Miteko 13

Yoorummwa ya Barnaba ni Sawuli

1Mukerexani ya wAntiyokiya yaakhalawo maprofeeti ni anamahusiha: Barnaba, Simeyoni iithaniwa Nigeri, Lusiyo oKireene, Manayeni aahuwiwe vamoha ni namalamula Herodi, ni Sawuli. 2Yaalapaka Apwiya ni etthukaka, Munepa Wootteela waaweerela: “Mukimwalamwalihere Barnaba ni Sawuli wa muteko Miyo kiwiitthanenlaaka.” 3Hiiho, emalihaka otthuka ni ovekela, yaawiikaathera matata ni yaahaarumiha.

Barnaba ni Sawuli oKipro

4Erumihiweene ni Munepa Wootteela, awo yaarowa oSeleusiya, ni evenyaka vaavaale, yaalapuwa munikulani erowaka oKipro. 5Ephiyaka oSalamina, yaalaleiya masu a Muluku muSinagogani* mwa aYuda. Yohaane aari ni yaawo ntoko oowaakhavihera. 6Yaaheetta eviraka ecirumba yootheene mpaka yaaphiya oPafo. Weiwo yaamuphwanya muYuda namacitta ni mprofeeti oolokottha iitthaniwa Baryesu. 7Aakhala ni guvernadori Sergiyu Pawulo, mulopwana a miruku. Guvernadori aarumiha wiitthaniwa Barnaba ni Sawuli, niwoko aatthuna wiiwa masu a Muluku. 8Elimasitho, namacitta (ntoko nintaphulelaaya nsinanawe) ahiixiittaniha, ni aaheerera omooceeliha guvernadori weera ahiroromele. 9Vano Sawuli, iitthaniwatho Pawulo, oosareya Munepa Wootteela, aamuwehexexa nnenesene Elimasi, ni aamweerela: 10“Mwaana a Diyabu* ni mwiittana a sootheene seiyo siri sa ekhaikhai! Nyuwo moosareya mikhalelo sootheene sa olokottha ni otakhala. Mmuhiye yaakhani onanariha iphiro soowookowa sa Apwiya? 11Musuwele vano weera Apwiya ti mwiittanaanyu, ni nyuwo mmwikhale oohoona, muhiweraka woona waara wa nsuwa wa ehuhu ekina.” Woowaakuveya yaamukhuruwela ewiriphi, ni owo, aapapelaka, aamwaasa mukina weera amuhoole ni ntata. 12Guvernadori oonaka yeeyo, aaroromela ni aatikhinaxa ni nihusiho na Apwiya.

