Lukasə Nəchwaakənə́ nə́ aŋwaʼlə zəənə́
Nəchwaakənə́ nə́ aŋwaʼlə zəənə́
Nkɨ yi Əshîʼnə ghɛn ńté Mmaʼmbî əwɛn Yeso Klisto lə́ kə ŋwaʼlə̂ Lukasə páʼə a nə ḿbə́ nə́ ntsóʼ məghɔ lə́. A nə ńkě lə́ táʼ ŋwunə á mə́m ngaŋə́zoŋə́ndzəm Yeso pô, ńkě kə́ ḿbə́ ŋwu Pəjusə pô. A nə ḿbə́ lə́ ngaŋəko Pɔlə, Pɔlə a kə lánə ńchígə́ ńkɔŋə̂ yə́. Pɔlə pó Lukasə kə̈ kéelə ńnyinə̂ nə́ əliʼ pi nɨ́ nə́ (Məfaʼ 16.10-17; 20.5-15; 21.1-18; 27.1-28). Lukasə a sóŋ ńgə́ ä ŋwaʼlə̂ lə́ á mbô Tiyofilosə ńjî ńgə́ a chígə́ ńdzə́ənə ndə̌ŋdəŋ mənu páʼ pə̈ zéʼkə nə́ yí ə́wə́. Ndə̌ŋdəŋə́ anu wɨ́d ghɛn lə́ nkɨ yi əshîʼnə ńté Yeso Klisto, páʼə Ajwǐəsê a nə ńtsɔ́ʼ nə́ yí ńgə́ a yǐ ə́fiʼtə̂ nkɨ wɨ́d ghɛnə́ á mbô pəpóŋə. Ə́fiʼtə̂ ndzaŋ páʼ Əsê a yǒ nə́ júmkə pəənə (4.18-19). Yeso a nə ə́fóŋə Matyo aliʼə́ akwáalə́nchubə aláʼ, ə́sóŋ ńgə́ yí Yeso a nə ńkě yǐ lə́ á mə́ chwádkə nə́ pɨ páʼ pó tɨ́ nə́ ndə̌ŋdəŋ pô, a nə ńgyǐ lə́ á mə́ chwádkə nə́ ngaŋə́ghɛlə təpɔŋə (5.32). A nə ə́fóŋə Zakyɔsə lə́ ńté ńgə́ a nə ńgyǐ lə́ á mə́ chwa nə́ pɨ páʼ pó péŋ nə́ ə́ tíʼ chwádkə ághóobə́ (19.10). Póʼ ńté mɔ́ wə̂ páʼə a nə ḿbéŋ nə́ lə́, ä nəələ̂ anu ńté əpɔŋ pó akóolə́mə́lə́ŋ páʼ Əsê a túg nə́ á ndu pɛnə̂. (15.11-32).
Lukasə a nəələ̂ anu páʼə á tɨ́ nə́ ndə̌ŋdəŋ ńté nkɨ yi əshîʼnə wə̂ ńgə́ ə́ kě lə́ tsɔʼə á mbô Pəjusə chî pô, ə́ chî lə́ á mbô mbî ntsəmə, ḿbə́ “Ndaʼnə á mbô pɨ páʼ pə́ chî nə́ á ətú ətsəmə.” (2.32).
Lukasə a nɨd əsa pəngyě á mbi Yeso, ə́sóŋə anu ńté Mɛɛlə páʼə a nə ḿbə́ nə́ mǎpə Yeso, Elisabɛlə, Mata pó Mɛɛlə nə́ pəshu píə (10.38-40). Pəngyě pi nɨ́ nə́ páʼ pó nə̈ ńdzoŋ nə́ ńkwáalə Yeso ə́faʼə̂ á mbô yí lə́ (8.2-3), ńkə́ ńnɨd ndzaŋə ándó Yeso a nə ə́sɛdnə̂ nə́ ńtséebə á mbô pəngyě pə̂ páʼ pó nə̈ ńkyéŋ nə́ ńdzoŋə̂ yə́ á Gɔlgɔta lə́ (23.27), Pəngyě pə nɨ́ nə́ pó nə ńdzoŋə̂ Yeso ə́fɛ́lə á Galili tə ńkɔ́ʼ ńkwúnə á Jɛlusalɛm ńtɨ́ ńjɨ́ ndzaŋ pə́ nə ńkwumtə̂ nə́ yə́ (23.40). Ḿbɨ ńkə́ ḿbə́ nə́ aliʼ páʼ pə́ nə ńtwə́ŋ nə́ Yeso ə́wɨ́ lə́ (23.55-56). Pó peg ńgɛn ńjɨ́ ndzaŋ Yeso a nə ńjúmnə nə́ á nəwû (24.1-80) ńtíʼ ńgɛn ə́sóŋə á mbô ngaŋə́zoŋə́ndzəm əjí zə̂ ntsɔb mɔʼə́ (24.9-10).
Lukasə a ghɛd pə́ zə́ənə akɔŋnə páʼ nkɨ yi əshîʼnə ńté Yeso Klisto ə́ yǐ nə́ nə́ zɨ́d lə́. Ńchwáakə nə́ azoobə́nkǐə pətseŋpə́ndɛ́pə́sê (2.14) ńgɛn ńkoʼ nə́ ndɛd páʼ Yeso á nə ḿmɛdtə̂ nə́ afaʼə ají ńkɔ́ʼ ńgɛnə̂ á nəpóolə á nəpɛnə́ Tǎ əyǐ lə́. Ngaŋə́zoŋə́ndzəm əjí pó tíʼ ńgóʼkə yí, məntɨ́ mɔ́b mə́ lwɛ́nkə nə́ akɔŋnə pó tíʼ mbɨ ḿbəənə̂ ághóobə́ á Jɛlusalɛm ńtíʼə ńchîə á Tə́kɔʼndɛ̂sê əghâ ətsəm ńgóʼkə Əsê (24.52-53).
Ndzaŋ pə́ Ghabtə̂ nə́ Mənu mə́ Aŋwaʼlə Zəənə́
Nətɛ́n nə́ aŋwaʼlə zəənə́ (1.1-4);
Mə́ yǐ nə́ mə́ Yeso (1.5; 2.52);
Yeso a lɛ́ɛlə mbɨ əjǐə á mə́ faʼ nə́ afaʼə ajíə (3.1; 4.13);
Afaʼə Yeso á mə́m Galiliə (4.14; 9.9);
Yeso a fɛ́lə á Galiliə (9.10-50);
Afaʼə Yeso á Judya (9.51; 13.21);
Afaʼə Yeso á mə́mə aláʼə Pɛla po pə mbɛnə́ míə (13.22; 19.27);
Ndzaŋ Yeso a nə ńkwû nə́ ḿbɨ ńjúmnə (19.28; 24.53).
Currently Selected:
Lukasə Nəchwaakənə́ nə́ aŋwaʼlə zəənə́: azo
Highlight
Share
Copy
Want to have your highlights saved across all your devices? Sign up or sign in