Lúʼkáasʉ 1
1
1Nde Tehofîlə, o jǐ ńgó pye tə nzáa kə khwor faʼ lə̂ nkə̂itə́ məno mi ə́ kə leitə́ təcər paghʼə, ə́ ŋwaʼá, 2ə́ nkə́ ŋwáʼá ndʉŋ-ndʉŋ ghíʼ pye pi gháp lə jwó měi tə fú lə́jitə́, ə́ mbou ncʉ́ʼ mə́ ŋáa ndêʼtə tsâr Sê. 3N ŋáa mə́ ntûŋ zâa ləcʉŋ mêi mwo məno tə njwó ńgó ə́ poŋ ńgó n ntʉ́ŋtə́ měi, ə́ nkə́ ŋwáʼa zâa shʉʼʉ cər wo ŋwaʼa ńŋə́ lə́ gho. 4Ə́ ndaghʼ ńdôu ńgó ô fúŋ, ə́ ndéitə́ mə́u, ə́ njí ńgó məno mi pə́ kə jyéʼ ghô měi, ə́ pə́ lə́nə́ʉ.
Cwôʼ Sê tsətə́ ńgó pə́ wo jí Jâŋ Mbaptísʉ
5Ə́ lə pə́ mpfu Elôdə pə̌ fou Yudêi, cǒ nuŋu-poʼ Sê pə̂ wó, ləjôghʼ yé pə̂ Sakalyê, a pə̂ lə́ ndyəghʼə́ pye Ábya. Ngwě ye fû lə̂ cʉŋə-ndə̂ Áloŋ, ləjôghʼ yé pə̂ Lísápe. 6Gháp pêi pə́pwô lə pə́ pye pi Sê lə jwó gháp ghíʼ pye ndʉŋ-ndʉŋ mbi zʉ́, gháp pou mə́ nzûʼ məntǎghʼ gháp pə maa zə̂u tsəm yi Nde lə lâʼ gháp tə́ kotə. 7Lə́ káa gháp lə ghwô gháp môu, ńté ńgó Lísápe lə pə́ nkə̌i, mə́i gháp pə́pwô pou mə́ cʉ́ʼ gháp pətikáŋ. 8Ə faʼ lə zə́mə́ tə ntə́ʉ lə̂ ndyəghʼə́ yi pə Sakalyê, a pə̂ ndə̂ Sê Yelúsalêm mə́ fâʼ, 9pənuŋú-poʼ-Sê pə̂ có leʼé, ə́ tə́m pyêr lə̂ ńdághʼ ńtsóʼ tâʼ ŋuu nou páp yi a wo kə́u təcər ndə̂ Sê, ə́ tǒu lamə́ndaa lə̂ ńdághʼ ńgúʼtə́ Sê ghíʼ gháp yaa ncí ńgʉ́. Ə́ ngʉ̌ yə́rə́, Sê tsôʼ Sakalyê. 10Ə lâʼ tsəm lə pə́ péi mə́ sʉ̂ʉtə Sê mpfu yi a lə pə́ təcər ndə̂ Sê mə́ ntôu lamə́ndaa. 11Tâʼ cwôʼ Nde kwâr mbi zʉ́ ńtə́ʉ yʉʼ yi pə́ tou lamə́ndaa wó ndə̂ Sê, lə̂ ndyəghʼə́ yi təʉ. 12Sakalyê jwô yé, ə́ pə̂u yé tə a pôghʼ. 13Lə́ cwôʼ Sê lâʼ lə́ zʉ́ ngô: Sakalyê koo kə̂ mbóghʼ; ńté ńgó Sê kə zûʼ sʉ̂ʉtə zô. Ngwě gho Lísápe wo jí tâʼ môu mbiŋə, ô cî ləjôghʼ yé ńgó Jâŋ. 14A táa pə́ zə̂u tə́koʼ lətsei mbó gho, pye tə nzáa pôu ntsěi ńté ghíʼ pə́ jí yé. 15Ńté ńgó a táa pə́ ŋuu njwǐ mbi Sê, a táa nô yé məluʼ po, tə mbaa zə̂u tsəm yi mboʼ ə́ ghʉ ŋuu pʉ̂ʉ. A táa ghǐ fú ləpəm mə́ ye, mə́i Zəghʼə Ndêi-lěi pə́ mə́ lə́ zʉ́. 16A táa ghʉ̌ ghəpə́ Ísə́lahêl tə nzáa pə̂ʉ ńtə́ʉ nzəm Nde yi a pə̌ Sê zap. 17A ghʉ̌ lǎghʼ jîno gháp pə mətəʉ Elyê ńŋə̌i mbi Sê, ə́ shərə́ məntə̂ʉ pətə́, gháp náŋtə́ ghəpə́, ə́ ghʉ̌ pəghaŋə tə̂i tû ghwô záp kwaŋtə ghíʼ pye pi gháp kǒŋ no lə́nə́ʉ, lə̂ ndághʼ ńtsuŋtə́ kwaʼ ngər pye-mə́soŋ shʉʼʉ mbó Nde. 18Sakalyê lâʼ lə́ cwôʼ Sê ngô: «Tə n ntáa lǎghʼ hó jí zêi no? Ńté no n ndwuŋ mə́ ghâa, ngwě ghâa pou cʉ̂ʼ yé ntikáŋ.» 19Cwôʼ Sê pwôr lə́ zʉ́ ńgó: «Ə̂ məŋ Ngápələ́ya ŋuu yi a tə̂ʉ mbi Sê, pə́ lə́ tə́u ghâa ńgó n ntó poghʼo tsâr n nkə́u tsə́tə́ wo Nkəʉ Shʉʼʉ mbó gho. 20Ə́ yo, o wo cʉ́ʼ cípúʼ, ə́ kə́ tsár ghô po tə ŋə́ leʼé yi yo no lěi, ńté ńgó n ndaʼ ghô məno mi ə́ táa lěi lə́ zap mpfu, koo pə̂i ghô.» 21Ə́ pə̂ mpfu wêi, lâʼ ghi pə́ zʉ́ʼtə Sakalyê, ə́ pə̂ nkə́ʼə gháp mbə̂u yi a lǎghʼ ńkə́u ndə̂ ńcí. 22Lə́ a pou nkwár, káa kə́ kûʼ yé lə̂ ndâʼ no lə́ páp, ə́ ncʉ́ʼ ndâghʼ pə̂ mbô mé ńfə̂iʼtə no; gháp lêi-lěi njí ńgó a kə̌u ndə̂, Sê ŋêʼ nyôghʼ mé a jwô cǒ kəʼə-no; ə́ fú yə́rə́ ncʉ́ʼ mbə́ pə́ cípúʼ.
23Mé məleʼé faʼ lə me, a pə̂ʉ lə̂ nzéʼ zʉ́. 24Mwo məno lə lei yə́rə́, ngwě ye Lísápe pə̂ məngyě shuŋú; ə́ ncʉ́ʼ nyâŋ pə̂ ndwo lwǒ ńté no mə́u təcər saŋ tâa, ə́ mə́ ńdâʼ cər ntə̂ʉ zʉ́ ngô: 25«Yo no yi Nde kə náŋtə́ ghâa tə ńgʉ́ lə́ məŋ, lə̂ ńdághʼ ńgʉ̌ zə̂u yi lə ghʉ məŋ cʉ̂ʼ ngaŋə-sə̂ʉ ə́ me.»
