Magə 15

Yeso á Mbi Payilɛlə

(Mat 27.1, 2, 11-14; Luk 23.1-5; Jɔn 18.28-38)

1Chigə mɛ́ məsânə pətə́kɔʼ pə́ ngaŋə́pêsê pópə mətû mə́ aláʼə, nə́ ngaŋə́zéʼkə pənoŋkə ḿbá ngaŋə́sáʼə́məsáʼ tsɔʼə ətsəm ə́ kyeetə̂ táʼə aliʼ, ńtíʼə ńkwaŋə̂ anu pó yǐ nə́ ghɛlə̂. Pó kwúlə Yeso nə́ məŋkɛd ńdɔgə̂ yí ńgɛn ə́fɛ̂ á mbô Payilɛlə. 2Payilɛlə a pítə yí ńgə́, “Gho lə́ əfo Pəjusə?”

Yeso a kwěe ńgə́, “Lə́ ndzaŋ gho sóŋ nə́.”

3Pətə́kɔʼ pə́ ngaŋə́pêsê pó néŋ məntsɨd mimə nɨ́ nə́ atû Yeso. 4Payilɛlə a kə́ ḿbɨ ḿbítə yí ngǎ yitsə̌ ńgə́ “Gho kě yǐ kwěe? Jɨ́ ndɛn mənu pə́ néŋ nə́ á atû gho.”

5Lə́ ngǎ yitsə̌ Yeso a kwéʼnə ńkǐəə yə́ á mə́ kwěe nə́ anu yitsə̌, anu yə́ wɨ́ á kɨʼnə̂ Payilɛd lɛ tətətə.

Pə́ Jwítə Yeso

(Mat 27.15-26; Luk 23.13-25; Jɔn 18.39–19.16)

6Á zá ḿbə́ alě akɔŋtə Ndzáʼkə atsəm lə́, Payilɛlə a shib ə́fógə táʼ ngaŋətsáŋ páʼ pɨ pə́ kɔŋ nə́ əfɛ̂ nə́ pó. 7Á nə́ ḿbə́ á əghâ yi wɨ́ lə́ ŋwu tsə̌ a chî ə́wɨ́ pə́ nə̈ ə́fóŋ nə́ nə́ Balabasə, á nə ńchîə á nkáʼə atsáŋ pópə pɨ páʼ pó nə ḿmaʼ nə́ ajwaʼlə á mə́mə aláʼə. Balabasə a nə ńchîə á nkáʼə atsáŋ lə́ ńté ńgə́ á nə ńjwítə ŋwunə. 8Ŋwu məsɔŋə́ a kyeetə̂ ńtíʼ ə́sóŋə á mbô Payilɛd ńgə́ a faʼ tsɔʼə ndzaŋ a ghə́ faʼə̂ lə́. 9A tíʼ ḿbítə ághɔ́b ńgə́, “Nə́ lɔ ńgə́ maŋ fóg lə́ əfo Pəjusə wə̂ á mbô pɨ?” 10A pə́ ḿbyádnə ńjî ńgə́ pətə́kɔʼ pə́ ngaŋə́pêsê pó nə́ ńgyǐ ə́fɛ̂ yə́ á mbô yi lə́ ńté ńgə́ pó nə ńtə́ ŋ́ŋwéetə yə́.

11Lə́ pətə́kɔʼ pə́ ngaŋə́pêsê pó pɨ ńtíʼ ńtóotə ŋwu məsɔŋ wə̂ ńgə́ pó ghɛd Payilɛlə a fógə Balabasə ḿmɛdtə̂. 12Payilɛlə a kə́ ḿbɨ ńtsáb ngǎ yitsə̌ á mbô ŋwu məsɔŋ wə̂ ńgə́ “Nə́ loonə̂ ńgə́ maŋ tíʼ ńgɛd ə́lɛ́ nə́ yí páʼ nə́ fóŋ nə́ nə́ əfo Pəjusə lə́?”

13Pó tɔ́ŋnə ə́sóŋ ńgə́, “Kwumtə̂ yə́!”

14Payilɛlə a pítə ághɔ́b ńgə́, “A wǔ lə́ akə̂ anuə?”

