Mika 2

Feiengauen chokewe mi ariaföüü chon wöüngau

2.1-13

1Feiengauen chokewe mi ekiekietä mine a ngau o pwüngü rawangau me won kier. Lupwen a ränila, ra afisi mine ra ekieki, pun a nom rer ewe pöchökül ar repwe föri. 2Lupwen ra mocheniaiti ekewe mälämäl, ra angeir fän pöchökül. Lupwen ra mochen imweni eu imw, ra chök angei. Iei usun ra ariaföüü eman aramas fänäsengesin imwan me fanüan me won saman. 3Iei mine ewe Samol mi Lapalap a apasa, “Üa ekiekietä pwe üpwe afeiengauakemi, nge ousap tongeni püsin amanauakemi. Ousap chüen tongeni fetal fan lamalamtekia, pun epwe torikemi eu fansoun feiengau. 4Lon ena fansoun aramas repwe eäni affa pworausen ämi feiengau o eäni echö kölün riaföü usun mine a fis ngenikemi. Repwe apasa:

Aia wesewesen feiengau.

Kot a angei senikem fanüem kewe

o ngeni chokewe mi liapenikem.” 5Iei mine lupwen epwe tori ewe fansoun pwe ewe fanü epwe liwinsefäl ngeni nöün Kot kewe aramas, esap fokun wor inetimi.

6Ekewe aramas ra afalafal ngeniei o üra, “Kosap afalafalakem. Kosap eäni ei sokun afalafal. Kot esap aitengauakem. 7Ifa usun, ekewe chon Israel ra anümamau? Ifa usun, ewe Samol mi Lapalap a müttir le song? Ifa usun, epwe wesewesen föri ei sokun föför? Ifa usun, esap eäni kapas pwetete ngeni chokewe mi wenechar?” 8Ewe Samol mi Lapalap a apasa, “Ekis chök fansoun a la, ämi nei aramas oua ütä usun chök chon oputaei. Oua angeala üfen chokewe mi pwerela, nge resap ekieki och, ir chokewe mi liwinto seni maun. 9Oua asüela ekewe fefin me lein nei aramas seni imwer kewe mi mürina, oua pwal angefochei ai feiöch seni nöür kewe semirit. 10Oupwe ütä o feila, pun ei leni esap chüen eu lenien asösö. Ämi kewe tipis ra afeiengaua ei leni, pwe epwe fokun tala. 11Are eman chon chofana me eman chon atuputup epwe feito o üreni ekewe aramas, pwe epwe wor chomong ünümer wain me sakau mi pwichikar, ätewe epwe fokun nöür soufos.

12Ngang üpwe fokun achufengenikemi, ämi chon Israel meinisin mi chüen manau. Üpwe achufengenikemi usun sip ra chufengen lon lenier, usun epwi pwiin sip mi nom lon ar lenien mongö. Ewe leni epwe ti ren aramas.” 13Kot epwe suki ewe al fän iten chon Israel o emwenirewu seni ar oola. Ir repwe pwerewu me lon asamalapen ewe telinimw o feila. Ar we king, ewe Samol mi Lapalap, epwe emweniir o akom mwer.

Currently Selected:

Mika 2: CHK

Highlight

Copy