Juan 21

Ko ja Jesús nyänyikëxë'ëkyë ma niwëxtujkpë yajpaatën ja y'ijxpëjkpëtëjk

1Ko jëtu'un tyuuntaay jyajtaayë, ënät ja Jesús ojts jatëkok nyänyikëxë'ëkyë ma ja y'ijxpëjkpëtëjkën jam Tiberias mejypyë'am. Jëtu'un ojts tyunyë jyätyë: 2Tam ënety ja Simón Pedro mëët ja Tomás mëti'ipë yajtijpën xeeny u'unk ets ja Natanael mëti'ipë kukajpn'ajtpën Caná, Galilea y'itjotm. Näy tam ja Zebedeo myaank ets nimäjtskpë ja Jesús ja y'ijxpëjkpë. 3Ënet ja Simón Pedro y'ënëmaayëtë:

Ajkxmajtspës nnëjkxytë.

Ets y'ëtsoowtë:

Oy nja'amëty.

Ënet ojts nyëjkxtë ets tu'uk ja kepy nëëwinye'epyë tuktëjkëtyë ets ojts nyëjkxtë. Jä'ä koots nitu'uk ja ajkx tkamajtstë. 4Ko xyiinytyaknë, tam ja Jesús ënety tyänë mejypyë'am, je'eyëp ko ja y'ijxpëjkpëtëjk ka'ap tnijawëtë ko jyä'äjëty. 5Ënet ja Jesús yajtëëwëtë:

Mexyëty, ¿ka'ap tii ajkx të xymyatstë?

Ets y'ëtsoowtë:

Ka'ap tii.

6Tääts ja Jesús y'ënëmaayëtë:

Nëëkujëpiptë yë mtsaay aka'anytsyow ets may nëë jëyujk xymyatstëty.

Ënet nëëkujëpijptë ja tsyääyëty, may ja ajkx tmajtstë, ka'ap y'ëkmaayënëtë tjuutëty, jä'ä ko nëkooyë ja nëë jëyujk myäy'ajnë 7Ja ijxpëjkpë mëti'ipë Jesús ni'ik tyimtsojkpyën, jä'ä ojts t'ënëëmë ja Pedro:

Wintsën yë'ë.

Je'eyë ja Simón Pedro ojts tnamëtoy ko jyä'äjëty ja Wintsën, ënät ja wyit tuktëjkëy, jä'ä ko tëë ënety ja wyit tjeny ko të nyëëtëkë. 8Ets ja wiinkpë ja y'ijxpëjkpëtëjk jyajtë jam mejypyë'am yë'ë pyajëtujtëp ja tsaay ujts mëët ja ajkx, ja nëëpë'aaypyë jä'ä tmëjëkämëty mëko'px metrën. 9Ko jyajtë jam nëëpë'am ënät t'ijxpatë ko tam ja jëën tyoy, ets ma ja jëënkopkën ajkx jam jëëntëtsp ets tsajpkääky jam këëp. 10Ënet y'ënëmaayëtë ja Jesús:

Yajmintë ajkx mëti'ipë të xymyatstën.

11Tääts ja Simón Pedro tyëjkëy kepy nëëwinye'epyëjoty ets twijtspëtsëëmy ja tsaay ujts mëët ja ajkx mëjëtypë. Mëko'px ja wëxtyikxy majktëkëëk ja ajkx y'ijty; ets oy ja ajkx jënu'un jyamayëty, kä'äp ojts ja tsaay kyiitsy. 12Ets ja Jesús y'ënëmaayëtë:

Min m'ajop'atë.

Ni pën ojts tkayajtëwtë pën jä'ä, jä'ä ko nyija'awëtëp ko yë'ëjëty ja Jesús. 13Ënet ja Jesús myëwinkoonëtë ets ja tsajpkääky tkoonë'ky ets myooyëtë mëët ja ajkx.

14Mëtëkëëk'ok ënety ja Jesús nyänyikëxë'ëkyë ma ja y'ijxpëjkpëtëjkën maju'unëm jyuukpyikyën.

