Matayo 21

Yesu ugingëa uYerusalemu gwa wiririsyo

(Mrk 11:1-11; Luk 19:28-40; Yoh 12:12-19)

1Yesu nënaawahumbeera uYerusalemu na ufika uBetifage mugëtanto ga Miseituni, agavatuma asëywi vakwe vavëë, 2agavëëra, “Endi faka ugëjiji nëgëusonge anyu na muumëhanga ndoghwe ëtungiwe nanë mwaandoghwe wakwe. Itarugwëëri muyiete kunë nee. 3Nëmuntu wamuwëëya sokokë, mukhanëi: ‘Müküü uguyifenja,’ mweesonoo uguyirekea itambëëmwe.” 4Ihanyo rësëë rëgatendeka gusoko asaa nënaa arëghëtiwe na munyagëdaghu ëkhondeke:

5“Ukhanëi muji wa Sioni:

Raraava, mutemi waja kunë veve.

Uu mufoo na ureere ndoghwe,

mwaandoghwe, mwana wa ndoghwe.”

6Uvii, asëywi vasaa vëgeenda vëgatenda mwino Yesu naawaraghëëyaa. 7Vëgamëeta ndoghwe ësëë na mwanakwe, vëgaara masaa awe gunto ayo, na agikhaa gunto. 8Mwirundo üküü wa antu ugaara masaa awe mwibara na antu vangëja vëgatema makhanja amëtë vëgayataantaya munjëa. 9Maburi a antu nënaavëmutongeere na vasaa nënaavëmuhongie vëgahanya:

“Hosana Mwana wamwa Daudi!

Aforiwe wasuu nëujie gwa rina ra Müküü!

Hosana gunto girunde!”

10Yesu nënaaugingëa uYerusalemu, muji woong'e ugijua muhangëëkhano. Antu vëgagiwëëya, “Uyuu uu anyu?” 11Antu mu mwirundo wasuu vëgahanya, “Uyuu unë munyagëdaghu Yesu, udua uNasareti mu mukoa wa uGalilaya.”

Yesu uguvajuncha asuruji mu Hekalu

(Mrk 11:15-19; Luk 19:45-48; Yoh 2:13-22)

12Uvii, Yesu agingëa muHekalu, agavajuncha gunji antu nënaavëurinja na ughura mantu mu Hekalu, agayifënengua mesa ya vasaa nënaa vëukhavisya hela, nanë matumbë a vasaa nënaa vëurinja nkunda. 13Agavëëra, “Yiandëkiwe mu Maandëko Meru: ‘khaya anë ëgutaanwa khaya a marombi,’ ëgweeso nyenye mwamëtendie mwino mpanga a ahëmbi.”

14Afoku nanë virema vëgamwendea kuuko mu Hekalu, Yesu mweesonoo agavaforya. 15Uvii, akumbëki aküü na aseyi va Seria nënaavayoona makura nëagayatenda Yesu nanë ang'ënya nënaa vëgaanga mu Hekalu vëuhanya: “Hosana kunë Mwana wamwa Daudi,” vëgakheefa. 16Uvii vëgamwëëra, “Wurë utitegheeye nëvëurëhanyana?” Yesu agavasucha, “Nhaa, ntegheeye! Wurë, ëkëë mwinasomana Maandëko ayaa Meru?

‘Waatendie ang'ënya në adëru

nanë ang'ënya nëvëgonkaa

vëduye ikuryo nërëkondekie.’”

17Uvii, agavareka, agadua gunji a muji ageenda uBetania, agëkhaa kuuko.

Mutini nëutiufaa nkari

(Mrk 11:12-14, 20-24)

18Yesu nënaa usukie umujini, diu chili, agoona njaa. 19Agawoona mutini rumwe umpeo a njëa, agaweendea: ëgweeso agauhanga utina intu mbanduvë ëgweeso matutu matufu. Uvii, agawëëra, “Utafee kangë nkhari khae na khae!” Muugënyafaafo mutini wasuu ugauma. 20Asëywi nënaavawoona vëgataka vëuhanya, “Gusokokë mutini uruu wumaa du?” 21Yesu agavasucha, “Tutë nene ngumukhanëa, nyenye nëmwatenda mwina uhuvëi gwa udëa uhanga wisaghasaghëi, muudaha ti utenda uvii gutufu, ëgweeso mbesa mwagëkhanëa gëtanto ëkëë: ‘Kurëka wighumëe mwirambo,’ rëutendeka uvii. 22Na nëmwina uhuvëi, intu gëkaku nëmwarëromba gwa marombi muuhanga.”

