Génesis 24

Abraham t'ixtaayë yë Isaac yë tyo'oxytyëjk

1Mëjja'ay ënety yë Abraham oynyë, e Dios mëj këjää të kyënu'kxyë. 2Paaty ojts tëkok t'ënëëmë ja tyuunpë mëti'ipë mëjja'aynyën mëti'ipë kyëwent'ajtypyën tu'kë'ëyë winë mëti'ipë ja Abraham myëët'ajtypyën. Tä t'ënëmaay:

Pëjkta'ak yë mkë'ë ma npuuypya'tkënës. 3Ets nikajpx mëët yë Dios xyëëwkëjxm, mëti'ipë Tios'ajtpën tsajpjotm ets naaxwiiny, ko këtii xy'a'ixëty ets nmaankës pyëkëty y'uukëty mëët yë to'oxy'ëna'k yaapë kyukajpn'atën Canaán, maas tyam ntsëënën njuuky'ätyën. 4Jam nëjkx yë tyo'oxytyëjk xy'ixtaayë maas yë nnaax nkajpnën ets xywyin'ixëty tu'uk ja to'oxytyëjk, mëti'ipë tyo'oxytyëjk'atëpën, mëti'ipë winkon yajjëëky'ajtp yajmëku'uk'ajtpën.

5Tä ja tyuunpë y'ëtsooy:

E ko xykyamëëtmina'anëtyës ja to'oxytyëjk. ¿Tiijës mëpaat ntuny? ¿Koonëmës ja myaank nwoownëjkxëty jam ma ja naax kajpnën ma ojts mtsoonyënë?

6Tä ja Abraham y'ëtsooy:

Ka'ap, këtii jam xywyoownëjkxëty. 7Yë Wintsën, yë Dios tsajpjotmëpë, mëti'ipës ojts xyajtsoonyën maas yë nteety ntaak yë jyëën tyëjkën ma ja y'it nyaaxwiinyëtën ja njëëky nmëku'ukës. Ets ojts xytyukwinwanës ya'atë it naaxwiinyëtë, ko tmo'oja'any yë n'ok'u'unk n'ok'ëna'kës, yë'ë näjyëtu'un ënät kyäxëp ja Dios ja tsyajpjotmëtë kukäjpxy ma mijtsën. Ets xyajmin xyajja'tëty ja to'oxy'ëna'k, mëti'ipës ja nmaank Isaac tyo'oxytyëjk'atëpën. 8Pën ja to'oxytyëjk ka'ap mëëtmina'anyë, mijts ëwaatsëtum je'eyëm mwë'ëma'any, ma ya'atë ja amay jotmayën. E yë n'u'unkës niwi'ixtsow mëpaat jam xykyayajnëjkxy.

9Ënet ja tuunpë ojts ja kyë'ë tpëjktä'äky ma ja wyintsën Abraham ja pyuuypya'tkën ets ojts tnikäjpxy mëët yë Dios xyëëwkëjxm ko tuna'any jëtu'un tä ënety ja wyintsën Abraham të y'ënë'ëmxëtyën. 10Tä ja Abraham ja tyuunpë nyänyipëjktakëyë. Jä'ä wyin'ijx ja oyëtypë näynyamo'ojë, mëti'ipë ënety ja Abraham myëët'ajtypyën ets näjyëtu'un tmënëjkxy majk yë jëyujk jëku'ux ma ja nyaax kyajpnën ja Nahor, mëti'ipë jam yajpatpën Mesopotamia. 11Ko ja Abraham ja tyuunpë jam jyä'äjty kajpn winkon, kujk ënety jyajmoonë, e jä'ä xëëw ënety ja to'oxy'ëna'këty myintë nëëwijtspë nëëkoompë ja jampë kyukajpn'atën. Paaty ja tuunpë jam tyajwa'ak'o'oyëtyääy ja jëyujk jëku'ux winkon mëët ja nëëjut ets jam pyo'kxtë. 12Ënet ojts tyëkë kajpxtakpë ets y'ënäny: Wintsën mëti'ipë y'ëwtajtypyën yë nwintsënës Abraham. Mijts myajkutukëp ets oy wyimpëtsëm jyëjpëtsëmëty ya'atë amay jotmay tyampës nkujëtitën. Yaj'ixët yë m'oyajtën maas yë nwintsën Abrahamën. 13Tyamës nwë'ëma'any winkon ma ya'atë nëëjutën ets ja to'oxy'ëna'k myintëty nëëkoompë, yaapë kyunaax'at kyukajpn'atën. 14Mijts myajkutukëp, koos ja to'oxy'ëna'k n'ënëëmëty: Tun yë mëyajtën tuk'ënu'kxkës wäänë yë mnëëtsiiyë wä'änës n'ëknëë'uuky, koos xy'ëtsowëty: Tyaa nëë uuk, pën mijts m'ënaanp n'ëkyajnëë'uukyës näjyëtu'un yë mjëyujk jëku'ux, yë'ëjës ntuk'ixëp ko yë'ë ënety mijts të xywyin'ixy ets to'oxytyëjk'atëty ja mtuunpë Isaac. Jëtu'untsës ëjts jotkujk nwë'ëmëty ko mijts mjanty'oyjya'ap yë nWintsënës.

15Ka'anëm ënety tuunta'ay ja kyapxtakën, ko myiiny tu'uk ja to'oxy'ëna'k mëët yë nyëëtsiiyë kyejkyijxy. Jä'ä ënety ja Rebeca, yë Betuel yë nyëëx, jä'ä ënety Betuel xyëëwajtyp ja Milcá ets ja Nahor ja myaank, ja Abraham ja myëkä'äx. 16Janty oy janty tsuj ënety yë Rebeca kyëxë'ëky. E ka'anëm ënety ni pën ye'etyëjk mëët tsyëënënëm. Tä kyëtäky ma ja nëëjutën ets tyaj'ujtsy ja nyëëtsiiyë mëët yë nëë. 17E winpijnëpts ënätynyë ko ja Abraham ja tyuunpë pyëyë'ktso'ony ets tnajtspatëy ja kiixy, tä t'ënëmaay:

Tun yë mëyajtën tuk'ënu'kxkës wäänë yë mnëëtsiiyë, wä'änës n'ëknëë'uuky.

18Oy mnëë'uukëty Wintsën: jëtu'un y'ëtsooy ja kiixy.

Ënätyë nyätyukuwijtstutë ja nyëëtsiiyë ets ojts tyajnëë'uuky ja Abraham ja tyuunpë. 19Ko ja tuunpë nyëë'uuktaay, tä ja Rebeca y'ënëmaayë:

Wintsën nëjkxës yë nëë n'ëkjaakkony wä'änës n'ëkyajnëë'uuky näjyëtu'un yë mjëyujk jëku'ux.

20Janty poj'am tuktäämtuty ja nyëëtsiiyë ma ja nëë'a'ukënën, tää ojts pëyi'ikyë wiinkpë tninëjkxkojnëpë, koonëm tyajnëë'uuktaay ja jëyujk jëku'uxëty. 21Ja tuunpë je'eyë t'ëkna'ixy ets ka'ap nitii ayuk tkäjpxynyëm. Yi'iyë ënety jam myëmääpy myëtäjpy ko ja Dios ja y'oyajtën tyajnikëxë'ëky ets jëtu'un wyimpëtsëm jyëjpëtsëmy oy mëti'ipë pyatijtypyën. 22Ko ja jëyujk jëku'ux nyëë'uktaaytyë, ënät ja ye'etyëjk tju'ty tu'uk ja pu'ts pujxnkë'ëjiits, jä'ä jye'emtyëty tëtujk nikonë ets tukjëjpëjkëy ja to'oxy'ëna'k. Ënet näjyëtu'un tmooy mäjtsk yë pu'ts pujxn kë'ëjän, naxy jye'emtyëty tu'kmëko'px nikonë, 23tä t'ënëmaay:

Tun yë mëyajtën tuk'ëwa'anëkës pën m'u'unk'ajtëp. Wä'änxyëp xynyamëët'atë ja'ajtakn ma mjëën mtëjkëtyën, tääjës jeexyë jam yë tsuu nyajnaxtë mëëtës yë nja'ay, mëti'ipës mëët nminyën.

24Ënet ja to'oxy'ëna'k y'ëtsooy:

Yë'ëjës nteety'äjtyp yë Betuel, yë y'u'unk yë Milcá ets Nahor. 25Maas yë ntëjkën tam yë ja'ajtakn ma mpo'kxtëtyën ets tam näjyëtu'un yë jë'kxy jyätyë ma mëpaat y'oktë wyëtstën yë mjëyujkëty.

26Ënet ja tuunpë nyäkyoxtënaaytyakë ets t'ëwtajty tmëpëjktsooy ja Wintsën, 27tä y'ënäny: Nmëjja'ap nkënu'kxyjya'apës yë Wintsën, mëti'ipë y'ëwtajtypyën yë nWintsënës Abraham. Yë'ë të tyaj'ixyë y'oyajtën maas yë nWintsënën, paatyës të xytyu'uwinwoy ma ja jyiiky myëku'uk ja jyëën tyëjkën.

