Luka 10

Eipaayie ꞉Yeso looiteng'eni 72

1Kore tesiedi ana negelu Laitoriani lkulie ooiteng'eni 72, neipaaya ma are are meituruko aapuo lkerenketi pooki o ng'oji pooki nelo ninye. 2#Mat 9:37,38Nejoki ninche, <<Keikitok ndung'ore e lchampa, kake keikuni laasak le siaai, naaku entoomon Lopeny ndung'ore metereu laasak le siaai atua ndung'ore enye. 3#Mat 10:16Enchom taa amu, kareu ntae ana lkuoo lekerra taatua suyiani! 4Naa eminap mbene ee ropiyiani anaa lbene anaa namuka, nimirorokiki ltung'ani to nkoitiei. 5Kore nkaji pooki nijing'jing, entang'as entejo, <Metijing'a seriani ana aji!> 6Naa tenetii ltung'ani le seriani inie, newuenie seriani inchi ninye, naa tenemetii, nechukokino ntae seriani inchi. 7#1Lkor 9:14; 1Tim 5:18Entewueni te inia aji, ninyanya nimatmat ntoki naichori ntae, amu kore laasani le siaai naa keichiaakino payie elaki. Emipuo aarukurukoo nkajijik. 8Kore lkerenket pooki lijing'jing neitoomoni ntae, entam ntoki pooki naapiki tekue ntae. 9Enchiunyie ltamoyia pooki ootii inie, nijokiki, <Etinyikaka ntae nkitoria e Nkai.> 10#Asat 13:51Naa kore lkerenket pooki lijing'jing nemeitoomoni ntae, enchom atua nkoito enche nijoijo, 11#Mat 10:7–14; Mrk 6:8–11; Luka 9:3–5<Kore abaki nterit e lkerenket linchi naterepa nkejek ang ikipioki ntae. Kake enteyielo naa aajo etinyikua nkitoria e Nkai.> 12#Ng'as 19:24–28; Mat 11:24, Mat 10:15Kajoki ntae kore kenya inia parri e nkiguana, keikachieki Sodom aaitalang ilo kerenket.>>

Lkerenketi lemeata nkurukoto

(Matayo 11:20–24)

13 # Isa 23:1–18; Ese 26:1—28:26; Yoel 3:4–8; Amos 1:9,10; Sak 9:2–4 <<Oi sii ake iyie Korasin!

Oi sii ake iyie Betesaida!

<<Amu kore tanaa ketaasaki apa te Tiro o Sidon mbaa e nking'asia naataasaki taatua ntae, anata apa eibelekenyete ninche, neichop lkuniyiani, newueni too nkuron.#10:13 Kore apa te lwuenet loo Lyiaudi, keichop ninche kuna tokitin teneyieu neitodol ajo keisinanio anaa teneyieu neirriidu too ng'ok enche. 14Kake kore kenya ta mparri e nkiguana, naa keiteleleki nkiguana e Tiro o Sidon aaitalang ninchi. 15#Isa 14:13–15Amaa iyie Kapernaum, mara mikiliepieki aaitabaki chumata? Ikintodouni aaitodoki nemeneng'a.

16 # Mat 10:40; Mrk 9:37; Luka 9:48; Yoa 13:20 <<Kore ilo oning ntae, naa nanu ening. Naa kore loany ntae, naa nanu etanya. Naa kore laatanya nanu, naa etanya ilo laaterewua.>>

Nchukunoto ee lolo ooiteng'eni 72

17Kore lolo ooiteng'eni 72, nechukunyie te ng'ida nejo, <<Laitoriani, kening abaki iyioo lairiruani tinikikusakan aaing'ode ta nkarna ino.>> 18Nejoki ninche, <<Katoduaa Chitani esulunye ana nkiwuang'ata naing'uaa chumata. 19#SNk 91:13Naa enteyielo taa aajo, kaichoo ntae nkitoria nindachiechie lasuria o nkulupani o ngolon pooki e lmang'antita, nemeatae hoo ntoki naar ntae. 20Naa eming'ida tankaraki naning ntae lairiruani, kake enting'idata tankaraki keigero nkarn inchi te chumata.>>

Ng'ida e Yeso

(Matayo 11:25–27, 13:16–17)

21Kore te inia kata, neiput Yeso ꞉ng'ida e Ltau Sinyati nejo, <<Kaarrep iyie Papa, Laitoriani le chumata o nkop, amu isudorie kuna baa lkursaii o laing'eni, nimbalakinyie nkera kunini. Ee Papa, inia naa apake yieunoto ino!>> 22#Yoa 3:35, Yoa 10:15Kaaitarasaka Papa lai, ntoki pooki apik nkaina ino. Meatae hoo loyielo ajo ng'ae Nkerai mara Papa ake, nemeatae sii loyielo ajo ng'ae Papa mara Nkerai ake, o ilo oyieu ꞉Nkerai neibalakinyie.

