Génesis 22

Tios twinma'any'ixy yë Abraham

1Tëkok yë Dios ojts yë Abraham twinma'any'ixy ets ojts tukmëkäjpxy yë xyëëw ets y'ëtsooy:

Tyaajës jä'ä.

2Tää yë Dios y'ënëmaayë:

Wow yë Isaac, mëti'ipë oy xytsyokyën ets nëjkx ma ja Moriah naaxjotmën, jamës xymyo'ojëty yë nwintsë'kënës ma ja kopkën, mëti'ipë ntuk'ënä'ämäämpyën.

3Komjëpom janty tsojk ja Abraham ojts pyëtë'kojy ets ojts ja jyëyujk tniwëëny. Ënet ojts ja nyija'axy tpujxë ja wintsë'kën ets ojts nyijkx jam ma ja itjotmën ma ënety ja Dios të tyuk'ënë'ëmxëtyën, tu'ukyë mëët ja Isaac ets nimäjtsk ja tyuunpë. 4Kom tëkëëk xëëw ja Abraham ojts ja itjot t'ijxpaatynyëm, jëkäm ënety wyi'imnyëm. 5Ënet ojts ja tyuunpë t'ënëëmë:

Wë'ëmtë yaa, ja yaa yë jëyujk këwent'atë, ëjts n'ëkjaamë'ëkyës mëët ya'atë nmaankës, nëjkxës yë Dios n'ëk'ëwtatë. Tyaajës jatëkok nwinpijtkojnëtëpë.

6Abraham ojts yë nyija'axy tso'owë ja wintsë'kën ets tmooy ja Isaac tääts tpatso'owëty kyejkyijxy, kyoon näjyëtu'un ja tsujkn ets ja jëën ets ojts nyëjkxtë nimäjtsk. 7Kom jeknyëm ja Isaac ojts ja tyeety tyajtëy:

Tatë.

Tääts y'ëtsoy ja Abraham:

¿Tii mtsojkpy u'unk?

Tää yë Isaac y'ëtsooy jatëkok:

Ëk'ix, nmëët'ajtëm yë ja'axy ets jëën. ¿E ma ënät ja kupixyny mëti'ipë Dios mtukwintsë'ëkëjäämpyën?

8Tä ja tyeety y'ëtsooy:

Dios nyija'ap wi'ix tyaka'any yë jëyujk mëti'ipë yajtukwintsë'ëkëpën.

E ënät jatëkok ye'eytsyo'ontë.

9Ko ojts jya'të jam ma ja itjotmën ma ënety ja Dios të tyuk'ënë'ëmxëtyën. Ënet ojts ja Abraham tnipëjktaakë ja wintsë'këntyakn ets ojts ja jyä'äxy yajxon tmä'kxy. Tä t'atsuumy tkë'ëtsuumy ja y'u'unk Isaac ets ojts jam tpëjktä'äky ma ënety ja wintsë'këntyakn të tni''ixën. 10-11Tam ënety ja y'u'unk tim nyixajjë'knë tukwintsë'ëkëja'any ja Wintsën, ko ojts ja Wintsën ja tsyajpjotmëtë kukäjpxy myëkäjpxyë jam tsajpjotm:

Abraham, Abraham.

Tyaajës jä'ä: y'ëtsooy yë'ë.

12Y'ënäny ja Dios kyukajpxpë:

Këtii m'u'unk jëtu'un xytyuny, tëëjës nnijawë ko mijts mtsë'këpë Dios ets ka'apës mijts të xywyin'ëënyës, koos yë m'u'unk xymyo'oja'any xytyukwintsë'ëkëja'any.

13Ënet yë Abraham y'ijxë'ky ets t'ijxpaty tu'uk yë kupixyny mëti'ipë ënety të jyänën yë wyaj ma ujts xe'entyën. Ënet ojts ninëjkxy ja kupixyny, tääts yë'ë tkëxko'ky jam ma ja wintsë'këntyaknën ets jä'ä ja Dios ojts tukwintsë'ëkë ijxtëm ja y'u'unkën jeexyë. 14Ok ojts ja Abraham ja xyëëw tpëjktä'äky ja itjotm: Yë Wintsën mëti'ipë yäjkpyën winë. Paaty tyampaat je'eyëm yajtijy ja kopk: Ma kopkën yäjkpy yë Wintsën mëti'ipë mëyajtpën.

15-16Ënet ja Wintsën ojts tsajpjotmëtë kukäjpxy myëkäjpxyë mëmäjtsk'ok jam tsajpjotm.

Dios jëtu'un të y'ënä'äny: Tëë jëtu'un xytyuny ijxtëm të nni'ënä'ämënës ets ka'ap yë m'u'unk të xytyukmëj'aty maas ëjtsën, tyamës kë'ëm nyänyikäjpxyë etsës n'ëna'any, 17ko nkënu'kxa'any mëjwiin këjää. Yë m'u'unk m'ok janty nimay y'ita'antë jëtu'un tä yë mëtsa'ajën ets jëtu'un nyimay'ata'antë ijxtëm yë jin kyëxë'ëkyën nëë''ëkë'ëy. Yë'ëjëty xëmë tmëmëta'aka'antë yë myëtsipëty, 18ets tu'kë'ëyë yë naaxwiinyëtë ja'ayëty nkënu'kxta'ajäämpyës mëët mijtskyëjxm, jä'ä koos mijts të xymyëmëtoy.

19Ënet ja Abraham wyimpijnë ma ënety jam ja tyuunpë të wyë'ëmtën, tä ojts jam tsyoontë ets nyëjkxtë Beerseba, ma ja Abraham tsyënaaytyaknpëjknën.

Y'u'unk y'ëna'k yë Nahor

20Ënet ja Abraham nyija'ajtë ja aaw ayuk, ko ënety ja kyäpy Milcá ja u'unk të tpaat të t'ixy, ja myëkä'äx ja tyo'oxytyëjk mëti'ipë xyëëwajtypyën Nahor. 21Mëët tu'uk mëti'ipë ojts ëka'any myëxu'unk'atyën, jä'ä xyëëwajtyp Uz. Ënet ojts myëxu'unk'aty näjyëtu'un ja y'uty, jä'ä xyëëwajtyp Buz. Ënet myëxu'unk'ajty näjyëtu'un ja Quemuel, mëti'ipë ojts ja Aram teety'ätyën. 22Ënet ojts myëxu'unk'atë näjyëtu'un ja Quésed, Hazo, Pildas, Idlaf ets Betuel. 23Ya'atë Betuel yë'ë jëtu'un ojts tnëëx'aty ja Rebeca. Ya'atë jëtu'un tuktujk y'u'unk'ajtyp yë Milcá mëët nyiye'etyëjk Nahor, yë Abraham yë myëkä'äx.

24Nahor ojts näjyëtu'un wiinkpë y'u'unk y'ity mëti'ipë y'u'unk'ajtën mëët ja myëmäjtsk to'oxytyëjk mëti'ipë xyëëwajtypyën Reumá. Jä'ä y'u'unkëty xyëëwajtë Teba, Gáham, Tahas ets Maacá.

Currently Selected:

Génesis 22: QUETZMIXE

Highlight

Copy