Hechos 2

Ko ja Kënu'kxymyëkajtën myiiny kyëtäky

1Ko ja pentecostés xëëw tpaty, jää ënety ni'ëmukë të ye'eymyujkta'atë ja mëpëjkpëtëjk ma tu'uk ja tëjkën. 2Ajotkumonë yajmëtooy amuup kyëtä'äky jam tsajpwinm, ijxtëm yë mëk pojën ets mëk ojts tyukwanë tëkoty. 3Tääts t'ijxtë ko kyëxë'ëky jëtu'un ijxtëm may jëënyä'änkën; tu'uktu'uk wyë'ëmtaaytyë ma ja kyëpajkëtyën. 4Ets ja Kënu'kxymyëkajtën myooyëtë ja winma'any ets ja mëk'ajtën jëtu'un ijxtëm ënety japëtyën ets tuntëty tkajpxtëty mëti'ipë ja Dios tsyojkpyën, ets ja ayuk wiinkëtypë ojts tkajpxtë wi'ixjaty ja Kënu'kxymyëkajtën myooyëtën.

5Nimay ënety ja jutiis ja'ay të myintë Dios ëwtajtpë jam Jerusalén mëti'ipë tso'ontëpën wiink naax wiink kajpn. 6Ko tmëtoowtë ko amuup tsyoony jam tsajpwinm, tää ja ja'ay may myujktë ets ka'ap tnija'awëtë tii tuunëp jajtëp; tääts ja mëpëjkpëtëjk ojts kanaakjëjp ja ayuk tkajpxtë këëkjä'ä. 7Mëj'ixy t'ijxtë ja ja'ayëty ets nyäy'ënanëtë nixim niyam:

Galiletë ja'ay ya'atëty kajpxtëp, ¿këtiijë? 8¿Wi'ixën ya'atë ja'ayëty jëtu'un kyajpxnëtë ijxtëm ëëtsajtëmën? 9Tääts yë ja'ay mëti'ipë tso'ontëpën Partia, Media, Elám, Mesopotamia, Judea, Capadocia, Ponto, Asia, 10Frigia, Panfilia, Egiptë, ma ja África kajpnën; yë'ëpaat mëti'ipë kukajpnajtëpën jam Cirenë jëxkë'ëm; mëti'ipë tso'ontëpën Roma ets Jutiis ja'ay tyeety'ajt tyaak'ajtëp, ëpëky mëti'ipë të tuktëkëtën ja jutiis ja'ay ja myëpëjkënëty. 11Näy tam ënety yajpaatë mëti'ipë tso'ontëpën Creta ets Arabië. Ojts nmëtowtës ko tkajpxtë ja n'ayukëtyës ets tnikajpxtë mëti'ipë ja Dios të tuny të tkäjpxyën.

12Ni'ëmukë ja ja'ayëty mëj ixy t'ijxtë, ets ka'ap nijawëtë wi'ix myäytyëty tyajtëtyën; ets nyäyatëwëtë:

¿Wi'ixën ya'atë nja'akyujkëmëty?

13E wiinkëtypë ja'ay je'eyë tukxiktë ets y'ënantë:

Tëë ënät y'uuktë, mukëtëp yë'ëjëty.

Ko ja Pedro kyäjpxy mayjyä'äyjoty

14Ënet ja Pedro wya'kujkëy mëët nimajktu'uk ja myëku'uktëjk, tä mëk kyajpxtso'ontäky mayjyä'äyjoty:

Miitsëty, Israel ja'ayëty ets ni'ëmukë mëti'ipë yaa tsënaaytyëpën Jerusalén; mëtowtë ets ja'akyukëtë yajxon mëti'ipë yam ntukmëmëtya'akantëpën. 15Ëëtsëty, ka'apës nmu'ukëtë ijxtëm miits mmaytyë mtajtën. Je'eyë tyam xëëw nyapëtsëmnyëm. 16Tyamën ja tyunyë jyätyë ijxtëm ja Dios ja kyäjpxynyajxpë Joel y'ënänyën:

17Ko ënety ja naaxwiinyëtë kyëxanë,

jääjës ja ja'ay ni'ëmukë nmo'oja'any ja njot nja'awën.

