Məfaʼə 10

Kɔneliɔsə a Wúnə Pita a Ndɛ̂ yə́

1Ŋwu tsə̌ a nə ńchîə aláʼə Kasalya páʼ əlɛ́n yí nə ḿbə́ nə Kɔneliɔsə. A nə ḿbə́ lə́ nətû nə́ Pəsoye táʼ nkɛd páʼ pə́ nə̈ fóŋ nə́ ághɔ́b ńgə́, “Akwɛlə pəsoye pə́ lǒo nə́ Italiə.” 2Kɔneliɔsə a nə ḿbə́ lə́ ŋwu ngóʼkə ńkə́ ḿbɔ́g Əsê; pópə əla əyǐ tsɔʼə ətsəm. A nə ə́fɛ̂ əpú pipə nɨ́ nə́ á mbô pəpóŋ pə́ Izlɛlə ńkə́ ńdzá ńchaʼtə́sê əghâ ətsəmə. 3A nə ḿbɛn ńdáʼ ḿbə́ alě tsə̌ ándó pəmə́nu pə́ teelə́ á ndzəŋ mə́nu, á mə́m ndzəəmə atəəmə́tɨ́ a chígə́ ńjɨ́ ndzaŋ páʼ ntseŋndɛ̂sê a yǐ nə́ ńkwú ə́sóŋ nə́ yí ńgə́ “Kɔneliɔs!”

4Kɔneliɔsə a tə́g əmə́g ńnáŋə á ntseŋndɛ̂sê ḿbɔ́g ńtíʼ ə́sóŋ ńgə́, “Mmaʼmbî, lə́ akə̂?”

Ntseŋndɛ̂sê wə̂ a kwěe yí ńgə́, “Əsê á zóʼə achaʼtə́sê azô ńkə́ ḿbí əpú páʼ gho fɛ̂ nə́ á mbô pəpóŋə, ńtíʼ ńkwúmtə gho. 5Əghâ nə́, tú pəənə a Joppa pó ghɛn fóŋə ŋwu tsə̌ páʼ pə fóŋ nə́ yí nə́ Saamun əlɛ́n yi yitsə̌ pə́ Pita. 6A chî pó ŋwu tsə̌ páʼ əlɛ́n yí kə pə́ nə́ Saamun, ntsoŋkə məngwub mə́ neemə, páʼ ngyaʼə́ əjǐ ə́ chî nə́ a nkaŋ nə́ənə.”

7Əghâ ándó ntseŋndɛ̂ wə̂ páʼ a pěʼ nə́ ńtséebə á mbô Kɔneliɔs lə̂ a ghɛn nə́ yí, Kɔneliɔsə a fóŋ ngaŋə́faʼ əjí zɛ́n pɛ̌ pópə táʼ ŋwu soye yitsə̌ á pɔ́g nə́ Əsê á mə́m pɨ pó kə pyáb nə́ yə́. 8A fiʼtə̂ ághɔ́b nə́ anu páʼ a laŋ nə́ ńtíʼ ńtúmə ághóobə́ á Joppa.

9Mbî ə́ fóg pó tə́ ńgɛnə̂, ndzaŋ pó nə ńtíʼ nə́ ḿbáatə aláʼə Joppa lə̂, Pita a kɔ́ʼ ńgɛnə̂ á ndu ndɛ̂ #10.9Ndu ndɛ̂ ə́ nə ńchî lə́ ńnoŋnə̂ ándó atətá. á ntɨ̌numnə á mə́ chaʼtə̂ nə́ Əsê. 10Nji nə ńdzáŋə Pita a tə ńdoonə̂ á mə́ jî nə́ məjîə. Nə́ ndɛd pə́ nə́ ńtə́ nə́ ḿbɛ́lə ńnáŋnə məjî lə́, a lê ndzəəmə atəəmə́tə́əmə, 11ńjɨ́ ndzaŋ páʼ nəpó nə́ ŋáʼnə nə́, ajûtsə́ ándó tə́kɔʼə apagə aləpá á tíʼə̈ ńtsóolə ńgyǐəə á mbi yí pə́ wam məlwî mí mətsəm mɛ́n nəkwa ńtíʼə ńtsóokə á ndəsê. 12Mbô məna mətsəm pópə mi páʼ mə́ kə́ŋ nə́ ńdzoŋ ḿbá pəsə́ŋ wə́. 13A tíʼ ńdzóʼ ngye yitsə̌ ə́ sóŋ nə́ yí ńgə́, “Pita lǒo əsê, ńjwítə ńkɔ́lə.”

