Luuka 12

Soowooperera

1Ehuhuweene yeele, ethukumanneene atthu ancipale moota wooweera yaapacera okwattulana mukina ni mukhwaawe, Yeesu aapacera wuuluma toko ni oohuseraawe eeraka: “Mwiipasoope ni eferementu ya aFarisi* eyo tiiyo yoowiixeera. 2Itthu sootheene siri wiiphini, nsooneleliwe, nitho itthu sootheene soovithiwa, nsisuwelihiwe. 3Yeeyo muhimmaanyu mpiphini, eniyiiwiwe othana, ni seiyo nyuwo mwaapiyaanyu mpaani, nsilaleiwe vanipathoni. 4Miyo kinooleelani, asinthamwenaaka, muhiwoove yaawo aniiva erutthu ni vahoolowaya kheewo angweraaya. 5Vano Miyo kinoowooniherani taani ontthuneya omoova. Mmoove Yoole oneera iiva erutthu, onooweratho ovonyera mmooroni. Aani, Miyo kinooleelani: mmooveke Yoowo. 6Khaanthumihiwa masiri mathanu wa makhoobiri meeli? Wa soothesene, khaniwowo naari nimoha a yaale ninttiwaliwa ni Muluku. 7Mpaka mayihi ootheene a mmurumwanyu ari oowaalikeliwa. Muhoove, nyuwo mootthuneyaxa opwaha masiri mancipale. 8Miyo kinooleelani: ootheene onkilapa vamaithoni wa atthu, Mwaana a mutthutho anaamuromole vamaithoni wa andyelo a Muluku. 9Vaheera yoole onkikhootta vamaithoni wa atthu, anaakhoottiwe vamaithoni wa andyelo a Muluku. 10Yoole ommuulumela Mwaana a mutthu, anaaleveleliwe, mene yoole omveiha Munepa Wootteela, kharwa aleveleliwa. 11Mwaaronghiwaka muSinagogani* ni ohoolo wa asitokweene ni atthu anlamula, muheeteteiye ni moota heeni muneeraanyu mwiixaakihe, hoye hoye mweere, 12niwoko ehuhuweene yeeyo Munepa Wootteela oniwooxuttiheni yeeyo entthuneya weera muhime.”

Yoolikanyiha ya namapuha oohikhalano miruku

13Mukina a atthu ancipale aamweerela: “Muhusiha, munleele munnaka weera akikawele yoohiyeriwa*.” 14Yeesu aamwaakhula: “Mulopwana, taani okithanlale okhala Mphukaanyu, hoye hoye Namakawaanyu?” 15Vano aaweerela: “Mwiipasoope! Musembe wakhalaru moota wa wiinlela mihakhu, niwoko okumi wa mutthu ti woopwahaxa sooreelasawe.” 16Aahaathalihera yoolikanyiha ela: “Ematta ya namapuha mmoha yaaruwera vancipale. 17Owo aahuupuwela muneenaawe: ‘Keereke hai? Nkinono woothokorora soohephasaka.’ 18Vano aaheera: ‘Koosuwela kineeraaka kipake. Kinrowa okankhanyula matathaaka ni oteka makina matokweene, ni mmo kinoothokorora etriguwaaka ni sooreelasaka. 19Miyo nkiixeerele: ‘Nyuwo mookhalano sooreela sincipale soothokororiwa wa iyaakha sincipale. Mwiitthuuwe, muce, ngwure ni muhakalale.’ 20Wa sootheene, Muluku aamweerela: ‘Mulolo! Ohiyuweene yoola munimookhwa. Vano, anaahalane taani ni yeeyo mureherenraanyu?’ 21Hiihaawo onimweereiya ni yoole onthokorora mihakhusawe, mene vamaithoni wa Muluku khahiyono namapuha a mmunepani.”

Sooweeteteela sa okumi

22Vano Yeesu aaweerela oohuseraawe: “Tivawo Miyo kinooleelani: muhiixeeteteele ni okumaanyu, mwa yeeyo muneeraanyu muce, hata ni erutthwaanyu yoowaraanyu. 23Okumi ori wootthuneyaxa opwaha yooca, ni erutthu yoopwaha soowara. 24Mwaawehe anakhuku – awo khaanaala, hata khaanghepha; khaanono empa yoothokorora itthu, hata matatha. Wa soothesene, Muluku onnaaciha. Nyuwo mootepa otthuneyaxa waapwaha apalame! 25Taani a nyuwo ongwera waandyeerera okumaawe ni ewoora emoha niwoko na weeteteiya? 26Woonaka weera khamungwera opaka etthu ekhaaneene ela, heeni muneeteteelaanyu itthu sootheene sikina? 27Ngwehe moota heeni sinunnuwaaya ithutu: iyo khasimvara muteko, hata khasintthava. Wa sootheene, Miyo kinooleelani weera, hata Salomoni moovuwanimwawe wootheene, khaawanre ntoko emoha ya seiyo. 28Muluku awariha hiiho malaxi a ntuphini olelo ariwo, omaalotho anoovonyeriwa mmooroni, wootepaxa anoowariheni nyuwo, atthu a nroromelo vakhaani? 29Muhaasaase eheeni muneeraanyu muce, hoye hoye ngwure. Muhiixeeteteele ni yeeyo. 30Vano, ti amalapo antthara itthusene seiya. Atiithitho ansuwela weera nyuwo muntthuna seiya. 31Ohiyanawaya, mwaasaase omwene wa Muluku, ni itthu seiya mmwaandyeerereliwe. 32Muhoove, muhuwo mukhaaneene, niwoko waahaasiveliha Atiithi woovahani omwene. 33Muthumihe murinaanyu ni mvahe samahala. Mwiipakele mahottha ahinrowa othaala yaaviraka ehuhu, aani muhakhu woohimala wiirimu, weiwo khaawo namwiiya onkhuveela, hata tthumpwiha ohintthumpwihaawemo. 34Vano, onkhalaayawo muhakhwaanyu, weiwotho onuukhale murimaanyu.