Barnaba ni Sawuli wAntiyokiya oPisidiya

13Pawulo ni yaawo yaamuhoonle, yaavenya oPafo ni yaalapuwa munikulani erowaka oPerge oPanfiliya. Weiwo, Yohaane aahaahiya yaawo ni aahokoleela oYerusaleemu. 14Ekhumaka oPerge, yaapwaherera mpaka wAntiyokiya oPisidiya. Nihuku na eSaabadu yaavolowa muSinagogani* ni yaakilaathi. 15Emalihaka osoma wa nlamulo ni wa maprofeeti, asitokweene a eSinagoga* yaahaarumiha atthu weera emweerele Barnaba ni Sawuli: “Axunna, mwaarino masu oolipiha murima wa muloko wa atthu, muulume.” 16Eemelaka, Pawulo aahaathoonyihera ni ntata ni aaweerela: “aYixrayeli ni nyuwo mummoova Muluku, mukiiwe miyo! 17Muluku a muloko wa aYixrayeli aathanla makholowaahu, ni aareeliha muloko wa atthu ehuhu yootheene waamankaaya wExipitu. Ni ikuru sitokotoko aavenxa wa elapo ele, 18ni aavilela munikareni woophiyera ehuhu ya iyaakha miloko mixexe. 19Owo aaphwata miloko sa atthu mithannamiili oKanaani, ni aavaha elapwaaya wa mulokwaawe ntoko yoohiyeriwa*. 20Sootheene iye saakhumelela woomalaka ehuhu ya iyaakha 450. Vahoolowaya, owo aahaavaha aphuki mpaka ehuhu ya Samuweli. 21Vano muloko wa atthu waamvekela Muluku mwene, ni Muluku aavaha muloko Sawuli, mwaana a Kixi, a epuumba ya Benyamini aalamula iyaakha miloko mixexe. 22Vahoolo wa omukhootta Sawuli, aamukhaliha Davide ntoko mwene, mwa yoowo Muluku aamukhalenlaawe onamoona eeraka: ‘Koompwhanya Davide, mwaana a Yixai, mulopwana a vamurimaniwaka. Owo anaapake sootheene seiyo siri sa otthunawaka.’ 23Muluku aahaaruuhela aYixrayeli Mvuluxa Yeesu, akhumaka ekhapira ya Davide, ntoko aaroromelihalaawe. 24Ahinaaye ophiya Yeesu, Yohaane aalaleera muloko wootheene wa aYixrayeli opatiso wa orukunxa murima. 25Aakwanihaawe mutekwaawe, Yohaane aaheera: ‘Munuupuwela weera miyo taani? Nkihiyono Yoowo mummuupuwelaanyu. Moonetho, anaarwe ottuliwaka Yoole ikwakwaattasawe kihiphwanenlaaka otaphula.’ 26Axunna, anamwane a Abrahaamu ni nyuwo mummoova Muluku, wa hiyo noorumiheliwa mutthenga ola wa ovuluxiwa, 27muloko wa atthu a oYerusaleemu ni asitokweenaaya khayaamusuwenle Yeesu ntoko Mvuluxa, mene emuttaruxaka Yoowo, yaakwanihera masu a maprofeeti ansommwa iSaabadu sootheene. 28Naamwi ehiphwanyaka mulattu woomwiivela, yaamvekelatho Pilatu weera alamule omwiiva. 29Ekwaniheraka sootheene saalempwale mwaha wa Yoowo, yaamvenxa vamuttandani ni yaamvitha mmahiyeni. 30Mulukutho aamvenyereriha mookhwaani, 31ni wa mahuku mancipale aahooniwa ni yaale yaarongwe vamoha ni Yoowo oYerusaleemu ekhumaka oGalileiya. Vano awo ari anamoonaawe wa muloko wa atthu. 32Hiyo ninoolaleerani nyuwo masu ooreeraxa ala: yeeyo Muluku aaroromelihalaawe makholowaahu, 33oonikwaniherela hiyo, anamwanaawe, amvenyererihaka Yeesu ntoko elempwalaaya ecipo yanaaveeli: ‘Weyo ti Mwanaka. Olelo kohooyara.’ 34Muluku aamvenyereriha mookhwaani weera Owo ahihokoleeletho muyuntteloni. Eyo Muluku aahima ni masu ala: ‘Miyo kinoovahani mareeliho ootteela ni oororomeleya yaaroromelihiwe wa Davide.’ 35Tivawo yoolempwa mpatta mukina: ‘Khamurwa muntthunihera Ootteelaanyu weera untte.’ 36Amalihaka waarumeela atthu a ekhapiraawe ntoko Muluku aatthunaawe, Davide aahookhwa. Owo aavithiwa ni makholowaawe ni erutthwaawe yaahuntta. 37Yooletho Muluku omvenyererihalaawe, khunttale. 38Tivawo, axunna, kintthuna woosuwelihani weera ti mwa Yeesu munlaleeriwaanyu elevelelo ya soottheka. 39Niwoko na Yoowo, khula mutthu onroromela, ohooniwa weera khanono nthowa wa sootheene seiyo nlamulo na Moisesi nahaaweraaya onilevelela. 40Mwiipasoope weera ehookhumeleleni yeeyo maprofeeti yaahimalaaya, yeeraka: 41‘Moone, nyuwo mumveiha, mutikhine ni muriheye, niwoko nkipake etthu mmahukunimwanyu nyuwo mwahaaroromelaanyu mukina ooleelani.’ 42Pawulo ni Barnaba evenyaka muSinagogani*, muloko wa atthu waahaalattula weera yuulumetho sa itthusene seiyo eSaabadu enrwa. 43Woomwareyani wa mmuthukumanoni, aYuda ancipale ni anamarwa a murima wa omuluku antthara ediini ya aYuda, yaamutthara Pawulo ni Barnaba. Awo yaatthekula ni yaawo, yaalipiheraka weera epwaherere mwa mahala a Muluku. 44eSaabadu yaattharelanne, wookwanaka atthu ootheene a esidade yaathukumana weera yiiwe masu a Apwiya. 45aYuda, ewoonaka atthu ancipale, yaasareya nrima ni eveihaka, yaavaanyiha yeeyo Pawulo aahimaawe. 46Vano Pawulo ni Barnaba yaawaakhula ni murima woolipa, yeeraka: “Waatthuneya woolaleerani toko nyuwo masu a Muluku, mene mweenre mukhoottaka masu ala, ni hiiho munoonihera weera khamuphwanenle okumi woohimala, vano hiyo ninoohokoleela wa amalapo. 47Vano, hiiho Apwiya aanilamulela yeeraka: ‘Miyo kohookhalihani waara wa amalapo, weera mukuxe ovuluwa mpaka ekotenle elapo.’” 48Yiiwaka yeeyo amalapo yaahakalala ni yaavuwiha masu a Apwiya, ni ootheene yaawo yaathanliwe ophwanya okumi woohimala, yaaroromela. 49Masu a Apwiya yaamwaramwaxeya wa elapo yootheene. 50aYudatho yaahaasesera asithiyana oosuwanyeya oomoova Muluku ni asitokweene a esidade. Etannyeraka omttharatthara Pawulo ni Barnaba, awo yaawoomola mweelaponimwaya. 51Awo ooweeli yaatatha ntthupi na inaawosaya ntoko eneneero ya waakhootta yaale, ni yaapwaha erowaka wIkoniyo. 52Oohusera yaapwaherera esareiyeene ohakalala ni Munepa Wootteela.

Currently Selected:

Miteko 13: VMK2021

Highlight

Copy