Pó pɨ ḿmegnə̂ ńgyɛ́ɛlə yɛ́ɛlə nə́ ńgə́, “Kwumtə̂ yə́!”

15Payilɛlə a nə ńtə́ ńdoonə̂ ńgə́ mbɨ ŋwu məsɔŋ wə̂ ə́ pɔŋə̂, ńtíʼ ə́fógə Balabasə ə́fɛ̂ á mbô pó. Ḿbə́ ə́shúmə Yeso ńtíʼ ə́fɛ̂ yí ńgə́ pó ghɛn ńkwumtə̂ yə́.

Ngaŋə́maʼə́ntso ə́ Nyegnə̂ Yeso

(Mat 27.27-31; Jɔn 19.2, 3)

16Ngaŋə́maʼə́ntso ə́ tíʼ ńdɔgə̂ Yeso ńkwú ńgɛn nə́ yə́ á mə́m ntɔ́ʼ (pə́ nə̈ fóŋ nə́ nə́ Pletolium) ńtíʼ ə́fóŋ yitsə̌ ngaŋə́maʼə́ntso tsɔʼə ətsəmə. 17Pó nə ńgwê paŋpaŋə atsəʼ yitsə̌ páʼ ndɛn yí ə́ nɨ́ nə́ á mbɨ yə́, ńtíʼ ńtwíŋə kɨ́koobə́ ándó lɛ nəfɔ lə́ ńgwê atû yə́. 18Pó tíʼ ńchúʼə á mə́ chaʼtə̂ nə́ yí ə́sóŋ ńgə́, “Sə̂ə əfo Pəjus!” 19Pó lɔg mbaŋ ńtíʼə ə́shúmə atûə ají ə́wɨ́, ńtwǐəə mətwê nə́ yə́, ńtíʼ ńkwə́ʼtə á mbi yí ńgóʼkə yə́. 20Əghâ ándó pó nə́ ḿməgtə̂ nə́ á mə́ nyegnə̂ nə́ yí lə́, ńtsɔ́ʼə paŋpaŋə atsəʼ wə̂ á mbɨ yí ḿbɨ ńgwê əpí ətsəʼə́ á mbɨ yí ngǎ yitsə̌, ńtíʼ ńdɔgə̂ yí ńgɛnə̂ á mə́ kwumtə̂ nə́.

Pə́ Kwumtə̂ Yeso

(Mat 27.32-44; Luk 23.26-43; Jɔn 19.17-27)

21Ndzaŋ pó nə ńchî nə́ alaŋə́ ńtə́ ńgɛnə̂ lə́ ńjwánə ŋwu tsə̌ pə́ nə̈ ə́fóŋ nə́ nə́ Saamunə, a nə ə́fɛ́d lə́ á aláʼ Silɛnə, ḿbə́ tǎpə Alezanda pó Lufusə, a tə́ ńdaŋə̂, ńdǒo á afɔ ńtə́ ńkwə̂ á mə́mə aláʼə, pó tíʼ ə́fyáalə yí ńgə́ a twáamə atǐə apagləpaglə Yeso. 22Pó lɔgə̂ Yeso ńgyǐ ńkoʼə̂ aliʼ yitsə̌ pə́ fóŋ nə́ ńgə́ Gɔlgɔta páʼ əlɛ́n yi wɨ́ ə̈ sóŋ nə́ lə́ ńgə́, “Aliʼə́ akəghə́ʼlə́ atûə.” 23Pó tíʼ ə́fɛ̂ məloʼə á mbô yí ńgwɛd nə́ ajûtsə́ pə́ fóŋ nə́ nə́ myl, lə́ a pə́ ńkǐəə yə́ á mə́ nô nə́. 24Pó tíʼ ńkwumtə̂ yə́ á atǐə apagləpaglə. Ńgabtə̂ ətsəʼ əpí, ńtíʼ ńtə́m pilə́ á mə́ jɨ́ nə́ ajú páʼ ŋwu ntsəmə a yǐ nə́ lɔgə̂.

