Sabiduría 11
11
Ixämbal israelitajob ti' tikiñal lum
1Jiñi ña'täbaläl tsi' yäk'e imäloñel itejklum Israel,
ti' itojlel iye'tel jiñi Moisés,
jiñäch ñumeñ ñukbä x-alt'añ icha'añ Lak Ch'ujutat.
2Jiñi israelitajob tsa' ka'xiyob majlel ti kolem tikiñal lum
yik'ot tsi' iwa'chokoyob ilejchempat
ya' ti lum baki ma'añik majch mejl ti k'otel.
3Tsi' ikoltayob ibä ti' itojlel its'a'leyajob
yik'ot tsi' imälbeyob ti' itojlelob.
4Che' tsa' kaji iyu'biñob tikiñti'
tsa' kaji ipejkañetob, kYum;
jatet tsa' awäk'ä ti pasel ja' ya' ti jump'ejl xajlel,
cha'añ che' jiñi ma' lajmesäbeñob itikiñti'.
Itojmulil its'a'leyajobä icha'añ Lak Yum
5Pejtelel chukitak tsa'bä ak'äñä cha'añ itojmulil
jiñi xts'a'leyajob icha'añ jiñi atejklum,
tsa' ak'äñä ja'el cha'añ ma' akoltañ atejklum Israel.
6Jiñi iya'lel jiñi ñoj ja' ik'aba' Nilo
tsa' pajmi ti ch'ich' yik'ot ti ok'ol.
7kYum, jiñäch jiñi itoj mulil
tsa'bä awäk'eyob jiñi egipciojob
che'bä jiñob tsi' cha'leyob xik'oñel cha'añ mi' itsänsäñtel
jiñi alälob icha'año'bä atejklum.
Ti' pejtelel xchumtälob ti atejklum,
tsa' awäk'eyob oñbä yäxbä ja'.
8Tsa' awäk'eyob iyu'biñob tikiñti' jiñi israelitajob,
cha'añ awom apäsbeñob
bajche' mi' awäk'eñob itojob imul xts'a'leyajob icha'añ
ti' kaj bi'bi'bä ijoñtolil.
9kYum lojoñ, ti jiñi jachbä k'iñ
che' woli atoj-esañob jiñi atejklum ti ak'uxbiya,
tsa' wäk'eyob iyu'biñob wokol jiñi xjoñtolob.
10Jiñi atejklum Israel
tsa' atoj-esa che' bajche' juñtikil tatäl mi itoj-esañ iyalo'bil,
ixku jiñi xts'a'leyajob icha'añob,
tsi' awäk'eyob itojob imul
che' bajche' juñtikil yumäl ñukbä ip'ätälel
mi iyäk' ti toj mulil jiñi its'a'leyajob.
11Ka'bäl tsi' yu'biyob wokol jiñi egipciojob
che' ya'añob ti iyotot yik'ot che' ñajt añob.
12Che'bä tsi' ik'eleyob chuki woli iyujtel ti itojlelob,
tsa' ñuk'a ich'ijiyemlel yik'ot ik'uxel ipusik'al.
13Yik'ot che'bä tsi' ik'eleyob cha'añ jiñi itoj mulil
cha'añäch mi' itoj-esäñtel israelitajob,
tsi' iña'tayob cha'añ jatet, Iyumetbä Israel,
jatetäch jiñi tsa'bä imele pejtelel jiñi.
14Che' alälto jiñi Moisés
jiñi egipciojob tsi' iña'ta itsäñsañob,
ti wi'il tsi' iwajleyob yik'ot tsi' bi'leyob,
ixku ti' yujtibal tsa' iñuk'esayob cha'añ ich'ejlel.
Jiñi wokolil tsa'bä yu'biyob xjoñtolilob
mach che'ik bajche' itoj-esäñtel tsa'bä awäk'e atejklum.
Lak Ch'ujutat añäch ip'ätälel yik'ot ip'uñtaya
15Jiñi egipciojob tsi' ich'ujutesayob lukumtak
yik'ot yañtakbä bi'bi'bä bälmate'el.
Tsi' icha'leyob che' bajche' jiñi cha'añ joñtolob
yik'ot cha'añ ma'añobik ts'äkäl iña'täbal.
Jiñ cha'añ, cha'añ mi' itojob imul
jatet, Iyumetbä Israel, tsa' achokbeyob tilel
ka'bäl ichäñil pañämil
yik'ot jäläkñe'bä mi' icha'leñ xämbal ti pam lum.
16Che'äch bajche' iliyi, tsa' akäñtesayob
cha'añ che'äch bajche' tsi' cha'leyob mulil,
ti wi'il jatet mi ikaj awäk'eñob itojob imul.
17Awilañ, mach wokolik,
cha'añ mi' achokbeñ tilel joñtolbä bäte'eltak ti itojlelob.
Kome, jatet, kCh'ujutat,
tsa' amele pañämil ti' ap'ätälel;
¡Jatetäch kCh'ujutat machbä añik ip'isol ip'ätälel!
18Che' ja'el tsa' mejli achokbeñob tilel
ti' tojlel jiñi egipciojob,
bäbäk'eñtakbä yik'ot bi'bi'bä bälte'eltak,
machbä k'elbilik icha'añob.
Bälte'eltak bi'bi'bä mi' iyujk'ijelob,
yik'ot yujilbä ilok'sañ buts' yik'ot k'ajk ti iyej,
yik'ot che' t'i'slaw alä k'ajk mi lok'el ti iwut.
19Jiñi bäbäk'eñtikaxbä bälte'eltak
ma'añik chuki tsi' meleyob cha'añ mi' ijisäñtelob,
jasäljach mi' iyilabeñob iwuttak
cha'añ mi' chämelob ti bäk'eñ jiñi egipciojob.
20Che' ja'el, jatet mejl abajñel jisañob mi che'ik awom,
jasäl jach che' ti wistäl iyik'el ati',
che' ma'añik tsa' ak'äñä jiñi bi'bi'takbä bälte'el.
Che'äch bajche' jiñi, tsa' mejli iyu'biñob ap'ätälel
yik'ot tsi' ich'ämäyob itoj mulil.
Awilañ,
jatet ma' amel che'äch bajche'
xuk'chokobilbä k'äläl ti' tejchibal.
21Jatet mejlet ak'äñ ap'ätälel ti bakijachbä k'iñ,
che' jiñi ma'añik majch mi' mejlel ilät' ip'ätälel ak'äb.
22Jiñi pañämil ti atojlel
lajal bajche' juñpijt alä ji' ya' ti p'isoñibäl,
che' bajche' juñchäjk' ye'eb ti' yopol te'.
23Ixku jatet mi' alaj p'uñtañob ti' pejtelel,
kome mi' ilaj mejlel amel chuki awom.
Che' ja'el mi' apäs awutslel majki mu'bä ti mulil,
yik'ot mi' apijtañ cha'añ mi' ik'extañ ipusik'al.
24Jatet mi' alaj k'uxbiñ ti' pejtelel chuki añ
yik'ot ma'añik mi' ats'a' k'el tsa'bä amele,
mi añ chuki ts'a' mi' ak'el,
ti' itejchibal ma'añik tsa' amele.
25Ma'añik chuki mejl ajñel ti pañämil
mi' jatet mach che'ik awom.
26KCh'ujutat, jatet utset ti ktojlel lojoñ,
kome acha'añ pejtelel chukitak añ,
yik'ot mi' alaj k'uxbiñ ti' pejtelel.
Currently Selected:
Sabiduría 11: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM