Lucas 11

Jesús tokjäty nuu'kxtakk y'ixpëjkpëttëjjk

1Jäm y'ijjty tu'kyaajjë Jesús nyuu'kxta'aky; kuts nyuu'kxtak'awaajt'ëëy nits nyimiijnë nitu'ukën y'ixpëjkpëttëjjk jäts nyëë'mxë:

—Wintsën, ta'awank ëëts nuu'kxtakk, naa'xk Juan Bautista tta'awaany y'ixpëjkpëttëjjk.

2Nits Jesús nyëë'mxëtë:

—Najj mnuu'kxta'aktë't:

"Teety'ajjt tsapjotm, mëjj'ijxy mëjjkexy mxëëw y'itt.

Wä'n mkuttujjkë'n tminy tja'aty.

Jäts tyunë't yaj naxwiiny, mati' tuujnë'p jäjp tsapjötypy.

3Moyky ëëts kääky tojkx mati' ëëts jawom jawom xka'ijjtjääpy.

4Mää'kxtujjkjääky ëëts ntakkoo'ny,

naa'xk ëëts nmää'kxtüky pënjäty ëëts xmutakkoypy.

Katij ëëts takkoo'nyjyötypy xyëkja'aty, jäts yëkjëwa'ak tukkë'yë kya'oywyë."

5Nits Jesús jyaknëë'mxëtë:

—Ku miits nitu'ukën jyeexyë xmëëtë tu'uk muku'uk mati' yëkxon mmëëtnamyaajyë'p, nits tsuu'm x'anëjkxë't tyëjkëntüjpy jäts xnëëjmë't: "Muku'ukënaj, tunmay'ajjt moyky ëjts tuwëëk tsapkääky, 6jä'ku tëj ëjts tu'uk nmuku'uk xnija'aty, jäts kä'ä ëjts nmëëtë tij ntokka'ypy." 7Jäts mmuku'uk jä'yë tyijkypy m'atsowë't: "Katij ëjts xne'emy; tëj ëjts ntëjjk nyëk'attujknë, jäts tëj ëëts nitukkë'yë nmaaktëjjkëkyëjxnë; kä'ä ëjts nwa'anyë nputtë'ëkt nits nyakt mati' mijts mjatsöjkypy." 8Ëjts wamp jäts kä'ä jä' pyuttë'ëkt jakëjx ku xmëëtnamyayë, puttë'ëkp jä' kuwanë jäts mmo'ojë't tukkë'yë tij mka'ijjtxë'p ku mkatsoont jäts tëjjk xwinkojx'atë'ëtst. 9Jäkëjxts ëjts nwa'any: Amatowtë, jäts Yës Teety mmo'ojëtë't; ijxta'atë, jäts xpaat'të't, winkoxtë tëjjk, nits jä' y'awa'atst. 10Jä'ku pën t'amatoop, yëkmoypy jä'; pënpën t'ijxtääpy, pyätypy jä'; pënpënts tëjjk twinkojxp, awaajtsxë'p jä'.

11¿Jäts miits nitteety, mo'op miits jyawë m'uu'nk tu'uk tsaa'ny ku ajkx t'amato'ot, 12ok tu'uk kajjpy ku m'amatowëtë't tu'uty? 13Miits ka'oyjyaa'ytyëjjk, mmoytyë'p miits m'uu'nktëjjk tukkë'yë y'oywyë, ¡Ntsots ntijë'n y'ijxë nteety'ajjt tsapjotm tkamo'ot jyaa'wë'n pënpën amatoo'xë'p!

Ku Jesús yyëknëëjmë jäts mëjjku'ujy myëjk'ajjt yyëktuujnjääpy

14Jäm y'ijjty Jesús tu'uk uum tokniwa'atsy mëjjku'ujy tyumpë; kuts mëjjku'ujy pyitsëëmy, nits jä' uum jaa'y kyajpxpëjjky, jäts jaa'y attëy'ajat ttattantë, 15nits ojts nitu'ukën jaa'y wya'antë: «Mëjjku'ujy nyiwintsën yë' mmoojyë'p mëjk'ajjt jäts yë' ttu'nt.»