23Neiwuatuwuatakino ꞉Yeso looiteng'eni lenyena nejoki too nkurrat, <<Emayiana nkonyek naadol nenia nidolitata ntae, 24amu kajoki ntae, keikumo loibonok le Nkai o Lkinkii ooyieu nedol kuna nidolitata ntae neitu edol, neyieu nening nining'itoto neitu ening.>>

Nkitanyanyukoto e Samariai supat

25 # Mat 22:35–40; Mrk 12:28–34 Nelotu laing'enii obo loo nkitanapat, neitache atem Yeso nejo, <<Laiteng'enani, amaa, aji aiko tanajung nkichon ee ntarasi?>> 26Nejoki ꞉Yeso, <<Aanyo naigero too nkitanapat? Aji inko iyie tinisom?>> 27#Nkit 6:5, Lal 19:18Newoliki ajoki, <<Tachama Laitoriani Nkai ino ta ltau lino pooki o te nkichui ino pooki o te ngolon ino pooki o te ng'eno ino pooki. Nicham sii le latia ino ana nicham koon.>> 28#Lal 18:5Nejoki ꞉Yeso, <<Itowolua aitibiraki, taasa inia, naa ibik ntarasi.>>

29Naa kore amu keyieu ninye neitodolu ajo kera ltung'ani loosipat, neipar Yeso ajoki, <<Ng'ae dei le latia ai?>> 30Newoliki ꞉Yeso ajoki, <<Etodowua apa ltung'ani obo eing'uaa Yerusalem alo Yeriko, netum ꞉ninye lapurrok, neoru nankan, neidong, nepuo aaing'uaa etaa keye. 31Nelotu laitainoni obo la lasar aimu inia oitiei, kore payie edol ilo tung'ana nerepaa aim tabata. 32Neitoki sii ltung'ani laa Lawi#10:32 Kore Lawi naa laretoni laa laitainok la lasar, nera sii lo lmarei le Lawi, kake mara lo ltim le Aron, naaku tankaraki inia mara ninye laitainoni la lasar. alotu inie ng'oji. Kore payie ebau nedol ilo tung'ani, neim tabata arepaa. 33#2Ng'a 28:15Kake kore Samariai obo olotito, nelotu neti ilo tung'ani. Kore payie edol, neing'erru oleng. 34Nelo neti ninye, neen ng'oldonyot enyena, neicho lmairo abukoki lata o naichuo e lmusabibu. Neitidir sikiria enye neya nkaji ee lomon, neapare teinie. 35Kore mparri naijipita inia, neitai dinarini#10:35 Kore dinari naa laata e mparri nabo. are neicho lopeny nkaji ee lomon nejoki, <Taapare ninye, kake tenerepaa lmairo linchoo nenia dinarini, nalak ntoki pooki tanachukunyie.> 36Amaa, alo too kulo okuni oitodolua ajo kera le latia tele tung'ani otumo lapurrok?>> 37Nejo, <<Ilo /oing'urrie ninye.>> Nejoki ꞉Yeso, <<Chomo naa taasa sii iyie nejia.>>

Eisabaka ꞉Yeso Marta o Maria

38 # Yoa 11:1 Kore epuoito ninche, nejing Yeso nkang nabo, neitoomon ꞉nkitok naji Marta ta nkaji enye. 39Neata apa nkanache naji Maria, natowuana tankalo nkejek e Laitoriani ainining nejoito. 40Kake kore Marta keirranita siaai kitok. Nelo neti Yeso nejoki, <<Laitoriani, midol ajo aatung'ayie nkanachai maisiayia lomon apeny? Tiaaki naa ninye maateret!>> 41Newoliki ꞉Laitoriani ajoki, <<Marta, Marta, iirrana nintanyamal koon too ntokitin kumo, 42kake mbae nabo ake eyieuni. Ketegelua Maria mbae supat, naa meoruni ninye.>>

Currently Selected:

Luka 10: saq

Highlight

Copy