28Rebeca pëyi'ikyë ojts nyijkxy ma ja tyëjkën ma ënety jam ja tyaakën ets tukmëmëtyäky, mëti'ipë të jyäty të kyëpetyën. 29Tam ënety ja y'äy, jä'ä xyëëwajtyp Labán. Ënet ojts pëyi'ikyë tninëjkxy ja ja'ay ma ënety nyëëkontën. Jä'ä mëti'ipë ënety ja y'uty Rebeca nyikäjpxypën. 30Të ënätyë t'ix ja kë'ëjiits ets ja kë'ëjän, mëti'ipë ja y'uty myëët'ajtypyën ma kyë'ëjën. Ets ko tëë ënety tmëtoy, ko ja y'uty tnimëtyä'äky wi'ix ja ja'ay të y'ënë'ëmxëtyën. Tä ja Labán ojts tmëwinkony ja Abraham ja tyuunpë, mëti'ipë jam yajpatëpën ma ja nëëjutën, 31tä t'ënëmaay:

Min maas yë njëën ntëjkën, mijts Dios y'u'unk, ko yë Dios mtsokyë mjawëty. Wi'ix ko yaa muum m'ëk wë'ëmpëty, ëjts tëëjës jam ni''ix nipëjktaakë ma mpo'kxtëtyën ets ma ja mjëyujk jëku'ux pyo'kxtëtyën näjyëtu'un.

32Ënet ja tuunpë jam jya'ajtë ma ja Labán ja tyëjkën, tä ja Labán tniwë'ëntuty tnikäjtuty ja jëyujk jëku'uxëty ets tmooy ja jyi'kxy. Tä ja nëë näjyëtu'un tmëmiiny ets ojts tyaj'apujy tyajtekpyujy ja tuunpë mëët ja myëku'uktëjk.

33Ko ënety tëë ja kyä'äyën y'ukën yaj'apëjkëtya'atë, ënät ja Abraham ja tyuunpë y'ënäny:

Ëjts ka'apës jëyëjp nkayä'äny, ma ka'anëm nkäjpxynyëmës ja n'amay njotmayës.

Nikajpx tiitën mkajpxäämp: jëtu'un y'ënäny ja Labán.

34Tä ja tuunpë tyëjkëy mëtyakpë ets y'ënäny:

Ëjts jamës ntuny ma mëjja'ay Abrahamën. 35Mëj yë Dios oy kyënu'kxyë jyëkyepyë ets jotkujk yaj'ityë ma jyëën tyëjkën ets ma jyuukyajtënën. Yë'ë të myo'oyë kumeenyajtën. Yë'ë myëët'ajtyp yë jyëyujk, tsyajpkaa, tsyajppaxëty, kupixynyëty ets tyuunpë ye'etyëjkpë to'oxytyëjkpë. 36E ja tyo'oxytyëjk Sara, ojts tu'uk yë u'unk maay tyajmëxu'unk'aty ma ënety kujk myëjja'ayënëtën. E yë nWintsënës Abraham yë'ë të tukkë'ëtëjkëtyä'äy ja y'u'unk myääy tu'kë'ëyë jënu'un winë tmëët'atyën. 37Yë nwintsënës yë'ëjës ojts xyajkäjpxy mëët yë Tiosë xyëëwkëjxm etsës xy'ënëmaay: Këtii xy'ëwa'atsëty etsës yë nmaank Isaac pyëkëty y'uukëty mëët ja to'oxytyëjk yaapë Canaán kyukajpn'atën maas tyam ntsëënë njuuky'ätyën. 38Jam mnëjkxëty maas ja njëëky nmëku'uk tsyëënëtën jyuuky'atën ets xy'ixta'ajëty tu'uk ja to'oxytyëjk mëti'ipës ja nmaankës pyëkëp y'uukëpën. 39Tä ojts ëjts n'ëtsoyës: Wintsën, ¿Pën ja to'oxytyëjk ka'ap xypyamina'anyës? 40Ënet ojts yë'ë xy'ëtsoyës: Ëjts Wintsënës yë nyë'ë tyu'u të npaye'eyë. Yë'ë kyäxäämpy yë tsajpjotmëtë kukäjpxy ma mijtsën ets oy wyimpëtsëm jyëjpëtsëmëty ma mnëjkxa'anyën. Ets xyajminëty tu'uk ja to'oxytyëjk mëti'ipë najëkäm yajjëëky'ajtp yajmëku'uk'ajtpën ets yë'ë mëët ja n'u'unkës nmaayës pyëkëty y'uukëty. 41E pën yë'ë ja nmëku'uktëjkës ka'ap mo'oja'anyë ja nyëëx, mijts ëwaatsëtuuy je'eyëm mwë'ëma'any ma ja mëti'ipë të xyjyanikäjpxyën Wintsën xyëëwkëjxm maas ëjtsën.

