Epacerero 16

Hagari ni mwaniye Iximayeli

1Sarai, mwaara a Abraamu, khaamuyanre naari mwaana mmoha. Vano owo aakhalano epottha emoha ya wExipitu, yiitthaniwa Hagari. 2Sarayi aamweerela Abraamu: “Yave ookooceeliha oyara. Vano, apaale epotthaaka enoowera wooyarelani mwaana wa miyo. Munkoneno.” Abraamu aahaakhulela aatthunaawe Sarayi. 3Vano hiihaawo, vahoolo wa iyaakha muloko ekhalaka elapo ya oKanaani, Sarai, mwaara a Abraamu, aamvaha iyawe epotthaawe Hagari ngwExipitu, ntoko mwaariye. 4Abraamu aamukonano Hagari ni owo aarupala. Vano asuwelaka weera oorupala, Hagari aapacera omuramusa Sarai. 5Sarai aamweerela Abraamu: “Miyo kohoovahani mmatatanimwanyu epotthaaka, ni vano yoonnaaya weera yoorupala, eyo enookiramusa. Yave akhale Mphukaahu.” 6Abraamu aamwaakhula Sarai: “Owo nlelo onoopwaherera okhala epotthaanyu. Mumpakeke yeeyo muntthunaanyu.” Vano Sarai aapacera omuhasula moota wooweera owo aatthawa. 7Ndyelo a Yave aamphwanya vanaattuuttuni, munikareni, ori mphironi enrowa oXuri, 8anamukoha: “Hagari, epottha ya Sarai, mungweela woowi ni munkela woowi?” Owo aamwaakhula: “Kinimtthawa Sarai, pwiiyaaka.” 9Vano ndyelo a Yave aamweerela: “Muhokoleele vaate wa pwiiyaanyu ni mwamwiiwelelewo.” 10Vanonto, ndyelo aapwaherera: “Kinimwaandyeerera ekhapiraanyu weera ahikhale anaawere waalikela.” 11Ndyelo a Yave aaheeratho: “Nyuwo moorupala ni mmungyare mwaana mulopwana muneeraanyu munttehe nsinanawe Iximayeli, niwoko Yave ohoona ohaawawanyu. 12Anaakhale ntoko buuru a muthupini ni mahuku ootheene aniittane ni ootheene, ni ootheene eniyiittane ni yoowo. Owo anaakhale oohasuweene iittanaka ni axunna ootheene.” 13Nno naari nsina Hagari aamuttenghaawe Yave aamweerenlaawe yoowo: “Nyuwo ti Muluku munkoona,” niwoko aaheera: “Nkimoone Yoole onkoona.” 14Tivawo naattuuttu ole iitthaniwaawe “Beer Lahi-Royi” ni omphwanyaneya eriyari ya oKadexi ni oBeredi. 15Hagari aamuyara mwaana mulopwana, vano atithawe, Abraamu, yaamutteha nsinanawe Iximayeli. 16Abraamu aarino iyaakha miloko mithannamiraru niithannamosa Hagari aamuyanraawe Iximayeli.

Currently Selected:

Epacerero 16: VMK2021

Highlight

Copy