Məfaʼə 4

Pita pó Jɔnə á Mbi Ngaŋə́sáʼə́məsáʼə

1Ndzaŋə ándó Pita pó Jɔn ə́ nə ńtə́ nə́ ḿbɛ́lə ńtséebə á mbô pɨ lə́, ngaŋə́pêsê yitsə̌ pópə nətû nə́ ngaŋə́maʼə́ntso páʼ pó nə̈ ḿbyáb nə́ Tə́kɔʼndɛ̂sê ḿbɨ ḿbə́ nə́ Pəsadusi pətsə́ pó yǐəə á mbô pó. 2Pó nə ńtə́ ńdzáŋ ndě nə́ Pita pó Jɔn ńté ńgə́ pó nə ńtə́ ńdzéʼkə pɨ nə́ atséebə Əsê ə́sóŋə ńgə́ Yeso a júmnə á nəwû páʼ á nɨd nə́ ńgə́ pəkwû pə́ yǒ pɨ júmnə á nəwûə. 3Pó tíʼ ńgwaamə̂ Pita pó Jɔn ə́fwɔnə̂ ághóobə́. Ndzaŋ ndɛd nkwanə́ ə́ nə ḿbɛ́d nə́ tə ńkoʼ lə́, pó tíʼ ḿmɛdtə̂ ághɔ́b ə́wɨ́ tə mbî ə́ fógə. 4Lə́ pɨ pipə nɨ́ nə́ páʼ pó nə ńdzóʼ nə́ anǔəsê páʼ Pita pó Jɔn ə́ nə ə́sóŋ nə́ lə́ ḿbímə zə́ələ́. Ńdaŋ ə́lɨ́d ndɛn mbyâŋnə páʼ pó pí nə́ anǔəsê ə́ kɔ́ʼ tə ńkoʼ ándó tɔsə tênə.

5Mbî ə́ fóg, pəkəm pə́ Islɛl pópə pətəkaŋ ḿbá ngaŋə́zéʼkə pənoŋkə ə́ kyeetə̂ á Jɛlusalɛmə. 6Pó nə́ ńjwánə pópə Anas, páʼ a nə ḿbə́ nə́ Mbê Əsê yi ngweŋə́ ḿbéenə Kaifasə, mbɨ ḿbə́ nə́ ŋwu tsə́ pə́ nə̈ fóŋ nə́ nə́ Jɔnə, ḿbéenə Alɛkzanda ḿbɨ ḿbə́ nə́ pɨ pətsə́ páʼ pó nə fɛ́d nə́ lə́ nə́ ngwud Mbêsê yi ngweŋə́. 7Pó ghɛd pə́ fógə Pita pó Jɔn ńgyǐ ńtə́gə á mbi pó, pó chúʼə á mə́ pítə nə́ ághɔ́b nə́ əpítə ətsáb ńgə́, “Əwə a fɛ̂ nə́ mətɨ nə́ pɨ ńgə́ nə́ tsóʼə a ŋwu nə́, kɨ nə́ faʼə̂ lə́ nə́ əlɛ́n əwə?”

8Ajwǐəsê á kwú ńdwɛ́nkə ntɨ́ Pita a tíʼ sóŋ ńgə́, “Pəkəm pə́ aláʼ pópə pətəkaŋ pə́ aláʼ, 9təmbɔʼ nə́ tə́ ḿbítə áwə́g ə́sɛ̂n nə́ anu ńté anu yə əshîʼnə páʼ pəg ghɛd nə́ á mbô kɔ́ŋə́sê nə́, ńkə́ ńtə́ ḿbítə ndzaŋ pə́ tsóʼ nə́ yí, 10á pɔŋ ńgə́ pɨ pətsəmə á Islɛl nə jî ńgə́, lə́ nə́ əlɛ́n Yeso Klisto Mɔ́ Nazalɛd páʼ pɨ nə ńkwumtə̂ nə́, Əsê a pə́ ńjúmkə yə́ á nəwû, páʼ ə́ ghɛd nə́ ŋwu nə́ a tə́əmə á mbi pɨ ńgyáŋə. 11Yeso lə́ ŋwu páʼ atséebə Əsê á tsáb nə́ ńté yí ńgə́,

Ngɔʼ páʼ pɨ ngaŋə́póomə məláʼ nə́ kəŋkə̂ nə́

ə́ nə ńtíʼ ngɔʼ nəlwî nə́ ndɛ̂.#4.11Ngɔʼ nəlwî nə́ ndɛ̂ Sal 118.22.

12Ŋwu yi ndaʼ yitsə̌ a kě ə́wə́ á ndu mbî chî páʼ Əsê a ghɛd nə́ ńgə́ təmbɔʼ pɛn laŋ ə́wɨ́ ńchwád pô, ńté ńgə́ əlɛ́n yi ndaʼ yitsə̌ ə́ kě ə́wɨ́ chî páʼ təmbɔʼ ə́ chwádkə áwɛ́n pô.”

13Á nə ńkɨʼnə̂ mətû mə́ aláʼ ndzaŋ páʼ Pita pó Jɔn ə́ túg nə́ ntə́əmə á mə́ tsáb nə́ tsɔʼə tə apɔ́g ńkə́ ḿbɨ ḿbə́ ńgə́ pó nə ńkě aŋwaʼlə ghɛn pô, ńkə́ ḿbɨ ḿbə́ lə́ tsɔʼə asáŋəsáŋə́. Pó tíʼ ńkwúmtə əghâ yi wɨ́ ńgə́ Pita pó Jɔn ə́ nə ḿbə́ lə́ ngaŋə́zoŋə́ndzəm Yeso. 14Pó nə ńdzə́ənə á ŋwu wə̂ páʼ Pita pó Jɔn pěʼ nə́ ńtsóʼ lə́ a tə́əmə á mbi pó, məntso mɔ́b mə́ tíʼ ńnaʼnə̂ ńté ńgə́ anu yətsə́ á nə ńkě ə́wɨ́ pɨ ńchî təmbɔʼ pó pɨ ńnéŋə atû pə Pita pô. 15Pó tíʼ ńgɛd Pita pó Jɔn ə́ fɛ́lə apeŋ pó tíʼ ńtsəmnə̂ ńté ághóobə́. 16Ḿbítə ńgə́, “Pɛn yǐ ghɛd ə́lɛ́ nə́ pɨ pəənə́? Ŋwu ntsəmə á Jɛlusalɛmə a jî ńgə́ pó nə ə́faʼ chigə nkɨʼnə akyeʼə́nu yitsə̌ páʼ təmbɔʼ pɛn kě kǐ pô. 17Lə́ ndzaŋə ándó pɛn kě nə́ kɔŋ ńgə́ atsáb ńté nkɨʼnənu ghɛn pó ghɛd nə́ lə́ a nyinə̂ á mə́mə aláʼ pô lə́, pɛn kwantə̂ pɨ pɨ ńgə́ kɔ pó pɨ sóŋə anuə á mbô ŋwu tsə̌ ńté ŋwu ghɛn páʼ a pə́ nə́ Yeso lə̂.”

18Mətû mə́ aláʼ mə̂ mə́ tíʼ ńgɛd pə́ pɨ ə́fóŋə Pita pó Jɔn ńgə́ pó kwúnə á ndɛ̂. Ndzaŋ pó kwú nə́ á ndɛ̂ lə́, mətû mə́ aláʼ mə̂ mə́ sóŋə á mbô pó ńgə́, “Kəənə á pə́ akə̂ kəənə akə̂, kɔ nə́ pɨ ə́sóŋə anu yətsə́ kɨ ńdzéʼkə anu yətsə́ ńté əlɛ́n Yeso.” 19Lə́ Pita pó Jɔn pó pə́ ńkwěe ńgə́, “Lə́ tsɔʼə pəənə́ á mə́ jî nə́ ńgə́ á koʼnə̂ á mbi Əsê ńgə́ pəg zóʼnə pə́ áwɨ́ ńtsɛɛlə̂ á mə́ zóʼnə nə́ Əsê? 20Mbɔʼ pəg kě chî tə ghə́ pəg tə́ fiʼtə̂ anu pəg nə ńjɨ́ nə́ ńkə́ ńdzóʼ pô.”

21Pó tíʼ ńkwantə̂ ághɔ́b ngǎ yitsə̌, ńtsɔ́ʼ mbô nə́ pó ńgə́ pó ghɛn ńté ńgə́ pó nə ńkě chî təmbɔʼ pó ghɛlə̂ anu yətsə́ nə́ pə Pita pô. Ndu yitsə̌ ə́ nə ńkě ə́wɨ́ chî təmbɔʼ pó néŋə atsáŋə á mbɨ pó pô ńté ńgə́ ŋwu ntsəmə a nə ńtə́ ŋ́ŋáŋkə Əsê nə́ anu páʼ a laŋ nə́ ŋwu wə̂ a yáŋə. 22Ŋwu wə̂ páʼ pə́ nə ńgɛd nə́ akyeʼə́nu nə́ yə́ a yáŋ lə́, a nə ńdaŋ ngoʼ məghə́m mɛ́n nəkwa.

Pɨ pó Pí nə́ nə́ Yeso pó Chaʼtə́sê Ńgə́ Məntɨ́ Mɔ́b mə́ Tyantə̂

23Əghâ pə́ nə ńtsɔ́ʼ nə́ mbô nə́ Pita pó Jɔn lə́, pó ghɛn ńtég ngaŋmə́ko əzɔ́b ńtíʼ fiʼtə̂ ághɔ́b nə́ anu páʼ pətə́kɔʼ pə́ ngaŋə́pêsê pópə pətəkaŋ pə́ aláʼ pó sóŋ nə́. 24Ndzaŋ pó nə́ ńdzóʼ nə́ anu yə wɨ́ tsɔʼə atsəm lə́, ńtíʼ ńkyeetə̂ táʼə aliʼ ńchaʼtə́sê məngye mɔ́b mə́ kɔ́ʼə atǐə, ə́sóŋ ńgə́, “Mmaʼmbî páʼ a tsɛ nə́ ajúmə atsəm, gho lə́ ntsoŋkə nəpó pó ndəsê nə́ nə́ənə, pópə ajúmə atsəm páʼ a chî nə́ á mə́m ə́wə́! 25Gho nə sóŋə anu jɨ ńtíʼ ńgɛd tǎpətǎ əwəg Debid páʼ a nə ḿbə́ nə ngaŋəfaʼ əgho a sóŋə ájɨ́d ńdaŋə̂ á mə́mə Ajwǐəsê ńgə́,

Lə́ ghɛlə̂ akə̂ məndě mə́ Pətəjǐsê mə́ záŋə;

Lə́ ghɛlə̂ akə̂ pɨ pə́ Islɛl pó kwúlə mənaŋə́ á mə́ ghɛd nə́ mənu páʼ mə́ kě nə́ atûə anu yətsə́ chî pô?

26Pəfo pə́ mbî pə́ lɛ́ɛlə mbɨ əzoobə́ á mə́ póʼnə nə́,

mətû mə́ aláʼ mə́ kə́ ńkyeetə̂ aliʼə́ mɔʼə́

á mə́ póʼnə nə́ məlaʼ pópə Mmaʼmbî ḿbɨ ḿbə́ nə́ Yi Ńtsəʼ nə́ əyǐə.

