Hechos 5

Ananías ets ja Safira

1Jam ënety yajpaaty tu'uk ja ja'ay mëti'ipë xyëëwajtëpën Ananías, Safira ja tyo'oxytyëjk xyëëwajtyp. Jä'ä tyo'k ja nyaax. 2Tääts ja Ananías ja nyaax tsow ojts tyajwë'ëmy tu'pëky ets ojts jatu'kpëky tmo'oy ja ijxpëjkpëtëjk. Wa'ats ja tyo'oxytyëjk tnijawë ko jëtu'un ja Ananías të tuknipëjktaakë. 3Tääts ja Pedro t'ënëmaay ja Ananías:

Ananías, ¿tii ko ja mëjku'u të mnätyuk'ëne'emyë ets xywyin'ëënëty ja kënu'kxymyëk'ajtën ko të xymyëwë'ëmy tu'kpëky ja naaxtsow? 4¿Tii këtii mijts xyjyä'äjëty ja naaxë? ets ko të xytyooky, ¿këtii myijtsëty xyjyä'äjëty ja nyimeenyë? ¿Tii ko jëtu'un të mwinma'anypyääty? ka'ap nyaaxwiinyëtë ja'ayëty xywyin'ëëny, Dios jëtu'un të xywyin'ëëny.

5Je'eyë ja Ananías jëtu'un tmëtooy, ooky tyimnakëtäky. Ets mëti'ipë y'ijxtën nyija'awëtën, ni'ëmukë tsyë'këtyë. 6Tääts ja ëna'ktëjk myiintë, ets twinpijtë ja o'kpë ets ojts tmënëjkxtë tääts tyajnaaxtëkëja'antë.

7Wäänë y'ijty tääts ja Ananías ja tyo'oxytyëjk pyajajtë ets tyëjkëy jap tëkoty, ka'ap tnijawë tii ënety të tyuny të jyätyë. 8Ënet ja Pedro tyajtëëy ja Safira:

Nikajpx, ¿jëtu'un ja mnaax të xytyooktë ijxtëm të xynyikajpxtënë?

Tääts y'ëtsooy ja Safira:

Jëtu'un.

9Tääts ja Pedro t'ënëmaay:

¿Tii ko të xykyäjpxy'atë nimäjtsk ets ja Wintsën ja kyënu'kxymyëk'ajtën xywyinma'any'ixa'antë? Tää ja ja'ay myintë tëjk ëkë'ëy mëti'ipë ja mniye'etyëjk ojts të tyajnaaxtëkëtën, mijts näjyëtu'un ënät nëjkx mnaaxtëkë.

10Tääts ja to'oxytyëjk ooky tyimnakëtäky jam ma ja Pedro tyeky'ëjxën. Ko ja ëna'ktëjk tyëjkëtyë, ooky ja to'oxytyëjk jap tpatë. Tää tyajpëtsëëmtë, ets ojts nän jam tnitajëtë ma ënety ja nyiye'etyëjk të nyaaxtëkën. 11Ënet ja mëpëjkpëtëjk tsyë'këtyääytyë, mëët ja ja'ayëty mëti'ipë y'ixtë nyija'awëtyën tii të tyuny të jyätyën.

Mëjajtën kanaakpë ets ja ijxpäjtën

12Ja ijxpëjkpëtëjk kanaak ja mëj'ajtën tuuntë ma ja ja'ayëtyën. Jam ijty ni'ëmukë ye'eymyuktë ma ja mëjtsajptëjkën, ma txëëwatyën Salomón Tyëjkwiin. 13Ja ja'ay mëti'ipë kyamëpëjktëpën ja Jesús, ka'ap ijty myintë ets ye'eymyuktëty mëët ja ijxpëjkpëtëjkëty, e ja ijxpëjkpëtëjkëty mëk ja ja'ay tsyokëtë. 14Ni'ikyë ja ja'ay nyimayëtë mëti'ipë ja Wintsën myëpëjktëpën, ye'etyëjk to'oxytyëjk. 15Ets ja pa'amja'ay jam may tpëjktaktë tu'u'am, tam mëti'ipë myaapäjnkëjxm ko'knaaytyëpën ets tam mëti'ipë to'okykyëjxmën; yë'ë y'ëwxijtëp ko ja Pedro nyaxëty ets ja ja'ay tsyo'oktëty, oy je'eyë ja y'äpk pyaatëtëty. 16Näyjyëtu'un ja ja'ayëty mëti'ipë wiink kajpn tso'ontëpën mëti'ipë ja Jerusalén myëwinkon'atëpën, ojts näjyëtu'un tyajmintë ja pa'amja'ay ets mëti'ipë ja ëxëëk pa'am myëët'ajtëpën. Ni'ëmukë tsyoktaaytyë.

