Sabiduría 4
4
1Ñumeñ ñuk ik'äjñibal che' tojbä lak melbal
che' loñ añ ka'bäl la ka'lobilob.
Jiñi tojbä imelbal
pejtelel lak pi'älob mi' chäñ k'ajtesañob,
che' ja'el Lak Ch'ujutat
temel yik'ot pejtelel wiñikob x-ixikob
mi' chäñ ña'täbeñob imelbal.
2Jiñi tojbä imelbal
uts'atäch che' mi' ilajiñob iñusak'iñ,
yik'ot che' ma'añix wä'añ la jkik'ot,
mi' ichäñ k'ajtesäñtelob.
Jiñi wiñikob tojbä imelbal
ti' pejtelel k'iñ mi' ichäñ mälob majlel,
kome tojäch pejtelel chuki tsa'bä imäläyob.
Jiñ cha'añ, Lak Ch'ujutat ya' ti pañchañ
mi ikaj iyäk'eñob ich'äjlil joläl
machbä ma'añik majki mi' ichilbeñ.
3Jiñi iyalobilob xjoñtolob
mi' iyilañob pañämil ti' kaj jiñi tik'bilbä tajbä.
Mach jiñ yälä che' ka'bälob
mach tijikña mi' ikajel ijoloñelob;
lajalob bajche' te'tak machbä tsätsik wa'al ti' ilumil
mi tamik iwi' mi' iyäk'.
4Mi jiñik yälä che' jiñi iyalä k'äb
mi weñ kolel majlel,
mi ikaj iyämts'uñ ik'
yik'ot mi ikaj ibujchelob lok'el ti' tojlel chäk ik'lel,
kome mach tamik iwi' ti imalil lum.
5Iyalä k'äbtak mi ikaj ti xujlel che' maxto k'otem ik'iñil,
yik'ot ma'añik majch mi ikaj ik'uxbeñ iwut
cha'añ mach k'äñ-atak.
6Jiñi alälob mu'bä iyilañob pañämil
ti tajbä tik'bilbä,
jiñäch iyejtal imulil itat iña'ob.
Jiñ cha'añ Lak Ch'ujutat mi iyäk'eñob toj mulil itat iña'ob.
Che' se'b mi' ichämel jiñi tojo'bä
7Jiñi tojo'bä
mi tsa' chämi che' weñ ch'itoñto,
mi kaj itaj iñäch'tälel ipusik'al.
8Jiñi añobixbä ija'bilel k'elbilo'bä ti ñuk,
mach jiñobik tsa'ixbä weñ jaleyob ti pañämil.
Mach mejlik lak p'isbeñ ixukt'älel ipusik'al
yik'ot bajche' itamlel ija'bilel.
9Jiñi ixuktälelob lajaläch che' bajche' isäklel itsutsel ijol
yik'ot iñoxlelob, jiñäch tojbä kuxtälel.
10Tsa' ajñi ti pañämil juñtikil xuk'ulbä wiñik
tsa'bä imele pejtelel chuki mu'bä imulañ Lak Ch'ujutat,
che' jiñi, jiñi Lak Yum tsa' iweñ k'uxbi.
Kome ya' tsa' chumle ba'añ xjoñtolob,
Lak Yum tsi' ipäyä majlel ti chumtäl ti' itojlel.
11Tsi' ipäyä majlel cha'añ jiñi joñtolil
cha'añ ma'añik tsi' iyäsibe iña'täbal,
yik'ot cha'añ ma'añik tsa' yajli ti lotiñtel
ti u'yaj t'añ.
12Jiñi joñtolil yom ijisañ chuki tojbä;
jiñi ikolosojlel pañämil
mi ik'am-esäbeñ iña'täbal jiñi tojo'bä.
13Añ ka'bälob oñ ija'bilel yomob
cha'añ mi' itajob iña'täbal,
ixku jiñi mu'bä ik'uxbiñob Lak Yum
se'el jach mi' itajob iña'täbal.
14Awilañ, cha'añ uts k'elbil ti Lak Ch'ujutat,
jiñi mi' ipäy majlel cha'añ mi' lok'sañob ba'añ joñtolil.
Jiñi wiñikob x-ixikob mi ik'elob iliyi
ixku ma'añik mi ich'ämbeñob isujm,
15kome mach yujilo'bik cha'añ jiñi Lak Yum
mi' ik'uxbiñ, mi' ikäñtañ yik'ot mi' ipi'äleñ
jiñi yajkäbilo'bä icha'añ.
Imälbal jiñi tojo'bä
16Isajtel jiñi tojbä wiñik,
mi yäk' ti toj mulil jiñi xjoñtolob.
Jiñi tojbä ch'itoñ yik'ot ambä iña'täbal
mi' bäk' k'otel iña'tañ pañämil
mi' iyäk' ti toj mulil tambä ikuxtälel jiñi xjoñtolob.
17Che'bä jiñi wiñikob
mi' ik'elob ti chämel juñtikil ambä iña'täbal,
ma'añik mi ik'otel ich'ämbeñob isujm
chuki yom Lak Yum ti' itojlel.
Che' ja'el mach yujilo'bik chukoch
jiñi Lak Yum tsi' ipäyä majlel ya' baki xuk'ulbä ajñibäl.
18Jiñi xjoñtolob mi' itse'tañob
che' mi' ik'elob ti chämel jiñi ambä iña'täbal;
awilañ ti wi'il jiñäch Lak Yum
mu'bä ikaj iwajleñ ti itojlel jiñi xjoñtolob.
19Che' mi' ichämelob jiñi xjoñtolob
ma'añik majch mi ichäñ k'ajtesäñtel ti k'uxbiñtel.
ñajt mi' kaj ichojkelob lok'el ti' itojlel Lak Ch'ujutat;
yik'ot ma'añik mi' ikaj iyäjk'elob iyälob mi che'ik wistäl it'añ.
Jiñob ma'añik baki bä k'iñ mi' ikaj ikäyob
jiñi ajñibäl icha'añ xchämeño'bä.
Lajalobäch che' bajche' jump'ejl jejmeñixbä otot,
ti' pejtelel k'iñ mi' ikajel iyu'biñob wokol,
yik'ot ma'añik majch mi kaj ik'ajtesañob.
Jiñi itoj mulil xjoñtolob
20Che' mi' iyu'biñob ipäjyel ti Lak Yum,
tsiltsilñeyob mi ikajelob ti bäk'eñ xjoñtolob.
Che' Lak Yum mi' yäk'eñob itoj mulil,
jiñi imulil mi ikaj iyäk'ob ti käjchel.
Currently Selected:
Sabiduría 4: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM