Juan 11
11
Ko ja Lázaro y'ooky
1Tää ijty tëëyëp tu'uk ja pa'amja'ay mëti'ipë xyëëwajtypyën Lázaro, Betania kyukajpnëty, ma ja Maria kyukajpnëtyën ets ja myëkä'äx Marta. 2Ja Maria, Lázaro myëkä'äx, nän yë'ë ojts ja pa'akxu'kpë nëë tukjaaxy ja Wintsën ets ja wyääy ojts tukyajtë'ëtsy. 3Ënet ja Lázaro ja myëkä'äx nimäjtsk ojts tnikäxëtë ja Jesús:
Wintsën, pëjkëp ja mmëku'uk mëti'ipë ni'ik mtsojkpyën.
4Ko ja Jesús jëtu'un tmëtooy ets y'ënäny:
Ka'ap ya'atë pa'am yaj'ooky, jä'ä yë'ë ets nyikëxë'ëkëty ja myëj'ajtën y'oyajtën ja Dios ets ja Dios U'unk.
5Oy ënety ja Jesús ni'ik tjatsoky ja Marta mëët ja myëkä'äxtëjk Maria ets Lázaro, 6ko yajnëmaay ko ja Lázaro ënety pyikyë, mäjtsk xëëw ojts jyaak timwyi'imy ma ënety jam y'ityën. 7Ënet y'ënëmaayëtë ja y'ijxpëjkpëtëjk:
Oy jatëkok nja'amëty jam Judea.
8Ja y'ijxpëjkpëtëjk jëtu'un y'ënëmaayë:
Wintsën, tyaa naamnëm yë Judá ja'ayëty mjakuka'atsa'anëtë, ¿ets jam jatëkok mnëjkxankojnëpë?
9Tääts ja Jesús y'ëtsooy:
¿Këtii majkmäjtsk horë tu'ukpë ja xëëw tmëëtëtyë? Ko ja ja'ay ye'ey xëëny ka'ap kyunäpë, jä'ä ko y'ijxyp ja kutë'kxn mëti'ipë yaa naaxwiinyëtën, 10e pën akoots tu'u ja'ay ye'epy, kunajpëp jä'ä ko ka'ap ja kutë'kxn tmëëtëty.
11Ënet ja Jesús jyaak'ënany:
Tëë myaanaxy ja nmëku'ukës Lázaro, tyamës nyuxa'any.
12Ënet ja y'ijxpëjkpëtëjk y'ënëmaayëtë:
Wintsën, pën tëë myaanaxy, jëtu'un yajja'akyukë ko wijaanp yë'ë.
13E ja Jesús, yë'ë ja jyatijpy ko tëë ënety ja Lázaro y'ooky, e ja y'ijxpëjkpëtëjk jä'ä tja'akyukëtë yë'ë yowë tyijpy ja tsuu ma'ay. 14Ënet ja Jesús ojts mëtëy myëkajpxëtë:
Tëë ja Lázaro y'ooky. 15Jotkujkës näjyawëty ko ka'apës jam të nyajpaaty, ets näjyëtu'un miits xytyuk'oy'ata'antë ets xymyëpëktëty. Ja'amtë n'ëk'ijxëmë.
16Ënet ja Tomás, tu'uk ja Jesús ja y'ijxpëjkpë mëti'ipë yajtijpën Xeeny U'unk, yë'ë ojts t'ënëëmë ja myë'ijxpëjkpëtëjk:
Ja'amtë ëëtsajtëm näjyëtu'un ets yë'ë mëët n'o'kmëty.
Jesús yajjuukpyëjkpë ets yë'ë yajjuuky'ajtpë
17Ko ja Jesús jyä'äjty jam Betania, tëë ënety ja Lázaro myajktaxk xëëwpäjnë ma nyaaxtëkën. 18Winkon ja Betania kajpn wyi'im mëët ja Jerusalén kajpn, jawäänë kyatu'k horë ye'eyëty, 19ets may ja jutiis ja'ayëty ënety të tninëjkxtë ja Marta ets Maria ets tjotmëkwinkajpxëtë ko ja myëkä'äx Lázaro të y'ooky. 20Ko ja Marta tnija'awëy ko tëë ja Jesús jyä'ty ënät tsyo'ony ets tjëjpye'eyë'ëka'any; e ja Maria yë'ë ojts jam wyi'im tëjkwintum. 21Tääts ja Marta t'ënëmaay ja Jesús:
Wintsën, ko jeexyë yaa të myajpaaty, ka'ap jeexyë yë n'ayës të y'ooky. 22E nija'apës ko mmo'ojanëp ja Dios tii m'amëtoopyën.