Ko ja ijxpëjkpëty yajpajëtijta'aktë

17Ënet ja teety wintsën mëët ja saduceos mëktä'äky tukjoot'anpëjktë ja ijxpëjkpëtëjk, 18ets tmajtstë ets ttsuumtë. 19Tu'uk ojts ja Wintsën ja y'anklës myiny ets ja pujxntëjk tyaj'ëwatsy ets pyëtsëëmtë. Tääts y'ënëmaayëtë:

20Nëjkxtë jam ma mëjtsajptëjkën ets xytyuk'ëwaanëtëty ja ja'ay ya'atë aaw ayuk mëti'ipë yajjuuky'ajtpën.

21Ko jëtu'un tmëtoowtë, tää komjëpom ojts tsojkyë nyëjkxtë ma ja mëjtsajptëjkën ets ja ja'ay tyaj'ijxpëjktso'ontë.

Ko ja teety wintsën mëët ja jyä'äy jyajtë, ënät twoowmujktë ja tsajptëkotyëtë yajuntë'ajtpë ets ja ijxpëjkpëtëjk näjyëtu'un ets yajwoowtsoowtë mëti'ipë ënety të yajtsumtën. 22Ko ja mëjtsajptëjk këwent'ajtpë jyajtë ma ja pujxntëjkën, ka'ap ja ijxpëjkpëtëjk jam tpatë. Tääts wyimpijtë, ets t'ënëmaaytyë ja mëti'ipë käjxëtën:

23Koos jam të nja'të, ëtuky ja pujxntëjk të npaatës, tam ja këwent'ajtpë tyänëtë pujxntëjk ëkë'ëm. Koos ja pujxntëjk të nyaj'awa'atstë, ni pën jap të nkapaatës.

24Ko jëtu'un ja ayuk tmëtoowtë ja teety wintsënëty ets ja mëjtsajptëjk këwent'ajtpë wintsënëty, ka'ap tmëwinma'anypyatë, je'eyë tmëmay tmëtajtë wi'ix kyukëxëja'any ya'atë winë.

25Tääts ja ja'ay tu'uk jyä'äjty ets y'ënäny:

Ja ja'ay mëti'ipë miits të xytsyumtën, tam ja yaj'ijxpëktë ma mëjtsajptëjkën.

26Tääts ja mëjtsajptëjk këwent'ajtpë wintsën ets ja tyuunpëtëjk ojts tninëjkxtë ja ijxpëjkpëtëjk; je'eyëp ko ka'ap wi'ix tuuntë, jä'ä ko tsyë'këtëp ja ja'ay ko kyuka'atsëtëty. 27Ko tyajja'ajtë, tääts ots twoownëjkxtë ma ja tsajptëkotyëtë yajtu'ukmujkpën. Jamts ja teety wintsën y'ënëmaayëtë:

28Tëë mëk'äämpy nëëmëtë ko ka'ap tääpë Jesús jyä'ä xy'ëknimëtyakënëtëty ma ja'ayëtyën. ¿E miitsëty tii të xytyuntë? tëë ja Jerusalén kajpn xytyuk'ëwa'anëtya'atë tääpë ijxpëjkën, etsës näjyëtu'un ëëts xypyokynyitijtë ko ja Jesús të y'ooky.

