Máakúsʉ 6

Pye Nǎzalêi wâghʼ Yěso

(Mat 13.54-58; Lks 4.16-30)

1Yěso gháp pə ngaŋə-jyêʼ-no* yé lə fú yʉʼ wó ə́ náa ndə̌r lə̂ lâʼ yi a lə ghúʼ wó. 2Ə́ pə̂ leʼé nji pəyúda*, a kə̂u ndə̂ cûʼtə* ə́ mə́ njyêʼ pye zə̂u, ŋuu ntsəm zûʼ tsâr yé ndyár ńdâʼ ngô: «A laghʼ mêi mwo ndwuŋ məno fû ghó? Tə wǒ ŋuu gháʼa ŋə́ yé zêi yo mbə̂u jîno gháp yo mbə̂u mətəʉ lə̂ ndághʼ ńgʉ̌ yo mbə̂u mənkəʼə məno? 3Káa a pə́ kámə́ndaa môu Mǎyaa mo? Lə́u ə́ mbə́ fə̌r pə Jâghʼ lə́ Yozês, ə́ ngʉ̌ Jwîdə tə mbaa Síməu póo? Tə káa paghʼə pə pəfə̌r pé pi pəngyě lə̂ kə́ ncî lâʼ yaʼa?» Gháp lâʼ yə́rə́, məkwaŋtə mêi mə́tsəm kə̂ʼtə gháp lə̂ mbə́i no yé. 4Ə́ pə̂ yə́rə́ Yěso lâʼ lə́ páp ngô: «Káa pə pə́ mpfû yé ntsətə-nkəʉ Sê* shʉʼʉ ə́ lâʼ páp, ə́ cər cʉŋə-ndə̂ záp mbaa nzeʼ páp.» 5Ə́ lə təi mbó zʉ́ tə káa a pə́i kûʼ yé lə̂ ngʉ̂ cǒ nkəʼə-no wó, tə ndyéʼ ghíʼ a lə zápə́ mbô lə́ pəcó pəghou, ə́ ngʉ̌ gháp shwítə. 6Ə́ pə̂ nkə́ʼə Yěso ghíʼ kâa gháp ghwô gháp pə̂i-ntə̂ʉ nzəm Sê. Ə́ lei yə́rə́, a cʉ̂ʼ ŋáa ŋə́i cər məlâʼ mi ə́ pə́ məpar lâʼ páp, ə́ njyêʼ pye no Sê.

Yěso tə̂u pye pé ntsap pwô lə̂ ləghə̂m

(Mat 10.1,5-14; Lks 9.1-6)

7Mpfu pôu nkûʼ, a fûŋ ngaŋə-jyêʼ-no yé ntsap pwô lə̂ ləghə̂m, ə́ ntə́u gháp pə́pwô pə́pwô, ə́ ŋə́ gháp mətəʉ lə̂ ndághʼ ńzǔŋ məzəghʼə tə́poŋ* ndəu pye. 8Ə́ ngǐ tə́u gháp yə́rə́, ə́ ndǎʼ lə́ páp ngô: «Koo pei ghi lə̌r ə́ mbyê có zə̂u, tə ndyéʼ ndaʼ kə́shʉŋ, koo pei côghʼ məzʉ̂, koo pei pyê paa, koo pei côghʼ nkâp cər pôu-paa péi, 9pei wé məlaŋə́, koo pei ghwô məndǐ maʼá mə́mbwô.» 10Yěso kə̂ ncí ndáʼ lə́ páp ngô: «Yʉʼ tsəm yi pei kə̌u wó, pei kə́ nyáŋ pə́ ndə̂ yi pə́ pfú wéi wó tə ndáʼ fú yʉʼ wó ndə́r. 11Yʉʼ tsəm yi pei kə̌u wó, pye lə̂ʼ gháp lə̂ mpfú wéi kəʉ lə̂ nzúʼ ntsʉ wéi, pei fû yʉʼ wó ngí lə̌r, ə́ mpfə̌r pəpə́ məku pei, ńjí ńgó ə́ cʉ́ʼ mbə́ tâʼ ləiʼi mbó páp.»

12Ngaŋə-jyêʼ-no lər, ə́ ŋáa ŋə̂i yʉʼ tsəm ńdáʼ lə́ pye ńgó ə́ pə́ ntúŋu ńgó maa wǒwó kə́p cǐ yé. 13Gháp lə ŋəi yə́rə́, ə́ nzûŋ məzəghʼə tə́poŋ* tə nzáa ndəu pye, ə́ mbou ndâghʼ məwə̂r ńzôʼ pəghou, ə́ ngʉ́ gháp shwítə.

