Matiye 21

Iisa on̰aa geegar ka Zerizalem

(Elloŋ Mark 11.1-11, Lik 19.28-40, Yaaya 12.12-16)

1Gaa Iisa ma jobookeetee garribiɗe Zerizalem, sariptí darre ma goo Betpazee, ma aaye balti dambu ka olibiyeyyi. Gaa n̰aamiɗe seera min oko jobookeetee gu ommiɗo. 2Gaa beneyyiyyoo gaa: «Aɗoŋ oko darre taata ma aaye untine. Wikinne maa kuu sare ka pa, ku gasakkay ɗurkila onnenta o runtí sariptí. Kuu ipiroŋca, ku itirinnawgu. 3Gaa gimu innitoŋ pa, ku tiilinee kuu: “Miltini aŋkiy, gaa cappiyyo haŋka keeke aɗe gu yookiɗo.”»

4Keeke pa ase ku maa ga beneyti nabiinici asiɗo butulti. Gata pa beneyye gaa:

5«Beneyyaniyo oko giimi ku geegar ka Siyon kuu:

Elloŋ! Keeke aɗe ay sultantoŋ asaatoŋ

gata pa kooloppa ɗa ta kaw o ga kalappe ɗurkulli,

haa, kalappe deheesani, runtí ɗurkilati#21.5 Elloŋ Zakariya 9.9..»

6Guu jobookeetee ku seera koo kaatiɗe. Guu leeɗiya aleŋ maa ga Iisa beneyyiyoo. 7Guu asikkiti ɗurkila ma runtí. Guu zaggiyyoogu kaɗiŋgeeco ku taatta daare, gaa Iisa kalpiɗe. 8Guu giimi maani ta kaw ɗereɗɗeegu kaɗiŋgeeco daare butuuli o daare pa ɗemekka linƴaƴƴi ku etteyyo. Guu ɗereɗɗeegu butuuli#21.8 Oko aadanco Yawudigeyyo pa, gi ɗerro ta kaɗiŋgeyyo o ta linƴaƴƴo butuuli ay ku maa gu karmiyɗo taattuwee maa ga asaa.. 9Guu giimi ma tan̰aa unti o ma jobokka cayyakɗo goo:

«Ozanna#21.9 Ozanna ma beneyco Arameyennigeyyo goo ‘logaw ay oko Mellayi’. Beneyyi ka Arameyennigeyyo pa, gu beneyya wikinniti Iisa Masi., logaw ay oko Runti Dawud!

Baarikenta ay gata ma asaa ma semeetee Mella Miltine!

Ozanna, logokkineega Mella ma aaye uwwa ta kaw samaani#21.9 Elloŋ Soom 118.25-26.!»

10Maa ga Iisa un̰n̰iɗe Zerizalem, guu giimi ku geegarri paracco yaagiɗe min hawwane ta parhanti. Gaa were paratti gu enewɗo goo: «Gata ay we?» 11Guu giimi ku maani kotti ma jobokkiya Iisa telewɗiyo goo: «Gata ay nabiinice Iisa ma ay ka geegar ka Nazaret ma aaye kiɗa ta Galilee.»

Iisa aaye girti Mellayi

(Elloŋ Mark 11.15-19, Lik 19.45-48, Yaaya 2.13-16)

12Gaa Iisa deeɗe un̰n̰a doorane ta girti Mellayi. Gaa gassiɗiy iŋaa giimi ma saawagga. Gaa pittiɗiy paracco. Gaa baggiɗiy taabulnigeeco giimi ma magakka gurus ka kiɗaayee pay pay o lawco maa gu nowoɗɗe gu giimi ma saawagga hamam. 13Gaa Iisa beneyyiyyoo gaa: «Aattí Kitamniti, ga Mella beneyye gaa: “Girtu gu akkiya kolowwo goo ger maa gu giimi enewɗino. Gaa kuŋ soopa leeɗiya ger ka marŋo#21.13 Elloŋ Esaya 56.7 o Zeremi 7.11..”»

14Guu koor̰ee o mugulee sappiyyee oko Iisa katta iŋaa doorane ta girti Mellayi. Gaa rayyidiɗiy. 15Guu taattuweeco soƴoowee ku saɗikaŋgeyyo o aalimnigee ku Kitamniti Muusa boŋsiɗe maa gu elliɗiy gaartee ku ajjibiti kotti maa ga leelo o miici ma cayyakka aattí dooranti girti Mellayi goo: «Ozanna, logaw ay oko kii, Runti Dawud!» 16Guu taattuwee kotti pa inniyya Iisa goo: «Ki geewaca aɗe cayyikico miico teete e?» Gaa Iisa pa tiiliyyoo gaa: «Haa, na geewaca aɗe. Kitamniti Mellayi beneyye gee: “Ma beneeco miici ku rootta o ma waƴakka, ki hassile logaw oko kii, Mella#21.16 Elloŋ Soom 8.3..” Ku garkiyya ɗa aɗe beneyyi keeke e?»

