NABI YEHESKIEL 4

Nabi Yeheskiel nglawatang indik kota Yerusaleme jaga kakurung

1Ida Sang Hyang Widi Wasa ngandika sapuniki: “Ih manusa, nyemakja bata atebih, laut pejang di arepan kitane. Sasubane keto lantas ukirja batane ento rupayang kota Yerusaleme. 2Sasubane keto gaenang apanga ngenah kotane kakurung. Gaenang diilehan kotane got, gunung-gunungan, pakemahan muah pakakas ane kanggon nomplok gapura muah tembok kotane. 3Laut jemakang besi atebih jujukang satmaka dadi tembok di selagan kitane kalawan kotane ento. Sasubane keto marepanja ka kotane. Ditu lakar sinah kotane ento sajeroning kakurung, tur kita padidi ane ngurung kotane ento. Unduke ento lakar dadi lawat pabuat bangsa Israele.

4-5Sasubane keto medemja kita nyingkrung ka kebot, ditu Ulun lakar mategenang teken kita kapelihan bangsa Israele. Telung atus sia dasa lemeng kita patut masare buka keto buat negen kapelihan bangsane ento. Ulun lakar ngukum kita awai buat nyilurin ukuman bangsane ento ataun. Dadinne kudang taunja makelon bangsane ento kukum, amonto dina makelonne kita kukum. 6Yen kita suba suud keto, laut badingang iban kitane nyingkrung ka tengawan, buat negen kapelihan Yehudane petang dasa dina makelonne, nah ento awai buat dadi silur ukuman iane ataun.

7Nengnengja kota Yerusaleme ane kakurung ento. Amengangja gemelan kitane ka kotane ento, laut ramalangja unduk kotane ento. 8Ulun lakar negul kita apanga kita tusing nyidayang mabading nyingkrung, kanti kotane ento suud kakurung.

9Ane jani kemaja nyemak gandum, jelae, kacang barak ane gede, kacang barak ane cenik, baas muah bulgur. Adukangja gandum muah ane lenan ento dadi abesik laut anggon roti. Rotine ento patut daar kita sanun kitane medem nyingkrung ka kebot telung atus sia dasa dina makelonne. 10Kita dadi naar roti tuah 230 gram awai, aketo patutne kanti ka pamragat. 11Kita masih patut majangka nginum yeh, nah ento tuah duang cangkir awai. 12Kita patut ngendihang api aji tain jlemane ane tuh, laut panggangja rotine sig apine ento, tur lautang daar, apang tepukina baan anake makejang.”

13Ida Sang Hyang Widi Wasa ngandika sapuniki: “Unduke ene nglawatang mungguing bangsa Israele lakar naar dedaaran ane tusing kawenangang baan pidabdabe, dikalan Ulune nyambehang ia di gumin wong sunantarane.”

14Nanging tiang matur sapuniki: “Duh Ratu Sang Hyang Widi Wasa Sane Maha Luur, sampunangja kadi asapunika. Titiang nenten naenin ngletehin dewek titiange. Ngawit saking kantun rare ngantos mangkin titiang nenten naenin nunas bangken wewalungan wiadin wewalungan sane pecak sarap sato galak. Titiang nenten naenin nunas dedaaran sane kabaos leteh.”

15Duaning punika Ida Sang Hyang Widi Wasa raris ngandika sapuniki: “Nah yen keto Ulun nglugrain kita nyilurin tain jlemane ento aji tain sampi, tur lautang panggang rotin kitane ditu.”

16Ida malih nglanturang sapuniki: “Ih manusa, Ulun lakar megatin bekel pabuat kota Yerusaleme. Jlemane ditu lakar pada keweh muah bingung dikalane ia nyangka dedaaran ane daara, muah yeh ane lakar inema. 17Ia lakar pada malaib pesu buat ngalih roti muah yeh. Ia lakar pada telah pepinehne, tur ia lakar kagela-gela ulihan dosa-dosannyane.”

Currently Selected:

NABI YEHESKIEL 4: BAN

Highlight

Copy