Cwôʼ Sê lâʼ lə́ Mǎyaa ńgó a táa jí môu mbiŋə
26Ə́ lə pə́ lə̂ mbâatə saŋ ntoghʼó ghíʼ Lísápe pə̌ məngyě shuŋú, Sê tə̂u cwôʼ ye Ngápələ́ya túsoŋ Nǎzalêi cər paghʼə-ngoŋ Galilêi, 27lə̂ cǒ môu-ngou yi pə́ fûŋ yé ńgó Mǎyaa, mə́i Yosêp ŋuu cʉŋə-ndə̂ fou Ndavîd lə tó ńtúŋú no tû yé tə pə́ pə̂i. 28Cwôʼ Sê kə̂u ndə̂ zʉ́, ə́ ndǎʼ ngô: Tsêi ńté ńgó Sê ghʉ no shʉʼʉ lə́ gho, pei zʉ́ pə̂. 29Mǎyaa zûʼ tsâr zei ə́ fû mbə́u yé gháʼate, a nkwâŋ ńgó zêi yo mbə̂u tsêʼtə gháʼá ndághʼ ńdaʼ ńgó hó? 30Cwôʼ Sê lâʼ ngô: «Mǎyaa, koo o pôghʼ, ə Sê mâʼ pou zô. 31Zûʼ: O wo pə́ məngyě shuŋú, ə́ ghʉ̌ jí môu mbiŋə, ə́ cǐ ləjôghʼ yé ńgó Yěso. 32A táa pə́ ŋuu njwǐ, pə fûŋ yé ńgó Môu Tsəpye. Nde Tǎa Sê ghʉ̌ ŋə́ lwoŋ ləfou Ndavîd tə́ ye lə́ zʉ́. 33A táa lǎghʼ ləfou yé yi tə láʼ mé, ə́ cí sâʼ Ísə́lahêl ntsəm.» #1.33 2Sa 7.16 34Mǎyaa lâʼ lə́ cwôʼ Sê ngô: «Tə zêi yo no wo láʼ lěi gháʼá, ghíʼ m mbyěr pə́ tə jǐ no ŋuu mbiŋə lo?» 35Cwôʼ Sê pwôr lə́ zʉ́ ngô: «Zəghʼə Ndêi-lěi táa kə́u lə́ gho, mətəʉ Tsəpye táa ndaghʼ mə́jʉ̂ŋtə ye kə́ptə́ ghô. Ə̂ zə̂u yi ə́ ghʉ̌, ndêi-lěi môu yi o táa jí lêi, pə́ táa fúŋ yé ńgó môu Sê. 36Fə̌r gho Lísápe pə̌ tə mə́i a lwuŋ mə́, lə́ ə́ mə́ nzʉ́ʼtə tâʼ môu mbiŋə yi a wo jí, zʉ́ yi pə́ lə fûŋ yé ńgó nkə̌i lə̂, â məngyě shuŋú tə ə́ pə́ mə́ saŋ ntoghʼó. 37Ńté ńgó mboʼ có no tsə̂ yé Sê po.» #1.37 Jnz 18.14 38Mǎyaa lâʼ ngô: «Mə̂ŋ ngaŋə-faʼ Nde: Ə́ poŋ ńgó məno mi o lǎʼ lə̂, ə̂ pə̂utə́ lə́ məŋ yə́rə́.» Cwôʼ Sê cʉ̂ʼ fú mbəʉ zʉ́ ə́ ndə̂r yé.
Mǎyaa wo ngwə́ Lísápe
39Mǎyaa lêsê lə̂ məleʼé mêi, ə́ ŋə̌i lə́ təʉ ńdə́r lə́ có túsoŋ lə̂ ndyəghʼə́ yi məkôr Yudêi. 40Ə́ nkə́u wó, ə́ ngwó nzeʼ Sakalyê ńtseʼtə́ Lísápe. 41Mpfu yi a zǔʼ tsêʼtə Mǎyaa, môu lêi-lěi ŋárə́ ləpəm zʉ́, ə́ Zəghʼə Ndêi-lěi kə̂u lə́ zʉ́. 42A lâʼ lə̂ təʉ ngô: «Mbwórə wə́ lə́ gho ə́ nděi pəngyě pə́tsəm, ə kə̌ mbou mbə́ lə́ môu yi a pə̌ ləpəm gho lə́wó. 43N ngáʼa mbə̂ zâa wǒ tə mə́ pə Nde ghâa tô ndə̂ məŋ? 44Ńté ńgó n nyǎa ńděi tə nzúʼ tsêʼtə zô, môu laghʼ lətsei ńŋárə́ ləpəm məŋ. 45Ndʉʉ-mboŋ, â məngyě yi a pə̌i ńgó no yi Sê lə lǎʼ lə́ zʉ́ táa pəutə́.»
46Mǎyaa cʉ̂ʼ ndâʼ ngô: «Mə́jʉ̂ŋtə ghâa pə̌ ngûʼtə Nde.