14Pita a pə́ sóŋ ńgə́, “Aléʼnə mə ḿbə́ Mmaʼmbî! Maŋ nə ńkě mə ajûtsə́ á féŋ nə́ kɨ ńkě á mbi Əsê ŋwaʼ kə̂ jîə pô, tə kɛ́ tə kɛ́.”

15Ngye zə̂ ə́ kə́ ḿbɨ ə́sóŋ nə́ yí ngǎ yitsə̌ ńgə́, “Ajú páʼ Əsê a ghɛd nə́ á ŋwaʼə̂ a mbi yí, kɔ láʼ ə́sóŋ ńgə́ á féŋə.” 16Anu yəwə́ a nə ńdɔgə̂ aliʼ ngǎ teelə́, pə́ tíʼ ńdɔgə̂ ajú yəwɨ́ ńkɔ́ʼ ńgɛn nə́ zə́ələ́ á nəpó nga mɔʼə́.

17Ndzaŋə ándó Pita a nə ńtə́ nə́ ńkwaŋə̂ anu páʼ ndzəəmə atəəmə́tɨ́ zə̂ ə̈ sóŋ nə́ lə̂, pɨ páʼ Kɔneliɔsə a pěʼ nə́ ńtú lə̂ pó pɛ́dtə ńnáŋ tə ńjɨ́ ndú ndɛ̂ Saamunə, tə ńgɛn tə ńkoʼə̂ á ntsoolə́poʼə. 18Pó fóŋnə á mə́ pítə nə́ ńgə́ Saamun páʼ əlɛ́n yi yitsə̌ ə́ pə́ nə Pita lə́ ä chî ə́wə́.

19Ndzaŋə ándó Pita a nə ńgɛn nə́ nə́ mbiə á mə́ kwaŋ nə́ anu páʼ ndzəəmə atəəmə́tɨ́ zə̂ ə̈ sóŋ nə lə̂, Ajwǐəsê a sóŋə á mbô yí ńgə́, “Saamun, pɨ pətsə́ pɛ́n pə́ teelə́ pə́ tə́ ńnáŋə gho. 20Lǒo əsê ńtsó ńgɛn ńtéekə ághɔ́b pɨ pó ghɛnə̂, kɔ lɛ́ɛlə. Kɔ gho lɛ́ɛlə ńté ńgə́ maŋ tú nə́ ághóobə́.” 21Pita a tíʼ ńtsó ə́sóŋə á mbô pó ńgə́, “Maŋ lə́ ŋwu páʼ pɨ náŋ nə́ lə̂. Pɨ yǐ lə́ ńgə́ akə̂?”

22Pó kwěe ńgə́, “Lə́ tú Kɔneliɔs ńtúmə áwə́gə́ á mbô gho, lə́ nətû nə́ pəsoye táʼ nkɛd, ńtɨ́ ndə̌ŋdəŋ ńkə̈ ńgóʼkə Əsê, ŋwu ntsəmə á Islɛl a fɛ̂ ngóʼkə nə́ yə́. Ntseŋndɛ̂sê a sóŋ nə́ yí ńgə́ a fóŋə gho, gho yǐəə á ndɛ̂ yí ńjî ńgə́ a zóʼə anu páʼ gho chî nə́ á mə́ sóŋ nə́.” 23Pita a tíʼ ńdɔgə̂ ághóobə́ á mə́m ndɛ̂, pó po tíʼ ńdê.