17Gaa Iisa cappiyyoo iŋaa girti Mellayi, gaa oomiɗe min geegarri gaa kaatiɗe darre ta Beetani. Iŋaa pa ga wale.

Iisa bolaaca boo

(Elloŋ Mark 11.12-14,20-24)

18Gaa ma ta sokkonta ma sossoko ka, maa ga Iisa yokowɗo ta geegar ka Zerizalem, gii maya dewɗiya. 19Gaa elliɗe saripti butuuli boo. Gaa maa ga saritti katta, gaa gassiɗe pe soo tappi ka. Gaa beneyyitti oko booti gaa: «Ka akka wee ɗa payya ta kaw miici.» Gaa ma haŋka keeke aɗe gi boo taata aaƴiɗe kayam. 20Maa gu jobookeetee elliyya liyaw kaaka, guu ajjibiɗe ta kaw. Guu beneyyiɗe goo: «Me soo, ma haŋka keeke aɗe gi boo tee aaƴiɗe?» 21Gaa Iisa pa tiiliyyoo gaa: «Na beneyyatoŋca seene: Kuu amanne o kuu bamakkica ɗa seera seera ku gederra ku leeɗiya aleŋ maa na leeti oko boo teete, o ga aleŋ keeke ɗa ka, ƴiila kulla ku leewa. Kuu beneyyiyee oko dambu keeke kulla kuu: “Bitu min iŋee, kii deeɗo gala baharriti”, ga keeke deewa. 22Paratti maa ku enaa min oko Mellayi ma amanno ku gasakkaa.»

Gudiranti Iisa asaa min taŋaa?

(Elloŋ Mark 11.27-33, Lik 20.1-8)

23Gaa Iisa un̰n̰iɗe girti Mellayi ga garkayɗiy giimi. Guu taattuweeco soƴoowee ku saɗikaŋgeyyo o ajaawaŋgeeco Yawudigeyyo sappiyye katta wikinne maa ga garkayɗiy giimi. Guu inniyya goo: «Ay we ma berewwiyam botol ki garkayɗiy giimi, o ga ay we ma oyowwiyam ki lewɗiya keeke?» 24Gaa Iisa tiiliyyoo gaa: «Naa kulla lekkitoŋ inno kaƴi ka na innittoŋ: Kuu tiilinaw pa, naa beneyyitoŋ ka pe baŋ ga ma botol ŋawwa na lewɗiya keeke. 25Ay we ma n̰aamiya Yaaya ga batasayɗiy giimi? Ay Mella e, e gu giimi?» Guu waciɗe gu beneyɗo aacco goo: «Kee tiile ɗe kee ga ay Mella ma n̰akammiya, ga enaane payya gaa: “A ayme ku alɗee amanna ɗa oko beneyti Yaaya?” 26A kee tiilee pa kee: “Ay giimi ma n̰akammiya”, kaaka pa ke ɓayakka giimi ku maani asan gu giimi paracco bakammiki Yaaya nabiinice ma seene.» 27Ay ɗakko appe gu tiiliyyee oko Iisa goo: «Baana, ni ibina ɗa.» Gaa gata pa beneyyiyyoo gaa: «A naa kulla beneyyatoŋ ɗa baŋ ga ay we ma biryaw botol ku maa na lewɗiya liyaw keeke.»

Masal ta ɗibili ku seera

28Gaa Iisa beneyyiɗe payya gaa: «Oko mooyitoŋ ka kuu me oko beneyyi maa na aŋka na beneyyitoŋ keeke? Miiɗi kaƴi aɗe lekka ɗibili seera. Gaa deeɗiya gassa ka tatta. Gaa beneyyiyyee gaa: “Addo meente ki deeɗine lubba gaantine.” 29Gaa gata pa tiiliyyee gaa: “Na aŋka ɗa kaato.” Gaa sulaayi pa, ga ledemmiɗe oko beneyti kaaka, gaa kaatiɗe. 30Gaa tacco deeɗiya gassa ka rootta. Gaa beneyyiyyee aleŋ tanti oko ka tatta kee aɗe. Gata kaaka pa tiiliyee oko tacco gaa: “Baaba, na kataa”, gaa alɗe kaata ɗa soo. 31A min oko ɗibili ku seera kooko ay ŋawwa ma leelo latta maa ga tatti aŋka?» Guu taattuweeco soƴoowee ku saɗikaŋgeyyo o ajaawaŋgeeco Yawudigeyyo tiiliyyee goo: «Ay ka tatta.» Gaa Iisa gaayiɗe payya gaa: «Na beneyyatoŋca seene, sokookee ku miiri o azabaŋgee omokkatoŋ un̰n̰ití mulunniti Mellayi. 32A gata pa, Yaaya ma batasayya giimi asitoŋ ku maa ga gaarittoŋga botol ka nunto ta ɗayaŋ unti Mellayi, kuu alɗiyee amanna ɗa oko beneyti. A sokookee ku miiri o azabaŋgee soopa amanɗe, o ga ma kaaka aɗe, maa ku elliɗiy kadar gu meeliy gaarco ku miɗɗa, ga kuŋ pa ledemmiyoo ɗa oko gaartoŋ ku miɗɗa ma aaye galbigeetoŋ maa ku amanniyee oko beneyti Yaaya.»

