Jâŋ 3
3
Yěso gháp Nikodêm
1Ə́ lə ghí pə́, cǒ kə̌m pəyúda pə̂ lə nou pəfalísia, ləjôghʼ yé pə̂ Nikodêm. 2A ghʉ̂ ntô cǒ lətwûʼ, ə́ ndǎʼ lə́ Yěso ngô: «Cícye paghʼ pə̌ njî ńgó Sê lə̂ lə tə́u gho ńgó o wó njyéʼ pye məno, ńté no mboʼ ŋuu ghʉ̂ yé mənkəʼə məno mi o ghʉ lo tə́ ghó Sê pə́ lə́ zʉ́ po.» 3Yěso lâʼ lə́ zʉ́ ngô: «Kwaʼ lə́nə́ʉ, mboʼ ŋuu jwô yé Ləfou Sê tə́ ghó pə́ jí yé lə̂ ləjî yi shwî po.» 4Nikodêm túŋu yé ngô: «Tə mboʼ ŋuu pə̂ ntikáŋ pə́ pyə́ghʼə njí yé gháʼá? Tə mboʼ a kə̂ ncí nkə́u ləpəm mə́ ye a pyə́ghʼə njí yé?» 5Yěso pwôr lə́ zʉ́ ngô: «Məŋ ndaʼ gho kwaʼ lə́nə́ʉ ńgó mboʼ ŋuu kə̂u yé cər Ləfou Sê tə́ ghó pə́ laghʼ nci gháp pə Zəghʼə ńjí yé po.» 6Ə zə̂u yi ə́ kwǎr lə̂ mbap mbəʉ ə̂ mbap mbəʉ, yi ə́ kwǎr lə̂ Zəghʼə pə̂ Zəghʼə. 7Koo ə́ kəʼə yé ghô ghíʼ n ndǎʼ lə́ gho ńgó ə́ poŋ ńgó pə jí ghô lə̂ ləjî yi shwî. 8Kəfwor khʉ pə́ lə̂ yʉʼ yi a kǒŋ, o zûʼ ghíʼ a lei lə́ káa jí yʉʼ yi a fû wó, káa kə́ jí yʉʼ yi a lər lə̂ wó. Ə́ kə́ mbə́ pə́ yə́rə́ lə́ ŋuu yi a kwǎr lə̂ Zəghʼə.
9Nikodêm túŋu Yěso ngô: «Zêi yo mbə̂u no gháʼa ndêi gháʼá?» 10Yěso pwôr lə́ zʉ́ ngô: «O pə́ Ísə́lahêl, ə́ mbə́ ŋuu yi a jyêʼ pye ləpə̌ʉ ə́ mbǒu káa pə́ jî yo no áa? 11Məŋ ndaʼ ghô Kwaʼ lə́nə́ʉ ńgó paghʼ laʼ no lə̂ no yi paghʼ pə̌ njí, ə́ mbə́ pənzǔʼ-njwó lə̂ no yi paghʼ lə jwó lə́ káa pei pə́ mbə̂i wéi. 12M mə̌ ndaʼ wéi no lə̂ məno mi ə́ leitə ndəu ndesé káa pei pə́ mbə̂i wéi, n ndə̌i ntə́i ndáʼ wéi pə́ mi ə́ leitə tʉ̌-lə́pû mə́i pei ghʉ̂ gháʼá poŋə́ pə́i? 13Ŋuu laa kə́ kóʼ ńgwó tʉ̌-lə́pû, ə̂ ndaʼ Môu ŋuu yi a lə fú wó shíʼ ńtó. 14Ndʉŋ-ndʉŋ ghíʼ Mə̌usə̂i lə lǎghʼ tâʼ tʉ̌ ḿbə́ʼə nô koŋə-məkwaʼá ńŋə́ tʉ́ lə̂, ə́ pə́ túŋu ńgó pə ghʉ́ nkə́ mbəʼə́ Môu ŋuu pə́ yə́rə́. 15Ə́ njí ńgó lei yə́rə́, ŋuu yi a pə̌i no zâa ghwo ləcwôr tə me. 16Ńté no Sê lə koŋ ndəu nzʉ̂ tə ntə́u tâʼ Môu ye moʼ ńjí ńgó ŋuu yi a ŋə̌ ntə̂ʉ lə́ zʉ́ kə̌ kwʉ̂ yé po, ə́ ncʉ́ʼ ngwó pə́ ləcwôr tə me. 17Kâa Sê lə tə̂u Môu yé ńgó a tó ńféʼ ndəu nzʉ̂, a lə tə̂u yé pə́ ńgó ndəu nzʉ̂ lêitə́ lə́ zʉ́ ə́ ncwór. 18Ŋuu yi a pə̌i no yé, pə́ ghʉ̌ fêʼ yé yé po, lə́ ŋuu yi kâa ŋə̂ yé ntə̂ʉ yé lə́ zʉ́, pə́ feʼ mə́ yé tə nzáʼ ntsâŋ ńté ghíʼ a lə̌ʼ lə̂ ŋə́ ntə̂ʉ yé lə́ Môu Sê. 19Yo ghíʼ pə́ wo fěʼ no zêi: nkeʼ tǒ cər nzʉ̂, pye-mə́soŋ ləʼ keʼ, ə́ nkə́ mbə̂ gháp pə́ cər nzə̌m ńté ńgó ngʉ̌ məno gháp kâa pôŋ. 20Ńté no ngʉ-məno-tə́poŋ ntsəm khʉ nkeʼ khʉ̌, ə́ nkǒŋ lə̂ nyáŋ yé pə́ cər nzə̌m ə́ mbóghʼ no nkeʼ wo kěʼ məno tə́poŋ mé ə̂ kwâr ndəu zǎa. 21Lə́ ŋuu yi a ŋəi lə̂ laŋə́-ndə̂u no lə́nə́ʉ koŋ lə̂ ŋə̂i cər nkeʼ njí ńgó nkeʼ kêʼ məno shʉʼʉ mé, pə́ jwô ńjí ńgó məfaʼ mé fû mbô Sê.»
