Génesis 27

Kyënu'kxën yë Isaac ma Jacob ets Esaú

1Yë Isaac tëë ënety myëjja'ayënë ets ka'ap y'ëk'ijxnë, paaty ojts tëkok tmëkäjpxy ja myaank mëti'ipë kä'äxkopkën, ja Esaú ets t'ënëmaay:

U'unk maay.

Tä y'ënäny yë Esaú:

Wi'ix tatë.

2Ënet y'ënäny ja Jacob: Mijts m'ijxyp mnija'ap ko tëëjës nmëjja'ayënë ets wä'än ajotkumonë n'o'knëty. 3-4Paaty yam n'amëtoy npëjktsoy ets nëjkx m'ëk jëtity kamjotm tu'ujotm, mpapëkëp yë mti'pxn mëti'ipë aayjëyujk ujtsjëyujk mtukmajtsypyën, tääts xymyëja'tëty ets xyaj'oyëty yë tojkx, wä'änës n'ëkkäy n'ëk'uuky. Tääts ënät ok nkënu'kxëty maas naamka'anëm n'ookynyëmën.

5E yë Rebeca tap ënety tmëtoow'ity tu'kë'ëyë, wi'ix ja Isaac myëtyä'äkyën mëët ja myaank Esaú. Paaty ko ja Esaú ojts nyijkxy tsu'utsy ixtääpyë kamjotm tu'ujotm. 6Ënet ja Rebeca ënätyë t'ënëmaay ja y'u'unk ja mutskpë, mëti'ipë xyëëwajtypyën Jacob:

Ëk'ix mijts Jacob, tëëjës wa'ats tmëtoy ko ja mteety të myëtyä'äky mëët yë m'ajty Esaú ets të t'ënëëmë: 7Nëjkx ixta'a tu'uk yë jëyujk ets xy'oytyunëty tu'uk yë tojkx, täätsës nkayëty n'uukëty. E ok ënät nmo'ojëty ja nkënu'kxënës mëët yë Wintsën yë xyëëw yë'ë wyintuuy, maas ka'anëm n'ookynyëmën. 8E paaty tyam, mijts u'unk mëtoow'it mëti'ipë yam ntuk'ënëëmëjäämpyën: 9Nëjkx ma jap yë tsajppax kupixyny tyänëtën ku'ëkemy ets yajmin mäjtsk yë tsyajppax. Wä'änës n'oytyuunë yë mteety yë tyojkx, mëti'ipë oy tyimtsojkën'ajtypyën. 10Koos nyaj'o'oyëtya'ajëty tääts xymyënëjkxëty ja kyä'äyën y'ukën ets kyäyëty. Jëtu'unts mijts myajmo'ojëty ja kënu'kxën, ma ënety ka'anëm y'ookynyëmën.

11Ënet ja Jacob ja tyaak t'ënëmaay:

Nanë yë n'ajtyës Esaú ni'u'kxy yë'ë, e ëjts ka'apës ni'u'kxyëty. 12Wi'ix m'ëna'ana'any, koos yë nteety xykyë'ënixajëty ets tjawëty ko ka'apës n'Esaujëty. Yë'ë jëtu'un myäyä'äny tyajja'any koos nëxi'ik ntukxi'iky, tääjës je'eyë xy'ëkjaakpojknëty jëtu'un ijxtëm jeexyë xkyënu'kxyënës.

13Tä ja tyaak y'ëtsooy:

U'unk pën npojkëp, ëjts nkëpätëp mijts yi'iyë patun ijxtëm n'ënëëmën, nëjkx yajtso'onkoj mäjtsk yë tsajppax.

14Ënet ja Jacob ojts tyajtsoony mäjtsk ja tsajppax ets tuknimiiny ja tyaak. Ënet ja tyaak tyaj'o'oyëy ja tojkx janty xu'kx jëtu'un ijxtëm ënety ja Isaac oy tsokyën. 15Tä tju'ty ja Esaú ja wyit mëti'ipë oyën, mëti'ipë ënety jap pëjkë'ëky yaj'ijtëpën ma ja tyëjkëtyën, tääts tukxojxy jä'ä ja Jacob ja mutskpë ja myaank. 16Ënet tukniye'py ja myaank yë tsajppax ak ma ja kyë'ëjën ets ma ja nyas'uunën, ma ënety ja Jacob ka'ap ja u'kxyajtën tmëëtëtyën, 17ets tmooy ja tojkx ets ja tsajpkääky mëti'ipë ënety të tyaj'apaatën.

18Tää ja Jacob tyëjkëy ma ënety jap ja tyeetyën ets t'ënëmaay:

Tatë.

Tä ja Isaac y'ëtsooy:

¿Wi'ix, tyaajës jä'ä, mpën u'unkës jëtu'un mijts?