Udaho wamwa Yesu

(Mrk 11:27-33; Luk 20:1-8)

23Yesu agingëa kangë mu Hekalu waausëya, na nënaaugusëya, akumbëki aküü nanë anyampaa vaantu vëgamuwëëya, “Ugutenda mantu ayaa gwa udahokë? Anyu wagufee udaho uruu?” 24Yesu agavasucha, “Na neenoongumuwëëya nyenye iwëëyo rëmwe, nësa muunsucha, uvii, neenoo ngumukhanëa ngutenda mantu ayaa gwa udahokë. 25Wurë, udaho wamwa Yohana wa ubadisa ugafuma kunë anyu? Wurë, ugafuma girundena namba gwa antu?” Ëgweeso veeso vëgaauvëëvëtya veeso gwa veeso vii: “Nëgwahanya, ‘Ugafuma girunde,’ mweeso uguguwëëya: ‘Uvii, asikëhe nëmugadëa umuhuvëa?’ 26Na nëgwahanya, ‘Ugafuma gwa antu,’ gughoghoofa mwirundo wa antu gusoko voong'e vëmanyie mwino Yohana naa munyagëdaghu.” 27Uvii, veeso vëgamusucha Yesu, “Sese gutighunë!” Yesu mweesonoo agavakhanëa, “Neenoo noo ntiumukhanëa ngutenda mantu ayaa gwa udahokë.”

Wikhori wa vana vavëë

28“Nyenye mugoona wurëhe? Muntu umwe naa wina vana vavëë. Agamwëëra uyoo wa mwandyo: ‘Mwananë, rëo enda utende mwëmo mu muunda wa mësabibu.’ 29Mubalanda wasuu agamwëëra, ‘Ntiinjë!’ Ëgweeso nënaa matungo akëra agafëëntua masëgho, agenda utenda mwëmo. 30Tata wasuu agamwëëra mung'ënya wakwe wa gavëë uvii uvii mweeso noo agasucha: ‘Nhaa tata!’ Ëgweeso agadëa gwenda umwëmo. 31Anyu mukhatë a avaa në vavëë nëagatenda mwëmo nënaa ihe ugufenja?” Vëgamusucha, “Mung'ënya uyoo wa mwandyo.” Yesu agavëëra, “Tutë namwëëra, anyaukhomboisya kooti nanë afumbu vëgingëa mu utemi wa Muungu ëkëë nyee mwinafika. 32Gusoko Yohana agaja kunë nyee agamuraghëëra njëa njija a uduvi na nyee mwinamuhuvëa, ëgweeso anyaukhomboisya usuru nanë alehadi vëgamuhuvëa. Nanë naamwayoonaa asaa oong'e nyenye mwinafëuraa nkhoo yanyu, na mwinahuvëa,”

Wikhori wa muunda wa mësabibu na anya urëma

(Mrk 12:1-12; Luk 20:9-19)

33Arë gwina munyakhaya unë agafandëa mësabibu u mughunda. Mweeso agaufëmëya na ikita, na agakura ikhombo raukhamëa divai, mweeso agajenga ikumbu ra urirëa, na agavarekea antu vangëja vëurëme, na mweeso agaenda ung'ë engëja. 34Itungo ra ntënange nënaarafika agavatuma atenda mwëmo vakwe gwa anya urëma avoo vende uhora gwa utafa ntënange akwe. 35Anyaurëma vasaa vëgavakwata atumami vasaa, umwe vëgamukhuva, ungëja vëgamuuragha na ungëja vëgamutura magwe. 36Muntu wasuu agavatuma kangë atumami vangëja, vingë nanguu ukëra va muhënjo wa mwandyo. Anyaurëma vasaa vëgavatendea uvii uvii. 37Mpeoayo agamutuma mwanakwe kunu ugusëghanëya, “vëumufa isima mwananë. 38Ëgweeso naarë anyaurëma vamwona mwana, veeso vëgagikhanëa veeso gwa veeso, ‘Uyuu në musai, nëgumuraghe sese guhange usai wakwe.’ 39Uvii, vëgamukwata, vëgamufunya gunji a muunda wasuu wa mësabibu, vëgamuuragha. 40Itungwee, munya muunda wa mësabibu wasuu nëikwë waja uguvatenda wurë anyaurëma vasaahe?” 41Veeso vëgamusucha, “Uguvamaa abë vasaa, na muunda wasuu uguvafa anyaurëma vangë nëvëumutafëa ntënange itungo ra ntënange.” 42Faafo Yesu agavëëra, “Wurë, mwinasomaana ihanyo ërëë mu Maandëko Meru?

‘Gëfandwa ga mukhate

gëfandwa ga mukhate ratendaa

gëfandwa në gëkuu

ra gimëcha nyumba.

Muuku unëwarëtendie intu ërëë,

ryesonoo ra utako ino kunë see!’”

43Uvii, nene ngumwëëra nyenye, utemi wa Muungu uguheywa kunë nyee na ufewa antu va ndughu ingëja nëvëuduyaa nkhari yayo. ( 44Nëugugwa gunto a igwe rësëë uguunëka mafëgha, na nëramugwëa muntu gëkaku rëumukhalanga.)

45Akumbëki aküü nanë Afarisayo nënaavategheeya nyinkhori yasee vëgamanya mwino naauguahanya veeso. 46Gwa uvii vëgaaufenja njëa a umutunga, ëgweeso vëgaoghofa antu gusoko veeso naavëmumanyie mweeso mwino munyagëdaghu.

Currently Selected:

Matayo 21: RNT

Highlight

Copy