Ləwʉ̂ Jâŋ Mbaptísʉ

(Mat 14.1-2; Lks 9.7-9)

14Ə́ leitə́ yə́rə́, ləjôghʼ Yěso sar yʉʼ tsəm. Fou Elôdə* zûʼ ghíʼ pə́ kʉ̂ʉ yé. Pəcó pye pə̂ ndâʼ ngô: «Ə̂ Jâŋ Mbaptísʉ a zʉ̌ʉ lə̂ ləwʉ̂! Ə̂ zə̂u yi ə́ ghʉ̌, a ghwô mətəʉ lə̂ ndághʼ ńgʉ̌ mənkəʼə-məno.» 15Lə́ pəcó pye pə̂ ndâʼ záp pə́ ńgó â Elyê*, pəcó pə̂ ndâʼ záp ńgó ə̂ tâʼ ntsətə-nkəʉ Sê* ghíʼ pi mpfu-ntsəmbi. 16Fou Elôdə* zûʼ mwo məno, ə́ ndǎʼ cər ntə̂ʉ zʉ́ yé ngô: «Ə̂ Jâŋ Mbaptísʉ yi n ndə ghʉ̌ pə́ zâʼ tû yé, a zʉ̌ʉ lə̂ ləwʉ̂!»

17A lə kwaŋ yə́rə́ ńté ghíʼ a lə ghʉ̌ pə́ ghou Jâŋ ńdághʼ pəcêŋ ńkə́r yé ńgwo ḿmâʼ ndə̂-tsâŋ. Ə́ máʼ yé yə́rə́ ńté Elodyâdə yi a lə pə́ ngwě Fílîp fə̌r Elôdə, a shə́rə́ sǎʼ yé ndaghʼ ńgʉ́ ngwě yé. 18Ńté no Jâŋ lə nyâŋ ndâʼ lə́ Elôdə ngô: «Kâa* pôŋ yé ńgó o sâʼ ngwě fə̌r gho ndághʼ ngʉ gho.» 19Ə́ leitə yə́rə́, lóŋ Elodyâdə* kə̂ nzâŋ zaŋə́ ńté Jâŋ tə a záʼa nkwaa yé, ə́ ncʉ́ʼ mə́ ndôu məsʉ̂ lə̂ ngʉ́ pə́ jwî yé, lə́ káa kə́ pə́ jwô yé, 20ńté no Elôdə* lə pə́ ŋə̂ məkuʼ Jâŋ. Ə́ mə́ njî ńgó â ŋuu no lə́nə́ʉ, ə́ mbou mbə́ ŋuu Sê, ə́ ncʉ́ʼ mə́ mbápə yé, ə́ nkǒŋ lə̂ nyáŋ ńzûʼ tsâr yé gháʼate, lə́ tsâr yé zei kə̂ ngághʼə yé ghaghʼə́.

21Elodyâdə* ghʉ ndéitə́ lə̂ leʼé lətsei laghʼ ńkʉ́ʉtə́ leʼé yi pə́ lə jí Elôdə* ńjwó saa lə̂ ngʉ́ pə́ jwî Jâŋ. Ə́ lə pə́ leʼé wêi Elôdə* fûŋ pye jwǐ, pəkə̌m gháp pə pətə́-ndə̂ pəlwóʼó-ntso cər Galilêi ntsəm. 22Gháp tô tə nyáŋə́ sê, môu Elodyâdə* yi məngyě kə̂u ndə̂, ə́ mbíŋ zə̂u tə no yé poŋə́ Elôdə* gháp pə pye pi a lə fúŋ gháp. Fou lâʼ lə́ môu məngyě wêi ngô: «Lóu ghâa zə̂u yi o kǒŋ, n ŋə́ lə́ gho.» 23Ə́ ndǎʼ lə́ zʉ́ tə nkâa ngô: «O lə̌i ndóu pə̂ hó, n ŋə̂ lə́ gho. O lə̌i mbə́i ndǎʼ pə́ ńgó n ngáptə́ ləfou zâa təcər n ŋə̂ có wuŋú lə́ gho, mə́i n nkə́ pə́i pə́i.» 24A kwâr ńgwó ńtúŋú mə́ ye ngô: «N ndóu yé hó?» Mə́ ye pwôr ngô: «Wo ńdóu yé tû Jâŋ Mbaptísʉ.» 25A kə̂ nkhʉ́tə́ pə̂ mpfu wêi ńgwó ńdǎʼ lə́ fou ngô: «M mə̌ nkoŋ ńgó ô kə́ nzáʼ tû Jâŋ Mbaptísʉ pə̂ mpfu wo, ə́ núŋú cər paghʼə kâŋ ńŋə́ lə́ məŋ.» 26Fou zûʼ, ə́ shʉ́ŋə́ sʉ̂ yé, lə́ no yi a yǎa ndǎʼ mbi pəghəʉ pé tə nkâa ghʉ, káa a kə́ njî yé ghíʼ mboʼ a lə̂ʼ. 27Ə́ nkə́ ntóghʼ ntə́u ŋuu yi a pâp pəghaŋə-tsâŋ ńgó a wó ndǎghʼ tû Jâŋ ńtó. A kə̂ ngwó ndə̂-tsâŋ ə́ nzáʼ tû Jâŋ, 28ə́ ncóghʼ cər kâŋ ndǎghʼ ńtó ńŋə́ lə́ môu məngyě wêi, a pfû ńgwó ńŋə́ lə́ mə́ ye. 29Ngaŋə-jyêʼ-no* Jâŋ zûʼ ńgó pə́ jwí tə́ ghap, ə́ ngwo ńkhwór kə́mtə́ yé ńcóghʼ cər ləshi#6.29 Zêi ləshi káa lə pə́ yé cər ndesé, ə́ lə pə́ pə́ cər ləghǒ yi pə́ shʉ̌ʼ, ə́ mə́ ngúʼú..