19Ëjts Esaú'ajtp ja kä'äxkopk: jëtu'un y'ëtsooy ja Jacob. Tatë pëtë'ëk, tun yë mëyajtën, ëk'u'unyë, tää mkay m'uukëty, tëëjës ojts ja tuka'any n'ixta'ay ets ënät xymyo'ojëtyës ja mkënu'kxën.

20Tää ja Isaac tyajtëëy: ¿u'unk wi'ix tëy poj'am të xytyimpatnë ja tuka'any?

Ets ja Jacob y'ëtsooy: Yë mWintsën Dios, yë'ëjës të xypyutëkë etsës tsojk'am të npaaty.

21Ënet ja Isaac t'ënëmaay:

Nimiinkës winkon, wä'än n'ëktonyës, pën janty mijtsëtën mEsau'ajtp.

22Ënet ja Jacob ja tyeety twinkuwa'këy ets kyë'ënitona'anyë. Tää ja Isaac y'ënäny: Ja aaw yo'kn jëtu'unës nmëtoy tä Jacob, e ja kë'ë aaw jëtu'un tä Esaujën. 23Paaty ja Isaac ka'ap tnija'awëy, pën jëtu'un ënety, ko janty ni'u'kxy toony ja Jacob jëtu'un ijxtëm ënety ja y'äjtyën Esaú. E tam ënety ja Jacob tmo'ojanë ja Isaac ja kënu'kxën, 24Ko jatëkok tyajtëëy:

¿Janty tëytyëm m'ëna'any ko mijts mEsaujëtyë?

Ets ja Jacob y'ëtsooy: Jëtu'un tëyës n'ëna'any koos nEsaujëty.

25Ënet ja tyeety y'ënëmaayë:

Mooykyës yë nka'ayën n'ukën, u'unk maay, wä'änës n'ëktukkay n'ëktuk'uuky mëti'ipë ojts të xy'ixta'ayën. E koos nkaaytya'ajëty täänëm nkënu'kxëty.

Ënet ja Jacob ja tyeety tyajkaay tyaj'uky, jëtu'un'äämpy ojts yë Isaac jyänty kyäy jyänty y'uuky. 26Ko kyääytyääy y'uktaay tää t'ënëmaay ja myaank Jacob:

Min winkon etsës xytsyu'kxëty.

27Ko ja Jacob tmëwinkoony ja tyeety ets tsu'kxa'any. Ënet ja Isaac ojts xyuuk'ajtxëty ja wyit, tä ojts kyënu'kxyë mëët ya'atë ja aaw ayuk:

Pën ya'atë mëti'ipës nxuukajtypyën n'u'unkës yë jyä'ä.

Jëtu'un yë'ë ijxtëm xyuuktën yë aaypyijy ujts pëjy

kamjotm tu'ujotm mëti'ipë, Dios kyënu'kxypyën

jyëkyejpyën.

28Dios mo'ojëtëp ja nëë tuu tsajpjotmëpë tsyoonyën,

ets mnëë mmok may xyajpëtë'ëktëty,

mëti'ipë mkayëp m'uukëpën.

29May ja ja'ay mëtunëtëty ets mwinkoxtänëtëty ja naax ja kajpn

mijts mwintuuy.

Mijts mniwintsën'atëp ja mjëëky mmëku'uk,

ets näjyëtu'un mwinkoxtänëtëty.

Pën mpojkëp, poky näjyëtu'un wyë'ëmëty;

e pën mkënu'kxëp,

kënu'kxy näjyëtu'un wyë'ëmëty.

30Të ënety yë Isaac tnakënu'kxtaaynyë yë Jacob ets tap ënety tyimpëtsëmy yë Jacob ma jap ja tyeetyën ko ja Esaú jyä'äjty, tsu'utsy ixtääpyë ënety të y'otsy. 31Ënet ojts ënätyë timnyanipëjktaakë ja ka'ayën ukën xu'kxpë, ko tyaj'apatëtyääy tä ojts tukninëjkxy ja tyeety ets t'ënëmaay:

Tatë ëkpëtë'ëk ets m'ëk kay m'ëk uukëty, tëëjës nyaj'oyë, mëti'ipës ojts të n'ixta'ayën, etsës xymyo'ojëty ja mkënu'kxën.

32Ënet ja Isaac tyajtëëy:

¿Pën jëtu'un mijts?

Ëjts yë Esaú yë m'u'unk yë mëjpë: jëtu'un y'ëtsooy yë Esaú.

33Ënet ja Isaac ojts jëtu'unyë kyumon kyutukë ets natsë'ëkëmëët y'ënäny:

¿Pën ojts të tsyu'utsy'ixta'ay etsës të xytyukniminy ja nkääkyës n'uukyës? Ëjts tëëjës ja ntimjyë'kxtaaykyojy ma ënety mijts ka'ap mjajtynyëmën ets të wyi'imy kënu'kxën mëët ja mëti'ipë jëyëjp të myinyën.

