Mika 3

Mika a apwüngü ekewe souamwenin Israel

3.1-12

1Mürin, üa apasa, “Oupwe rongorong, ämi souemwen seni mwirimwirin Jakop, pwal ämi kewe samolun Israel. Ifa usun, sap ämi chon silei mine a pwüng? 2Nge ämi oua oput mine a mürina o efich mine a ngau. Ämi oua äsera ünüchen nei aramas o etti fituker seni chür. 3Ämi oua ochei fituken nei aramas, oua äsera ünücher o kupikisi chür, oua pökükisiretiu usun fituk lon nape.” 4Mürin ekewe souemwen repwe siö ngeni ewe Samol mi Lapalap, nge i esap palüeniir. Lon ena fansoun epwe amona mesan seniir, pun ra föri föför mi ngau.

5Iei alon ewe Samol mi Lapalap fänäsengesin ekewe soufos mi atoka nöün kewe aramas o eäni kökö ngeni chokewe mi amongöniir pwe epwe wor kinamwe, nge ra eäni eniweniw maun ngeni chokewe resap amongöniir, 6“Epwe wor pwin ngenikemi, nge esap wor künaemi, epwe pwal wor rochopwak ngenikemi, nge esap fis angangen ämi pwee.” Akkar epwe tuputiu won ekewe soufos, nge rän epwe rochopwak wor. 7Ekewe souwo repwe itengau, nge ekewe soupwe repwe küna säw, repwe fokun mitingau, pun Kot esap pälüeniir. 8Nge ngang, ewe Samol mi Lapalap a aüraei ren Ngünün me an manaman, a atufichiei, pwe üpwe weweiti mine a pwüng o apworaei, pwe üpwe pwäri ngeni ekewe chon Israel ar kewe tipis.

9Oupwe rongorong, ämi kewe mi emweni ekewe mwirimwirin Jakop pwal ämi mi nemeni ekewe chon Israel, ämi chokewe mi oput pwüng o atoka meinisin mine a wenechar, 10ämi mi aüetä Sion fän ämi nimanauei aramas, pwal Jerusalem fän föföringau. 11Ekewe souemwenin Jerusalem ra angei lifangen amichimich, lupwen ra eäni kapwüng, ekewe souasor ra awewei än Kot kewe allük fän iten ar repwe angei liwin, nge ekewe soufos ra föri pwee fän iten ar repwe angei moni. Nge ra pwal anomu ar apilükülük won ewe Samol mi Lapalap o üra, “Ewe Samol mi Lapalap a nom lefilach. Esor feiengau epwe torikich.” 12Iei mine Sion epwe wiliti eu leni mi tu usun eu mälämäl pokitemi, Jerusalem epwe wiliti eu ioien mettoch mi tala, nge ewe chuk ia ewe imwenfel a nom ie epwe wiliti eu wöllap. #Jer 26.18

Currently Selected:

Mika 3: CHK

Highlight

Copy