Lúʼkáasʉ 3
3
Jâŋ lâʼ ńgó pye kə́p cǐ záp
(Mat 3.1-12; Mks 1.1-8; Jâŋ 1.6-8,19-28)
1-2Ə́ lə pə́ mbâatə nguʼ tsap tâa lə̂ ləghə̂m, ghíʼ fou Tibêi lə nyáŋ lwoŋ mə́ sâʼ lâʼ, Sê lâʼ no lə́ Jâŋ môu Sakalyê ghíʼ a pə̌ koŋə-məkwaʼá. Ə́ pə̂ mpfu wêi Póŋsə́ Piláto pə̂ ngə́mnaa lə̂ ndyəghʼə́ yi Yudêi, Elôdə pə̂ yé fou lə̂ ndyəghʼə́ yi Galilêi, fə̌r ye Fílîp pə̂ fou ntwoʼ lə̂ ndyəghʼə́ yi Itwilî gháp Təlakonîd, Lisanyǎsʉ pə̂ lə̂ ndyəghʼə́ yi Abilêŋ. 3Jâŋ cʉ̂ʼ nkə́ ŋáa ŋə́i cər məlâʼ mi wə́ nkaŋ nci Yuudêŋ mə́tsəm, ə́ mə́ ngâp tsâr Sê lə̂ lâʼ ngô: «Pei kə́p cǐ zéi ə́ mpfú nci, Sê lyəghʼə́ məfaa wei.» 4Ə́ kə̂ ḿbə́ ghíʼ Esǎya ntsətə-nkəʉ-Sê lə ŋwaʼá ngô: «Ə nji cǒ ŋuu pə̌ nkôʼ koŋə-məkwaʼá mə́ ndâʼ ngô: Pei ńtsúŋtə́ laŋə́-ndə̂u Nde, ə́ ngʉ̌ pəshwáŋə-láŋə́ pé núŋ ndʉŋ-ndʉŋ. 5Maa toʼo tsəm táa pə́ yi ləghʼə́, maa ləkôr tsəm pə́ yi koghʼə́, pə́ táa ghʉ̌ məlaŋə́-ndə̂u mə́tsəm mi ə́ ŋóʼtə́, ə̂ tə́ʉ ndʉŋ-ndʉŋ, pə́ póu nkǒghʼ məluʼú ńdághʼ ńdə́ghʼə́ məghəm mə́tsəm, ə laŋə́ núŋ ndʉŋ-ndʉŋ. 6Ŋuu tsəm táa jwó ləcwôr yi Sê ŋə̌. 7Mpfu yi nou lâʼ lə pə́ ntó ńcə́r Jâŋ ńgó a ŋə́ gháp nci, a pə̂ ndâʼ lə́ páp ngô: Ngər mənô! Wǒ ŋuu kə jyéʼ wéi lə̂ nkhʉ̂ záŋə-lóŋ Sê yi ə́ pə́ ntó? 8Pei lâghʼ pə̂ ngʉ̌ məno wéi ńnyarə́ ńgó pei kəp mə́ cǐ zéi, koo pei lâʼ pə́ ńgó pei ghəpə́ Ábələhâm. Ńté ńgó kwaʼ lə́nə́ʉ, mboʼ Sê shə́rə məghǒ mwo ńdaghʼ ńgʉ́ ngər Ábələhâm. 9Ə́ Pəi mə́ mbə̌u ghíʼ nzaa wo khwóʼ məŋaŋə tʉ̌; tʉ̌ tsəm yi káa pə́ nzə̂m yé ntǎa shʉʼʉ, pə́ wo khwóʼ, ə́ mǎʼ mǒghʼ.» 10Ə lâʼ túŋú yé ngô: «Tə mboʼ paghʼ ghʉ gháʼá?» 