San Mateo 4

Ja winëëmpa ojts tsots ix jä Jesús

(Mr 1.12-13; Lc 4.1-13)

1Wa'nit jä Kunuukx poj tyajknïkx jä Jesús jäm apajk ijt jootm, jäts jä winëëmpa tsyots ixet.

2Wa ijt wïxkepx xëë wïxkepx tsuu nitiya ojts tka kaay tka uuk wa'nit ojts jä yuu tjawene. 3Wa'nit jä winëëmpa ojts tmuwintema jää Jesús jäts tsots ixet, jäts tnïmye:

—Pen Kunuukxtee y'unejk mits, nëjma yë tsaa jäts tsapkaaky ju'n twimpite.

4Wa'nit jä Jesús y'atsoowe:

—We'en japyet wya'any: Ka'a tsapkaaky këxap jaye tyum juukyat, naywe'en pën tkutyuump tukëye jä Kunuukxtee pyawanen.

5Wa'nit jä winëëmpa yajknëjkxe jäm mëj kajpen Jerusalén it jootm, jäm tsaptëjko'm wats këxm yajkpäjte 6jäts yajknïmye:

—Pën Kunuukxtee y'unejk mits, naakistekasnit; jäp japyet wya'any:

Kunuukxtee tkäxep jä y'angel jäts m'ixitet.

Jää m'amatsjap kyë'ë këxm,

Jäts ka tii tsaa xkunëjkxa jäts mtsaatsyat.

7Wa'nit jä Jesús y'atsoowe:

—Naywe'en japyet wya'any: Ka'a xtsots ix jä mWintsën Kunuukxtee.

8Wa'nit tyajknëjkxkome jäm kopk këxm juu wa'ts këxm, jäts tuuk ixkïx tsoj jä tujk ijt ja tujk naax jä jyotkujkenta jäts tsoj jä nyimëjen jä naaxwiinete, 9jäts yajknïmye:

—Nijum yëë nkëyakëxet, pën xwinkuxtenyep ëts x'ajootep ëts.

10Wa'nit jä Jesús y'atsoowe:

—Nëjkxe, mits winëëmpa, we'en jäp japyet wya'any: Ajoota mits jä mwintsën mKunuukxtee, jää mits tujkjëpxïp m'tuunjap.

11Wa'nit jä Jesús jä winëëmpa ojts winwajkwatsene, xäj jä angelestëjkta nyamyukete jäts tmutuunte jä Jesús.

Jä Jesús ojts tsoontejk jä tyuunk

(Mr 1.14-15; Lc 4.14-15)

12Ku jä Jesús ojts tnijawa jäts të jä Juan yajkpujxen tëjk pïm, xa nyïjkx jäm galilea ijt jootm. 13Jäts ka' jäm tsyinye Nazaret it jootm, jäm ojts tsyïna Cafarnaúm ijt jootm, Galilea myu'ut pa'am, juma jyukyete jä Zabulón jäts Neftalí ijt jootmta. 14Jää kukexepa we'en jya'ty jäts kyutyunkëxet juu jyaay jä kukexepa Isaías:

15Zabulón jäts Neftalí nyaax,

jatu'k atum jä jordan,

jäm maaxy në'ë pa'am:

jäm tsyëneta jä japyeejkx jayeta, jäm Galilea ijt jootm.

16Ja kajpen juu akoots ijtep juukyetep

ixtap jä mëj kunojken;

tujk jä kunojken ojts tïjkx

pen pën maaytep tajtep tsëjketa jä ooken kujajete kunojkete jawe.

17Wa'nitjye jää Jesús ojts tsoontejk t'awana t'ayaaxa: Awimpiteta jä Kunuukxtee, paaty ku wintemep ej jä kutujken juu jäm tsapjootm.

Jesús ojts twinken majktaxk jää ajkx maajkpata

(Mr 1.16-20; Lc 5.1-11)

18Jäm Galilea Nyë'ëpa'ay wyena nyaxy jää Jesús, Ku t'ixpaaty mätsk jä jaye tujk kä'äxta: Tujk xyëë Simón, nay jää txëë Pedro, jäts jä tujk Andrés. Ajkx määjky ijt tyuunketep, tewan wyena xyuum tnë'ëwejeta. 19Wa'nit jä Jesús ojts nyë'ëmxeta:

—Payo'oyta ëts, wa miits mtuuntep ajkx maajky jäts xyam miits ntuunk nmootat jää mtuntap jäts jä jayeta xwatsowtat jäts ëts xpayo'oyet.

20Wa'nitjye tmajktsooktene jä xyuumta jäts jää tpanëjkxtene.

21Wään wyena yo'oyta, ku jä Jesús t'ixpaaty jä nimäjtsk jä ya'atyëjkta tujk kä'äxta: Santiago jäts Juan, Zebedeo myajktëjkta, jäm wyeneta mëët tyee barca jootm xyuum tyajk'oyeta. Wa'nit jä Jesús tweew jä Zebedeo myajktëjkta, 22wa'nitjye tmajktsooktene jä tyee jäts jä xyuumta, jäts tpanëjkxtene jä Jesús.

Jesús jä may jaye tyajk'ixpïjk

(Lc 6.17-19)

23Wa'nit jä Jesús t'ayo'oy tukëye jäm Galilea ijt këxm, jäts yajk'ixpïjk jäm ixpëjkentëjkm jäm tujk kajpen jä tujk kajpen. T'awana jä kutujken jä oy kets oy ayuuk jäts jä jaye tyajktse'ejk jäts tyajkpa'amnitwatsy. 24Nijum jä Siria it jootm tnijawetene tkostene t'riijktene jä Jesús ntso jä jaye tputëjka o'k tyajktse'ejk, jäts tuninëjkxta jä Jesús pen pën jaty ampaatp tsyaatsy paatp, pëjketep aanetep, jäts jä juu ko'opyamap pëjketep jäts jä juu päjkmäjt. Yajktseekp jä Jesús.

25May jä Galilea jayeta, jä kajpen Decápolis, jäts jä Jerusalén, jäts jä Judea jäts jä ijt Jordan y'anuuxem tpayo'oyta jä Jesús.

Currently Selected:

San Mateo 4: JKAYUUK

Highlight

Copy