Epacerero 8

Emalihero ya mirupi

1Vano Muluku aamuupuwelela Nowe ni inama sootheene sa ntuphini ni soohuwiwa saari vamoha ni yoowo munikulani, anarumiha epheyo mweelaponi yootheene ni maahi yaapacera owelela. 2Anaattuuttu a mphareiyani moowiixera nitho milako sa wiirimu saawaleya ni epula yaamaaxa. 3Maahi yannawelela vakhaani vakhaani vatthayani. Evinreene mahuku ncira ni miloko mithanu, maahi yaavukuwa. 4Vano nihuku nanaamuloko ni mathannameeli na mweeri wanaathannamiili, nikula naaheemela vamwaakoni wArarati. 5Maahi yeera ewelelaka mpaka mweeri wanaamuloko, ni munihukuni noopacera na mweeri ole saapacera okhuma itthomela sa nyaako. 6Eviraka mahuku miloko mixexe, Nowe aahula exanela aapankaawe vanikulani. 7Owo aamuruma nakhuku okhumela vaate, mene owo aamweera ovava paahi mpaka owelela maahi yaari vatthayani. 8Vahoolowaya Nowe aarumiha ekhunda weera yoone yaawelenleene maahi vatthayani. 9Vano ekhunda khayaaphwannye nipuro nooweemela niwoko maahi nlelo yeera ehinaaye omala owelela vasulu wa etthaya. Tivawo yaahokoleenlaaya munikulani na Nowe. Aahookola moono, anavara ekhunda ni anavoleiha munikulani. 10Nowe aawehereratho mpaka omala mahuku mathannameeli, anarumihatho ekhunda. 11Oxekuwaka, yaahokolowaaya ekhunda, yaaruuha epampeene nikukhu nnyowani na mwiri wa sooliveira*. Vano Nowe aasuwela weera maahi aawelela vatthayani. 12Aaweherera mpaka omala mahuku mathannameelitho, anarumihatho ekhunda, mene emaareene yeele, eyo khayaahokolongwe. 13Munihukuni noopacera na mweeri woopacera vayaakhani ya macira mathannamosa ni eyaakha emoha ya okumi wa Nowe, yaawelela maahi ootheene vasulu wa etthaya. Vano Nowe aavenxa nipatho na nikula, anoona weera etthaya yeera yuumaka. 14Munihukuni na naamiloko miili ni mahuku mathannameeli na mweeri wanaaveeli, etthaya yootheene yaakwanela wuuma.

Ompacereroni wa elapo ya vathi enyowani

15Vano Muluku aamweerela Nowe: 16“Mukhume munikulani, nyuwo vamoha ni amwaarinyu, anamwaniinyu nitho axaaraya. 17Mwaakhumihetho axinama ootheene ari vamoha ni nyuwo, ipalame, inama itokweene ni ikhaani soowiipurula. Mukhumihe weera simwaramwareele mweelaponi yootheene, siyaraneke ni saandyeereraneke.” 18Vano Nowe aakhuma munikulani vamoha ni amwaariye, anamwanaawe nitho axaaraya. 19Inama sootheenetho – inama soowiipurula sootheene ni ipalame – sootheene saakhuma munikulani, moota wa ikhalelo sootheene. 20Vahoolowaya, Nowe aampakela altaari* Yave ni aakuxaka axinama akina ootteela ni ipalame sikina sootteela, aaveleela ntoko sooveleela ahisaka vasulu wa altaari*. 21Vano Yave aahoona wunkhela wooreeraxa ni aahiixeerela: “Nkirwa kilaphatho etthaya niwoko na mutthu, orookhalaru murimaawe woosareya ni soonanara okhuma oyariwawawe. Nkirwatho kiphwata itthu sootheene siri ni okumi ntoko kipankaaka emaara ela. 22Elapo ya vathi ereene nlelo, khoorwa othowa mmiso, nitho soohepha, oriira naari oviha, elimwe naari eyiita, othana naari ohiyu.”

Currently Selected:

Epacerero 8: VMK2021

Highlight

Copy