Mbî ə́ fóg, Pita a lǒo əsê pó po ghɛnə̂, ngaŋə́zoŋə́ndzəm Yeso yitsə̌ páʼ ə́ nə ńchî nə́ Joppa kə́ ńdzoŋə̂ ághɔ́b pó po ghɛnə̂. 24Mbî ə́ fóg pó koʼə̂ á Sisalya. Kɔneliɔsə a nə ńtə́ ḿbyáabə ághóobə́ ńtíʼ ə́fóŋ pəlim pí pópə pəshu píə. 25Əghâ ándó Pita a nə ńkwú nə́ á ndɛ̂ lə̂, Kɔneliɔsə téekə yí ńgwǔəə á məko yí ńgóʼkə yə́. 26Lə́ Pita a pə́ ńgwaamə̂ yí ńdookə̂ á ndəsê ə́sóŋ ńgə́, “Lǒo əsê, maŋ kə́ ḿbə́ lə́ tsɔʼə ŋwunə ándó gho.” 27Ndzaŋə ándó Pita a nə ńtə́ nə́ ńtséebə pó yí lə̂, ńkwúnə á ndɛ̂ ńdzɨ́ mboŋ pɨ ə́ náanə táʼə aliʼə́. 28Pita sóŋə á mbô pó ńgə́, “Nə kə́ ḿbyádnə ńjî ńgə́ noŋkə əwəgə́ á Islɛl á kě pí ńgə́ mbɔʼ pəg túgə anu yətsə́ pə̂gpə Pətəjǐsê, kɨ tsɔʼə mə́ ghá nə́ ághɔ́b pô. Lə́ Əsê a pɛn ńgɛd maŋ jî ńgə́ a kě koʼnə̂ á mə́ sóŋ nə́ ńgə́ ŋwu tsə̌ a kě féŋ kɨ ŋ́ŋwaʼə̂ a mbi Əsê pô. 29Lə́ ghɛd ə́lɨ́d əghâ ándó gho nə ńtú nə pɨ ńgə́ pə fóŋə mə lə́, maŋ kə kě kǐəə á mə́ yǐ nə́ pô. Tíʼ fiʼtə̂ mə nə́ anu páʼ gho fóŋ nə́ á mə nə́ zɨ́d lə́.”

30Kɔneliɔsə a kwěe ńgə́, “Lə́ əlě mbî pɛn nəkwa ə́ laŋ nə́, á mə́m ndɛlə́ ándó jɨ páʼ maŋ nə ńtə́ nə́ ńchaʼtə́sê nə́ pəmə́nu pɛn pə́ teelə́ á ndɛd nkwanə́. Ńgabkə̂ ńdzə́ənə ŋwu tsə̌ a tə́əmə á mbi maŋ ətsəʼ əpí ə́ ŋwaŋkə̂ ŋwaŋkə̂ nə́. 31A sóŋə á mbô maŋ ńgə́, ‘Kɔneliɔs! Əsê a zóʼə achaʼtə́sê azô, ńkə́ ńtə́ ńjɨ́ əpú páʼ gho fɛ̂ nə́ á mbô pəpóŋə. 32Tú pəənə a Joppa pó ghɛn ə́fóŋə Saamun páʼ əlɛ́n yí yitsə̌ ə́ pə́ nə Pita. Lə́ ngaŋnə́ghéenə a ndɛ̂ Saamun páʼ ä tsoŋkə̂ nə́ məngwub mə́ na lə̂, páʼ ndɛ̂ əjǐ ə́ chî nə́ a nkaŋ nɨ́ lə̂.’ 33Lə́ ghɛd ə́lɨ́d maŋ nə ńtɔ́g ńtú pɨ ńgə́ pó yǐ ə́fóŋə gho, gho kə ńdzóʼ ńgyǐ nə́ ntɨ́ yi əshîʼnə. Əghâ nə́ pɛn pətsəm chîə á mbi Əsê á mə́ zóʼ nə́ anuə atsəm páʼ Mmaʼmbîə a sóŋ nə́ ńgə́ gho fiʼtə̂ áwə́gə́.”