Miits ja mnëëxëty, mmaankëty kyajpxtëp myëtya'aktëp ja n'aaw n'ayukës.

Ja myä'äy'ëna'këty y'ixtëp ja mëti'ipës ënety ntuk'ixantëpën,

ets ja mëjja'aytyëjkëty nëjkxëp mya'atë pyo'ktë oy tsuj.

18Jä'ä xëëw ja ntuunpës nmo'oja'any ja njot nja'awënës, ye'etyëjkpë to'oxytyëjkpë,

etsës ja n'ayuk tkajpxtëty.

19Nyaj'ixanëpës jam tsajpwinm mëti'ipë ja ja'ay mëk jyawëtëpën, ets ja ne'pny ets ja jëënjok nyaj'ixa'anyës yaa naaxwiiny.

20Pi'itsaanp ja xëëw,

ja po'o ne'pnyën y'awinpita'any

ka'anëm ënety ja Wintsën myinyëm,

ets jää nëjkx yaj'ixy ja Wintsën ja myëj'ajt y'oyajtën.

21Ets ni'ëmukë ja ja'ayëty mëti'ipë ja Wintsën ja xyëëw kyajpxpatëpën,

jä'ä nëjkx nyitso'oktë.

Tääts ja Pedro jyaak'ënany:

22Miitsëty, Israel ja'ay ja tyiktsëty y'aatsëty, mëtowtë mëti'ipës yam nkajpxäämpyën: Ijxtëm miitsëty wa'ats xynyijawëtën, ojts ja Dios tyaj'ixyë ja kyutujkën mëët ja Jesús, Nazaretëtë ja'ay, ko tyaj'ixyë ja myëj'ajtën y'oyajtën ets kanaakjëjp ja ijxpät. 23Tääpë ye'etyëjk, ojts miits myajtukë'ëtëkëtë, ijxtëm ja Dios ënety të tuknimay të tuknitajën, miits ojts xyaj'ooktë, ko ja ëxëëkja'aytyëjk xytyukyajkruutspäjtë. 24E tëë ja Dios tyajjuukpyiky, ets tëë tyaj'ëwaatsëpëtsëmy ma ëxëëk të jyätyën ko të y'ooky, jä'äkyëjxm ko ka'ap ja o'kën tii mëk'ajtën tmëëtëty ets yaj'ookëtëty. 25Jëtu'un ja David nimëtyä'äky ja Jesús:

Xëmës ijty n'ixy ja Wintsën nwintuuyës,

mëë ko yë'ë yajpaaty maas yë n'a'oykyë'ëjën,

ka'apës pën xyajkutëkoyëty.

26Paatyës jotkujk näjyawëty

etsës yë xoontakën nnikäjpxy;

oyës n'ookëty, ka'ap tiijotmay,

jyëjp'ixëp ëjts ni'kx nkopk ja juukyajtën,

27Ka'ap mijts xyajwë'ëmëtyës o'kpëjutjoty,

ni xykyayajkutukëty ets wyintëkoyëty ja mwa'ats Ja'ay nyi'kx kyopk.

28Tëës mijts xytyuknijawë ja në'ë tu'u mëti'ipës xyajja'tëpën ma ja juukyajtënën,

ets mijts xyajjotkujkta'akaanpës mwintuuy mwinkujk.

29Mëku'uktëjkëty, ëmuumtu'ukjot yam nëëmëtë ko ojts y'ooky ja n'ap'ajt nteety'ajtëmë David ets ojts nyaaxtëkë. Tää ja yaa yajpaaty ma ëëtsajtëmën ja it naaxwiinyëtë ma nyaaxtëjkëyën. 30Yë David, Dios käjpxynyajxpë ijty, nyija'ap jä'ä ko ënety ja Dios tëë mëktä'äky tyukwinwanëty ko ja y'u'unk y'ok tu'uk tpëjkta'aka'any mëti'ipë y'ëxajëpën ja David ja kyutujkën. 31Jëtu'un ja David ojts jëwyiinyëp nijawë ets ojts nikäjpxy ko ja Kristë ënety jyuukpyëka'any jatëkok ets ka'ap y'ëk'ijnëty o'kpëjutjoty, ni kyawintëkoyëty ja nyi'kx kyopk. 32Tëëts ja Dios tyajjuukpyiky ja Jesús, ëëtsajtëm tëë wa'ats n'ijx nija'awëmë. 33Ko ënety ja Dios Teety të yajtsajpetyë ets të yajnaaxweetsyë y'aka'any'äämpy ets ko ënety ja Kënu'kxymyëkajtën ja Dios Teety mëti'ipë të xytyuwinwa'anëmën ets tëë tyajknaxy ma ëëtsajtëmën. Yë'ë tyam të xy'ixtë ets të xymyëtowtë. 34Ka'ap yë'ëjëty ja David tsyajpejty, yë'ë ojts kë'ëm y'ënä'äny:

Jëtu'un ja Wintsën t'ënëmaay ja nWintsënës:

U'nyë yaa n'a'oytsyowës,

35koonëmës yë mmëtsip nmëmëta'akëty.

36Wä'än ja Israel ja'ay nija'awëtya'atë ko tyiyëty jyääntyëty ko ja Jesukristë, mëti'ipë miits myajkruutspäjtën, tëë ja Dios tpëjktä'äky Wintsën ets Kristë.

37Ko jëtu'un tmëtoowtë, tää jyotmaytyëjkëtyë ets tyajtëëwtë ja Pedro ets ja wiink ijxpëjkpëtëjk:

Mëku'ukëty, ¿tiijës ntuntëp?

38Tää ja Pedro y'ëtsooy:

Ixmatstë ja m'ëxëëk winma'anyëty, jootwinpitë ets mnëëpätëty tu'ukjaty Jesús xyëëwkyëjxm ets ja mpoky yajmä'kxtëty, ets näjyëtu'un ja Kënu'kxymyëkajtën myajmo'otëty. 39Miits yë Dios të mtukwinwanëtë mëët yë m'u'unk m'ëna'këty ets jënu'un yë naaxwiinyëtë ja'ay mëti'ipë jëkämpaat tsënaaytyëpën, ni'ëmukë mëti'ipë ja Wintsën wyinwitsäämpyën.

40Jeky ja Pedro ojts ja ja'ay tmëëtmëtyä'äky kanaakpëky, ets tjakajpxwijy:

Ixmatstë ja m'ëxëëk winma'anyëty ets këtii mëët mnämyäyëtë yë ja'ay mëti'ipë näyaj'ijtëtëpën pokyjotm.

41Mëti'ipë myëpëjktën ja aaw ayuk mëti'ipë ja Pedro nyikajpxën, ënätyë ojts nyëëpätë. Jä'ä xëëw, nitëkëëk milën ojts ja ja'ay nyäpyäätyë. 42Ets oy ojts tukjuuky'atë ja ijxpëjkën mëti'ipë nyimëtyaktën ja ijxpëjkpëtëjkëty. Tu'ukyë ijty ja tsajpkääky tyajkwa'kxtë ijxtëm ja Jesús tuuntäkyën mëët ja y'ijxpëjkpëtëjk ets ja Dios tja'amyätstë.

Wi'ix jyuukyajtën ja mëjëwyiimpë ja mëpëjkpëtëjkëty

43Ja ja'ayëty mëj'ixy t'ijxtë ko ja ijxpëjkpëtëjkëty tyaj'ixëtë ja Dios ja myëj'ajtën kanaakpëky. 44Tu'ukyë ja mëpëjkpëtëjk ijty ja wyinma'anyëty ets tu'knax winë tyajkwa'kxtë mëti'ipë myëët'ajtëpën. 45Ko ja nyaax kyam ijty tooktë, yajkwa'kxtëp ja nyimeeny ma ja ja'ayëtyën mëti'ipë yajmëyajtëpën. 46Jëpom jëpom ijty nyiye'eypyätë ma ja tsajptëjkën ets ma ja tyëjkëtyën ets ja tsajpkääky tujkwa'kxtë ets ijty xoontä'äky kyäytyë y'uuktë yujy tëtä'äky. 47Xëmë ijty ja Dios tmëjjawëtë tjaantyjawëtë. Oyjya'awëtëp ni'ëmukë ja ja'ayëty ets winjëpom ja Wintsën ja ja'ay tyajmayë mëti'ipë ja pyoky yajnimä'kxtëpën.

Currently Selected:

Hechos 2: QUETZMIXE

Highlight

Copy