42E jëtu'un ko tyam të nja'tyës ma yaa nëëkopkën, tääjës yë Wintsën të nmëpëjktsoy, Wintsën mëti'ipë y'ëwtajtypyën yë nwintsënës Abraham: pën janty tëyajtën ko oy wyimpëtsëma'any jyëjpëtsëma'any mëti'ipës mpajëtijtypyën, 43tyam mijts n'amëtoy nmënu'kxtä'äky, ko ma tyam nyajpaatyënës winkon ma ya'atë nëëjutën. Ko ja to'oxy'ëna'k myinëty nëëwijtspë etsës n'ënëëmëty tun yë mëyajtën yajnëë'ukës wäänë, 44ets koos xy'ëtsoowëty: Oy mnëë'uukëty wintsën ets min näjyëtu'un n'ëkyajnëë'uukyës yë mjëyujk jëku'ux. Jä'ä ënety ja to'oxytyëjk mëti'ipë mijts të xywyin'ixyën ets yë'ë to'oxytyëjk'atëty ja nwintsënës ja y'u'unk myääy. 45E ka'anëm ënety nkajpxtakta'ayës, koos të n'ixy myiny yë Rebeca nëëwijtspë mëët yë nyëëtsiiyë kyejkyijxy. Tääjës të ninëjkxy ma ënety jam ja nyëë tjuutyën etsës të n'ënëëmë: tun yë mëyajtën yajnëë'ukës wäänë. 46E yë'ë ënätyë të nyätyukejky wyijtstu'utyë yë nyitsiiyë etsës të xy'ënëëmë: Oy mnëë'uukëty wintsën, min näjyëtu'un n'ëkyajnëë'uukyës yë mjëyujk jëku'ux. Jëtu'unës të xyajnëë'uuky të xyyajnëëpëky ku'uxyë ets tëë näjyëtu'un tyajnëë'uuky yë njëyujk jëku'uxës. 47Tääjës të nyajtëy: ¿Ko pën tyaak'ajtyp tyeety'äjtyp? Etsës të xy'ëtsoy: Yë'ëjës nteety'äjtyp yë Betuel, yë myaank yë Nahor ets Milcá. Ënätës të npëjktä'äky tu'uk yë kë'ëjiits ma jyëjpën ets kë'ëjän mäjtsk ma kyë'ëjën. 48Täätsës të nyäkyoxtënaaytyä'äkyë etsës të n'ëwtaty yë Wintsën; etsës të nmëjjaw të njaanty jawë ja Dios mëti'ipë y'ëwtajtypyën yë nwintsënës Abraham. Koos të xytyu'uwinwoy të xytyu'uwinwitsy ma ja në'ë tu'ujën ja oypyë etsës të nja'ty maas ja nwintsën ja jyiiky myëku'ukën. Jëtu'unës ja y'u'unk nyëëx n'amëtowanë npëjktsowanë, mëti'ipë pyëkëp y'uukëp ja nwintsënës Abraham ja myaank. 49E tyam mijts ënät nëmaaytyëkës, pën oy ja aaw ayuk xy'ëëw'ëtsowa'antë, mëti'ipës ja nwintsën të xytyukmëkäxën ma miitsëtyën. E pën kajts nijawëjäämpyës näjyëtu'un, tääjës n'ixëty pën tiijës n'ëktuumpy.

50Ënet ja Labán mëët ja tyeety Betuel y'ëtsoowtë:

Tu'kë'ëyë ya'atë jam tsyoony ma Wintsënën, yë'ë ka'ap tjëkyepy ëëtsëty n'ëna'antëty jëtu'un'atëp, ëkë ka jëtu'un'atëp. 51Ëk'ix, tyaajës ja n'u'unk Rebeca, oy xywowëty ets yajnëjkx. Wä'än mëët tpëky t'uuky ja y'u'unk ja mwintsën, jëtu'un ijxtëm yë Wintsën të tyajnikutukën.

