Ester (Griego) 9
9
Jiñi judiojob mi' ijisañob xts'a'leyajob
1 Tsa' k'oti jiñi uxlujump'ejl k'iñ cha'añ uw ik'aba' Adar, che' yomix its'äktiyel jiñi ts'ijbubilbä ixik'oñel yumäl cha'añ mi' ijisäñtelob jiñi judiojob. Awilañ, tsa' ujti chuki machbä ña'tabilik icha'añob; ti jiñbä k'iñ jiñi judiojob tsi' imälbeyob ti' tojlel ts'a'leyajob icha'añ. 2 Ti' joytilel iyumäñtel Asuero, jiñi judiojob tsi' tempayob ibä ya' ti tejklum baki chumulob, chajpäbilo'ibä cha'añ mi' ijisañob yombä itik'lañob. Ixku ma'añik majki tsi' iñopo iyotsäbeñ ibä, awilañ, wäle wolix ibäk'ñäñtelob jiñi judiojob. 3 Che' ja'el, che' wolix ibäk'ñäñtel Mardoqueo, ti' pejtelel año'bä iye'tel tsa' ikoltayob judiojob, 4 awilañ, wäle añix ñukbä iye'tel ya' ti yumäñtel. Mardoqueo tsa' käjñi ti joytilel tejklumtak, ti jiñbä k'iñ tsa' kaji iñuk'añ ip'ätälel.
5 Jiñi judiojob tsi' ch'ämäyob ijek'oñib, ya'i tsi' laj tsäñsayob pejtelel xts'a'leyajob. 6 Che' ja'el ya' ti Susa tsi' tsäñsayob jo'k'al icha'bajk' (500) wiñikob, 7-10 tsi' tsänsäbeyob ja'el ti' lujuñtiklel iyalobilob Amán: Parsandata, Dalfón, Aspata, Porata, Adalía, Aridata, Parmasta, Arisai, Aridai yik'ot Vaizata. Ixku ma'añik tsi' ch'ämbeyob ichu'bä añ icha'añ.
11 Ti jiñi jachbä k'iñ tsi' isu'beyob jiñi yumäl jaytikil tsa' chämiyob ya' ti Susa. 12 Che' jiñi, jiñi yumäl tsa' kaji isu'beñ Ester:
—Ya' ti Susa jiñi judiojob tsa'ix itsäñsayob jo'k'al icha'bajk' (500) wiñikob, yik'ot lujuntikil iyalobilob Amán. ¡Mik ña'tañ che'äch tsi' tsäñsayob ti lajal wiñikob ti yañtakbä kolem tejklum ti kyumäñtel! ¿Chukito yambä mi' amulañ? K'ajtibeñoñ chuki awom, cha'añ joñoñ muk'äch kaj käk'eñet.
13 Ester tsi' ijak'be:
—Mi che'äch yom kyum, kom cha'añ ijk'äl ja'el mi yäjk'elob ijisañob xts'a'leyajob cha'añ judiojob ya' ti Susa. Kom ja'el cha'añ jiñi ibäk'tal jiñi iyalobilob Amán mi' iyajpañ pästälob ya' ti' yojlil tejklum.
14 Jiñi yumäl tsi' cha'le xik'oñel cha'añ che'äch mi' mejlel; jiñi ts'ijbubilbä juñ ambä icha'añ xik'oñel tsa' ajk'i ti Susa.
15 Jiñi judiojob ya'bä añob ti Susa tsi' tempayob ibä ja'el che' ti chäñlujump'ejl (14) k'iñ ti uw ik'aba' Adar yik'ot tsa' itsäñsayob jo'lujunk'al (300) wiñikob, ixku ma'añik tsi' ch'ämbeyob ichu'bä añ icha'añ.
16-17 Jiñi yañtakbä judiojob pam pujkemo'bä ti kolem tejklum iyumäñtel yumäl tsa' itempayob ibä che' ti uxlujump'ejl k'in cha'añ uw Adar cha'añ mi' koltañob ibä yik'ot mi ikojlelob ti' itojlel xts'a'leyajob. Ti jiñi jachbä k'iñ tsi' tsäñsayob waxäklujunbajk icha'pijk (14,400) wiñikob, xts'a'leyajob ti' tojlel judiojob, ixku ma'añik tsi' ch'ämbeyob ichu'bä añ icha'añ. Ti chänlujump'ejl (14) k'iñ tsa' ik'ajayob iyoj yik'ot tsa' kajiyob imelob k'iñijel cha'añ tsi' imäläyob. 18 Ixku jiñi judiojob ya'bä añob ti Susa tsi' tempayob ibä che' ti uxlujump'ejl (13) k'iñ yik'ot ti chänlujump'ejl (14) k'iñ cha'añ mi' ikoltañob ibä, yik'ot che' ti jo'lulump'ej (15) k'iñ tsa' imeleyob k'iñijel ja'el. 19 Jiñ cha'añ jiñi judiojob pam pujkemo'bä ya' ti tejklumtak yumäñtel tsa' iyajkayob jiñi chäñlujump'ejl (14) k'iñ che' ti uw Adar bajche' k'iñiläch k'iñijel, yik'ot ti jiñbä k'iñ mi' ijel k'extäbeñob ibä majtañäl. 19a Ixku, jiñi judiojob año'bä ti kolem tejklumtak mi' imelob k'iñijel che' ti jo'lujump'ejl (15 ) k'iñ ti uw Adar yik'ot ka'bäl tijikñäyel, che' ja'el mi' iyäk'beñob ibä majtañäl.
Jiñi k'iñijel Purim
20 Mardoqueo tsi' icha'le xik'oñel cha'añ mi' its'ijbuñtel chuki tsa' ujti, yik'ot tsi' ichokbeyob majlel juñ ti' pejtelel judiojob ti' yumäñtel Asuero, cha'añ chumulo'bä ti läk'älbä tejklum bajche' ñajtbä añob. 21 Ya' ti juñtak Mardoqueo woli icha'leñ xik'oñel cha'añ, ti ja'ja'bil, che' ti chänlujump'ejl (14 ) k'iñ yik'ot jo'lujump'ejl (15) k'iñ ti uw Adar mi' mejlel k'iñijel, 22 cha'añ mi' ik'ajtisäñtel jiñi uw yik'ot k'iñtak che' jiñi judiojob tsa' kojliyob ti' tojlel ixts'a'leyajob icha'añob, yik'ot jiñi wokolil yik'ot ich'ijiyemlelob tsa' sujti ti' tijikñäyel. Ti jiñtakbä k'iñ cha'añbä k'iñijel, mi' ikajel iyäk'beñob ibä majtañäl, yik'ot mi' ikajel ikoltañob jiñi p'umpuño'bä. 23 Jiñi judiojob tsa' iyäläyob it'añ cha'añ its'äktesañ bajche' tsa' icha'le xik'oñel Mardoqueo, che'äch bajche' tsa'ix imeleyob.
24 Amán, its'a'leya judiojob, tsa' iña'ta cha'añ mi' ijisäñob, yik'ot tsi' icha'le alas cha'añ mi' ikäñe' jala mejl itsäñsañob yik'ot mi' ijisañob. 25 Ixku jiñi Ester tsa' majli ba'añ yumäl, iliyi tsi' yäk'ä ti ts'ijbuñtel ixik'oñel cha'añ Amán mi' iyäk'eñtel itoj imul cha'añ joñtolbä iña'täbal. Tsa' icha'le xik'oñel cha'añ Amán yik'ot iyalobilob mi' ilaj jijch'elob. 26-27 Jiñ cha'añ jiñi ili k'iñtak käñbil bajche' ik'iñijel Purim. (Purim yom iyäl «alas yajkaya» ti it'añ jiñi Hebreojob ti oñiyixbä k'iñ).
Jiñi judiojob tsa' iyäläyob it'añ cha'añ mi' imelob jiñi k'iñijel, ti' kaj cha'añ laj ts'ijbubilbä ya' ti juñ icha'añ Mardoqueo, yik'ot ja'el ti' kaj cha'añ wokol tsa'bä iyu'biyob yik'ot tsa'bä iñusayob. Tsi' cha'leyob xik'oñel cha'añ ti ja'ja'bil, bajche' jiñob temel yik'ot iyalobilob yik'ot ibutsob mejl ich'ujutesañob ili cha'p'ejl k'iñ k'iñijel, che'äch bajche' mi' iyäl baki ts'ijbubil. Che' ja'el tsi' ña'tayob cha'añ yom imejl ja'el ili k'iñijel pejtelel ipi'älob mu'tobä ikajel ich'ok'añ, yik'ot pejtelel mu'bä ikajel imuchk'iñob ibä ti' itojlelob. 28 Mi juñtiklelik judío mejl ti ñajäyel icha'añ imel k'iñijel Purim. Ti' pejtelel tejklumtak yom mi' imelob k'iñijel yik'ot mi' k'ajtisäñtel ili k'iñtak.
29-30 Jiñ cha'añ Ester yik'ot Mardoqueo tsa' its'ijbayob icha'k'ejlel juñ, baki woli ipäs yustlel yik'ot iweñlel, cha'añ mi' iyäk'beñob itsiklel jiñi k'iñijel. Tsa' chokbeñtiyob majlel ti' pejtelel judiojob ya'bä woliyob ti chumtäl ti wukp'ej iwukk'al (127) kolem tejklum ti' yumäñtel Asuero. 31 Ya' ti juñ ts'ijbubilbä, Ester yik'ot Mardoqueo woli icha'leñob xik'oñel cha'añ pejtelel jiñi judiojob yik'ot ip'olbalob yom mi' imelob k'iñijel ya' ti tsik albilixbä, che'äch bajche' ñämäl mi' imelob. Che' ja'el mi' iyälob ya' ti juñ bajche' melbil jiñi ch'ajb yik'ot bajche' mi' isu'bob iwokolel. 32 Jiñäch Ester majki tsi' iyälä it'añ cha'añ mi' imejlel jiñi k'iñijel Purim, yik'ot jiñi t'añtak tsa' ts'ijbuñti ti juñk'ejl juñ.
Currently Selected:
Ester (Griego) 9: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM