Məfaʼə 17
17
Anuə á Laŋ nə́ á Mə́m Tɔ̂ŋ Tɛsalonika
1Pɔlə pó Silasə tóokə á mə́m tɔ̂ŋ Amfipolis pó Apolonya ńtíʼ ńgɛnə̂ á Tɛsalonika, aliʼə́ ándó ndɛ̂sê Pəjus nə chî nə́ ə́wə́. 2Pɔl a ghɛn ńkwúnə á ndɛ̂sê Pəjus ndzaŋə a nə̈ ńgɛd nə́ aliʼə́ atsəm páʼ ndɛ̂sê ə́ chî nə́ ə́wə́. Á mə́m əlěláʼsê pɛ́n teelə́ pó po kəʼlə̂ atsáb ńté mənuə á mə́mə aŋwaʼlə Əsê, 3a nə ńdoonə̂ lə́ á mə́ kwá nə́ ághɔ́b pó jî ńgə́ a nə ńkoʼnə̂ ńgə́ yi páʼ Əsê a Tsəʼ nə́ lə́ a chîə mə́ zɨ́ nə́ ngə́ʼ kə́ kwû pɨ júmnə nəwûə. Pɔl a nə sóŋə á mbô pó lə́ ńgə́ Yeso ghɛn páʼ maŋ fiʼtə̂ nə́ áwɨ́ nə́ anu ńté yí lə́, “Lə́ yí páʼ a pə́ nə́ yi ńtsəʼ nə́.” 4Pó pətsə́ Pəjus pó nə ńdzóʼə anu yə́ ə́wɨ́ ḿbímə, ńtíʼ ńdzoŋ ndzəm Pɔl pó Silasə. Pɨ pə́ Glik pipə nɨ́ nə́ páʼ pó nə̈ ńgóʼkə Əsê pɔ́ pə́ Islɛl ḿbɨ ḿbə́ nə́ mətû mə́ pəngyě tə nɨ́ nə ńkə́ ḿbí ńdzoŋ ndzəm Pɔl pó Silasə.
5Lə́ Pəjus pətsə́ pó kə túgə ŋwéetə́ ńté Pɔl pó Silasə, ńtíʼ ńkyeetə̂ mboŋ pəənə; ngaŋə́ghɛlə mənu mə́ təpɔŋə; ngaŋə́fɛ̂ngə́ʼə, pɨ pə́ kě nə́ atûə anu yətsə́ chî pô ḿbɨ́ ḿbə́ nə́ pəlɔŋə́, pó chúʼə á mə́ maʼ nə́ ajwaʼlə á mə́m tə́kɔʼ tɔ́ŋə. Mboŋ pɨ zɨ kə ghɛn ńgwam pɨ pó kə chî nə́ ndɛ̂ Jasɛn nə́ məlaʼə́ á mə́ náŋ nə́ Pɔl pó Silasə ə́lɔgə̂ ághɔ́b yǐ nə́ pó á mbi nkyeetə ə́ kə chî nə́ apeŋə́. 6Lə́ əghâ ándó pó nə ńkě nə́ Pɔl pó Silasə jɨ́ pô lə́, ńtíʼ ńgwaamə̂ á Jasɛn pópə pəlim pə́ pətsɨ́ ə́soŋə̂ ághɔ́b ńgɛnə̂ á mbi mətû mə́ tə́kɔʼ tɔ́ŋə, ńtíʼə̈ ńtɔ́ŋnə ə́sóŋə ńgə́, Pɨ pɨ páʼ pó maʼ nə́ ajwaʼlə á mə́m mbî ntsəm lə́ pó nyi tə ńkoʼə̂ á mə́mə aláʼ pɛnə̂, 7tə Jasɛnə a lɔgə̂ ághóobə́ á ndɛ̂ yə́, pó pətsəm tə́ ńkǐə pənoŋkə pə́ əfo əwɛn Kasa ə́sóŋə ńgə́, “Yitsə̌ əfo a chî ə́wɨ́ pə́ fóŋ nə́ nə́ Yeso.” 8Ndzaŋ pɨ pə́ pópə mətû mə́ tə́kɔʼ tɔ̂ŋ mə́ pó kə zóʼ nə́ atsáb zɨ lə́ ńdzáŋ ndě lɛ̂ tətətə. 9Əghâ ándó Jasɛn pó pətsə́ pəlim á mə́m Yeso pó kə tû nə́ nkáb yitsə̌ pə́ kə noŋkə̂#17.9 Pə́ kə ghɛd pó tû nkáb zɨ lə́ á mə́ nɨd nə́ ńgə́ pó kě anuə təpɔŋ yitsə̌ yǐ ghɛd pô. nə́ ńgə́ pó tû lə́, pə́ tíʼ ḿmɛdtə̂ ághɔ́b pó ghɛnə̂.
Pɔl pó Silasə Ghɛnə̂ á Bɛlya
10Túʼə a nə́ ńkə́ sɛ́n tsɔʼə sɛ́n nə́ lə́, pəlim á mə́m Yeso pó ghɛd Pɔl pó Silasə ghɛnə̂ á Bɛlya. Ndzaŋ pó nə ńgɛn nə́ ńkwú ə́wɨ́ lə́, ńtíʼ ńgɛnə̂ á ndɛ̂sê Pəjusə. 11Pəjusə pə́ nə ńchî nə́ Bɛlya pó nə́ ŋáʼ ntɨ́ əghóobə́ á mə́ jwə́ʼtə nə́ á mbô Pɔl pó Silasə ńtsɛ Pəjus pó nə ńchî nə́ Tɛsalonika, ńté ńgə́ pó nə ńkwá nkɨ yi əshîʼnə ńté Yeso klisto nə́ táʼ ntɨ́ ńkə̈ ńdzéʼə aŋwaʼlə Əsê əlě ətsəm á mə́ jɨ́ nə́ ńgə́ anu páʼ Pɔl pó Silasə sóŋ nə́ lə́ á koʼnə̂ á mə́mə aŋwaʼlə Əsê. 12Ńdaŋ ə́lɨ́d pó pipə nɨ́ nə́ néŋ ntɨ́ nə́ Yeso, pətə́kɔʼ pə́ pəngyě pə́ Glik tə nə́ənə, ńdzoŋ ḿbeg mbyâŋnə wə́. 13Lə́ əghâ ándó Pəjus pó nə ńchî nə́ Tɛsalonika pó kə zóʼ nə́ ńgə́ Pɔlə a kə́ ńtə́ ə́sóŋə anǔəsê á mbô pɨ pə́ Bɛlya lə́, pó ghɛn ə́wɨ́ ńtíʼ ńtóotə pɨ pi wɨ́ ńgə́ pó fɛ̂ ngə́ʼə. 14Tsɔʼə əghâ yi wɨ́ pəlim pə́ pó ghɛn ńchaakə̂ yə́ á nkaŋ nə́ənə, á ndú páʼə á chî nə́ mə́ ghɛn nə́ wə́, lə́ Silasə pó Timoti tíʼ ḿbɛ́lə Bɛlya. 15Pɨ páʼ pópə Pɔl nə ńgɛn nə́ lə́ pó kə lɔgə̂ á yí ńgɛn tə ńkoʼə̂ á Atɛnsə. Pɔlə tíʼ ḿbinkə̂ ághóobə́ á Bɛlya nə́ nkɨ ńgə́ Silas pó Timoti téekə yə́ Atɛnsə nə́ mətəənə.