47Zəghʼə zâa pə́ ntsěi
ńté Tǎa Sê Nzaʼ-nkʉ ghaa.
48Ńté ńgó a tâghʼ nyôghʼ mé lə́ məŋ yi n ngwǒ lə́ pəghaŋə-faʼ pé, káa pə̌i pə̂ ghâa có zə̂u.
Ə̂ŋ, lə̂ fú mpfu wo, pye-mə́soŋ lə́ məwěi məwěi táa cí fûŋ ghâa ńgó ndʉʉ-mboŋ,
49ńté no Sê ngaŋə-mətəʉ mə́tsəm ghʉ pətə́koʼ məno lə́ məŋ.
A pə́ tə́ lǒʼ.
50Poŋə-ntə̂ʉ yé pə́
lə́ maa wǒwó yi a pə̌ mbôghʼ yé, lə̂ məwěi məwěi.
51A laghʼ mətəʉ pô yé,
ə́ shághʼə́ pye pi gháp kə ghwǒ məkwaŋtə ləŋâʼtə məntə̂ʉ páp.
52A lə shúʼú pəfou lə̂ məlwoŋ máp,
ə́ ntó lə́ pye pi gháp shúʼú mbəʉ záp, ə́ ŋáʼá gháp ńŋə́ tʉ́.
53A kə ŋə́ məzə̂u lə́ pəghaŋə-nji tə ndóghʼó mbô máp,
ə́ mbaghʼə́ pəghaŋə-zə̂u, gháp kwô mbô fe.
54A kʉ̂ʉtə poŋə-ntə̂ʉ yé,
ə́ ntó ḿpfútə́ Ísə́lahêl ngaŋə-faʼ ye.
55Ghíʼ a kə lǎʼ lə́ pətə́ paghʼə
ńté Ábələhâm gháp pə ngər yé lə̂ mənguʼ mənguʼ.»
56Mǎyaa gháp Lísápe cî no saŋ tárə́, a pə̂ʉ yé lə̂ nzeʼ zʉ́.
Pə́ jí Jâŋ Mbaptísʉ
57Mpfu yi Lísápe wo jí ghʉ̂ nkûʼ, a jî môu mbiŋə. 58Pəghaŋə ləpar nzeʼ pé gháp pə pəfə̌r pé zûʼ ńgó Nde lə fú ndǎghʼ poŋə-ntə̂ʉ yé ńgʉ́ tə́koʼ no shʉʼʉ lə́ zʉ́, gháp pəpáp tsêi. 59Ə́ pou mbə́ lə̂ mbâatə leʼé ləfǎa, gháp tô lə̂ mbúʼ môu, ə́ nkə́u mə́ nkôŋ ncí ləjôghʼ yé ghíʼ yi tə́ yé ńgó Səkəlyê. 60Lə́ mə́ ye pfû tsâr ńdǎʼ ngô: «Ə ngə́, pə wo fúŋ yé ńgó Jâŋ.» 61Gháp lâʼ lə́ zʉ́ ngô: «Káa cǒ ŋuu pə̂ yé lə̂ ngər zei yi pə́ pə́ fûŋ yé yə́rə́.» 62Ə́ ncʉ̂ʼ mə́ ndâghʼ mbô máp ńfə́iʼtə́ ńtúŋú tə́ môu ləjôghʼ yi a pə̌ nkoŋ ńgó pə cî lə́ zʉ́. 63Səkəlyê ghʉ̂ pə́ ŋə̂ paghʼə zə̂u lə́ zʉ́ a ŋwaʼa mə́u ngô: «Ləjôghʼ yé Jâŋ.» Ə́ fû nkəʼə́ ŋuu ntsəm. 64Ntsʉ yé tsóʼo, a cʉ̂ʼ ngí pə́ tsár, ə́ mə́ ngúʼtə Sê. 65Pəghaŋə ləpar nzeʼ pé lə zûʼ záp yə́rə́, ə́ mbóghʼ; pə́ pou mbə́ lə̂ ndyəghʼə́ yi məkôr cər lâʼ Yudêi, ə́ mə́ sʉ̂ŋ mêi mwo məno mə́tsəm. 66Ə́ lə kəʼə wǒwó yi a lə zúʼ gháʼate, a cʉ̂ʼ mə́ ndâʼ ngô: «Tə wei wo môu táa pə́ gháʼá? Lə́, ə́ yaa ngí pə́, Nde pə̂ nzəm zʉ́ lə́nə́ʉ.»
