John 20

Kulyuk Pisala Se

(Matthew 28:1–8; Mark 16:1–8; Luke 24:1–12)

1Toang na ke lotutang in Sunday, ke srakna lohsrlosr, Mary Magdalene el som nu ke kulyuk ah tuh liyauk lah eot sac ipisyukla liki mutun kulyuk sac. 2El kasrusr som nu yorol Simon Peter ac mwet lutlut se ngia su Jesus el lungse, ac fahk nu seltal, “Elos eisalla Leum liki kulyuk ah, ac kut tia etu lah elos fililya oya!”

3Na Peter ac mwet lutlut se ngia eltal som nu ke kulyuk ah. 4Eltal tukeni kasrusr, a mwet lutlut se ngia mui lukel Peter ac sun kulyuk ah meet. 5El kui nu ten ac liyauk nuknuk linen ah, tusruktu el tiana utyak nu loac. 6Ac Simon Peter el tuku tokol ac suwosla na nwe in kulyuk ah. El liye nuknuk linen oan we 7ac nuknuk se ma sang pwelah insifen Jesus ah — tia wi nuknuk linen uh oan, a limlimla na oan saya. 8Na mwet lutlut se ngia ma sun kulyuk ah meet, el utyak pac nu in luf uh. El liye ac lulalfongi. ( 9Eltal soenna kalem ke Ma Simusla ma fahk mu el enenu na in moulyak liki misa.) 10Na mwet lutlut luo ah folokla nu lohm seltal ah.

Jesus El Sikyang Nu Sel Mary Magdalene

(Matthew 28:9–10; Mark 16:9–11)

11Mary el tu na tung likin kulyuk ah. Ke el srakna tung, el suwoli ac ngetang nu in luf sac, 12ac liyauk lipufan luo nuknuk fasrfasr. Eltal muta yen se ma monin Jesus tuh oan we ah, sie ke acn sifal oan we, ac sie ke acn nial oan we. 13Eltal siyuk sel, “Mutan, efu kom ku tung?”

Mary el topuk ac fahk, “Elos usalla Leum luk, ac nga tia etu acn elos fililya we!”

14Na el tapulla ac liyalak Jesus tu insac, tusruktu el tiana akilen lah Jesus. 15Jesus el siyuk sel, “Mutan, efu kom ku tung? Su kom suk an?”

Mary el nunku mu el mwet ima se, ouinge el fahk nu sel, “Fin kom pa usalla, fahk nu sik acn kom fililya we, ac nga fah som eisal.”

16Jesus el fahk nu sel, “Mary!”

Mary el forang nu sel ac fahk ke kas Hebrew, “Rabboni!”#20:16 Rabboni: kas Aramaic; Rabbi pa kas Hebrew. (Kalmac pa “Mwet Luti.”)

17Jesus el fahk nu sel, “Nik kom sruokyuwi, mweyen nga soenna sowak nu yurin Papa. Tusruktu, fahla nu yurin mwet lili ac fahk nu selos lah nga sowak nu yurin Papa tumuk ac Papa tumalos, God luk ac God lalos.”

18Ouinge Mary Magdalene el som ac fahk nu sin mwet tumal lutlut lah el liyalak Leum, ac el srumun ma Jesus el tuh fahk nu sel ah.

Jesus El Sikyang Nu Sin Mwet Tumal Lutlut

(Matthew 28:16–20; Mark 16:14–18; Luke 24:36–49)

19Ke eku in len Sunday sac, mwet lutlut elos tukeni in sie acn ac lakiya srungul uh mweyen elos sangeng sin mwet fulat lun mwet Jew. Na Jesus el tuku ac tu inmasrlolos ac fahk, “Misla nu suwos.” 20Tukun el fahk ma se inge, el kolang paol ac fahkak pac la siyal nu selos. Mwet tumal lutlut elos arulana engan ke elos liye Leum. 21Jesus el sifil fahk nu selos, “Misla nu suwos. Oana ke Papa El supweyume, ouinge nga supwekowosla.” 22Na el mongyang nu faclos ac fahk, “Kowos eis Ngun Mutal. 23Kowos fin nunak munas ke ma koluk lun mwet, elos fah eis nunak munas. Kowos fin tia nunak munas nu selos, elos ac tia pac eis nunak munas.”

Jesus ac Thomas

24Thomas (su pangpang pac Fak,#20:24 Fak: pa inge kalmen ine se inge, Didymous.) el wangin yorolos ke Jesus el sikyang nu selos. 25Ouinge elos fahk nu sel, “Kut liyal Leum!”

Thomas el fahk nu selos, “Nga fin tia liye inken kinet in osra inpaol ah, ac filiya kufinpouk fin kinet ah, ac isongang pouk nu ke la sial, nga ac tia lulalfongi.”

26Wik se toko mwet lutlut elos sifilpa tukeni in lohm ah, ac Thomas el welulos. Srungul uh lakiyuki, a Jesus el tuku ac tu inmasrlolos ac fahk, “Misla nu suwos.” 27Na el fahk nu sel Thomas, “Filiya kufinpoum inse inge, ac liye pouk. Na asroema poum ac isongang nu ke la siuk. Nimet kom alolo, a lulalfongi na!”

28Thomas el fahk nu sel, “Leum luk ac God luk!”

29Jesus el fahk nu sel, “Ya kom lulalfongi mweyen na kom liyeyu? Insewowo elos su tiana liyeyu a elos lulalfongi!”

Sripen Simla Lun Book Se Inge

30Jesus el oru pac mwenmen puspis ye mutun mwet tumal lutlut, a tiana simla in book se inge. 31Tusruktu ma inge simla tuh kowos fah ku in lulalfongi lah Jesus pa Christ, Wen nutin God, ac tuh ke lulalfongi lowos in el, kowos fah ku in eis moul.

Currently Selected:

John 20: KOS

Highlight

Copy