Ukunukuo 3
3
Ukhani gwa Saridi
1“Gwa malaëka wa kanisa ra Sarde andëka vii: Uruu unë ukhani ufuma kunë mweeso në wina nkhoo imufungatë ya Muungu na njota imufungatë. Nëyamanyie mantu ako oong'e; nëmanyie umanyikie mwino umufanga ngwë ukurë! 2Fëtya! Khomya roong'e në rija nërësighie nëkëë rasëëno rënahira hiiri. Gusoko ufikëa itungwee, ntinoona ntendo yako yakhodekeka usonge a Muungu wane. 3Kumbukwa, uvii, ayoo nëvasëiywe na mwino wategheeye, uyakunyatye ufëntuke ufuma umahutyë ako. Nëwadëa ukhomecha miho ngugujëa mwino muhëmbi, na mbesa utëumanya itungo nëngugujëa. 4Ëgweeso vërefo akeevu kuuko uSairdi në vinayakhombaa masaa awe. Vasaa vënoneye gwenenda itambëëmwe na nee kunu vëryë masaa në meru. 5Vasaa nëvëuhuma, vëuryechwa masaa në meru. Neeno ntiuyafangajëya mina awe mugëtabu ga ufanga; kangë nguvakumua mwino në vane usonge amwa Tata wane nanë usonge a vaa malaëka vakwe. 6Në wina makutwe, uvii, atëgheeye asaa në Mwahu uguyakhanëa makanisa!”
Ukhani gwa Filadelfia
7“Gwa malaëka wa kanisa ra uFiladelfia andëka Vii: Uruu unë ukhani ufuma kunë mweeso në mweeru na wa tutë, unë ukwëtë ufunguo uroo wamwa Daudi, na unë ugurughua na gutie muntu nëudahëtë guutia, uguutëa na gutie muntu nëugurughua. 8Nëyamanyie mantu ako oong'e! Itungwee narughua usonge ako rurye në gutie muntu nëudahëtë gutia; nëmanyie mwino mbesa utikweti nguu ino, gweeso wayakwatëëre maraghëëyo ane, waukunyatye ukhani wane na winarëkhana rina rane. 9Tëgheeya! nguvatënda vëje kunë vee antu va iburi ramwa Setani, antu nëvëgihanya mwino në Ayahudi, ngwë në vegheeghe. Nhaa, nguvatënda vëje kunë vee na uvatënda vëtungame usonge ako vëdahe umanya mwino tutë nëguyanjëte veve. 10Gusoko veve wakunyatëe iraghëëyo rane ra ughimu, neenoo nguguhaghamëya vëja itungo ëroo ra makhasëko nërëjie uwuhanga urëmi uvaghema voong'e nëvigëkhaa muurëmi. 11Nëjie kunë vee ruvë! Ghoja, uvii, nëugëkwëte itungwee, utajee uhegheywa na muntu woong'e ngaa ako a ühumi. 12Vasaa nëvëuhuma nguvatenda vetende vifandwa mu hekalu ra Muungu wane, na vëtiudua faafo gu khae. Na ngwandëka gunto awe rina ra Muungu wane nanë rina ra muji wa Muungu wane, unë Yerusalemu në ufya, muji nëugutununta ufuma gunto iërunde kunë Muungu wane kangë nguandëka gunto awe rina nane nëifeya. 13Në wina makutwe, uvii, atëgheeye asaa në Mwahu uguyakhanëa makanisa!”
Ukhani gwa Laodikea
14Gwa malaëka wa kanisa ra uLaodikëa andëka vii:
“Uruu unë ukhani ufuma kunë mweeso nëugwëtaanwa ‘Amina.’ Mweeso në musudangei muhuvei nanë wa tutë, unë mwandyo wa ntundo oong'e nëwamëtundie Muungu. 15Nëyamanyie mantu ako oong'e! Nëmanyie mwino veve utë muryuku mbesa utë mufyu. Bahu ësa wë intu remwedu gwa ayaa mbesa; muryuku mbau mufyu. 16Uvii, gusoko we mütütü, uti muryuku mbesa uti mufyu, ngungürüka! 17Veve ugihanyaa, ‘Nene në mughwarë, nëkweti oong'e ntifere gëntu mba gëmwe.’ Ngwë utimanyie mwino veve u mulegheku, ugufenja gonewa uvavi, u mutuki, umufoku kangë wë gëfuyu! 18Ngugusëya ughure kunë nene sahabu nëëoyiwe gwa moto utëndeke umughwarë tutë. Kangë bahu ughure noo isaa nëryeru, urye na ukumba mënyaa a gefuyu gako. Ghura noo makuta uvire miho ako udahe goona. 19Nene unë ngumwonyaa na umusucha woong'e nënëmuyanjëtë. Gwa uvii khomia nkhoo, rekanuka na mahutye ako. 20‘Tegheeya! Nene nëmëkie ugënyamwango ngufëndua. Muntu nëwatëgheeya ruri wane na urughua rurye, ngingëa umwakwe na ngula malëwa itambëëmwe na mweesono, mweesonoo ugula itambëëmwe na nee. 21Vasaa nëvëuhuma, nguvikheecha itambëëmwe na nee gunto a itumbë rane ra utëmi, mwino noo nene mughonjo nënahumie nëgikhaa itambëëmwe nanë Tata wane gitumbë rakwe ra utëmi. 22Në wina makutwë, uvii, atëgheeye asaa në Mwahu uguyakhanëa makanisa!’”
Currently Selected:
Ukunukuo 3: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.