Matiye 20

Masal ta milti gaani ma lubaakeetee

1Gaa Iisa beneyɗo missa gaa: «Mulunniti Mellayi saabayye aleŋ milti gaani ma arme ma sossoko ka ku maa ga diyyiɗo giimi ma lobokkee gaanti. 2Maa ga gassiɗiy pa, guu boodiɗe ma haggane oko meene ta lubbi, gaa n̰aamiɗiy gaanti. 3Gaa dahaaniti ga oomiɗe payya, gaa elliɗe lubaakee daare guu aaye saripti sunniti goŋŋa ka bala lubbi. 4Gaa beneyyiyyoo gaa: “Kuŋ kulla aɗoŋ lubba gaantu. Na pilkitoŋca haggantoŋ ma butulti.” 5Guu kaatiɗe. Gaa oomiɗe payya gidaaniŋgee ku gaayilti gaa n̰aamiɗe kulla daare lubbi gaanti o usurti, gaa leeɗe aleŋ tee aɗe. 6Gaa ma gidaane ka galawtí paatti ga gassiɗe payya lubaakee daare guu aaye payya iŋaa, gaa inniɗiy gaa: “Ayme ku alɗo iŋee min sossoko ya pootimooko bala lubbi?” 7Guu guta pa tiiliyyee goo: “Lekka ɗa gimu ma kollinii lubbi.” Gaa gata pa beneyyiyyoo gaa: “Aɗoŋ ga kuŋ kulla ku deeɗo lubba gaantu.”

8«Maa gi paato galɗe, gaa milti gaani beneyyiyyee oko gimu maa ga berewweega gurus ka pilkiti gaa: “Kolliy lubaakee kii pilkiyyooca hagganco, o ki diilu pilko ma lubaakee ma aseero sulaayi, kii dessiɗo ma koo ma aseero omma.” 9Guu lubaakee ku galawtí paatti asiɗe. Gaa kulla kee aɗe gu pilkiyyee gurus ka meenti. 10Guu lubaakee ku diiliti asiɗe. Guta pa oko mooyico ka goo walaŋ gu pelekkayo maani ƴiila. Innasoopa ga oko guta kulla ga pilkiyee oko kulla kaƴi aɗe gurus ka meenti. 11Maa gu gassiyya gurusco kaaka, guu ŋor̰omr̰omɗo, guu beneyyiyyee oko milti gaani goo: 12“Lubaakee ku galawtí paatti kooko lubbe saha kaƴi ka, kii peleɗɗiyo sawa ma nii ma lubbeero min sossoko namma ya pootimooko ma gazaan̰i ka paatti.” 13Gaa milti gaani tiiliyyee oko kaƴi min aacco gaa: “Lanjo, na leewiyam ɗa ka miɗɗa, maa ke bodee aɗe ma gurus ka meenti? 14Kaaka pa ki icciyya guruscum kii kaatiɗo. Gii deyyaw daanaw na biriyyoo oko giimi ma lubbe sulaayi sawa ka ma kii, maa gi saawantu. 15Ma gurustu na lekka ɗa aɗe botol maa na leeɗo maa na aŋka e, e gi galbancum namta maa na alɗo gidaani?”» 16Gaa Iisa beneyyiɗe payya gaa: «Ay goŋŋa appe gu giimi ku sulaayi asiɗo dee ku omma o ku omma asiɗo dee ku sulaayi.»

Taasiti Iisa ta subbatiŋ ma ka muutti o naɗawti

(Elloŋ Mark 10.32-34, Lik 18.31-34)

17Gaa Iisa ma jobookeetee katawɗo geegar ka Zerizalem, gaa tirriyɗiy ku orro o seera kayco ka. Gaa beneyɗiyo butuuli o gu kataa, gaa: 18«Giyyoŋ ƴa! Haŋka ke kataa Zerizalem, iŋaa pa, ga Runti Gimi gu deeɗiya bira picco taattuweeco soƴoowee ku saɗikaŋgeyyo ma gicco aalimnigee ku Kitamniti Muusa gu baamiyya. Guta kotti pa deeɗee caaɗa parlane ma ka muuti. 19Guu biriyyooga oko giimi ma ay Yawudigee ɗa, guu noƴƴiyyee gaari, guu r̰occiyya, guu paapiyya kuruwayi. Gaa oko meene ma daa ta subba pa ga naɗiɗo min muuti.»