Yěso zághʼə pye tóusʉ tâa

(Mat 14.13-21; Lks 9.10-17; Jâŋ 6.1-15)

30Pəghaŋə-ntə̂u Yěso* lər tə mbə̂ʉ, ə́ ntó ńkə́itə́ mbəʉ zʉ́, ə́ mə́ mbyêtə zə̂u tsəm yi gháp kə kə́u ńgʉ́, ə́ ndǎʼ yé tə mbaa zə̂u yi gháp kə́ jyéʼ pye. 31A lâʼ lə́ páp ngô: «Pei tó paghʼə lə́r lə̂ yʉʼ yi káa ŋuu pə̂ yé wó, ə́ pei nyêʼ nzə́tə́.» A lâʼ yə́rə́, ńté no lâʼ lə zâa, pəcó pye pə̂ ndə́r, pəcó pə̂ ntó tə káa gháp pə ngaŋə-ntə̂u* yé kə̂ ngwô gháp mpfu yi mboʼ gháp zʉ̂ zə̂u. 32Gháp pə pǎp kə̂u cər kənyúʼ, ə́ mə́ ndə̂r lə̂ yʉʼ yi kâa pye pə̂ gháp wó.

33Ə́ ngí lə̌r, lâʼ jwô gháp, ə́ ndə̌i gháp, ə́ nzáʼá ńŋə̂i lə̂ məku, ə́ fú mətúsoŋ mə́tsəm nâa nkwǎr, ə́ mbyə̌ghʼ lə̂ cǒ njʉŋə́, ə́ nzʉ́ʼtə́ Yěso. 34A kə̂u yʉʼ wó, ə́ fú cər kənyúʼ ńkwár, ə́ njwó lâʼ, məjʉ̂ŋ máp kô yé, ńté no gháp lə cʉ́ʼ mbə́ pə́ ghíʼ məndənzʉ mi ŋuu yi a koghʼə gháp kâa pə̂ yé wó lə̂. Ə́ njǐ lə̂ njyéʼ gháp məno tə nzáa. 35Zâʼ nzʉ̂ pôu ndêi, ngaŋə-jyêʼ-no* yé tô lə̂ mbəʉ zʉ́, ə́ mə́ ndâʼ ngô: «Paghʼə pə́ gháʼa yʉʼ yi káa có zə̂u pə̂ yé wó, zâʼ nzʉ̂ pou mə́ nděi. 36Lǎʼ lə́ pye ńgó gháp wó cər məlâʼ mi ə́ pə́ məpar yaʼa, ə́ nzə́u məzʉ̂ ńzʉ́.» 37A pwôr lə́ páp ngô: «Pei zéi lə́wó, pei ŋə́ zə̂u gháp zʉ́.» Gháp pwor záp ngô: «O lâʼ gháʼa ńgó paghʼ lâghʼ nkâp məpaghʼ#6.37 Paghʼə nkâp káa (tâʼ ndənyê) lə pə́ ntsoʼó-faʼ yi tâʼ leʼé mbî. Nkâp məpaghʼ nkʉ pwô lə pə́ ntsoʼó-faʼ yi məleʼé mbî nkʉ pwô. nkʉ pwô ńgwo ńzə́u mbələ̂ghʼ ńŋə́ lə́ páp áa?» 38Yěso túŋu gháp ngô: «Pei ghwô mbələ̂ghʼ ntâʼ sə́ʼə́? Pei wó náŋtə́.» Gháp wo náŋ, ə́ mbə̌ʉ nzəm ə́ ndáʼ yé ngô: «Paghʼ ghwo mbələ̂ghʼ ntâʼ ntaa ə́ ngʉ̌ shû ntâʼ pwô.»