25Pə́ nə ńkwumtə̂ yí lə́ nə́ pəmə́nu pɛ́n nəpuʼə́ á məsânə. 26Pó nə ŋ́ŋwaʼlə̂ aŋwaʼlə páʼ zə́ələ́ á fiʼtə̂ nə́ anu páʼ pə́ kwumtə̂ nə́ yi ńté, á sóŋə ńgə́, “ƏFO PƏJUSƏ.” 27Pó nə́ ńkwumtə̂ yí lə́ pópə pəzə̌ pə́ pɛ̌, táʼə á apô yə tɨ, táʼə á apô yə kwaabə. 28Nə́ ndú wɨ́d ghɛn, anu pə́ nə ŋ́ŋwaʼlə̂ nə́ á nə́ ńdɔgə̂ aliʼ ńgə́, Pə́ nə ńnéŋə yə́ á ndzɔʼ ngaŋə́fanə. 29Pɨ pə́ nə̈ ńdaŋ nə́ aliʼ yə wɨ́ pó tíʼə ńchíʼ ətû əpɔ́b ḿmaʼə̂ məndzɔmnə nə́ Yeso, ə́sóŋə ńgə́, Lɛ̌ gho páʼ gho nə ə́sóŋ nə́ ńgə́ gho yǐ shaʼtə̂ Tə́kɔʼndɛ̂sê pɨ póomə ájɨ́d nə́ əlě teelə́! 30Əghâ nə́, tsóolə atǐə apagləpaglə wə̂ ńkə́ ńchwádkə mbɨ əzo.

31Tsɔʼə ə́lɨ́d, pətə́kɔʼ pə́ ngaŋə́pêsê pópə ngaŋə́zéʼkə pənoŋkə pó kə́ ńnyegnə̂ Yeso, ə́sóŋə á tətɨ pó ńgə́, “A kə chwádkə pɨ pə́ ndaʼə, lə́ mbɔʼ a pə́ ńkě mbɨ əjǐ chwádkə pô. 32Tíʼ Klisto, Əfo pɔ́ pə́ Izlɛlə, a tsóolə á atǐə apagləpaglə wə̂ əghâ nə́ ńjî ńgə́ pɛn jɨ́ ńkə́ ńtúg mbimə́!”

Pɨ pə́ nə ńkwumtə̂ nə́ ághɔ́b po lə́, pó nə ńkə́ ńdzɔmtə̂ yə́.

Ndzaŋ páʼ Yeso a nə Ńkwû nə́

(Mat 27.45-56; Luk 23.44-49; Jɔn 19.28-30)

33Ndzəmə́ ə́ nə ńgwǔəə á mə́mə aláʼə atsəm ə́fɛ́lə á ntɨ̌mə́nu tə ńkoʼ nə́ pəmə́nu pə́ teelə́. 34Á nə ḿbə́ ándó pəmə́nu pə teelə́ pə́ nə́ ńkoʼ nə́, Yeso a kyéŋ nə́ tə́kɔʼ ngye ə́sóŋ ńgə́, “Eli, Eli, lama Sabachtani?” páʼ ä sóŋ nə́ lə́ ńgə́, “Əsê mə, Əsê mə, Gho myaʼə̂ mə lə́ ńté akə̂?”

35Pɨ pətsə́ pə́ nə ńtɨ́ nə́ aliʼ yi wɨ́ pó nə ńdzóʼə atsáb yə wɨ́ lə́ ńtíʼ ə́sóŋ ńgə́, “Jwə́ʼtə nə́, a tə́ ə́fóŋnə Elayija.”

36Táʼ ŋwu əghɔb yitsə̌ a tɔ́g ńkə ńgɛn ḿbyáanə kwunchá ńchibə̂ á mə́m məloʼ mimə tsə́g nə́ ńtóŋ nə́ atítí ńkɔ́ʼkə ə́fɛ̂ nə́ Yeso ńgə́ a nô, ńtíʼ ə́sóŋ ńgə́, “Mɛdtə̂ nə́ yə́ ngǎ yí əghâ nə́, pɛn jɨ́ ńgə́ kɨ Elayija a yǐ tsóokə yə́ aliʼə́ nə́.”

37Yeso a kyéŋ nə́ mɛ́ tə́kɔʼ ngye ńtíʼ ńkwûə yə́.