29Tääts ja Pedro y'ëtsooy mëët ja myëku'uktëjk:

Yë'ë ëëts xypyatëp ets ja Dios nmëmëtowtëtyës, këtiinëm ja ja'ay. 30Ja Dios, mëti'ipë ëëts ja n'ap n'ok y'ëwtajtën, yë'ë të tyajjuukpyiky ja Jesús, mëti'ipë miits myaj'o'ktën jam kruutskëjxm. 31Tëë ja Dios tpëjktä'äky y'aka'any'äämpy Yajkutujkpë ets Yajknitsokpë, jëtu'unts ja Israel ja'ay t'ëxmatstëty ja y'ëxëëk winma'anyëty ets ja pyoky yajnimä'kxtëty. 32Ijxpë nija'awëpë ëëts të n'itë, näjyëtu'un ja Kënu'kxymyëkajtën, mëti'ipë ja Dios Teety të tmo'oyën ja ja'ayëty mëti'ipë mëmëtoowëpën.

33Ko jëtu'un tmëtoowtë, tääts tukjoot'anpëjktë ets ojts tjayaj'ooka'antë. 34Jamts ënety tu'uk ja fariseë ja'ay, Gamaliel xyëëwajtyp ets tyuk'ijxpëjkpy ja jutiis ja'ay ja ënä'ämën ets wintsë'ëkë ja ja'ay yaj'ityë. Yë'ë ojts wya'kukë ets t'ënëmaay ja mayjyä'äy ets tuktsojk yajkäjxpëtsëmtëty ja ijxpëjkpëtëjk. 35Tääts t'ënëmaay ja wiinkëtypë ja kutuunktëjkëty:

Israel ja'ayëty, ëkwinmay ëkwintajtë yajxon wi'ix tääpë ja'ay xytyuna'antën. 36Ja'amyätstë ko ojts tu'uk ja ja'ay jyapëtë'ëky, mëti'ipë xyëëwajtën Teudas; ko y'ënäny ko yë'ë mëj'äämpy y'ity ets ojts may yë jyä'äy tpaaty, nimajktaxk mëko'pxën. E ojts ja ja'ay yaj'ookyë ets jëtu'unyë ja jyä'äy ye'eywya'kxtaaytyë ets jääyë kyijxy nyäjxy. 37Kom ok, näjyëtu'un jyäjty ja Judas, mëti'ipë Galiletë ja'ayën, jää ma ja yajkutujkpë jyääymyujkyën; ojts jyä'äy nimay tpaaty, je'eyëp ko ojts ja ja'ay yaj'ookyë ets jëtu'unyë ye'eywya'kxtaaytyë ja jyä'äy. 38Paaty tyam nkajpxwijtë ets xy'ëxmatstëty tääpë ja'ay, ka'ap nëkoo xytyuktëkëtëty tääpë jëtu'unpë winma'any. Pën kyë'ëm winma'any yajtuuntëp, tsojk kyutëkoya'antë, 39e pën Dios yë jyä'ä yajtuunëtëp, nijëna'a miits xykyayajkutëkoytyëty. Näkyëwent'atëtë, ka'ap mëpaat mtsiptuntë mëët ja Dios.

40Ojts tja'akyukëtyë mëti'ipë ja Gamaliel kyajpxën. Tää twoowtsoowtë ja ijxpëjkpëtëjk ets tyajkwojpëtë je'eyë, ets t'ënëmaaytyë ko ka'ap t'ëknimëtyaknëtëty ja Jesús. Tääts t'ëxmajtstë. 41Ënet ja ijxpëjkpëtëjk pyëtsëëmtë juntëjoty, akujk jotkujk tsyo'onëtë, jä'äkyëjxm ko ja Dios ënety të tyajkutuky ets y'ëyo'onpaatëty ko ja Jesús tnikäjpxy tnimëtya'aktë. 42Jëpom jëpom ijty tnimëtya'aktë ja Jesús ja jyä'ä ma mëjtsajptëjkën ets winjëën wintëjk.

Currently Selected:

Hechos 5: QUETZMIXE

Highlight

Copy