Jâŋ Mətû məno
Mətû məno
Ə́ wo lə̂ pəŋwaʼa ləkwo pi pə́ ŋwaʼá ńté Yěso, yi pə̂ pə́ lə̂ ye mbə̂u. Ə no yi ə́ náŋtə́ ngwôʼ Yěso (Kəm. 18-19), ə̂ zə̂u yi ŋwaʼa Jâŋ gháp pə pəcó pəŋwaʼa lǎghʼ ńshwírə́. Ə́ ngwǒ lə̂ məcó məno, Jâŋ cʉ̂ʼ ndâʼ no mə́u pə́ zə́ghʼə́-zʉ́; ə́ məno ghíʼ no lâa-ndə̂ Kána (2.1-12), ghíʼ ə tsâr yi Yěso gháp Nikodêm lə tsár zěi (3.21), ghíʼ tsâr yi Yěso gháp məngyě Samalə̂i lə tsár zěi (4.1-12), ghíʼ záp ngaŋə-pwóʼtə́ Betésda (5.1-18), mbaa tsâr záp ŋuu yi a lə pə́ fwoghʼ-mə́nyôghʼ tə fú leʼé lə́jí (9.1-41). Pə́ lə̌i mə́ ndʉ̂ŋtə məno mi Jâŋ lə ŋwaʼá lə́ mi pəcó pəŋwaʼá məno ńté Yěso lə ŋwáʼá záp, mi pə́ wo jwó ńgó káa Jâŋ lə pyêtə yé məno tə ə̂ záa lə̂ lənyâŋ ye ndəu ndesé. Lə́ ə́ ngwǒ lə̂ mi a lǎʼ ńté lənyâŋ ye wêi, a côghʼ lətəi-ndwuŋ mə́u gháʼate, ńté no mêi mə̂, ə̂ mi Yěso lə ghʉ̌ ə́ ndaghʼ sâa-sǎa ńjyéʼ pye zə̂u.
A ghí jǐ ŋwaʼa (1.1-18), ə́ mə́ nyárə Yěso ghíʼ tsâr Sê yi ə́ láʼ cí pə̂ pə́ wó, ə́ yi ə́ shə́rə́ ncʉ́ʼ ŋuu-məsoŋ, ə́ ntó gháp pə pye-mə́soŋ naa ncʉ́ʼ ncí. Ə tsâr zei pə̂ lənyâŋ, ə́ mbə́ nkeʼ, ə́ mbou mbə́ no lə́nə́ʉ.
Mboʼ pə́ ghaptə məno mi Jâŋ lǎʼ ńté Yěso, ə́ yʉʼ pwô. Mboʼ pə́ fûŋ ləiʼi laghʼ ńgáptə́ ńgó «ə mpfu yi Yěso», ə́ laghʼ ḿbə̂ mpfu yi a lə kwʉ́, ə́ nkʉʼʉ́ mbə́ mpfu yi Sê lə kóʼó yé ə́ ŋə́ cər ləghûʼ ye (2.4; 12.23). Məyʉʼ mêi mə́mbwô mwo mə́twúŋú.
- Ə mpfu yi Yěso pyěr tə́ kuʼ (1.19–12.50): nduŋ-mbi yʉʼ wo pə̌ ndeʼtə məno zʉŋə zʉŋə mi pye lǎʼ, ə́ pə̂ mi gháp pə́ njî lə́ Yěso: ghíʼ mi Jâŋ Mbaptísʉ lǎʼ, ghíʼ mi Aŋderê ngaŋə-jyêʼ-no Yěso lǎʼ, ghíʼ mi Fílîp lǎʼ, mbaa ghíʼ mi Natanayêl lǎʼ. Wǒwó lə́ páp lə́ cʉ́ʼ lə̂ ndâʼ yé no lə́ Yěso, ə́ ndǎʼ pə́ lə̂ ye mbə̂u yi a lə lǎghʼ ńjwó yé. Jâŋ lâʼ no ńté pwo pye tə ə́ kuʼ, a pâatə ndâʼ no ghíʼ Yěso gháp pə pəcó pye tə nzáa lə tsár, ə́ mbáatə́ ndâʼ no lə̂ mənkəʼə məno saambwô mi ə́ pə́ ghíʼ «mələiʼi», ə́ ndaʼ yə́rə́, ə́ ndaghʼ nyárə ńgó ntəʉ no pə́ ńgó pə zúʼ no yi měi laghʼ ńdâʼ. Jâŋ cʉ̌ʼ lə̂ ndyə̂ghʼtə́ wo nduŋ-mbi yʉʼ, ə́ kəitə́ məno mə́tsəm mi a laʼ mə́ ńté Yěso, ə́ ndaghʼ ńkə́r mətû məno mə́tsəm mi a lə tó lə̂ njyéʼ pye.
