Yohaane 7

Yeesu onrowa ofestani ya mikottha

1Vahoolowaya, Yeesu anneetteetta oGalileiya akhalaka mwayiini ottaiwene wa oYudeiya niwoko iwe aYuda yaasaasa omwiiva. 2Vano, yaattamelaka efesta ya aYuda, yeele ya mmikotthani, 3axunneiye Yeesu yaamweerela: “Ontthuneya weera Nyuwo muvenye va ni murowe oYudeiya weera oohuseraanyu yoone miteko mumpakaanyu. 4Khaawo ontthuna osuweliwa mwaatthuni oneetta muxiirini. Mweenre Nyuwo mpakaka itthu seiya, mwiixoonihere mweelaponi.” 5Vano, hata axunneiye khayaamuroromenle Yoowo. 6Yeesu aaweerela: “Wa Miyo kheenaaye ophiya ehuhu yootthuneya, mene wa nyuwo yakhalaru ehuhu ti yootthuneya. 7Amalapo khaangwera woothanyani, mene anookithanya Miyo, niwoko kinookhalela onamoona weera yeeyo ampakaaya ti yoonanara. 8Murowe ofestani. Miyo va nlelo nkinrowa ofestani eyo, niwoko wa Miyo kheenaaye ophiya ehuhu yootthuneya.” 9Amalihaka ohima yeeyo, aakhala oGalileiya. 10Wa soothesene, yaarowaaya axunneiye ofestani, Owo aarowatho ahiixooniheraka, mene muxiirini. 11Ofestani, aYuda yannangweherera ni yannakoha: “Ori woowi Mulopwana Owo?” 12Waakhala waapa vancipale mwaha wa Yoowo variyari wa atthu ancipale. Akina yeera: “Ti Mulopwana ooreera.” Akina yaakhula: “Hoye, Owo onlokottha muloko wa atthu.” 13Khaawotho yuuluma mwaatthuni sa Yoowo niwoko na owoova aYuda.

Yeesu onxuttiha ofestani

14Vano, yaaphiyalaaya efesta eriyaraaya, Yeesu aarowa Mpaani mwa Muluku ni aapacera oxuttiha. 15aYuda yaatikhina ni yaakohana: “Owenre hai Mulopwana Ola okhalano nihusiho mooteene yoola ahinatoko oxuttera?” 16Yeesu aawaakhula: “Nihusihonaka khanihiyono nawaka muneenaaka. Ningwa wa Yaale akirumihale. 17Akhala mukina onlakela opaka otthuna wa Muluku, owo anoonelele nihusihonaka nawa wa Muluku, hoye hoye kinuuluma ni mirukusaka muneenaaka. 18Yoole onuuluma sawawe, onnaasa ovuwawawe muneenaawe. Yooletho onaasa ovuwa wa Yaawo yaamurumihale, Owo ti a ekhaikhai. Kheewowo etthu yoowootha mwa Yoowo. 19Moisesi khoovangheni nlamulo? Wa sootheene, khaawo a nyuwo oniiwelela. Heeni nyuwo munaasaanyu okiiva?” 20Atthu ancipale yaamwaakhula: “Nyuwo murino munepa woonanara! Taani onaasaasa owiivani?” 21Yeesu aaweerela: “Kaapaka yootikhiniha emoha ni nyuwo ootheene mwaatikhina. 22Wa soothesene, eenre Moisesi ahoovahakani wiineliwa, nyuwo muniinela eSaabadu, orookhalaru weera vekhaikhai wu khawaarwiiye wa Moisesi, mene wa atithinyu a khalayi. 23Moone, wakhala woowaakhuleleya weera mwaana mmoha iineliwe eSaabadu weera nlamulo na Moisesi nihinanarihiwe, heeni nyuwo munkinyoonyeriwaanyu Miyo niwoko na olamiha erutthu yootheene ya mulopwana eSaabadu? 24Muhithorihe mukhalelo woowooneya paahi, mene muthorihe moota wa ekhaikhai.”

Yeesu ti Kristu?