16Nits jani'ey, nikoj y'ijjty Jesús tyëkkajpxtakkoywya'antë, jäts tnëëjmjäätyë nits myëj'ajjt tyëknikkä'äxjë'ëkt mati' Yës Teety moojyë'p. 17Jäts Jesús nyijaa'w'eepy jä' y'ijjty ntsoj jä' wyinmaytyë, jakëjxts tnëëjmjaay:

«Ku tu'uk kajjp nyatsyiptunëtë't, nakkyutakkoyëtë'p jä', maj tu'ktëjjk jaa'y nyatsyiptünyëtë tum'akkë'm, nawya'kxkëxëtë'p jä'. 18Jäts ninyajj, ¿ntsoj y'ijxë mëjjku'ujy myëjk'ajjt tjakyëknikkä'äjxjë'ëkt ku tum'akkë'm nyamyutsip'attëtë't? Jakëjxts ëjts nwa'any ku miits mwa'antë jäts mëjjku'ujy nyiwintsënkëjxm ëjts mëjjku'ujy tyumpë nyëkpitsemy; 19pën najjts jä', ¿pënts miits m'ixpëjkpëttëjjk moojyëtë'p mëjk'ajjt jäts mëjjku'ujy tyëkpitsë'mtë't? Pën miits mwantë'p jäts Yës Teety jä' moojyëtë'p, najjts kyä'äjxjë'ëky jäts miits kë'm mkajpxtakkoypy. 20Kuts Yës Teety kyëjxm ëjts mëjjku'ujy nyëkpitsemy, najjts kyä'äjxjë'ëky jäts tëj Yës Teety kyuttujjkë'n mniminyëtë.

21»Tsip mää'tspë jyajjtxë't tyëkkë't tijkypy, pën kumajaaw jä' kuttëjjk jäts jäjp tmëëtë tij nityakkuwaajnë'p. 22Pën mimpts jatu'uk jaa'y jawäänë kumajaaw jäts pyëjkëjjxë't tukkë'yë mati' tsee'my nityakkuwaajnë'p, nits myää'tskëjjxë't tukkë'yë myaay pyëjkta'aky, jäts myuku'uktëjjk ttaniwaajtëkyëxt.

23»Pën ëjts xkapputtëjjk'eepy, xmutsip'eepy ëjts jä', pënts ëjts jaa'y xkatamëëtwaamujkp, yyëkkäkkejxypy jä' oo'ktëy.

Ku mëjku'ujy tyumpë wyimpity

24»Ku tu'uk mëjjku'ujy tyumpë tniwa'atsy tu'uk jaa'y, jäts nyijkxy tëtsta'aky'itjötypy jäjpts t'ijxta'ay maj pyoo'kxt; kuts tkappaaty, nits wyinmay: "Wimpijtnë'p ëjts ntëjkëntüjpy, maj ëjts jäjp npitsëëmy." 25Kuts jä' jya'aty, jäts jä' jaa'y tpaaty naa'xkë'n tëj tu'uk tëjjk wa'ats yëkpe'ety jäts tëj tukkë'yë yëkkon'oyëkyexy. 26Kuts najj t'ijxy nits nyijkxy jäts t'as'ijxta'ay janiwixtujjk myuku'uk mati' ka'oy, najjts nitukkë'yë nyëjkxtë tsënääpyë jäjp, jäts jä' jaa'y oo'ktëy tyäny, kä'ä y'ijjty nyajjë ku tu'ukëm mëjjku'ujy jäjp tsyëënë.»

Pën jotkujjk'ajjt tpaatp

27Niyam y'ijjty najj Jesús yä'äny, ku tu'uk to'oxytyëjjk jaa'y'akujkm kyajpxkeejky:

—¡Mëjjxontaajk jyakyejpypy jä' to'oxytyëjjk mati' myëkkä'äjxë jäts myëkyää'jkë!

28Nits Jesús y'atsooy:

—¡Jä' jaa'y mëjjxontaajk tjakyäjptë'p pën Yës Teety y'aaw y'ayuujk tmatoojjäätyë'p, jäts tkuytyuntë!