Masal ta lubaakee ku jineeniti

(Elloŋ Mark 12.1-12, Lik 20.9-19)

33Gaa Iisa beneyɗiyo missa gaa: «Giyyoŋ payya masal kaƴi. Lekka milti ger kaƴi aɗe ma lekka jineene. Gaa tumɗe ettee ma tarakka ma saabayye mor̰mor̰oskee, gaa tirpicca. Gaa leeɗe ɗoogin̰a yaata ta miƴƴiti ronco ettee kotti. Gaa geewiɗe ger siƴƴa oko taraakeyyo. Gaa onniɗe beneyyi ma lubaakee maa gu lubbicca jineeniti, gaa gata pa kulla gu deeɗeeca berewwo ka pe hagganti. Gaa turguwɗe paaɗe. 34Maa ga wikinne ka jaawico ronco etteyyo asiɗe, gaa milti jineeniti n̰aamiɗe lubaakeetee wikirco oko koo maa gu onoɗɗiya beneyco maa gu deeɗeeca bira hagganti. 35Guu lubaakee ku jineeniti kotti soopa bammiɗiy lubaakeetee maa ga n̰aame. Ka kaƴi ɗe gu tammiya, ka kaƴi pa gu deyya o ka kaƴi kulla gu dawwiya ma dambee gu deeɗiya. 36Gaa milti jineeniti n̰aamiɗe payya lubaakee daare maani ƴiila min ku omma. Guu lubaakee ku jineeniti leeɗiyoo aleŋ ku omma koo aɗe. 37Gaa dessiti pa, ga milti jineeniti n̰aamiyooga saa pe runti asan ga moyaa gaa: “Runtu soopa gu karmayya paaɗe.” 38Maa gu lubaakee ku jineeniti elliyya runti gaa asaa, guu beneyyiɗe aacco goo: “Ay keeke appe maa ga artane akkee mara. Asineega dee, gaa artane ka jineeniti marinne.” 39Guu baamiyya runti kaaka. Guu cimmiyya renta min jineeniti, guu deeɗiya.»

40Gaa Iisa inniɗiy taattuwee kotti gaa: «Gaa milti jineeniti ase yooka, ga leeway pe gaa me lubaakee ku jineeniti?» 41Guu guta pa tiiliyyee goo: «Akkiy dee bala ello ta saamuwco lubaakee kotti ma gidaani ɗa ta kaw. Gaa onniɗo beneyyi ma lubaakee daare. Guta kotti pa deeɗeeca berewwo hagganti ta ronco etteyyo kulla wikinne aɗe ka jaawico.» 42Gaa Iisa beneyyiyyoo gaa: «Kitamniti Mellayi beneyye gee:

“Dambu maa gu gekeewee uwwe maaƴi,

ay gata appe ma deero dambu ka samaane kee ka diiliti geewiti giiri.

Ay Mella Miltine aɗe ma leyya keeke,

o ga ay latta ka ajjibiti maa gu iɗiitine elle#21.42 Elloŋ Soom 118.22-23.!”

Ku garkiyya ɗa aɗe beneyyi keeke e?

43«Ay ɗakko appe na beneyɗitoŋ naa ga Mella akkica icca mulunniti min oko kuŋ, gaa biriyyooca oko giimi daare. Guta kotti pa akkiya jobba ka Mellayi. 44Gimu ma akka gala oko dambu kaaka pa ɗemekka ta kamac kamac o maa ga dambu kaaka galee reden̰n̰a.» 45Maa gu taattuweeco soƴoowee ku saɗikaŋgeyyo ma Pariziyennigee giyyiɗiy masalnigee kooko, guu leeɗe kabarre kadar ga Iisa baarayye guta aɗe. 46Guu deyeɗɗo pe botol ku maa gu baamiyya. Guu ɓayaɗɗo soopa giimi ku maani asan gu giimi paracco bakammiki Iisa nabiinice.

Currently Selected:

Matiye 21: mmy

Highlight

Copy