Matayo 16

Antu vëufenja Yesu atende ndolyo

(Mrk 8:11-13; Luk 12:54-56)

1Afarisayo nanë Asadukayo vëgamwendea Yesu, na gwa umwëghëëya, vëgamuromba atende ndolyo nëëfumie girunde. 2Ëgweeso Yesu agavasucha, “Itungo ra mpëndë nërafika nyenye muuhanyaa: ‘Mpefo ëgutendeka njija gusoko irunde ikhooku!’ 3Na diu chili muuhanya: ‘Rëo mpefo ëgutendeka a gësemusemu, gusoko irunde ikhooku na kangë maunde ëkunikëe!’ Uvii, nyee mumanyie ino uyasoma matungo gwa uraraava irunde, ëgweeso umanya ndolyo ya matungo ayaa mutimanyie. 4Ufafo uvë na wa uramatwë! Muufenja ndolyo, ëgweeso mutiufewa ndolyo mbanduvë ëgweeso ëyoo amwa Yona gutufu.” Uvii, agavareka, agenda kunë winjë.

Sase a Afarisayo nanë Asadukayo

(Mrk 8:14-21)

5Asëywi vakwe nënaa vanankëa itumbë ra gavëë ra irambo, vëgoona vëwaa uhora mëkaate. 6Yesu agavëëra, “Raraavi na mwighoje na sase a Afarisayo nanë Asadukayo!” 7Ëgweeso veeso vëgaagikhanëa: “Uguhanya uvii gusoko gwinahora mëkaate.” 8Yesu agayamanya masëgho awe, agavëëra, “Nyee antu nëvina uhuvëi unyughuu! Njuu mugikhanëa sayu a udëa uhora mëkaate? 9Wurë, mutikumbukiwe nënaangamëvegha mëkaate ëtano eyoo gwa antu avoo maghana a njou atanona? Wurë, mugijuya makafu anga a makhokho? 10Namba, mëkaate emufungatë eyoo nënaavëgafewa antu avoo maghana a njou anë, wurë, mugahaangwëya makafu anga a makhokho? 11Ëgutendeka wurë mutimanyie mwino aja ntiurëghëtya sayu a mëkaate? Ighoji na sase a Afarisayo na Asadukayo!” 12Faafo asëywi vëgamanya mwino agavakhanëa vighoje ti na sase a mëkaate ëgweeso na masëyo a Afarisayo na Asadukayo.

Fetero ugumuhanya Yesu mwino Mwana wamwa Muungu

(Mrk 8:27-30; Luk 9:18-21)

13Yesu nënaawafika umatumbë a uKaisarea Filipi, agavawëëya asëywi vakwe, “Antu vëuhanya Mwaamuntu u nyanyu?” 14Vëgamusucha, “Vangëja vëuhanyaa mwino uu Yohana Mubadisi, vangëja Eliya, vangëja Yeremia namba umwe wa anyagëdaghu.” 15Yesu agavawëëya, “Nanë nyee, wurë? Muuhanya nene nee nyanyuhe?” 16Simoni Fetero agasucha, “Veve wëë Masihi, Mwana wamwa Muungu në mufanga” 17Yesu agahanya, “Uforiwe veve Simoni mwana wa Yona, gusoko ti mwëërë natisaghami në agukunukwëyaa tutë ëyëë, ëgweeso Tata wanë nëwëë girunde. 18Neenoo nagwëëra: veve wëë Fetero, na gunto a ng'ongo ëyëë nene ngurëjenga kanisa ranë, nanë nguu ya ikuya njeeso ëtiudaha urëhuma. 19Ngugufa funguo ya utemi wa girunde mu rësëë nëugurëutëa muurëmi rëguutëwa girunde noo, mu rësëë nëugurërughua muurëmi rëurughuwa girunde noo.” 20Agavëëra asëywi, vëtamukhanëë muntu mbaumwe mwino mweeso uu Masihi.

Yesu ugurighëtya sayu a makhasëko nanë ikuya rakwe

(Mrk 8:31–9:1; Luk 9:22-27)

21Ufuma itungo rësëë, Yesu agaandya uvëëra daaji asëywi vakwe: “Inoneye nene nënde uYarusalemu, na kuuko nëhange makhasëko mingë ufuma gwa anyampaa, akumbëki në aküü nanë asëyi va Seria. Nene nguuraghwa na itiku ra gatatu ngufëtya.” 22Faafo Fetero agamutoa umpëo, agaandya umukenea: “Taja ëtendeke uvii Müküü. Ihanyo ërëë rëtiuguhanga veve!” 23Ëgweeso Yesu agikengeeya, agamwëëra Fetero, “Hegha kunë nee, Setani! veve wëë gëfingo kunë nee. Veve ti guuvaru wa Muungu ëgweeso a gëintu!”

24Uvii Yesu agavëëra asëywi vakwe, “Nësa muntu gëkaku ugufenja ung'onga nee, inoneye ikhane mughonjo, auhore musalaba wakwe ang'onge. 25Gusoko, muntu nëugufenja uwutyoa uduvi wakwe mughonjo, uguuyaghaya, 26ëgweeso muntu nëuguuyaghaya uduvi wakwe gusoko anë, uguuhanga. Wurë, muntu uguhanga ntuni nëwauhanga ughwarë woong'e wa urëmi ëgweeso wooyaghaya uduvi wakwe? 27Gusoko, Mwaamuntu ujie mu üküü wamwa Tata wakwe itambëëmwe na vamalaëka vakwe, na faafo unë ujie umurëfa mu muntu gwa gwining'anëëra gwa ntendo yakwe. 28Tutë namwëëra, vërëfo vangëja afaafaa nëvëtiukuya nëkëë vinamwoona Mwaamuntu nëujie mu utemi wakwe.”

Currently Selected:

Matayo 16: RNT

Highlight

Copy