Pɔlə á Chîə á Aláʼə Atɛnsə
16Ndzaŋ Pɔl a nə ńtə́ nə́ ḿbyáabə Silas pó Timotiə á Atɛns lə́, ńchígə́ ńchîə mə́mə afɨnə ńté ńgə́ a nə jɨ́ ńgə́ məsê mə́ məfɨgə mə́ nə nə́ənə á mə́m tə́kɔʼ tɔ̂ŋ yi wə́. 17A tíʼ ńchwáakə á mə́ kəʼlə̂ nə́ atséebə á mə́m ndɛ̂sê Pəjusə pópə Pətəjǐsê pó kə ghóʼkə nə́ Əsê. A nə ńkə̈ ńkəʼlə̂ atsáb əlětsəm pópə pəənə ándó pó kə chî nə́ á məteenə́. 18Pəənə ándó pó kə̈ zéʼkə nə́ mənu mə́ pɨ pə́ kə̈ fóŋ nə́ ághɔ́b nə́ Pəpikulyan pópə Pəsətɔyik lə́ a kə kə́ ńkəʼlə̂ atsáb pó po. Pó pətsə́ tíʼ ḿbítə ńgə́, “Akəkógə́ ajú zəənə́ a nɨd mbɨ ə́sóŋə lə́ ńgə́ akə̂?” Pətsə́ pó kwěe ńgə́, “Á chîə pə́ ándó a tséebə lə́ anu ńté məsê mə́ atú yitsə̌.” Pó kə sóŋ lɛ ńté lə́ ńgə́ Pɔlə a kə tə́ ə́sóŋə anu ńté Yeso pó mə júmnə nə́ á nəwûə. 19Pó tíʼ ńdɔgə̂ Pɔl ńgɛn nə́ yə́ á aliʼ ngaŋə́sáʼə́məsáʼ ə́ kyeetə̂ nə́ ə́wə́, ə́sóŋə á mbô yí ńgə́, “Pəg loonə̂ á mə́ jî nə́ anu páʼ ndzeʼkə́ yi fî zɨ gho yǐ nə́ nə́ zɨ́d lɛ ə́ sóŋ nə́? 20Ńté ńgə́ gho fiʼtə̂ áwə́g nə́ əkɨʼnəmə́nu pətsə́, ńdaŋ ə́lɨ́d pəg loonə̂ mə́ jî nə́ anu páʼ ndɛn mənu ghɛn ə́ sóŋ nə́.” 21(Pɨ pə́ Atɛnsə pópə pəyǐyinə́ pó kə chî nə́ əwɨ́, pó nə ńdaŋkə̂ ndɛd əzɔb kətaŋə, tə ńdéʼtə ńgə́ pó tə́ fiʼtə̂ kɨ ńtə́ ńdzóʼə anu yə fî yitsə̌.)
22Pɔl a tíʼ ńtə́əmə á tətəənə aliʼ ngaŋə́sáʼə́məsáʼ kyeetə̂ nə́ wɨ́ lə́ ə́sóŋ ńgə́, Pɨ pə́ Atɛns, “Maŋ jɨ́ nə́ ndú ətsəm ńgə́ pɨ pyádnə ńtə́gə atú nə́ mənu mə́ məsê mə́ənə́. 23Mäŋ sóŋə lə́ ńté ńgə́ ndzaŋə ándó maŋ nyi nə́ lə́ ńdjɨ́ əpú páʼ pɨ ghóʼkə nə́ ándó məsê mə́ənə́. Maŋ kə kə́ ńdzɨ́ nəpá páʼ pə́ ŋwaʼlə̂ nə́ ə́wɨ́ ńgə́, ‘Á mbô əsê pə́ kě nə́ nəfɛdnə́ jí jî pô.’ Əsê zə̂ páʼ nə́ ghóʼkə nə́ páʼ nə́ kě nə́ zɨ́d jî pô lə́, lə́ zɨ́d páʼ mäŋ sóŋ nə́ anu ńté yə́.”