Innití yaaco rontee Zebedee

(Elloŋ Mark 10.35-45, Lik 22.25-27)

20Maa ga gaamiyya beneyti ka muutti o ka naɗawti kaaka, gii daatti Zebedee ma ronti ku seera#20.20 Ronti ku seera pa ay Zak ma sinti kee Yaaya. asiyyee saripti Iisa. Gii darsiɗe unti ku maa ga oyyitiiga maa gi enaa. 21Gaa Iisa innicca gaa: «Ka aŋka na leeɗite ini me?» Gii gita pa tiiliyyee gee: «Beneyyaw min haŋka kadar ga wikinne maa kii asica gassa mulunnicum, ki oyaayo oko rontaw ku seera kooko, ga ka kaƴi ƴa ki duwiya tiyaawacum o ka kaƴi pa n̰ugilacum.» 22Gaa Iisa pa tiiliyyoo oko ronti gaa: «Ku ibinya ɗa latta maa ku enaa. Ku gederra aɗɗe ku aar̰icca kuraakatu ta diiganti maa na akka aar̰a?» Guu guta pa tiiliyyee goo: «Haa, nii gederra ni aar̰icca.» 23Gaa Iisa beneyyiyyoo gaa: «Haa, ku akkica aar̰a kuraakatu ta diiganti. A nunto ta tiyaawatu o ta n̰ugilatu pa, ay naa ɗa ma aparray. Ay Tattu ma hassalliyoogu wereeriyee kotti oko giimi maa ga aparre.»

24Maa gu jobookeetee ku orro giyyiyya beneyco kaaka, guu boŋsiyyoo oko seneeta ku seera kotti. 25Gaa Iisa kolliɗiy paracco saripti, gaa beneyyiyyoo gaa: «Ku lekka kabarre kadar ga dunuuniti gu salaataŋgee ku kiɗaayeyyo hekemeyyiy ma ka gazanta gimco, o taattuwee garaaca gudiranco oko gimco maa gu hekemeyye. 26Beenannitoŋ soopa gi aɗaatoŋ dee ɗa goŋŋa. Innasoo, gaa gimu kaƴi min aattoŋ aŋka ga deeɗo tatta ƴiila, ga dee lubaakatoŋ. 27A gaa kaƴi min aattoŋ aŋka ga deeɗo ka omma, ga dee lawwitoŋ. 28Ay goŋŋa appe ga Runti Gimi saa kulla alɗe asaa ɗa ku maa gu giimi asiyyee lubba. Innasoopa ga asee ku maa ga asiyyo lubba oko giimo o ga biricca hayaatanti aleŋ haggane oko najjiyco giimi maani.»

Koor̰ee ku seera ku geegar ka Zerikko

(Elloŋ Mark 10.46-52, Lik 18.35-43)

29Gaa Iisa ma jobookeetee sarɗe geegar ka Zerikko. Maa gu okomɗo, guu giimi maani joboɗɗiya. 30Guu lekkiɗo koor̰ee seera ma nowotte biiti butuuli. Maa gu giyyiɗe kadar ga ay Iisa ma ƴelaa ma iŋaa, guu diiliɗe gu cayyakɗo goo: «Miltini, Runti Dawud, ellu ɗe saamuwtini!» 31Guu giimi ku maani kotti makaɗɗiyo goo: «Ƴaapoŋ!» Guta soopa cayyakka saa pe ma raɗɗa ƴiila goo: «Miltini, Runti Dawud, ellu ɗe saamuwtini!» 32Gaa Iisa warriɗe. Gaa kolliɗiy, gaa inniɗiy gaa: «Ku aŋka na leeɗitoŋ ini me?» 33Guu guta pa tiiliyyee goo: «Miltini, iyyaniigu iɗiitini!» 34Gaa Iisa elliɗe saamuwco ta kaw. Gaa eesiyyoogu iɗiico. Gaa ma haŋka keeke aɗe, gu koor̰ee elliɗe ta kar̰aŋ. Guu jobbiyya.

Currently Selected:

Matiye 20: mmy

Highlight

Copy