Okhala oolikana orumeela

35Mukhale oolikaneene weera murumeele ni onyaaraanyu opwaherere ovarela, 36ntoko onyaari wa yaale anaaweherera apwiyaaya ohokolowa ofestani ya othelana, weera yaaphiyakaru ni yamana nsele, awo ewere ohula woowaakuveya. 37Ooreelihiwa ti arumeiyi awo apwiyaaya yaaphiyakaru eneeraaya yaaphwanye elipelelaka. Miyo kinoororomelihani weera apwiya ale eniiwarele yoorumeela, eniyaakilaathihe vameesa ni eniyaarumeele. 38Hata awo ephiye ohiyu eriyari, hoye hoye oyaaka ni oxa, ooreelihiwa ti yaale Apwiya eneeraaya yaaphwanye yiireherenreene. 39Tivawo, mwiiwexexe yeeyo: Muneene a empa aasuwenle ewoora heeni aneeraawe aphiye namwiiya, khaatthunihera weera yiiyiwe empa. 40Nyuwotho mwiireherere, niwoko Mwaana a mutthu onimoowa ehuhu yoohiweherereya.” 41Pedru aahaakoha: “Apwiya, munnithalihera yoolikanyiha ela hiyo, hoye hoye wa atthu ootheene?” 42Apwiya yaamwaakhula: “Vanonto, murumeiyi taani oororomeleya ni a miruku, Apwiya amukhalinghaaya muhooleli a arumeiyi weera aavahe yoocaaya wa ehuhu yootthuneya? 43Ooreelihiwa ti murumeiyi mwa yoowo Apwiyaawe yaaphiyaka, eneeraaya emphwanye apakaka hiiho. 44Miyo kinoororomelihani weera awo eniimukhalihe mutokweene a sooreelasaya sootheene. 45Noone hatho weera murumeiyi owo oniixeerela muneenaawe: ‘Apwiyaaka anoopisa ohokolowa.’ Vano, onoopacera waamana arumeiyi alopwana ni arumeiyi athiyana, acaaka, awuraka ni ahapaliwaka. 46Apwiya a murumeiyi owo animoowa ehuhu ohinaawehereraawe nitho ohisuwenlaawe. Awo eniimuthikile eriyariru ni eniimwiikaathi vanipuroni na atthu oohiroromeleya. 47Murumeiyi owo onsuwela otthuna wa apwiyaawe ni ahinareherera, hata ahinapaka yeeyo antthunaaya, onoowaxuliwa moota woowoopiha. 48Yooletho ohisuwenle otthunawaya ni ompaka itthu soophwanela ottaruxeliwa, anaawaxuliwe vakhaani. Mwa yoowo ovahiwe sincipale, anaanyesereriwe sincipale, ni mwa yoowo ovahereriwe sincipale, anaavekeliwe soopwahaxa.

Yeesu khanruuhela murettele

49Kirweenle oruuha mooro mweelaponimu, ni hapo kaatthunaxa weera mooro owo opattihiwe! 50Ontthuneyatho weera kipatisiwe, ni moota kihooxiwaaka murimaaka mpaka owo oneeraaya okwaniheriwe! 51Nyuwo munuupuwela weera kirweenle oruuha murettele mweelaponimu? Miyo kinooleelani: Hoye! Ohiyanawaya, kirweenle oruuha ohiiwanana. 52Okhuma vaanaano vaava mpaka ohoolo eniikhale amusi athanu oohiiwanana mukina ni mukhwaawe: araru yiinanaka ni eeli, ni eeli yiinanaka ni araru. 53Eniikhale oohiiwanana atiithi ni mwaana mulopwana ni mwaana owo ni atithawe; amaayi ni mwaana muthiyana ni mwaana owo ni amayawe; pwiyamwaana ni mwaara a mwanawe ni mwaara owo ni pwiyamwaanaawe.”

Ineneero sa ihuhu

54Owo aaweerela atthu ancipale: “Nyuwo moonaka nihutte nikhumaka ninkela nsuwa, muneera woowaakuveya: ‘Enoorupa!’ ni hiihaawo enimweereya. 55Yoopaka epheyo ya ohitto, muneera: ‘onoovihaxa’ ni hiihaawo onimweereya. 56Anamwiixeera! Moosuwela otaphulela mikhalelo sa elapo ni sa wiirimu. Muhinsuwela hai otaphulela ehuhu ya vaanaano? 57Niwoko heeni muhinthorihaanyu muneenaanyu yeeyo eri ya ekhaikhai? 58Mukina a nyuwo, aarowaka ni mwiittanaawe wa mulipa oowuuluma milattu, mweerere weera mwiiraane ni yoowo mphironi weera owo ahoorongheni wa mphuki, ni mphuki ahiwinnyerereni wa mpilixa, ni mpilixa ahoovonyereni okaliposo. 59Miyo kinooleelani weera khamunrowa okhuma muhinaaye oliva nikhoobiri noomalihera.”

Currently Selected:

Luuka 12: VMK2021

Highlight

Copy