Ko Jesús mëët ja Simón Pedro myëtyä'äky

15Ko y'ajop'ajtaaytyë ets ja Jesús tyajtëëy ja Simón Pedro:

Simón, Juan yë myaank, ¿Xytsyojkpës mijts wäänë ni'ikë këtiinëm ya'atëtyë?

Ets ja Pedro y'ëtsooy:

Ntsojkpy mijts, Wintsën, mnija'ap mijts ko ntsoky.

Ets ja Jesús y'ënëmaayë:

Këwent'ajtëkës yë nkupixyny.

16Ets ojts jatëkok yajtëëwkojënëpë:

Simón, Juan yë myaank, ¿Xytsyojkpës mijts wäänëni'ik këtiinëm ya'atëtyë?

Ets ja Pedro y'ëtsooy:

Ntsojkpy mijts, Wintsën, mnija'ap mijts ko ntsoky.

Ets ja Jesús y'ënëmaayë:

Këwent'ajtëkës yë nkupixyny.

17E mëtëkëëk ok yajtëëwkojënëpë:

Simón, Juan yë myaank, ¿xytsyojkpësë?

Ets ja Pedro jyotmaytyëjkëy ko mëtëkëëk ok yajtëyë pën tsyojkpy ets t'ëtsooy:

Wintsën, mnija'ap mijts tu'kë'ëyë winë, mnija'ap mijts ko ntsoky.

Ets ja Jesús y'ënëmaayë:

Këwent'ajtëkës yë nkupixyny. 18Tëy mijts t'ënëëmë, ko ijty m'ëna'k'aty, kë'ëm ijty mnäxyoxyë ko muum mnëjkxa'any; e ko nëjkx mmëjja'ayënë mxajwa'kxëp yë mkë'ë ets wiinkpë mxoxëtëty ets myajnëjkxëtëty ma ka'ap xytsyokyën.

19Ko jëtu'un y'ënäny, ja Jesús yë'ë ojts tijy wi'ix ënety ja Pedro y'ooka'anyën ets tyajknikëxë'ëkëty ja Dios ja myëj'ajt y'oyajtën. Ënet ja Jesús y'ënëmaayë:

Pamiinkës.

Ijxpëjkpë mëti'ipë Jesús ni'ik tsyojkpyën

20Ko ja Pedro y'ijxwinpijty ets t'ijxy ko ja ijxpëjkpë ix'ok myiny mëti'ipë ja Jesús mëk tsyojkpyën, mëti'ipë ënety të tyajtëyën ja Jesús ma jam y'a'ux'atën: Wintsën, ¿pën mkë'ëyakanëp? 21Ko ja Pedro t'ijxy ets tyajtëëy ja Jesús:

Wintsën e yë'ë, ¿wi'ix jyata'any?

22Ënet ja Jesús y'ëtsoowë:

Pën ntsojkpyës ets jyuuky'atëty jääpaat maajës ënety nwinpityën, ¿ka'ap kyopkpëkyëty ets mijts xynyijawëty? mijts pamiinkës.

23Ets ja ayuk ojts ye'eywyä'kxy ma ja mëpëjkpëtëjkën ko ya'atë ijxpëjkpë ka'ap ënety y'ooka'any. E ja Jesús ka'ap ënety jëtu'un të y'ënä'äny ko ka'ap y'ooka'any: Jä'ä ënety të y'ënä'äny: Pën ntsojkpyës ets jyuuky'atëty jääpaat maajës ënety nwinpityën, ¿ka'ap kyopkpëkyëty ets mijts xynyijawëty?

24Ya'atë jëtu'un ja ijxpëjkpë mëti'ipë yam winë nyimëtyäkpyën, ets yë'ë të tkuja'ay. Ets nija'awëm ko tyiyëty mëti'ipë nyimëtyäkpyën.

25May ja Jesús ojts winë tjaaktuny mëti'ipë ka'ap kyëxja'ayëtyën ma ya'atë nokyën. Ko jeexyë të yajkujaaytyä'äy, ni kyanipaatë jeexyë ja naaxwiinyëtë mëët ja maynyoky mëti'ipë yajjääpyën.

Currently Selected:

Juan 21: QUETZMIXE

Highlight

Copy