39A lâʼ lə́ páp ngô: «Pei ghʉ́ pye nyáŋtə́ lə̂ məghěi məcuʼú məcúʼú.» 40Gháp shîʼ nyáŋtə́ sê, məcó məcúʼú pə̂ pye mə̂m-taa, məcó pə̂ pye nkʉ. 41Yěso pfû mbələ̂ghʼ wêi ntâʼ ntaa gháp pə shû ntâʼ pwô, ə́ mbəʼə́ tû yé, ə́ ŋə́ nkhwo mbó Sê. Ə́ mbwóʼtə́ mbələ̂ghʼ ńŋə́ lə́ ngaŋə-jyêʼ-no* yé, ghíʼ gháp ghâptə́ lə́ lâʼ, ə́ nkə́ ncí ngʉ́ pə́ yə́rə́ lə̂ shû. 42Gháp pə́tsəm pfâr, ə́ njwə́r. 43Pə́ kəitə məpfuʼ mbələ̂ghʼ tə mbaa mi shû mi ə́ vuʼú, ə́ lóghʼə pətyép ntsap pwô lə̂ ləghə̂m. 44Pye pi gháp lə pfár mbələ̂ghʼ, lə záa gháʼate, tə ndaʼ mbiŋə pə̂ no tóusʉ tâa.

Yěso ŋəi ndəu nci

(Mat 14.22-33; Jâŋ 6.16-21)

45Yěso kə̂ ntóghʼ ndáʼ lə́ ngaŋə-jyêʼ-no* yé ńgó gháp kə́u kənyúʼ, ə́ mbə́ mbi, ə́ ntə́u ndə̂r lə̂ cǒ njʉŋə́ lə̂ ndyəghʼə́ lâʼ Mbetsayída; â cʉ́ʼ nzəm ngʉ́ lâʼ pə̂ʉ. 46Yěso ghʉ̂ lâʼ pəʉ, a kôʼ ndəu ləkôr lə̂ sʉ́ʉtə́ Sê. 47Twûʼ ghi shʉ́ŋ, mə́i kənyúʼ lər mə́ tə nkə́u soŋ nci, Yěso pyêr ntə́ʉ pə́ nkaŋ nci zə́ghʼə́-zʉ́. 48Ə́ njwó ngaŋə-jyêʼ-no yé pə̂ ndâghʼ məkwâghʼ ḿbághʼə nci, lə́ káa kənyúʼ pə́ fátə́ ncʉ́ŋə́ yé, ńté ńgó kəfwor lə pə́ fû pə̂ mbi mbi ńtó. Ə́ ghʉ ḿbə́ nkôʼ-nzʉ̂, Yěso ŋə̂i ndəu nci lə̂ ngwó ncə́r gháp, ə́ ŋə̌i tə mə́ ntóghʼə gháp ńdêi. 49Gháp jwô ghíʼ ŋuu pə̌ ŋə̂i ndəu nci, ə́ nkwǎŋ ńgó ə̂ wú-ŋuu, ə́ njǐ lə̂ ncwôr ngwuŋ. 50Gháp pə́tsəm lə naa mə́ njwô yé ghíʼ a tô, ə́ fú mbóghʼ gháʼate, lə́ Yěso kə̂ ntóghʼ ndáʼ lə́ páp ngô: «Pei ghwótə́ mbəʉ zéi! Ə̂ mə̂ŋ, koo pei kə̂ mbóghʼ!» 51Ə́ ndǎʼ yə́rə́, ə́ nkə́u cər kənyúʼ, kəfwor záʼa, ə́ kəʼə gháp gháʼate, 52ńté ghíʼ məntə̂ʉ máp lə tə̌i, káa gháp zûʼ gháp zə̂u yi nkəʼə-no yi mbələ̂ghʼ lə laghʼ ńdáʼ.

Yěso ghʉ̂ pəghou njʉŋə́ Jenezarêd shwîtə

(Mat 14.34-36)

53Gháp tə̂u nci tə nkə́u Jenezarêd, ə́ nkǎp kənyúʼ nkaŋ nci. 54Ə́ nkwatə́ ńtə́ʉ sê, pə́ ləi Yěso, 55ə́ nkə́ ntóghʼ nkhʉ́tə́ ńgwǒ mənzeʼ, ə́ nkhwótə́ pəghou lə̂ məkweʼ ńdághʼ ńtó ncə́r yé yʉʼ yi a pə̌ wó. 56A pə̂ ndêi maa yʉʼ tsəm mətúsoŋ gháp pə məlâʼ, pə́ pə̂ nkhwôtə pəghou ndághʼ ńtó ńnûŋtə lə̂ yʉʼ yi a wo lěi wó. Ə́ sʉ̂ʉtə yé ńgó a pə́i gháp kə̂u pə́ ndaʼ lətsáa ndǐ yé. Pye pi gháp lə kə̌u lətsáa ndǐ yé zei, lə shwítə́ pə̂ pə́tsəm.

Currently Selected:

Máakúsʉ 6: NLA

Highlight

Copy