11A pwôr lə́ páp ngô: «Ŋuu yi a ghwǒ məndǐ mə́mbwô, a ŋə́ tâʼ lə́ ŋuu yi kâa ghwô yé cǒ. Ŋuu yi a ghwǒ məzʉ̂ ŋə́ mi ŋuu yi kâa ghwô yé.» 12Pəpfǔ-ntsəp tô záp lə́wó lə̂ ngʉ́ pə́ ŋə̂ gháp nci, ə́ ntúŋú yé ngô: «Cícye, paghʼ ghʉ́ zághʼ gháʼá?» 13A pwôr lə́ páp ngô: «Koo pei kʉ́ʼʉ có zə̂u lə́ yi pə́ lǎʼ ńgó pei pfú.» 14Pəlwóʼó-ntso ntúŋú záp yé lə́wó ngô: «Ə́ ngwǒ lə́ paghʼ, paghʼ ghʉ̂ zághʼ gháʼá?» A pwôr lə́ páp ngô: «Koo pei lâghʼ mətəʉ ḿpfú zə̂u ŋuu; koo pei kâp no tû ŋuu ńdághʼ ḿpfú zə̂u yé, lə́ pei zʉ́ʼtə́ pə̂ məntsoʼó-faʼ méi.» 15Ə́ lə́ pə́ mpfu wêi, lâʼ pə̂ nzʉ́ʼtə gháʼate, wǒwó pə̂ ntúŋu cər ntə̂ʉ zʉ́ ngô: «Kəʉ Jâŋ lə̂ gháʼa ḿbə́ Nzaʼ-nkʉ wêi?» 16Jâŋ lâʼ lə́ páp pə́tsəm ngô: «N ndaghʼ zâa pə̂ nci fefe ńŋə̂ wéi nci; lə́ cǒ ŋuu pə̌ ntó, ə́ tə̌i ńdéi ghâa tə kâa m mbə́i nkuʼ ghâa pə́ lə̂ nkéʼ mənkʉ məlaŋə́ mé. A táa laghʼ yé pə̂ Zəghʼə Ndêi-lěi gháp mǒghʼ ńŋə́ wéi nci. 17A ghwo tsəkələ ye pô zʉ́, ghíʼ a lǎghʼ tár məfəpə lə̂ məmbəm. Ə́ loʼó məmbəm cər nkəi, ə́ zǎghʼ məfəpə tǒu cər mǒghʼ yi tə́ láʼ ncwí.» 18Jâŋ pə̂ ndêʼtə lâʼ Nkəʉ Shʉʼʉ, ə́ mbou mə́ ŋə̂ məcó məntǎghʼ tə nzáa. 19Lə́, Jâŋ lə sáʼ ngə́mnaa Elôdə, ńté no a lə shə́rə́ sâʼ Elodyâdə, ngwě fə̌r ye, ə́ mbou nkə́ ncí sáʼ ńté məcó məno tə́poŋ mi zǎa. 20Elôdə lə pôu ngǐ nzápə́ no tə́poŋ lə̂ có, ə́ ngʉ̌ pə́ ghou Jâŋ máʼ ndə̂ tsâŋ.
Yěso tǒ lə̂ ḿpfú nci
(Mat 3.13-17; Mks 1.9-11; Jâŋ 1.32-34)
21Lâʼ tsəm lə pə́ ńtó mpfû nci*, Yěso kə̂ ntó ḿpfû yé nci lə́wó. A lə pfû nci tə ə́ kuʼ, a pə̂ sʉ̂ʉtə Sê, tʉ̌-lə́pû ŋéʼe ńtə́ʉ. 22Ə Zəghʼə Ndêi-lěi shîʼ ghíʼ pə́ptə́ lə́ Yěso, cǒ njî fû tʉ̌-lə́pû ndǎʼ ngô: «Ô môu ghâa, yi n nkǒŋ yé gháʼate.»