Jâŋ Mbaptísʉ gháp Yěso
22Yo no lei, Yěso gháp pə ngaŋə-jyêʼ-no yé lər lə̂ cər paghʼə-ngoŋ Yudêi, ə́ nkə́u wó nyáŋ leʼé ndwuŋ, a pə̂ ŋə̂ pye nci. 23Jâŋ pə̂ yé túsoŋ Enôŋ mbəʉ yi Salîm lâʼ pə̂ ńtó a lâghʼ nci ńŋə̂ gháp nci ńté ńgó mənci lə záa yʉʼ wó gháʼate. 24Ńté no lə ghí pə́ mə́i Jâŋ kə́ kə̂u yé tsâŋ.
25Cǒ ŋuu pəyúda gháp pə ngaŋə-jyêʼ-no Jâŋ nyâŋ tə njî lə̂ nzóŋə́ no ŋə́ lə̂ no sôghʼ pəi mboŋə́ ghúʼtə́ Sê. 26Ngaŋə-jyêʼ-no Jâŋ wo njwó yé, ə́ ndáʼ lə́ zʉ́ ngô: «Cícye o pə̌ nkʉ̂ʉtə ŋuu yi pei zʉ́ lə pə́ njʉŋə́ nci Yuudêŋ lə̂ tə o pə̂ ndâʼ məno mi o pə̌ njî lə́ zʉ́ lə̂? A pə̌ ŋə̂ yé nci lə́ pye tə lâʼ tsəm cʉ́ʼ ngwo cə̂r pə́ yé.» 27Jâŋ pwôr ngô: «Sê yi a pə́ tʉ̌-lə́pû lə̂ ŋə̂ faʼ ŋuu ntsəm.» 28Tû-mbəʉ zéi pə́ ntsuŋú njî ńgó n ndə laʼ wéi ńgó káa məŋ mbə̂ ghâa Nzaʼ-nkʉ. M mbə̌ pə́ ŋuu yi pə́ lə tə́u yé ńgó â pə́ mbi zʉ́. 29Ŋuu yi a zǒʼ məngyě lə̂ pə̌ ndə̂u məngyě. Lə́ Sə̌u ndə̂u məngyě təʉ mbəʉ ndə̂u, ə́ mə́ nzûʼ nji ye, no poŋə́ yé gháʼate. Lətsei wêi, â ghâa, m mbôu ntsêi tə myâghʼ ntə̂ʉ ghâa ntsəm. 30Ə́ pə́ ntúŋu ńgó no yé lə́r lə̂ mbi, zâa pə̂ʉ lə̂ nzəm.
Ŋuu yi a fǔ tʉ̌-lə́pû
31Ŋuu yi a fû tʉ̌-lə́pû ghǔʼ ńděi ŋuu tsəm. Ŋuu yi a pə́ ndəu ndesé pə̂ ŋuu ndesé; ə́ mbou ndâʼ no pə́ lə̂ məno mi náŋtə́ ndəu ndesé. Lə́ ŋuu yi a fǔ tʉ̌-lə́pû ghǔʼ ńděi maa ŋuu tsəm. 32A laʼ məno mi a lə jwó mbou nzúʼ, lə́ káa ŋuu pə̂i yé. 33Ŋuu yi a pə̌i tsâr yé laghʼ ńnyárə ńgó Sê pə̌ ndaʼ no lə́nə́ʉ. 34Ŋuu yi Sê tə̌u yé laʼ pə̂ məno mi ə́ fú mbó Sê, ńté no Zəghʼə Sê pə́ lə́ zʉ́. 35Tə́ kôŋ Môu yé, ə́ mbou ncóghʼ zə̂u tsəm mbó zʉ́. 36Ŋuu lə̌i mbə́i no Môu, a ghwo ləcwôr tə me. Ŋuu póu ndə̌ʼ no Môu, a lâʼ ngwô yé ləcwôr po; záŋə-lóŋ Sê tə̂i ndəu zʉ́.
Currently Selected:
Jâŋ 3: NLA
Highlight
Share
Copy
Want to have your highlights saved across all your devices? Sign up or sign in