27Ɛlɔd pó Pɔŋtus Payilɛd ə́ nə ńjwánə á tə́kɔʼ tɔ̂ŋ ghɛn pópə Pətəjǐsê ḿbɨ ḿbá pɨ pə́ Islɛl ńtíʼ ńkwúlə mənaŋə́ á mə́ jwítə nə́ Yeso, páʼ a pə́ nə́ ngaŋəfaʼ əgho yi ŋwaʼ nə́ páʼ gho nə́ ńtsəʼ nə́, 28ńgə́ a faʼə̂ anu páʼ gho nə ńdɔ nə́ ńgə́ á yǐ lɔgə̂ aliʼ nə́ mətɨ mô. 29Əghâ nə́ nə́ Mmaʼmbî, jɨ́ ndzaŋ páʼ pó kag nə́ áwə́gə́, kwáalə áwə́g ngaŋə́faʼ əzô pəg sóŋə anuə azô á mbô pɨ pɨ nə́ atyǎntə ntə́əmə. 30Tsɛɛkə̂ apô azô ńtsóʼ məghɔ wə́, ḿbɨ́ ńgɛd ńgə́ pə́ nɨd mənu mimə yɛ́d nə́ yɛ́d nə́ pópə əkɨʼnəmə́nu ńdaŋ nə́ əlɛ́n ngaŋəfaʼ əgho yi ŋwaʼ nə́ Yeso.”

31Əghâ ándó pó nə ḿməgtə̂ nə́ á mə́ chaʼtə̂ nə́ Əsê lə́, aliʼ pó nə̈ ńtsɛntə̂ nə́ ə́wɨ́ lə́ á chiʼnə̂. Ajwǐəsê á lwɛ́nkə məntɨ́ mɔ́b pətsəm, pó chúʼə á mə́ sóŋ nə́ anǔəsê tsɔʼə tə apɔ́gə.

Pɨ pó Pí nə́ nə́ Yeso Ajúmə Azóobə́ á pə́ Táʼə

32Pɨ pó nə ḿbí nə́ nə́ Yeso məntɨ́ mɔ́b mə́ nə́ ḿbə́ lə́ táʼə, akwaŋə azóobə́ á kə́ ḿbə́ táʼə. Ŋwu əghɔb yitsə̌ a nə ńkě ə́sóŋə ńgə́ ajúmə ají lə́ ají pô ńté ńgə́ pó nə̈ ńgeebə̂ ajúmə atsəm pó túg nə́ á tətɨ pó. 33Məntú mə́ Yeso mə̂ mə́ ghɛn nə́ mbîə á mə́ tsáb nə́ tsɔʼə tə apɔ́g ə́fiʼtə̂ ndzaŋ páʼ Mmaʼmbî Yeso a nə ńjúmnə nə́ á nəwûə. Əsê a tíʼ ńnəələ̂ apɔŋə́ntə́əmə ají yə nɨ́ nə́ á mbô pó pətsəmə. 34Ŋwu tsə̌ a nə ńkě ajúmə á mə́m pö póŋə pô. Pɨ páʼ pó nə ńtúg nə́ əliʼ ndəsê kɨ məláʼ pó fintə̂ ńgyǐ nə́ nkáb páʼ pó fi nə́ əwɨ́, 35ə́fɛ̂ á mbô məntú mə́ Yeso pó tíʼ ńgabtə̂ zə́ələ́ á mbô ŋwu ntsəm ńdzoŋə̂ nə́ məmí mənu páʼ mə̈ tsɛ nə́ yə́.

36Jɔsɛf páʼ pə́ nə mbî nə́ yə́ á Sayiplus a pə́ əla Lebi, məntú mə́ Yeso mə́ fóŋə yí nə́ Banabas (páʼ əlɛ́n yí wɨ́ ə́ sóŋ nə́ lə́ ńgə́, “Ŋwu páʼ ä néŋ nə́ ntɨ́ ŋwu əghâ a chî nə́ á mə́mə afɨnə”) 37a finə̂ aliʼə́ ndəsê ají ńgyǐ ə́fɛ̂ nkéebə á mbô məntú mə́ Yeso.

Currently Selected:

Məfaʼə 4: azo

Highlight

Copy