Nitu'ukën t'amatowtë Jesús jäts tyëkkä'äjxjë'ëkt myëj'ajjt

29Nits nimay jaa'y jyaknamyujk'atëëjtsëtë jäts tmatoojjëtë't Jesús y'ixpëjjkë'n, nits Jesús nyëë'mxëtë: «Jaa'y mati' ixyam jüky'eetyë'p, ka'oyjyaa'y yë'ëtë; jä'yë yë' ttsoktë t'ijxwa'antë Yës Teety myëjk'ajjt, kä'äts yë' tij t'ok'ijxnëtë't aweky, yë' jä'yë ntsoj ojts Jonás jyäty. 30Najj naa'xk ojts Jonás Nínive'tjaa'y ttuujnë ijxpäjjt, ninyajjts ixyam yaa'ytyëjjk y'uu'nk ttuujnë ijxpäjjt nitukkë'yë jaa'y mati' ixyam jüky'eetyë'p. 31Jä' xëëw ku nijkxy nitukkë'yë jaa'y yëktëytyüny, kuts pyaatë't ya'at jaa'y mati' ixyam jüky'eetyë'p, jäts yëkkuttujkpë to'oxytyëjjk mati' tsoo'mp awa'ajt itjotm jä'äts nijkxy tnikkajpxpety jäts Yës Teety ayoo'njötypy kyäxëtë't; jä'ku jakkämnäxy jä' to'oxytyëjjk tnitsoo'jny jäts tmato'ot wijy ayuujk mati' y'ijjty Salomón nyaskajpx'eepy, ixyamts ëjts nnikkäjpxy jäts jäj yaj tu'uk jaa'y nimëjj, kä'ä jä' y'ijjty nyë'në Salomón. 32Mëët Nínive'tjaa'y nijkxy tyenkyukkëtë nits tnikkajpxpät'të't jäts Yës Teety ayoo'njötypy tkäxt ya'at jaa'y mati' ixyam jüky'eetyë'p; jä'ku ojts Nínive'tjaa'y Yës Teety t'awimpittëtë ku Jonás kya'amaajyëtë, jäts mati' miits ixyam yaj mmukkajpxëtë'p, kä'ä yë' Jonás nyaspaat'ätyë.

Nikkëjjx nyijajjk

33»Nippën tu'uk jaa'y pujjxjëën tkayëktoypyeky jäts tyu'utst, ok tnijupt kajuunpa'tke'py, oo'ktëy jä' tpëmtë këjx'am, jäts tkuno'okt jaa'y pënjäty tëjjk'eetyë'p. 34Yë' mwiin, yë' nikkëjjx tnijajjp tnittëë'kxp; pën oy mwiin, tukkë'yë mnikkëjjx jëën nyijajjë't; pën ka'oyts mwiin, akkootsy'attüjpy jä' tukkë'yë mnikkëjjx y'itt. 35Na'y'ijxy'ittëtë, jäts ajajjk mati' miits mjakyäjptë'p katij pyi'itsy. 36Pën jajjp tëë'kxp mijts mnikkëjjx jäts kä'ä tij yu'utsy y'ity, najjts mijts xnijajjt xnittëë'kxt tukkë'yë naa'xkë'n tu'uk pujjxjëën nyijajjy.»

Jesús twintso'oy fariseostëjjk mëët pawaa'n yëk'ixpëjkpëttëjjk

37Ku Jesús kyajpxkitaajky, nits tu'uk fariseo pyawaajjë kaywyë tyëjkëntüjpy, kuts jäjp Jesús jya'ajty jäts y'ijxtaajky kaytyaajk'aajy. 38Jäts jä' fariseo attëy'ajat ttattaany ku Jesús kä'ä jawyiin kyë'pujjy nits kya'yty, naa'xkë'n jä' tkajjpëtë. 39Jakëjxts Jesús nyëë'mxë:

—Miits fariseostëjjk nikkëjjxy miits jä'yë mnakwya'atsyëtë, jäts m'am mjotm xjakyäptë kya'oywyë mëët tukkë'yë tijjäty tëj xmäätstë. 40¡Miits kawinjaa'w'eepyë jaa'y! ¿Kä'ä xnijawëtë mati' nikkëjjxy tyëk'oy'ëëy, mëët tyëk'oy'ëëy mati' jötypy? 41Mmumatowtë m'aaw mjoojt, puttëkkëtë ayoopëttëjjk mmo'otë tij ka'ijjtxëtë'p, nitnë'mts miits wa'ats mta'ntë't

42«¡Ayoopë miits, fariseostëjjk! Ku miits xyoxtë tukkë'yë mati' mniptë'p mkäjxtë'p mkamjötypy, jäts kä'ä Yës Teety tu'k'aaw tu'kjoojt xtsoktë nikkä' y'oy'ajjtpë xtuujnëtë mmuku'uktëjjk. Yë' jyeexyë jawyiin mtuntë'p, katits mëët xjaa'tyakkoytyë mteeny mkexy xyoxtë't.