24Əsê páʼ ə́ kə tsoŋkə̂ nə́ mbî pó ajúmə atsəmə á chî nə́ á mə́m ə́wə́, lə́ yí páʼə pə́ nə́ Mmaʼmbîə, ə́sáʼə nəpó pó ndəsê. A kě á mə́m məndɛ̂ páʼ ŋwu mbîə á tsoŋkə̂ nə̈ chîə pô. 25Mbɔʼ pɨ pə́ məsɔŋ pə́ kě anu yətsə́ ghɛd ə́fɛ̂ nə́ yí pô, ńté ńgə́ a kě ajûtsə́ póŋ pô. Lə́ yí páʼ ä fɛ̂ nə́ nchîmbî pópə ajwiə á mbô ŋwu ntsəm ḿbɨ ḿbə́ nə́ ajúmə ətsəmə. 26A nə ńdɔgə̂ táʼ ŋwu ńtsoŋkə̂ ətú ətsəm wə́ á mə́m mbîə, tsɔʼə tə ndɛd tə koʼ, a kə pɛ́dtə ńdɔʼkə̂ məndɛlə́ ándó pó yǒ nə́ chîə á mbî ńdzoŋ ḿbá məndɛdtə ándó pó yǒ nə́ jî tɨ́ wə́. 27Əsê a nə ńgɛd lɛ lə́ ńjî ńgə́ mbɔʼ pó chwaalə̂ yə́, nə́ akwaŋ ńtə́ ḿbyáabə ńgə́ mbɔʼ pó məmtə̂ əliʼ ńdzə́ənə yə́. Ndə̌ŋdəŋə́ a chî nə́ əwɨ́ lə́ ńgə́ Əsê a kě chî ndi sag pô, 28ńté ńgə́, Lə̈ ghɛlə̂ yí ńgɛlə̂ pɛn chîə á mbîə, ńnyinə̂ ḿbɨ́ ńkə́ ńtúg nchîmbîəʼ Tsɔʼə ndzaŋ ngaŋə́ŋwaʼlə aŋwaʼlə azɨ́ yətsə́ ə́ sóŋ nə́ ńgə́, Pɛn kə́ ḿbə́ lə́ pɔ́ píə.
29“Ndzaŋ pɛn pə́ nə́ pɔ́ pə́ Əsê lə́, pɛn kě chîə á mə́ kwaŋ nə́ ńgə́ Əsê lə́ ajú páʼ mbɔʼ ŋwunə a lɔgə̂ gôlə kɨ ngɔʼ yi ŋwaŋkə̂ nə́ kɨ ntê ngɔʼ yitsə̌ páʼ ə́ pɔŋ nə́ á mə́ kɔ́ nə́ yí ə́wɨ́ pô. 30Á nə ḿbə́ nə́ ndɛd pɨ pə́ nə ńkě nə́ Əsê kə́ jîə pô lə́, Əsê a nə ńkə́bkə əmə́g mí nə́ mənu páʼ pó nə ńgɛd nə́, lə́ nə́ əghâ nə́ ä sóŋə á mbô ŋwu ntsəmə aliʼə́ atsəm ńgə́, Pó kwúblə ntɨ́ əghɔ́b ə́fɛ́lə á mə́m pətəpɔŋ póobə́. 31Ńté ńgə́ a lɔʼkə̂ ndɛd páʼ a yǒ nə́ əsáʼ əsáʼ mbî ntsəm nə́ ndú páʼ wɨ́d tɨ́ nə́ ndə̌ŋdəŋə́, əlaŋə̂ á mə́m ŋwu tsə̌ páʼ a tsɔ́ʼ nə́. A ghɛd ŋwu ntsəmə á ndú mbîə a jîə a ŋwu ghɛn ńté ńgə́ a kə júmkə yə́ nəwûə.” 32Əghâ ándó pɨ pə̂ pó nə ńdzóʼ nə́ anu ńté á mə́ júmnə nə́ á nəwû lə́, pó pətsə́ nyegnə̂ a yə́, lə́ pətsə́ pə́ sóŋ ńgə́, “Pəg kɔŋ ńgə́ gho pɨ ə́sóŋə anu ńté á mə́ júmnə nə́ nəwûə á mbô pəg əghâ ndaʼə.” 33Pɔl a tíʼ ḿmɛdtə̂ ághɔ́b ńgɛnə̂ yə́, 34Lə́ pɨ pətsə́ pó néŋ ntɨ́ nə́ anu páʼ a kə sóŋ nə́ lə́, ńtíʼ ńdzoŋə̂ yə́. Á mə́m pó lə́ kə pə́ Dionysius páʼ a nə ḿbə́ nə́ táʼ əsáʼməsáʼə pó məngyě yitsə̌ pə́ fóŋə nə́ Damalisə ḿbɨ ḿbə́ nə́ pətsə́ pəənə.
Currently Selected:
Məfaʼə 17: azo
Highlight
Share
Copy
Want to have your highlights saved across all your devices? Sign up or sign in