23Ënet ja Jesús y'ëtsoowë:
Juukpyëkaanp yë m'ay jatëkok.
24Ënet ja Marta y'ënëmaayë:
Nija'apës ko jyuukpyëka'antë ja o'kpë jä'ä xëëw ma ja ja'ay ënety yajpaye'eytyën.
25Ënet ja Jesús y'ënëmaayë:
Ëjts yajjuukpyëjkpë, ëjts nyäjkpy ja juukyajtën. Pën ëjts xymyëpëjkp, oy jya'ooky, juukpyëkaanp jatëkok; 26e ni'ëmukë mëti'ipë jaakjuuky'ajtëpën ets xymyëpëktës, nijëna'a kya'ooka'antë. ¿Mmëpëjkpy mijts ya'atë?
27Ënet ja Marta y'ëtsooy:
Jëtu'un Wintsën, nmëpëjkpyës ko mijts mKristë, Dios U'unk, mëti'ipë ënety minaanpën.
Ko ja Jesús yä'äxy ma ja Lázaro ojts nyaaxtëkën
28Ko ja Marta jëtu'un y'ënäny ënät ja myëkä'äxtëjk Maria ojts twoy ets t'ënëmaay ame'tsyë:
Tää ja yaj'ijxpëjkpë yaa yajpaaty tap mëkäjpxyë.
29Wi'ix ja Maria jëtu'un tmëtooy, ënätyë tsyo'ony ets ojts ninëjkxy ja Jesús. 30Jesús ka'anëm ënety tyëkë kajpnjoty, tamnëm ënety yajpaaty ma ja Marta jyëjpye'eytsyoowën. 31Ja jutiis ja'ayëty mëti'ipë ënety jyämyëët'ajtëpën ja Maria jam ma tyëjkën, ko t'ijxtë ko ja Maria pyëti'ky ets pëyi'ikyë tsyo'ony ënät tpatso'ontë jä'ä ko jëtu'un myäytyë tyajtë ko ja Maria jam nyijkx ma ja o'kpë të nyaaxtëkën ets jam tniya'axa'any.
32Ko ja Maria jyä'äjty ma ja Jesús ënety jamën ojts twinkujxtänë ets t'ënëmaay:
Wintsën, ko jeexyë mijts yaa të myajpaaty, ka'ap jeexyë yë n'ayës të y'ooky.
33Ko ja Jesús t'ijxy ko ja Maria yä'äxy mëët ja jutiis ja'ayëty mëti'ipë ënety mëët të myinyën ënät ja Jesús ojts y'amutskë, 34ets tyajtëëy:
¿Ma ojts xyajnaaxtëkëtë?
Ets y'ënëmaayëtë:
Min ix, Wintsën.
35Ënet ja Jesús yäxy. 36Tä ja jutiis ja'ayëty y'ënantë:
Ixtë, tsyojkpy ijty mëk.
37Jënaakën ojts y'ëna'antë:
Ya'atë, ojts tyaj'ijxë'ëky ja wiints, ¿ka'ap jëtää jeexyë tii të tuny ets Lázaro jeexyë ka'ap të y'ookyë?
Ko ja Lázaro jyuukpyiky
38Jesús, mëët ja monyëtukyë, ojts jatëkok nyijkx ma ja o'kpë ënety të nyaaxtëkën. Ja o'kpë jut, aank y'ijty ets tsaa y'akë'ë'ajtyp. 39Ets ja Jesús y'ënäny:
Jëkë'ëtë yë tsaa.
Ënet ja Marta, mëti'ipë ja o'kpë myëkä'äx'ajtypyën, ojts y'ënë'ëmxëty:
Wintsën, tokxu'knëp yë'ënë, jä'ä ko tëë myajktaxk xëëwpäjnë ma nyaaxtëjkënën.
40Ënet ja Jesús y'ëtsoowë:
¿Këtii të t'ënëëmë ko xymyëpëkëtyës, m'ixëp ja Dios ja myëj'ajt y'oy'ajtënë?
