsën
13Po'kxënxëëw ënety ko ja Jesús ojts tyaj'ooky wäänë ja mo'onts ets ja ja'ay wiintspë tyaj'ijxë'ky. 14Paaty ojts twoownëjkxtë ja ye'etyëjk mëti'ipë ijty wiintsën ma ja fariseë ja'ayëtyën, 15ets ja fariseë ja'ayëty tyajtëëwtë wi'ix ënety të y'ijxë'ëky ets y'ëtsoowëtë:
Mo'ontsës të xytyukwinjaaxë, täätsës të nwinpujy etsës të n'ijxë'ëky.
16Ënet jënaakën ja fariseë ja'ayëty y'ënantë:
Ja ja'ay mëti'ipë ya'atë tyuunpyën ka'ap yë'ëjëty Dios yajtunyë, jä'ä ko ka'ap yë po'kxënxëëw t'ëmaay'äty.
Ets ja wiinkpë y'ënantë:
¿Wi'ix jëtää mëj'ajtën tunëty pën pokyjyä'äy?
Tääts ojts nyäpyëjkwa'kxëtë xim yam. 17Ënet ojts jatëkok tyajtëëwkojnëtëpë mëti'ipë ënety wiints të yajpaatyën:
E mijts, ¿wi'ix m'ëna'any, pën yë'ë mëti'ipë të myaj'ijxë'ëkyën?
Ets ja ye'etyëjk y'ënäny:
Jëtu'unës n'ëna'any ko Dios yë kyäjpxynyajxpë.
18E ja jutiis ja'ayëty ka'ap ojts tmëpëktë ko ja ye'etyëjk ijty wyiintsëty ets ko të y'ijxë'ëky. Ënätnëm tmëpëjktë ko ja tyaak tyeety ojts twowtë, 19ets tyajtëwtë:
¿Mijts ya'atë mmaankë? ¿Wiints yë'ë ojts jyänty myëxu'unk'atyë? ¿Wi'ix tyam y'ijxnë?
20Ënet ja u'unktaak u'unkteety y'ëtsoowtë:
Nnija'awëtëpës ya'atë n'u'unk ko wiints ojts myëxu'unk'aty. 21Ni ëëts nkanijawëtë wi'ix tëy tyam y'ijxnë ets ni ëëts nkanijawëtë pën të yaj'ijxë'ëkyë. Yajtëwtë yë'ë kë'ëm. Mëj ëna'k yë'ënë. Wä'än kë'ëm nikäjpxy.
22Jëtu'un ja tyaak tyeety ojts y'ëna'antë jä'ä ko tsyë'ëkëtë, tëë ënety ja jutiis ja'ayëty tkäjpxy'atë ko ka'ap tkupëka'antë jap tsajptëkoty tu'kë'ëyë mëti'ipë ënantëpën ko Jesús yë'ë Kristë. 23Paaty ja tyaak tyeety y'ënantë: Yajtëwtë kë'ëm. Mëj ëna'k yë'ënë. Wä'än kë'ëm nikäjpxy.
24Ojts ja jutiis ja'ayëty jatëkok twowtë ja mëti'ipë ënety wiints të y'ityën ets t'ënëmaaytyë:
Tuk'ëwa'anëtëkës ja tëyajtën ma Tiosën, ëëtsëty nija'awëtëp ko ya'atë ja'ay pokyjyä'äy yë'ë.
25Ënet ja ye'etyëjk y'ëtsooy:
Ëjts, ka'apës nijawë pën pokyjyä'äy ëkë kapokyjyä'äy, yi'iyës nija'ap ko wiintsës të n'ity e ijxnëpës tyamnë.
26Ets ojts tyajtëëwkojnëtëpë:
¿Wi'ix mtuunë, wi'ix ojts myaj'ijxë'ëkyë?
27Ets ja ye'etyëjk y'ëtsooy:
Tëë miits njatuk'ëwaanëtë ets ka'ap xymyëpëktë. ¿Tii ko xyajtëwtë etsës nnikajpxwinpit nikajpx'atëjëty? ¿Yë'ë ko jëtää miits näjyëtu'un xypyanëjkxa'antë?
28Tääts ojts t'ojtë mëti'ipë ijty wiintsën:
Jä'ä ko mijts ya'atë ja'ay mpanëjkxyp; e ëëtsëty Moisés npanëjkxtëpës. 29Nnija'awëptëpës ko Dios ojts myëkäjpxyë ja Moisés; e tääpë ja'ay ka'apës nijawëtë maa tsyoony.
30Ënet y'ëtsooy mëti'ipë ënety wiints të y'ityën:
Ka'apës nja'akyukë ko jëtu'un m'ëna'antë, ko miits ka'ap xynyijawëtë maa tsyoonyën e ëjts nija'apës ko yë'ëjës të xyaj'ijxë'ëky. 31Wa'ats ëëts nnija'awëmë ko yë Dios ka'ap tmëtoow'ity yë pokyjyä'äy, yë'ë y'amëtoow'ijtyp mëti'ipë wintsë'këyëpën ets mëti'ipë tyuuntëpën mëti'ipë yë'ë tsyojkpyën. 32Nimaa kyayajmëtoy'äty ja'ay y'ijxë'ëky mëti'ipë tëë myëxu'unk'atyën wiints. 33Ko jeexyë ya'atë ye'etyëjk kyatsoony ma Tiosën, ka'ap jeexyë tjëkyepy tii tunëty.
34Ënet t'ënëmaaytyë:
Mijts pokyjoty të mëxu'unk'aty, ¿ka'ap tjëkyepy xyaj'ijxpëktëtyës?
Ets t'ixkäjxtë jap tsajptëkoty.
Pën jëtu'un yajpatp ijxtëm ja ja'ay wiintspën
35Ojts ja Jesús tnijawë ko ënety ja wiints të t'ixkäxtë jap tsajptëkoty; ko tpaty, ënät tyajtëëy:
¿Mmëpëjkpy mijts ja naaxwiinyëtë ja'ay ja y'U'unkë?
36Tääts y'ëtsooy mëti'ipë ënety wiints të y'ityën:
Wintsën, tuk'ëwa'anëkës pën yë'ë etsës nmëpëkëty.
37Ënet ja Jesús y'ëtsoowë:
Tëë tyam xy'ixy. Ëjts jëtu'un mëti'ipë mmëmëtyakëpën.
38Ënet ja ye'etyëjk y'ënëmaayë:
Wintsën, nmëpëjkpy mijts.
39Tääts ja Jesús y'ënëmaayë:
Yë'ëjës të niminy naaxwiinyëtë etsës ja ja'ay mëtëy nipaye'eyëty; nyaj'ijxpëka'anyës mëti'ipë wiintsën ets nyajwiintsëja'anyës mëti'ipë ijxtëpën.
40Ko jëtu'un tmëtoowtë; jënaakën ja fariseë ja'ayëty mëti'ipë ënety japëtyën tyajtëëwtë ja Jesús:
¿Wä'än jëtää ëëts näjyëtu'un nwiints'atë?
41Ets ja Jesús y'ëtsooy:
Ko jeexyë miits mwiints'atë, ka'ap jeexyë miits myajpoky'ixtë. Yë'ë ko m'ëna'antë ko m'ixtë paaty myajpoky'ixtë.
Currently Selected:
Juan 9: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