Pəmə́ngâa-njʉʼ Yěso
23Yěso lə ghí jǐ lə̂ ŋáa ntsə́tə́ Nkəʉ Shʉʼʉ ə́ ngwǒ no nguʼ mə́ntárə́. Pye lə pə́ njî ńgó â môu Yosêp yi a lə pə̂ yé môu Elyê. 24Elyê pə̂ môu Matad. Matad pə̂ môu Levî. Levî pə̂ môu Meləshî. Meləshî pə̂ môu Yanêi. Yanêi pə̂ môu Yosêp. 25Yosêp pə̂ môu Matatyǎsʉ. Matatyǎsʉ pə̂ môu Amósʉ. Amósʉ pə̂ môu Nawûm. Nawûm pə̂ môu Eslî. Eslî pə̂ môu Nagêi. 26Nagêi pə̂ môu Maad. Maad pə̂ môu Matatyǎsʉ. Matatyǎsʉ pə̂ môu Səməyîŋ. Səməyîŋ pə̂ môu Yôsêʼ. Yôsêʼ pə̂ môu Yôda. 27Yôda pə̂ môu Yohanâŋ. Yohanâŋ pə̂ môu Réza. Réza pə̂ môu Zolobabêl. Zolobabêl pə̂ môu Sheltyêl. Sheltyêl pə̂ môu Nelî. 28Nelî pə̂ môu Melkî. Melkî pə̂ môu Aadí. Aadí pə̂ môu Kosam. Kosam pə̂ môu Elmandâm. Elmandâm pə̂ môu Êr. 29Êr pə̂ môu Yǒsówa. Yǒsówa pə̂ môu Elyezêr. Elyezêr pə̂ môu Yolîm. Yolîm pə̂ môu Matad. Matad pə̂ môu Levî. 30Levî pə̂ môu Simeyôŋ. Simeyôŋ pə̂ môu Yúda. Yúda pə̂ môu Yosêp. Yosêp pə̂ môu Yonâm. Yonâm pə̂ môu Elyakîm. 31Elyakîm pə̂ môu Melə́ya. Melə́ya pə̂ môu Mənaa. Mənaa pə̂ môu Matataa. Matataa pə̂ môu Natâŋ. Natâŋ pə̂ môu Ndavîd, 32Ndavîd pə̂ môu Yesê. Yesê pə̂ môu Obêd. Obêd pə̂ môu Bôoz. Bôoz pə̂ môu Salá. Salá pə̂ môu Náasoŋ. 33Náasoŋ pə̂ môu Aminadâp. Aminadâp pə̂ môu Admîŋ. Admîŋ pə̂ môu Aanî. Aanî pə̂ môu Esəlôm. Esəlôm pə̂ môu Perésʉ. Perésʉ pə̂ môu Yúda, 34Yúda pə̂ môu Yokôp. Yokôp pə̂ môu Ísaghʼ. Ísaghʼ pə̂ môu Ábələhâm. Ábələhâm pə̂ môu Talá. Talá pə̂ môu Nahôr. 35Nahôr pə̂ môu Səlûʼ. Səlûʼ pə̂ môu Rəwu. Rəwu pə̂ môu Pəlêghʼ. Pəlêghʼ pə̂ môu Ebêr. Ebêr pə̂ môu Shilá. 36Shilá pə̂ môu Keinâm. Keinâm pə̂ môu Aafazâd. Aafazâd pə̂ môu Sem. Sem pə̂ môu Nówa. Nówa pə̂ môu Ləmeghʼ. 37Ləmeghʼ pə̂ môu Matúsaləm. Matúsaləm pə̂ môu Enôghʼ. Enôghʼ pə̂ môu Yəlêd. Yəlêd pə̂ môu Malélêi. Malélêi pə̂ môu Keinâm. 38Keinâm pə̂ môu Enósʉ. Enósʉ pə̂ môu Sed. Sed pə̂ môu Ádam. Ádam pə̂ môu Sê.
Currently Selected:
Lúʼkáasʉ 3: NLA
Highlight
Share
Copy
Want to have your highlights saved across all your devices? Sign up or sign in