38Apagə atsəʼə́ á nə̈ ńgabtə̂ nə́ Tə́kɔʼndɛ̂sê á nə ńtíʼ ə́sɛɛnə̂ əpag pɛ̌ ə́fɛ́lə á nətû ńtsó ńkwúnə á nətɛ́nə. 39Lə́ nətû nə́ ngaŋə́maʼə́ntso páʼ nə́ nə ńchî nə́ aliʼ yi wə́ á mbi Yeso, ńdzóʼ ndzaŋ páʼə a kyéŋ nə́ ḿbɨ ńkə́ ńdzɨ́ ndzaŋ páʼə a kwû nə́ lə́ ńtíʼ ə́sóŋ ńgə́, “Ndə̌ŋdəŋə́, ŋwu nə́ a nə́ ḿbə́ lə́ Mɔ́ Əsê!”

40Pəngyě pətsə́ pə́ nə ńchî ə́wɨ́ ńtə́əmə á ndi yi sɛ ńtíʼə ńnáŋə. Á mə́m pó, lə́ nə ḿbə́ Mɛɛlə Magdalɛn, ḿbɨ́ ḿbə́ nə́ Mɛɛlə mǎpə Jɛmsə yi ńkoʼnə̂ nə́ pó Jɔsɛf, ńtíʼ ḿbɨ ḿbéenə Salomɛ. 41Pó nə ńdzoŋə̂ Yeso ə́fɛ́lə á Galili ńnyinə̂ ńkwáalə yə́. Pəngyě pi nɨ́ nə́ pó nə ńkə́ ńchî ə́wɨ́ páʼ pópə Yeso nə ńkɔ́ʼ nə́ ńgyǐəə á Jɛlusalɛm.

Ndzaŋ pə́ nə Ńtwə́ŋ nə́ Yeso

(Mat 27.57-61; Luk 23.50-56; Jɔn 19.38-42)

42Lə́ nə ḿbə́ alě ándó pə̈ tsoŋkə̂ nə́ əpúmə Alěláʼə́sê, Á yǐ ḿbə́ ndɛd nkwanə́, alě atyáŋtə́púmə Alěláʼə́sê ndzaŋ mbî yǐ nə́ tíʼ ə́fóg ə́ pə́ alěláʼə́sê lə́, 43Jɔsɛfə a nə́ ńdǒo nə́ aláʼə Alimatya ḿbə́ tə́kɔʼ ŋwunə aliʼə́sáʼə́məsáʼ, páʼə a nə ńkə́ nə́ ńtə́ ḿbyáabə ajíə Anuə Nəfoonə Əsê lə́, a wam ntɨ́ əyí ńgɛnə̂ á mbô Payilɛd ḿbítə akwûə Yeso. 44Á nə ńkɨʼnə̂ Payilɛd ndzaŋ páʼ a nə́ ńdzóʼ nə́ ńgə́ Yeso a pɛ́d tə ńkwûə. A tíʼ ə́fóŋ nətû nə́ ngaŋə́maʼə́ntso ḿbítə yí ńgə́, Yeso a pɛ́d tə ńkwû? 45Əghâ ándó a nə ńdzóʼ nə́ á mbô nətû nə́ ngaŋə́maʼə́ntso zə̂ ńgə́ lə́ ndə̌ŋdəŋ lə́, ńtíʼ ə́fɛ̂ akwûə ajíə á mbô Jɔsɛfə. 46Jɔsɛfə a tíʼ ńjúnə apagə atsəʼ yə əshîʼnə, ńtsóokə akwûə ají, ńdə́mə ájɨ́d nə́ fúfúə apô atsəʼ yə əshîʼnə ńtíʼ ńnéŋə zə́ələ́ á mə́m nəse páʼə a nə ńtóŋ nə́ á mə́m ngwúbə. Ńtíʼ ńkabkə̂ mɛ́ ngɔʼ yitsə̌ ńkə́bkə ntso nəse yi wɨ́ ə́wə́. 47Mɛɛlə Magdalɛn pó Mɛɛlə mǎpə Jɔsɛf, ə́ zə́ənə aliʼ pə́ noŋkə̂ nə́ Yeso wə́.

Currently Selected:

Magə 15: azo

Highlight

Copy