25Vano akina yaamanke oYerusaleemu yaapacera okoha: “Khahiyono Ola Mulopwana awo ammwaasaaya omwiiva? 26Ori va Owo uulumaka mwaatthuni ni khaammweerela etthu. Weeraka asitokweene yaaphiya woovaanelani weera Owo vekhaikhai ti Kristu?” 27Hiyo noosuwela onkhumelelaawe Mulopwana Ola. Kristu aawaaka, khaawo aneera asuwele onkhumelelaawe.” 28Yeesu eera axuttihaka Mpaani mwa Muluku, aakhuwela: “Aani nyuwo mookisuwela ni moosuwela kinkhumelelaaka. Miyo nkikhanle va niwoko na mwaneenaakaru, mene Yaawo akirumihale ti a ekhaikhai. Nyuwo khamwaasuwenle, 29mene Miyo kohaasuwela, niwoko kingwa wa mpattaaya ni Awo akirumihale.” 30Vano yaaheerera omvara, mene khaawo yaamvanre niwoko ehuhuwaawe khayaaphiyale. 31Wa soothesene, ancipale a muloko wa atthu ancipale yaamuroromela Yoowo. Awo yaaheera: “Krisu aawaaka, anaapake ineneero sootikhiniheya soompwaha Mulopwana Ola ompakaawe?” 32aFarisi* yaawiiwa atthu ancipale yuulumaka itthu seiye mwaha wa Yoowo. Vano ahooleli a asaserdoti* ni aFarisi* yaahaaruma anakhotto a Empa ya Muluku weera emutthuke. 33Yeesu aaweerela: “Kiri ni nyuwo ehuhu vakhaani paahi ni vano nkirowe wa Yaawo akirumihale. 34Nyuwo mmwikaasaase, mene khamurwa mukiphwanya. Weiwo kineeraaka kikhale, nyuwo khamungwera owa.” 35aYuda yaaheerelana: “Ontthuna orowa woowi Mulopwana Ola, hiyo nihingweraahu omuphwanya? Apaale weiwo onkhalaayawo muloko wa atthwaahu omwaramwareiye variyari wa aGrego weera axuttihewo? 36Eheeni aatthunaawe ohima eeraka: ‘Nyuwo mmwikaase, mene khamurwa mukiphwanya’ ni: ‘Weiwo kineeraaka kikhale, nyuwo khamungwera owa’?” 37Wa nihuku nookisera noottittimiheyaxa na efesta, Yeesu aavenya, anakhuwela: “Akhala mukina ori ni ntthona, awe wa Miyo ni awure! 38Ntoko Yoolempwa* yeenraaya: ‘Yoole onkiroromela Miyo, mmurimanimwawe nsikhume nyooloko sa maahi a okumi.” 39Owo aahima mwaha wa Munepa yeeraaya yaakhele yaawo animuroromela Yeesu. Mpaka ehuhuweene yeele Munepa nlelo weera ohinaaye ovahiwa, niwoko Yeesu khaanaaye ovuwihiwa. 40Yiiwalaaya maswaawe, akina a muloko wa atthu yaaheera: “Vekhaikhai Mulopwana Ola ti Mprofeeti.” 41Akina yaaheera: “Owo ti Kristu.” Akinatho yaakoha: “Ongwereya hai Kristu orweela oGalileiya? 42Yoolempwa* enghima nnenesene weera Kristu anaawe wa ekhapira ya Davide, wa esidade ya oBetelehemu weiwo Davide aakhalaawewo!” 43Hiiho muloko wa atthu waakawanyeiya niwoko na Yeesu. 44Akina yaatthuna omtthuka, mene khaawo yaamvanre.

Ohiroromela wa ahooleli a aYuda

45Vano anakhotto a Empa ya Muluku yaahaahokoleela ahooleli a asaserdoti* ni aFarisi*, mwa yaawo yaahaakoha: “Heeni nyuwo muhimurowenlaanyu?” 46Anakhotto yaahima: “Khaawo otonke wuuluma moota ntoko Mulopwana Ole onuulumaawe!” 47aFarisi* yaahaakoha: “Weeraka nyuwotho moolokotthiwa? 48Apaale mukina a asitokweene, hoye hoye aFarisi* aamuroromela Yoowo? 49Hoye! Mulokotho owo ohisuwenle nlamulo ori woolaphiwa!” 50Nikodemu, mmoha a yaawo, yoowo eera ahinaaye omwaattamela Yeesu, aahaakoha: 51“Nlamulonahu nnimuthoriha mukina ohinaaye omwiiwa, naari osuwela yeeyo oneeraawe?” 52Awo yaamwaakhula: “Nyuwotho muri a oGalileiya? Musomele ni mmoonelele weera oGalileiya khawa akhumelela mprofeeti.” 53Vano mutthu ti mutthu aarowa owannyawe.

Currently Selected:

Yohaane 7: VMK2021

Highlight

Copy