Luka 14
14
Eisabaka Yeso nkaji e Lparisayoi
1Kore apa Sabato nabo payie elotu Yeso nkaji anya ndaa o lkitok obo loo Lparisayo, newueni Lparisayo aaleen ninye. 2Naa ketii apa tekue ninye ltung'ani oata moyian naitejia sesen. 3Neipar ꞉Yeso laing'eni loo nkitanapat o Lparisayo ajoki, <<Keichiaakino tee nkitanapat teneichiunyieki ltung'ana ta mparri e Sabato ana meichiaakino?>> 4Kake negira ninche. Kaa hae, neibung ninye, neichiunyie, neicho mechomo. 5#Mat 12:11Nejoki ninche, <<Ng'ae taa ntae aa kore payie edoki layieni lenye anaa nkiteng enye lare, nemeitai nabokata aipung'unyie ta mparri e Sabato?>> 6Kake nelau ninche wolet.
7Kore payie edol neiko lolo omon tenegelaki ate ng'ojitin e nkanyit, neliki nkitanyanyukoto ajoki, 8#Rach 25:6,7<<Kore tinikintoomon ꞉ltung'ani ta latim le nkiyema, miwuon to ng'oji e nkanyit metaa teneitoomonoki likae ltung'ani oyanyiti alang iyie, 9nemelotu ilo oitoomono ntae pukura nikijoki iyie, <Nchoo ele tung'ani mpaach>, nintoki alo to nkurna awuon tesiedi. 10Kake tinikintoomon ꞉ltung'ani chomo towuana tesiedi, metaa tenelotu ilo likintoomono nikijoki, <Lchore lai! Liepa chomo towuana te idie tekue.> Naa inia kata kianyiti iyie tekue lolo pooki likiboitiere te misa. 11#Mat 23:12; Luka 18:14Amu kore pooki ng'ae oiliepie koon naa keitodouni, naa kore loitodoyio koon naa keiliepieki.>> 12Nejoki ꞉Yeso ilo oitoomono ninye, <<Tinincho ltung'ana ndaa e siran tanaa neteipa, mimpotu sotuatin linono o lalachera linono o le ntipat ino o le latia ino oaara parakuo, payie meaku ikintoomon aitoki ninche iyie aalaaki inia nintaasa. 13Kake tininya iyie sukukuu, ntoomono loomena o lng'ojinia o lootigiligilete o lmodook, 14naaku ikimayiani iyie tankaraki mikindim ninche aatalak. Amu ikilaakini iyie ta nkata naitipiuni loosipat.>>
Nkitanyanyukoto e sukukuu kitok
(Matayo 22:1–10)
15Kore payie ening lobo loo lolo oowueni tenebo o ninye inia nejoki, <<Emayiana lolo oaanya kenya ndaa te nkitoria e Nkai.>> 16Nejoki ꞉Yeso ninye, <<Kore apa, neitai ltung'ani obo sukukuu kitok, neitoomon ltung'ana kumo. 17Kore payie eaku ng'amata e ndaa, nereu laisiaayiani lenye metiliki lolo ooitoomonoki ajoki, <Wootu, amu eidipe naa ntoki pooki.> 18Neng'asu ninche pooki alimu nkolati enche. Nejoki ninye ꞉lekue, <Kainyieng'ua lchampa taata, naa keyiere payie alo adol. Kaamon naa payie kipalaa machomo.> 19Nejo likae, <Kainyieng'ua lmong'i tomon laturuchere eena ma are are, naa kalo asaanaa ninche. Wou naa tapalayieeki machomo!> 20Neitoki sii likae ajoki, <Ng'ole ake ayemiche, naaku matumoki hooyia ayeu!> 21Nelotu ilo aisiaayiani neti lkitok lenye neliki lkilikuai. Negoro inia kata lopeny nkaji nejoki laisiaayiani lenye, <Mpung'o tesioi, chomo ntacho taa lbarbarani o nkoito e lkerenket, niriku laisinak o lng'ojinia o lmodook o lootigiligilete!> 22Nejo laisiaayiani, <Lkitok lai, kore naduo nikintanapa mataasa naa ketaase, newuon siake eatae mpaach.> 23Nejoki ꞉lkitok ilo laisiaayiani lenye, <Chomo nkoito naalala o mbat e lkerenket, ninyok ateku ltung'ana metijing'u nkaji ai ana meiputa. 24Amu kajoki ntae, meatae hooyia lobo too lolo duo ooitoomonoki oichamcham inia daa ai> >>.
Mbaa naagol naatum lolo oaaku loiteng'eni le Yeso
(Matayo 10:37–38)
25Kore eiriamari lturrurri kumo o Yeso, neiwuatuwuatakino ninche nejoki, 26#Mat 10:37<<Kore tenelotu ltung'ani natii, namaacham#14:26 Kore namaacham naa kejo Luka tele kereri Tinimimbai. Naa mara nkiba eipirita inia, kake keyieu Yeso nikipik ninye tekue ntoki pooki. nanu aitalang papa lenye o ng'otonye o nkitok enye o nkera enyena o lalachera o nkanachera enyena anaa nkichon enye, naa meaku loiteng'eni lai. 27#Mat 10:38, 16:24; Mrk 8:34; Luka 9:23Kore ilo pooki lemenap lmusalaba lenye, naairukurukore nanu, naa meidim ataa loiteng'eni lai. 28Amu ng'ae naa taa ntae, aa teneyieu nechet ltalet, lemewuon ang'as aikenicho, aing'uraa ntoki pooki naaidipie? 29Payie meaku naa, kore etuuno nkitamanyunoto, nelakino aidipa, nedol ltung'ana pooki neng'asu aarojare 30aajo, <Etang'asua ele tung'ani acheticho kake ketalakine aidipa.> 31Tanaa amaa, keatae lkinkii olo arare likae kinkii ta larrabal lemewuon ang'as tekue aiguana makoon, adol tanaa kore eata nkalupuni tomon, keidim sa nerasaki ilo oata nkalupuni tikitam tenelotu arare ninye? 32Kore payie edol ajo meidim atarare ninye, kore ake ewuon elakua nerewaki lkilikuai aipar mbaa naidim aayau melet. 33Naaku kore pooki ng'ae taa ntae lemeing'uaa pooki naata, naa meaku loiteng'eni lai.
Entaa ana makaat napi
(Matayo 5:13; Marko 9:50)
34<<Keisupat makaat, kake teneichunyie mpijan, nyo epiki payie epiju? 35Meisupat hoo abaki to nkop tanaa to ltulugumi. Kenang'ari aulo.
<<Kore loata nkiyiaa naaning'ichere, nchoo metining'o!>>
Currently Selected:
Luka 14: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