52Ko ja jëtu'unpë ja aaw ayuk tmëtooy ja Abraham ja tyuunpë, ënät ojts nyäjyijtä'äkyë naaxkëjxy ets t'ëwtajty ja Wintsën mëët kukkajpxën ja'awëkyëtakkën. 53Ënet tyajpëtsëëmy kanaakpëky ja näynyamo'ojë tä yë kë'ëjiitsën, nantsëmën, tatsktëyën, mëti'ipë oytyunyën mëët yë pu'ts pujxn ets poop pujxn ets wit tujkxy mëti'ipë nyamooyën ja Rebeca ets näjyëtu'un yajnamooytyë winë ja y'äy Labán ets ja tyaak. 54Täänëm ojts ja tuunpë kyääytyëkë mëët ja myëku'uktëjk, mëti'ipë ënety të pyaminyën. Jam ojts ja tsuu tyajnaxtë. E ko komjëpom myä'äypyëtë'ktë, ënät ja Abraham ja tyuunpë y'ënäny:

Oyës ënät jatëkok nwinpitëty maas ja nwintsën ja jyëën tyëjkën.

55Ets ja Rebeca ja y'äy ets ja tyaak y'ëtsoowinpijtë:

Wä'än jeexyë yë kiixy t'ëkjaakwë'ëmy oy majk xëëwën mëët ëëtsëty. E ko majk xëëw kya'pxëty tääts mpanëjkxëtëty.

56Tä ja tuunpë y'ëtsooy:

Këtiijës nëkoo xyajpo'oxtë. Dios të tyajkutuky etsës oy yë nnë'ë ntu'u wyimpëtsëm jyëjpëtsëmëty. Paaty tyam ëxmajtstëkës wä'änës n'ëknëjkxy maas ja nwintsën ja jyëën tyëjkën.

57Ënet ojts y'ëtsoowkojnëtëpë:

Min ëjts n'ëkmëkajpxtë ja kiixy, wi'ix yë'ë y'ëk'ënaanpë.

58Tä tmëjyaxëtyë ja Rebeca ets tyajtëëwtë:

¿Wi'ix mnëjkxaanp mëët tyaapë ja'ayë?

Tä ja Rebeca y'ëtsooy:

Oyës npanëjkxëty.

59Ënet ojts t'ëxmajtsnëtë ja Rebeca ets nyëjkxëty, ojts näjyëtu'un tukpakäjxtë ja tyuunpë to'oxytyëjkpë, mëti'ipë ënety të kyëwent'atyën xëmë. Näyjyëtu'un ojts t'ëxmajtsnëtë ja Abraham ja tyuunpë ets mëti'ipë ënety jämyëët'ajtëtëp. 60Tä ojts tkënu'kxtë ja Rebeca mëët ya'atë aaw ayuk:

Jëëky mëku'uk ets mëkä'äx,

Taak tsi'tsk m'itëty ma nimayjyä'äyën.

Ets ja m'u'unk m'ok myëmëta'akëp ja naax kajpn

ma ja myëtsip tsyëënëtën jyuuky'atën.

61Ënet ja Rebeca mëët ja tyuunpë ojts tukwä'tspäjnëtë ja jëyujk jëku'ux ets ojts tpanëjkxnëtë ja Abraham ja tyuunpë. Jëtu'un ja tuunpë ojts twootso'onë ja Rebeca ma tyëjkën.

62Yë Isaac jam ënety ojts të wyimpity ma jam tu'uk ja nëëwookyën mëti'ipë xyëëwajtypyën Mëti'ipë juukyajtpën etsës xy'ixy. Jam ënety tsyëënëtë ma ja naax kam txëëwatyën Négueb. 63Uxëp ojts nyijkxy najxwij pëjkwijpë, ko ojts ajotkumonë t'ixy jam jëkäm myintë ja jëyujk jëku'uxëty. 64E yë Rebeca näjyëtu'un tëë ënety y'ijxpaatyë; e ko t'ijxy ko jä'ä ja Isaac, ënät ojts ja jyëyujk jëku'ux ënätyë tukjënäky. 65Ets tyajtëëy ja tuunpë:

¿Pën ja'ay ximpë myintën?

Tä y'ëtsooy ja tuunpë:

Yë'ëjës yë nwintsën.

Ënet ja Rebeca ojts ja wyit nyätyukwinkujuuxëty.

66Ja tuunpë tyukmëmëtyaktaay ja wyintsën Isaac tu'kë'ëyë mëti'ipë ënety të tunyën. 67Ënet ja Isaac ojts ja Rebeca twoownëjkxy ma ja tyaak ja jyëën tyëjkën, tä ojts mëët pyiky y'uuky. Yë Isaac mëk tsojky tja'awëy yë Rebeca, jëtu'un ojts jotkujk nyäjyawëty jatëkok oy ënety ja tyaak të y'ëk'ooky.

Currently Selected:

Génesis 24: QUETZMIXE

Highlight

Copy