Lukas 18

Pworausen awewe usun eman fefin mi mä pwülüan me eman soukapwüng

18.1-8

1Mürin Jesus a apworausa ngeni nöün kewe chon kaiö eu pworausen awewe, pwe a mochen aiti ngeniir usun ar repwe iotek fansoun meinisin, nge resap achanü. 2Iwe, a apasa, “Lon eu telinimw a wor eman soukapwüng esap niuokusiti Kot ika ekieki aramas. 3Mi pwal wor eman fefin mi mä pwülüan lon ewe telinimw, a chök soun feito ren ewe soukapwüng o tüngormau ngeni, ‘Kopwe pwärala ai pwüng o alisiei ren ewe chon ü ngeniei.’ 4Fansoun langatam ewe soukapwüng esap mochen alisi. Nge feilfeil a ekieki lon lelukan, ‘Inamwo ika üsap niuokusiti Kot ika ekieki aramas, 5nge pokiten ei fefin mi mä pwülüan a chök osukosukaei, iei üpwe le alisi, pwe epwe pwäla an pwüng. Are üsap alisi, epwe chök sopwela le feito rei tori üpwe osukosuk ren.’”

6Iwe, ewe Samol a apasa, “Oupwe rongorong mine ewe soukapwüng mi ngau a üra. 7Ifa usun, Kot esap fokun pwärala än nöün kewe mi fil pwüng, ir chokewe mi kökköri le rän me le pwin? Ifa usun, epwe mang le alisiir? 8Ngang üpwe ürenikemi, epwe müttir le pwärala ar pwüng. Nge lupwen Nöün Aramas epwe war, ifa usun, epwe küna aramas mi lükülük won fanüfan?”

Pworausen awewe usun eman Farisi me eman chon ioni takises

18.9-14

9Iwe, Jesus a pwal apworausa ei pworausen awewe ngeni ekewe aramas mi lükü püsin ar pwüng o aücheangaua aramas. 10“A wor ruoman mwän mi feitä lon ewe imwenfel pwe repwe iotek, eman, eman Farisi, nge ewe eman, eman chon ioni takises. 11Iwe, ewe Farisi a ütä, a iotek lon lelukan o üra, ‘Ai Kot, üa kilisou ngonuk, pwe üsap usun ekewe ekoch aramas, ir chon solä, chon pwüngingau, chon lisowu, ika fen pwal usun ei chon ioni takises. 12Ngang üa echikefel fän ruu lon eu wiik, üa pwal fangala leengolun meinisin mine üa eäni.’ 13Nge ewe chon ioni takises a ütä me toau, esap fen mwo nge netä läng, nge a pisiri fän mwärin o apasa, ‘Ai Kot, kopwe ümöümöch ngeniei, ngang eman chon tipis.’” 14Jesus a apasa, “Üpwe ürenikemi, ei chon ioni takises a küna pwüng fän mesen Kot lupwen a liwinla lon imwan, nge sap ewe Farisi. Pun iö a püsin atekiatä epwe küna tekison, nge iö a püsin atekisonatiu epwe küna tekia.” #Mat 23.12; Luk 14.11

Jesus a afeiöchü ekewe kükün semirit

18.15-17

(Mat 19.13-15; Mark 10.13-16)

15Iwe, ekoch aramas ra uwato nöür kükün semirit ren Jesus, pwe epwe afeiöchüür. Nge lupwen ekewe chon kaiö ra küneer, ra apwüngü ekewe aramas. 16Nge Jesus a körato ekewe semirit ren o a apasa, “Oupwe mwüt ngeni ekewe semirit pwe repwe feito rei, nge ousap epetiir, pun iö a wewe ngeni ekei semirit epwe mwüni Mwün Kot. 17Enlet, üpwe ürenikemi, are eman esap etiwa Mwün Kot usun eman semirit, esap tongeni tolong lon.”

Ewe mwän mi pisekisek

18.18-30

(Mat 19.16-30; Mark 10.17-31)

18Iwe, eman sounemenem a aisini Jesus, “Sense mi mürina, met ngang üpwe föri ai üpwe eäni manau esemüch?” 19Jesus a üreni, “Pwota ka aita ngeniei mürina? Esap wor eman a mürina pwe Kot echök. 20Ka silei ekewe allük: ‘Kosap lisowu, kosap niela aramas, kosap solä, kosap eäni kapas chofona usun eman, kopwe asamolu semom me inom.’” #Eks 20.12-16; Tut 5.16-20 21Iwe, ewe mwän a pölüeni, “Ekei allük meinisin üa fen apwönüretä seni leküküni.” 22Lupwen Jesus a rong ekei kapas, a üreni, “Mi chüen wor eu mettoch ka mang ngeni. Kopwe amömöla meinisin mine ka eäni, nge ewe moni kopwe fangala ngeni ekewe chon wöüngau, pwe epwe wor woumw lon läng. Mürin kopwe feito o tapweto müri.” 23Nge lupwen ewe mwän a rong ekei kapas, a fokun letipeta, pun a fokun pisekisek. 24Iwe, lupwen Jesus a küna pwe a letipeta, a apasa, “A men fokun weires ngeni ekewe aramas mi pisekisek ar repwe tolong lon Mwün Kot. 25Enlet, a mecheres än eman kamel epwe tolong lon pwangen efoch tikek, lap seni än eman chon pisekisek epwe tolong lon Mwün Kot.” 26Iwe, ekewe aramas mi rong ekei kapas ra aisini, “Nge iö chök epwe tongeni küna manau?” 27Jesus a pölüeni, “Mine esap tufich ngeni aramas a tufich ngeni Kot.”

28Mürin Petrus a üreni Jesus, “Nengeni, äm aia likitala meinisin mine aia eäni o tapwela mürum.” 29Jesus a pölüeniir, “Enlet, üpwe ürenikemi, are eman a likitala imwan are pwülüan, are pwiin, are saman me inan, are nöün kana fän iten ewe Mwün Kot, 30ewe aramas epwe angei liwinin mi fokun watte lon ei fansoun, epwe pwal angei manau esemuch lon ewe fansoun epwe feito.”

Aülüngatin än Jesus kapas usun an mäla

18.31-34

(Mat 20.17-19; Mark 10.32-34)

31Mürin Jesus a aimwüela ekewe engol me ruoman chon kaiö o üreniir, “Oupwe rongorong! Oukich sipwe feitä Jerusalem. Ikenan mettoch meinisin mi makketiu me ren ekewe soufos usun Nöün Aramas epwe pwönüetä. 32Epwe tolong lepöün ekewe chon lükün Israel, repwe urumwotei, repwe turunufasei o atufa. 33Repwe pwal wichi o niela, nge mürin ülüngat rän epwe manausefälitä.” 34Nge ekewe chon kaiö resap weweiti ekewe mettoch, pun ekewe kapas a monomon seniir, resap pwal silei wewen met Jesus a kapas usun.

Jesus a aneloi mesen eman chon chun mi tütüngor

18.35-43

(Mat 20.29-34; Mark 10.46-52)

35Iwe, lupwen Jesus a arap ngeni Jeriko, eman mwän mi chun a mot lepekin al o tütüngor lifangan. 36Lupwen a rongorong pwe chomong aramas ra fetalela won ewe al, a aisiniir, “Met a fis?” 37Iwe, ra üreni, “Jesus seni Nasaret a feito.” 38Mürin ewe mi mesechun a kökkö fän leüömong, “Jesus, Nöün Tafit, kopwe tongeei!” 39Iwe, ekewe aramas mi nom mwan ra apwüngü o üreni pwe epwe fanafanala. Nge i a chök alapata leüan o kökkö, “Nöün Tafit, kopwe tongeei.” 40Iei mine Jesus a üla o apasa pwe repwe emwenato ren ewe mi mesechun. Iwe, lupwen a kaneto, Jesus a aisini, 41“Met ka mochen üpwe föri ngonuk?” A pölüeni, “Ai samol, üa mochen küna mwei.” 42Iwe, Jesus a üreni, “Kopwe küna mwomw, om lükülük a apöchökülok.” 43Lon ewe chök otun ewe mwän a küna mwan, a tapwela mürin Jesus o kilisou ngeni Kot. Lupwen ewe mwichen aramas ra küna ei, ir meinisin ra mwareiti Kot.

Currently Selected:

Lukas 18: CHK

Highlight

Copy