43»¡Ayoopë miits, fariseostëjjk! Ku xtsoktë jäts käjxta'aky m'it'të't maj jaa'y yo'ymyuktë, jäts mëët xtsoktë wintsë'ëkë jaa'y mkë'paattëtë't tuu'aajy.

44»¡Ayoopë miits, najj mkä'äxtë naa'xk maj tëj tu'uk oo'kpë yëknittajjë jäts kä'ä kyä'äjxjë'ëky, nits jäj jaa'y yo'oytyë nyaxtë, ku tkanijawëtë!»

45Nits tu'uk pawaa'n yëk'ixpëjkpë y'atsooy:

—Wintsën, ku najj mwa'any mëët ëëts xmukkajpxtakkoy.

46Jäts Jesús y'atsooy:

—¡Ayoopë miitsmë, pawaa'n yëk'ixpëjkpë!, Ku miits jaa'y xta'akkuwanë jäts tkuytyu'ntë't pawaa'n mati' tsip tsu'ux, jäts miits kë'm kä'ä xtsoktë jakwäänë xkuytyu'ntë't.

47¡Ayoopë miits!, Ku xnippotstë maj yëknittajj'eetyë yëk'ayuujknajxpëttëjjk, mati' miits m'ap m'ok yëk'oo'këjxtë. 48Ku najj m'atë'ëtstë najj yë' kyä'äjxjë'ëky jäts m'ojyaa'w'eetyë'p ntsoj m'ap m'ok y'atëtstë, jä' jaa'y tyëk'oo'ktë jäts miits mnipojjtsjäätyë'p maj yëknittajj'eetyë.

49Jäkëjxts Yës Teety nyijaa'w'ëë'ny ojts tkäjpxy ku wyaany: "Ntanikkäxp ëjts miits apóstolestëjjk mëët yëk'ayuujknajxpëttëjjk, nitu'ukën miits nijkxy xyëk'ooktë jäts mati' ta'ntë'p kä'ä jä' jotkujjk xyëktsëënëtë't jä'yë jä' xpanaxtë't xpattëkkëtë't xyëk'ookwa'antë't." 50Miits nijkxy myëktappayo'oytyë yëk'ayuujknajxpëttëjjk jyüky'ajjt, mati' yëk'oo'k'axajjtë nit'eewyë ku it naxwiin tsyoo'ntaajjky, 51nit tsyoo'ntajjky ku Abel ojts tyëk'ooktë nits Zacarías takkukkëjjx'ëëy, mati' ojts tyëk'ooktë itkujjky maj Yës Teety yëkwintsë'ëkë jäts tsaptëjjk. Ixyam ëjts nnikkäjpxy jäts miits nii'xyë'n ixyam mjükyëtë, miits nijkxy Yës Teety mtappayo'oyëtë jä' jaa'y jyüky'ajjt.

52¡Ayoopë miits, pawaa'n yëk'ixpëjkpëttëjjk!, Yëkxon miits xnijawë ntsoj y'ijxë Yës Teety n'ijx'ajjtë'n; kä'äts miits xtajottakkoytyë jäts x'ijxëtë't nikkä' mëët xtsoktë jäts t'ijxëtë't pënjäty tja'ijxëwyantë'p.

53Kuts Jesús tsyoo'në jäjp, jäts yëk'ixpëjkpëttëjjk mëët fariseostëjjk mëjk ojts y'ampëktë, nits oytyii'jë tyëktëë'axajjtë, 54jä'äts y'ijjty jä'yë tsyojktë'p jäts Jesús kyajpxtakko'yty.

Currently Selected:

Lucas 11: LUKMya

Highlight

Copy