Ə mpfu yi Yěso kuʼ (13.1), a lâʼ məno mi ngaŋə-ku yé wo cʉ́ʼ nzəm pə́ ghʉ̌, ə́ pə̂ ghíʼ a pə̌ ŋə̂ gháp məntǎghʼ, ə́ poŋə́ kwʉ́ (Kəm 13-16). A pâatə, ə́ mbə́ cər sʉ̂ʉtə, ə́ mə́ ntsûŋtə mbəʉ ye lə̂ ndághʼ ńzʉ́ʼtə́ mpfu yi pə́ wo jwí yé, ə́ mbou ncóghʼ pye pi a wo nyér gháp, ə́ lə̌r yé lə̂ mbó Sê (Kəm 17). Jâŋ lə̂r tə nkə́u lə̂ yʉʼ yi ə́ leʼtə mbə̂u yi pə́ lə lǎghʼ ńgôu Yěso, ghíʼ pə́ wo fěʼ yé, ə́ nzáʼ ńgó pə́ wo kʉ̌ʉ yé lə̂ tʉ̌-mbʉ̂ŋtə, mbaa ghíʼ pə́ lə jwó ləshi tə̂ʉ fe, mêi məno laghʼ ḿbə̂utə lə̂ məno mi pəcó pəŋwáʼá məno lə́ Yěso lə záʼ nzʉ̂ ŋwaʼá (Kəm 18-20). Ə leʼé Pásʉ́ka, ə̂ leʼé yi Yěso lə zʉ́ʉ lə̂ ləwʉ̂, ə́ nkwǎr mbi Mǎyaa yi Mǎghʼdala, mbaa mbi ngaŋə-jyêʼ-no yé, mbaa ghíʼ a lə cwǐ yʉʼ yi Tomásʉ ə́ nkwâr mbi zʉ́. Ə́ pə́ cər kəm 21, pə́ pə̂ yʉʼ wó, ə́ mə́ ndêʼtə ghíʼ Yěso lə zʉ́ʉ lə̂ ləwʉ̂, ə́ nkwǎr mbi ngaŋə-jyêʼ-no yé saambwô, ə́ nkaŋ nci Tiberiadə. Yo no mi a lə mǎʼ nci laghʼ ńtsóʼ, ə́ mboŋə́ kʉʼʉ́ ŋwaʼá.
Wo nci laghʼ ńtsóʼ yi ə́ pə́ cər (Kəm 20.30-31) pə́ ndaʼ kwaʼ zə̂u yi ə́ lə cʉ́ŋə́ Jâŋ lə̂ ŋwáʼá məno ńté Yěso Kəlísto, ə́ pə̂ ńgó a lə pə́ ndôu ńgó ŋuu yi a wo fúŋ ŋwaʼa wo; jí ńgó Yěso Kəlísto, â Nzaʼ-nkʉ yi Sê lə ghʉ̌ ndaʼá ńgó a ghʉ̌ tə́u yé, ə́ Môu Sê. Ə̂ lêi yə́rə́, â ghwô lənyâŋ yi Sê pə̌ nkǒŋ, ə́ ndʉŋ-ndʉŋ ghíʼ tû-mbəʉ Yěso wêi yi Tə́ lə tə́u, pə̌ ndaʼ ngô: «Mə̂ŋ laŋə́-ndə̂u, ə́ mbə́ no lə́nə́ʉ ə́ mbou mbə́ lənyâŋ yi Sê pə̌ nkǒŋ» (14.6).
Currently Selected:
Jâŋ Mətû məno: NLA
Highlight
Share
Copy
Want to have your highlights saved across all your devices? Sign up or sign in