Matayo 6
6
Nkichoorot taa laisinak
1 #
Mat 23:5
<<Entodol emintoduaaya asat inchi ee sipat tekue nkonyek ee ltung'ana metoduaa ntae, amu kore tiniasias nejia, naa mitumtum laata ta Papa linchi le chumata. 2Naa tinincho laisinak, mikut mowuo metining'i aajo nchoo, ana neas lolo ooitaakino taatua Sinagogini o taatua nkoitieii payie etum ꞉ltung'ana aaterrep ninche. Kedede kajoki ntae, eidipa ninche aatum laata enche. 3Kake tinincho laisinak, mincho meteyielo nkaina ino e kidienye ntoki naasita ne tetene, 4metaa no lkutoto nkichooroto ino, paa kore Papa lino odol atua ng'oji neing'opa, nikilaaki iyie.
Eiteng'enichie Yeso mbaa naaipirita nkomono
(Luka 11:2–4)
5 #
Luka 18:10–14
<<Naa tiniomonmon, emiaku ana lolo ooitaakino, oaacham aatoomon eitachoo taatua Sinagogini o too ntumot ee nkoito, payie edol ninche ꞉ltung'ana. Kedede kajoki ntae, etumo ninche laata enche ebore. 6Kore tiniomon, tijing'a atua lgilata le nkaji ino, ninken, niomon Papa lino otii ng'oji neing'opa, amu kore Papa lino odol nenia naaing'opa, naa ikilaaki.
7<<Naa tiniomonmon ntae, emiingil rereii lemeata tipat, ana neiko loreren lemeyielo Nkai. Amu kejo ninche kening'i tankaraki rereii lenche kumo. 8Emitiuu ana ninche, amu keyielo ꞉Papa linchi nenia niyieuu ewuon abaki eitu iomonmon ninye. 9Naa, tiniomonmon, entoomon aajo inji:
<Papa lang oti chumata, meyanyiti nkarna ino,
10meeu nkitoria ino, metaasai niyieu to nkop ana netiiu to chumata,
11nchoo iyioo mparri pooki ndaa naitiemu iyioo.
12Nipaliki iyioo ntorrok ang,
ana payie kitapalikita sii iyioo lolo ooitarruokita iyioo.
13Naa mincho iyioo kijing atua ntemat,
kake talaku iyioo te Ilo torno.>#6:13 Ketii lkigerot ooponiki aajo, Amu nino nkitoria o ngolon o nkitoo, ntarasi o ntarasi. Aamin.
14 # Mrk 11:25,26 <<Amu tinipalikiki ntae lolo ooitarruoki ntae, naa kepaliki sii ntae ꞉Papa linchi le chumata. 15Kake tinimipalikiki ntae ltung'ana ng'ok enche, nemepaliki sii ntae ꞉Papa linchi nkuninchi.
Enata e nkutuk
16<<Naa tinienien nkutukie inchi, emiaku ana lolo ooitaakino oosub nkomomi, amu keidisie nkomomi payie edol ltung'ana aajo keteena nkutukie. Kedede kajoki ntae, etumo ninche laata enche ebore. 17Kake tinien nkutuk, iela nkue ino, nintuk nkomom, 18payie medol ltung'ana aajo iteena nkutuk, kake payie edol ꞉Papa lino otii ng'oji neing'opa, oyielo nenia naasai too ng'ojitin neing'opa, nikilaaki iyie.
Parakuoicho e chumata
(Luka 12:33–34)
19 #
Yak 5:2,3 <<Emichumaki ate parakuoicho to nkop nanyayie lasai o kutu, neidim sii lapurrok aatigil inie, nepurroo. 20Kake entipik parakuoicho inchi chumata, inie nemenyayie lasai o kutu, nemegil lapurrok aapurroo. 21Amu kore netii parakuoicho ino, naa inie etii ltau lino.
22<<Kore lkilang'ilang'et le sesen naa nkong'u. Naa teneisupat nkong'u ino, neboreii wong'an sesen lino pooki. 23Kake tanaa keitorno nkong'u ino, neboreii sesen lino pooki ꞉naimin. Amaa tanaa kera wong'an niata naimin, kewuaa sa inia aimin?
24<<Meatae loidim aisiaayia lkutuaa oare. Amu keibai likae nechamu likae, tanaa eibung'are likae nemenu likae. Mindimdim naa aaisiaayia Nkai o parakuoicho e nkop!
Emiirrana
25<<Kore tankaraki inia kaajoki ntae, emiirrana tee nkichoni inchi, aajo nyo inyanya tanaa nyo imatmat anaa sii nyo inchopchop. Amaa, mara kelang nkichon ndaa, nelang sesen nkichopo? 26Eng'ura ja nkueeny e ai, meunicho, nemedung'ucho nemebosoki sii ndaa lkompeii, kake keitoti Papa linchi le chumata. Mirara ntae le tipat aalang ninche? 27Naa amaa taa ntae, ng'ae eirrana oidim neponiki nkichui enye saa nabo? 28Aanyo sii payie iirranana tankaraki nkichopo? Eng'ura ntapuka e soro neiko tenebulu, nemenyok aasicho, nemepiyaicho.
29 #
1Lki 10:4–7; 2Ng'a 9:3–6 <<Kake kajoki ntae, eitu abaki eichopo Solomon te nkitoo enye pooki ainyinyikore nabo ee nana tapuka. 30Oi siake ntae oaata nkurukoto kini! Amaa, tanaa nejia eiko Nkai nkujit e soro, naatae ana parri, neikenyu nenang'akini nkima, mara keichop ninye ntae aitalang ninche? 31Emiirrana ntae aajo, <Nyo kinya?> anaa <Nyo kimat?> anaa <Nyo kinchop?> 32Amu kore nenia pooki, naa keirrana loreren lemeyielo Nkai aayiaya. Kake keyielo ꞉Papa linchi le chumata ajo, iyieu ntae nenia pooki. 33Naa entang'as enteyiai nkitoria enye o sotua oipida tenebo o Nkai, naa keponikini ntae nenia pooki. 34Naaku naa, emiirrana tankaraki teisiere, amu keata teisiere nenyena. Meata mparri nemeata nyamali enye.
Currently Selected:
Matayo 6: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