Anu Páʼ Pita a nə Sóŋ nə́ nə́ Kɔneliɔsə pópə Pɨ Píə

34Əghâ nə́ Pita a chúʼə á mə́ tsáb nə́ ə́sóŋ ńgə́, “Maŋ jɨ́ ńgə́ Əsê a kě mbî tóŋə pô. 35Lə́ á mə́m ətú mbî ətsəm, ŋwu ntsəm páʼ a tə́ nə́ ḿbɔ́g Əsê ńkə́ ńtə́ ə́faʼə̂ anu páʼ á koʼnə̂ nə́ á mbi Əsê, Əsê a pímə yə́ ándó əyǐ ŋwunə. 36Nə jî nkɨ páʼ Əsê a nə ńtú nə́ á mbô pɨ pə́ Izlɛlə, ńnáŋkə nkɨ yi əshîʼnə páʼ wɨ̈d yǐ nə́ nə́ mbwɔ́dnə ńdaŋə̂ á mə́m Yeso Klisto páʼə á pə́ nə́ Mmaʼmbîə á tsɛ nə́ ajúmə atsəmə. 37Nə jîə anuə atsəm páʼ a nə ńdɔg nə́ aliʼə́ á mə́mə aláʼə Judya tsɔʼə atsəmə ńchúʼə á aláʼə Galili, əghâ ándó Jɔnə a nə ḿməgtə̂ nə́ á mə́ fiʼtə̂ nə́ pɨ ńgə́ pó kwúblə á mə́m pətəpɔŋ pɔ́b a fɛ̂ nkǐ nə́ pó. 38Nə́ jîə anu ńté Yeso Klisto Mɔ́ Nazalɛd ńkə́ ḿbə́ ndzaŋ páʼ Əsê a nə ńtsəʼ nə́ yí nə́ Ajwiə ají ḿbɨ́ ḿbə́ nə́ mətəənə. Ńkə́ ḿbə́ ndzaŋ páʼ Yeso a nə̈ nyi nə́ aliʼə́ atsəm ńgɛd əshîʼnə ńkə́ ńtsóʼə pɨ páʼ Satanə a nə̈ ńjwaʼ nə́ ághɔ́b ńté ńgə́ Əsê nə ńchî pó yə́. 39Pəg nə ńjɨ́ ndɛn mənu ghɛn ətsəm nə́ əmə́g ndzaŋ páʼ a nə faʼ nə́ á Jɛlusalɛm pópə aliʼə́ atsəmə á Islɛl. Pə́ nə ńkwumtə̂ yə́ atǐəpagləpaglə a kwûə. 40Lə́ əlě teelə́ ə́ laŋ Əsê a júmkə yə́ a nəwû a tíʼ ńnɨd mbɨ əjǐə á mbô pɨ pó chigə ńdzə́ənə yə́. 41Lə́ a nə ńkě mbɨ əjǐə á mbô ŋwu ntsəm nɨd pô. A kə nɨd mbɨ əjǐ lə́ á mbô pəg páʼ pə́ nə ńtsɔ́ʼ nə́, pəg páʼ pə̌gpo nə̈ ńjî nə́ ńkə́ ńnô əghâ páʼ a nə ńjúmnə nə́ a nəwûə. 42A sóŋə á mbô pəg ńgə́ pəg ghɛn ńnáŋkə nkɨ yi əshîʼnə wə̂ á mbô pɨ, ńkə́ ńgɛd pɨ pə́ jî ńgə́ yí lə́ ŋwu páʼ Əsê a tsɔ́ʼ nə́ ńgə́ a sáʼ məsáʼ mə́ pɨ páʼ pó chî nə́ a mbî ńkə́ ḿbə́ nə́ mimə́ pəkwûə. 43Məntú mə́ Əsê mətsəm mə́ nə́ ə́sóŋə anu ńté yí ńgə́ ŋwu ntsəm páʼ a pí nə́ nə́ Yeso, Əsê a yǐ ləgnə̂ təpɔŋ əyǐ ə́laŋ nə́ əlɛ́n yə́.”

Ajwǐəsê á Kwúnə á Mbɨ Pətəjǐsê

44Ndzaŋə ándó Pita a nə ńgɛn nə́ nə́ mbiə á mə́ sóŋ nə́ ndɛn mənu ghɛn lə́, Ajwǐəsê a tsóolə á ndu pɨ páʼ pó nə̈ ńdzóʼ nə́ atséebə Əsê. 45Ngaŋə́zoŋə́ndzəm Yeso páʼ pó kə pə́ nə́ pɨ pə́ Islɛl, páʼ pó nə fɛ́d nə́ Joppa pópə Pita lə̂, anu yəwə́ a kɨʼnə̂ ághɔ́b lɛ ti ńgə́ Əsê kə kwɛd məfɛ̂nə míə á mbɨ pətəjǐsê, páʼ mə́ pə́ nə́ Ajwǐəsê. 46A nə ńkɨʼnə̂ ághɔ́b ńté ńgə́ pó nə ńdzóʼ ndzaŋ páʼ pɨ pə̂ pó tsáb nə́ nə́ ətsáb ətú pi ndaʼ páʼ pó kě nə zéʼ pô, ńtíʼə ŋ́ŋáŋkə Əsê. Pita tíʼ ńtsáb ə́sóŋ ńgə́, 47“Əsê a fɛ̂ Ajwǐəsê á mbô pɨ pɨ tsɔʼə ndzaŋ páʼ a fɛ̂ nə́ á mbô pɛn pɔ́ pə́ Izlɛlə. Ńdaŋ ə́lɨ́d mbɔʼ əwə a pə́ ńtíʼ ńdzɔŋ ńgə́ kɔ pó kwá nkǐə?” 48A tíʼ ə́sóŋ ńgə́ pó kwá nkǐ nə́ əlɛ́n Yeso Klisto. Kɔneliɔs pópə pɨ pí tíʼ ə́sóŋ nə́ Pita ńgə́ a chî pó po nə́ əlěmbî pətsə́.

Currently Selected:

Məfaʼə 10: azo

Highlight

Copy