Ə zap-nci Sakalyê
67Ə Zəghʼə Ndêi-lěi fû mbə́ lə́ tə́ ye Sakalyê, a cʉ̂ʼ ntsâr pə́ ghíʼ tâʼ ntsətə-nkəʉ Sê ə́ ndâʼ ngô: 68«Ghûʼtə wə́ mbó Nde yi a pə̌ Sê Ísə́lahêl, ńté ghíʼ a pfutə́ pye pé, ə́ nkwárə́ gháp lə̂ puʼ. 69A tə̌u Nzaʼ-nkʉ yi njwǐ ńŋə́ təcər paghʼə. A kwar lə̂ ngər ngaŋə-faʼ ye fou Ndavîd. 70Ə́ pə̂ no yi a lə láʼ mə́ ntə́u pətsətə́-nkəʉ pé gháp tô ńtsə́tə́, gháp pə́ tə́ lǒʼ. 71A lə ghʉ ndaʼá ńgó a táa pfú wághʼə mbó pəghaŋə mbəu pághʼə, mbaa mbó pye pi gháp pə́ mbaa wághʼə. 72A lə nyárə poŋə-ntə̂ʉ yé mbó pəmə́ngâa-njʉʼ pághʼə. A pou nkʉ́ʉtə́ kaa tə́ lǒʼ yi gháp pə pǎp lə wǎr, 73ə́ nkʉ́ʉtə́ ghíʼ a lə lǎʼ tə nkâa lə́ Ábələhâm mə́ngâa-njʉʼ waghʼə ńgó 74a táa lěi tə kwarə́ wághʼə mbó pəghaŋə mbəu pághʼə, pághʼə fáʼ mbó zʉ́ tə́ pôghʼ. 75Ə́ cʉ́ʼ pə́ pə́ pətə-lǒʼ gháp pye no-lə́nə́ʉ mbi zʉ́ cər ləcǐ-mbî waghʼə ntsəm. 76Ə́ ngwǒ lə́ gho môu ghâa, mə́i o táa pə́ ntsətə-nkəʉ Tsəpye Sê, ńté ńgó o táa pə́ mbi pə́ ŋə̌i tsuŋú məlaŋə́-ndə̂u Nde. 77Lə̂ ndághʼ ńgʉ̌ pye pé jî no ləcwôr, ə́ ndeitə́ ghíʼ a lyəghʼə́ məfaa gháp, 78ńté no Sê pə̌ nâŋtə wághʼə shʉʼʉ, ə́ mbou mə́ ntsâa məjʉ̂ŋ mághʼə gháʼate. A táa ghʉ̌ nkeʼ fú tʉ́ nkěʼ wághʼə, ə́ mbə́ ghíʼ nkeʼ mə́nəu ə́ mpfu yi a pə̌ sáʼ. 79Lə̂ ndághʼ ńkěʼ pye pi gháp nyâŋ cər nzə̌m, ə́ cər mə́jʉ̂ŋtə ləwʉ̂. Ə́ pǒu pfú mbi, ə́ pə́ nyarə wághʼə mbə̂u yi paghʼə wo lǎghʼ ńŋə̌i lə̂ laŋə́-ndə̂u mbwórə.» 80Môu wêi lə pə́ ngúʼ lə̂ njʉ́ŋ-mbəʉ mbaa cər Zəghʼə Ndêi-lěi. A lə kə́ ncî yé pə́ pəkoŋə-məkwaʼá tə ndáʼ nkə́u leʼé yi a lə nyarə́ mbəʉ ye mbi pye lâʼ Ísə́lahêl.
Currently Selected:
Lúʼkáasʉ 1: NLA
Highlight
Share
Copy
Want to have your highlights saved across all your devices? Sign up or sign in
