NABI MALEAKI 1

1Puniki pawuwus Ida Sang Hyang Widi Wasa sane katiba ring Nabi Maleaki mangda karauhang ring bangsa Israele.

Sih pasuecan Ida Sang Hyang Widi Wasa ring bangsa Israele

2Ida Sang Hyang Widi Wasa masabda ring kaulan Idane, sapuniki: “Ulun tan mari nyuecanin kita.”

Nanging ipun masaur sapuniki: “Kadi asapunapike caran Palungguh IRatu nyuecanin titiang?”

Pangandikan Ida Sang Hyang Widi Wasa sapuniki: “I Esau muah I Yakub ento manyama, nanging Ulun asih sueca teken I Yakub muah katurunannyane, 3tur Ulun tusing ledang teken I Esau muah katurunannyane. Ulun suba ngusakang pagunungan I Esaune, tur ngutang guminnyane dadi tongos sato alas.”

4Yen katurunan Esaune, wong Edome punika ngucap kadi asapuniki: “Kota-kotan iragane suba uug, nanging iraga lakar buin mangunang kota-kotane ento.” Irika Ida Sang Hyang Widi Wasa jagi masabda kadi asapuniki: “Depang suba ia buin mangunang kotane ento, nanging Ulun lakar buin nguugang. Anake lakar ngadanin ia: Gumi ane jaat muah bangsa ane kena pidukan Ida Sang Hyang Widi Wasa ngantos salawas-lawasne.”

5Bangsa Israele jaga ngeton indike punika antuk paningalannyane niri tur ipun pacang mabaos sapuniki: “Ida Sang Hyang Widi Wasa maraga wisesa, yadiastun ring jabaan jagat Israele.”

Ida Sang Hyang Widi Wasa mapaica panglemek ring parapanditane

6Ida Sang Hyang Widi Wasa Sane Maha Kuasa, masabda ring parapanditane, sapuniki: “Ipianak subakti teken bapannyane, tur iparekan subakti teken gustinnyane. Ulun ene bapan kitane, ngudiang dadi kita tusing subakti teken Ulun? Ulun ene gustin kitane, ngudiang dadi kita tusing ngajiang Ulun? Kita nganistayang Ulun, yadiastun keto kita masih matakon kene: ‘Kadi asapunapike antuk titiang nganistayang Palungguh IRatu?’ 7Kene caran kitane, nah ento malantaran kita ngaturang rayunan ane tan paguna di pamorboran aturan Ulune. Sasubane keto, buin kita matakon kene: ‘Kadi asapunapike antuk titiang nenten ngajiang Palungguh IRatu?’ Ulun lakar ngorahin kita, nah ento malantaran kita ngletehin tongos pamorboran aturan Ulune. 8Yen kita ngaba aturan wewalungan ane buta, wiadin gelem wiadin ane perot di ayun Ulune, apake unduke ento kaden kita tusing pelih? Tegarang kita ngaturang wewalungan ane buka keto teken sang bupati. Apake dane lakar ledang teken kita muah nyuciang kita?”

9Sane mangkin, inggih semeton parapandita sami, indayangja mapinunas, mangda Ida Sang Hyang Widi Wasa nyuecanin iraga. Ida nenten jaga nagingin pangastawan semetone, tur indike punika dados iwang semetone ngraga. 10Ida Sang Hyang Widi Wasa Sane Maha Kuasa, masabda sapuniki: “Ulun ngranayang apang ada anak adiri uli pantaran kitane ane lakar ngubetang jelanan-jelanan perhyangane, buat nyadelin kita lakar ngendihang api ane tan paguna sig pamorboran aturan Ulune. Ulun tusing ledang teken kita. Ulun tusing lakar tampi teken aturan ane aturang kita teken Ulun. 11Bangsa-bangsane uli tanggun gumine abesik nganti teked ka tanggunnyane ane lenan, pada ngluihang Ulun. Dija-dijaja luire, ia pada morbor menyan teken Ulun muah pada ngaturang aturan ane tan paleteh. Ia ajaka makejang pada ngluihang Ulun. 12Nanging kita tusing ngluihang Ulun malantaran kita ngorahang mungguing pamorboran aturan Ulune ento tan paguna, buina kita ngaturang aturan ane cemer sig pamorboran aturane ento. 13Kita ngorahang kene: ‘Beh ambate kewehne unduke ene makejang,’ tur kita laut ngadesem marep teken Ulun. Makadadi aturan kitane teken Ulun, kita laut ngaturang buron malingan wiadin buron ane perot wiadin ane gelem. Apake kaden kita Ulun lakar ledang nampi aturan kitane ento? 14Wastu ibobab ento kena temah, ane ngaturang buron ane tan paguna teken Ulun, nanging sujatinne ia ngelah buron ane melah di pantaran ingon-ingonnyane, ane suba sesangianga lakar anggona aturan teken Ulun. Sawireh Ulun ene Sang Prabu Ane Agung, tur sakancan bangsane pada nungkul teken Ulun.”

Currently Selected:

NABI MALEAKI 1: BAN

Highlight

Copy