34Ko ja Esaú jëtu'un tmëtooy wi'ix ja tyeety y'ënä'änyën, ënät ojts tyëkë yaxpë ets mëk yujk'ënany:

Tatë mooykyës näjyëtu'un wäänë yë kënu'kxën.

35Tä ja tyeety Isaac y'ëtsoowë:

U'unk yë m'uty, yë'ë të myiny etsës të xywyin'ëëny ets të tmënëjkxy ja kënu'kxën mëti'ipë ënety mijts mpatëpën.

36Ënet yë Esaú y'ënäny:

Tyimxëëw jëtu'un Jacob, jä'ä ko jëtu'un jyä'äy'äty. Mëmäjtsk'okës tyam ëka'any jëtu'un winë xypyëjkë. Më''ëka'any ojtsës xypyëjkë nkä'äxkopk'ajtën e tyam ja nkënu'kxënës ënät të xypyëjkë mëti'ipës xypyatpën. ¿Tatë këtii jap maa xyjyaakpëjkë'ëky etsës jeexyë näjyëtu'un wäänë xykyënu'kxpë?

37Ënet ja Isaac y'ëtsooy:

Ëk'ix, yë m'uty Jacob yë'ëjës të nmo'oy ja kuttujkën ma mijtsën etsës të n'ënëëmë ko tuunpë'atëty ja jyiiky myëku'uk ets ko tmëët'atëty ja jyi'kxy pyiky mëj këjää. ¿Tiijës ënät tyam ntuunta'akëp mëët mijts u'unk maay?

38Ja Esaú ni'ikyë ja kyajpx'ëtë'ëtsy:

¿Tatë tii këtiis mëpaat xytyimmooynyë ja kënu'kxënë, oyxyëp jeexyë ja tu'ukënë?

Ënet jatëkok ja Esaú tyëjkëy yaxpë.

39Ënet ja Isaac y'ënäny:

Mijts mëjëkäm'atëp ja naax kam ma winë y'ity wyintëyën,

ets ma ja nëë tuu xëmë kyä'äyën.

40Kë'ëm nëjkx mnäkyuwa'anyë mëët ja mtujn mpujxn,

yë m'uty yë'ë mëtunëp.

E ko mëk mnäpyëjkta'akëtëty,

tääts mnäyaj'ëwaatspëtsëmëtëty ma yë'ëjën.

Jacob tkuke'eky yë Esaú

41Jä'ä xëëw jä'ä jëmëjt yë Esaú ojts tmëtsiptso'onë ja Jacob, ko ënety të pyëjkëty ja näkyënu'kxë, mëti'ipë yë'ë patëpën ma tyeetyën. Ënäty ja Esaú ojts myäy tyäjy: Tim wäänë jëtu'un täätsës nmëët'atëty yë monyëtukyë mëët yë nteetyës, ko wiinkoonëp ma y'o'knëtyën. Ko ja jëtu'unpë kyëxëty nyaxëty, taats nyaj'ookëty yë n'uty Jacob.

42Ko ja Rebeca tnija'awëy wi'ix ja myaank myäy tyäjyën, tä ojts tmëkäjpxy ja mutskpë ja myaank mëti'ipë xyëëwajtypyën Jacob ets t'ënëmaay:

Ëk'ix; yë m'ajty Esaú tëë mtukjoot'anpëkyë ets mtimyaj'ookanëp yë'ë, mëët wi'ix të xytyunyën ets jëtu'un ja tsyip y'äkë tyajnaxa'any ma mijtsën. 43Paaty mëtoowit mëti'ipë tyam ntuk'ënëëmëjäämpyën. Kä'äk ets nëjkx jam Harán, jam mja'tëty ma ja tyëjkën ja n'ayës Labán. 44Jam mwë'ëmëty, koonëm ja m'ajty ja tsyip y'äkë xyäämëty. 45Ets tja'atyëkoyëty wi'ix të xytyunyën, e nän kë'ëm ntuk'ëwaanëty jëna'a jatëkok mwinpitëty. N'u'unkës jëtu'un nkayajtëkoyäämpy nimäjtskëty tu'ukyë xëëw.

46Tä ja Rebeca t'ënëmaay ja Isaac:

Ëjts tëëjës xynyatim tsyijpnë ya'atë juukyajtën mëët yë Hit ja'ayëty, mëti'ipë mëët të pyiky të y'uukyën yë Esaú. Pën Jacob yë'ë mëët pyiky näjyëtu'un yë Hit to'oxy'ëna'këty ijxtëm yë Esaú tyo'oxytyëjkën, mëti'ipë yaa tsënaaytyëpën Canaán, ni'ikë tim oy'atëp koos ëjts ntimy'ookëty.

Currently Selected:

Génesis 27: QUETZMIXE

Highlight

Copy