41Ënet ja tsaa tjëkëëytyë ets ja Jesús pya'at'ijxy tsajpwinm ets y'ënäny:
Dios Teety, mijts nkukajpxëp, jä'ä ko tëëjës ja n'ayuk xymyëtoowë. 42Nija'apës ko xëmë mijts xy'amëtoow'ityës ets yë'ëjës xyaj'ënaanp ets ya'atë ja'ay oyajtën tpaatëty mëti'ipë tyam yaajëtyën ets tmëpëktëty ko mijts të xykyexyës.
43Ko jëtu'un kyajpxtaay ënät mëk y'ënäny:
Lázaro, pëtsëm jap.
44Tä ja o'kpë pyëtsiimy winmotsy winpity, wit winjuuxy. Ënet ja Jesús t'ënëmaay ja ja'ayëty:
Kë'ëkäjtë tekyäjtë ets ëxmatstë, wä'än nëjkxy.
Ko ja ja'ay tkäjpxy'atë ets ja Jesús tyaj'ooka'antë
45Paaty ja jutiis ja'ay ojts may tmëpëktë ja Jesús mëti'ipë ja Maria ojts tjämyëët'atën jä'ä ko t'ijxtë mëti'ipë ja Jesús tyuunën. 46Je'eyëp ko jënaakën ojts nyëjkxtë ets tukmëmëtyaktë ja fariseë ja'ayëty mëti'ipë ënety ja Jesús të tunyën. 47Ënet ja fariseë ja'ayëty ets ja teety wintsëntëjk tyajnämyujkëtë ja tsajptëkotyëtë yajjuntë'ajtpë ets y'ënantë:
¿Tii ënät ntu'unmëp? May ya'atë ye'etyëjk tuun'ëtë'ëtsy ja mëj'ajtën. 48Ko n'ëxmajtsmëty ets jëtu'un tjaaktunëty, ni'ëmukë ënät yë ja'ay myëpëkëtëty ets myina'antëty ja Romë ja'ayëty ets tjitëty yë nmëj tsajptëjk'ajtëmë ets xypyëjkëmëty yë nnaax'ajt nkajpn'ajtëmë.
49E tam ënety tu'uk ja ja'ay mëti'ipë xyëëwajtypyën Caifás, teety wintsën ënety y'ity tääpë jëmëjt, yë'ë ojts y'ënä'äny:
Ka'ap miits xynyijawëtë, 50ni xykyanijawëtë ko nik ntuk'oy'ajtmëp ëëtsajtëm ko tu'uk ja ja'ay tku'ookëty yë nnaax'ajt nkajpn'ajtëmë këtiinëm ko yë naax kajpn kyutëkoyëty.
51Ka'ap ja Caifás ojts kyë'ëm winma'anyëty tkäjpxy, jä'ä ko yë'ë ënety teety wintsën'ajtp tääpë jëmëjt, Dios ojts jëtu'un yajkäjpxyë ko ja Jesús tku'ookëty ja jutiis ja'ayëty; 52ets ka'ap yi'iyëty, näjyëtu'un ets tyajnämyukëtëty tu'kë'ëyë ja Dios ja y'u'unk y'ëna'k mëti'ipë ënety të ye'eywya'kxtën naaxwiinyëtë apëtsëmy. 53Jä'ä xëëw ja kutuunktëjk ojts tkäjpxy'atë ets ja Jesús tyaj'ooka'antë.
54Paaty ja Jesús ka'ap nikëxë'ëky y'ëkjëtijnë ma ja jutiistëjkën, jam ojts nyijkx ma ja itën wiinkonpë, të'ëts'itjotmëpë, ma ja kajpn txëëwatyën Efraín. Jamts ojts wyi'im mëët ja y'ijxpëjkpëtëjk:
55Ja ëmaayxyëëw ënety wiinkoonëp mëti'ipë ja jutiis ja'ayëty myëjja'awëtëpën ets may ja kajpn ja'ay ojts nyëjkxtë jam Jerusalén, ijxtëm tuntën ets tpatë ja wa'atsajtën naamka'anëm tpaaty ja ëmaayxyëëw. 56Ja ja'ayëty yë'ë ënety oy y'ixtaaytyëp ja Jesús ets nyäyajtëwëtë nixim niyam ma ja mëjtsajptëjkën:
¿Wi'ix miits m'ëna'antë? ¿Minaanp jëtää xëëwotyë ëkë ka'apë?
57Ja fariseë ja'ayëty ets ja teety wintsënëty tëë ënety tni'ënä'ämëtë ko pën tnijawëty maa ja Jesús, ënätyë tnikajpxëty ets yajmatsëty.
Currently Selected:
Juan 11: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
