Matiye 19

Iisa beneyya ma gaari ku cappiti daato

(Elloŋ Mark 10.1-12, Lik 16.18)

1Maa ga Iisa gaamiɗiy beneyyiŋgeetee kotti, gaa ƴiiliɗe min kiɗa ta Galilee. Gaa kaatiɗe kiɗa ta Yudee ma aaye ta nussanti katik oko ƴiiro ta Yurden ma sorotta diiman. 2Guu giimi maani maani joboɗɗiya. Gaa iŋaa ga rayyidiɗiy giimi ma parayya.

3Guu lekkiɗo Pariziyennigee daare ma asiyee saripti ku maa gu cokkiyya. Guu inniyya goo: «Hukumnigeetine oyowwine aɗɗe ga gimu cappitti oko daatti ma kulla oorane ka maa ga gassiti?» 4-5Gaa Iisa pa tiiliyyoo gaa: «Kitamniti Mellayi gee: “Min diilití dunuuniti ga Mella kilgiyiy giimi, miiɗi o daate#19.4-5 Elloŋ Diilo ta Lawwi Paracco 1.27..” Gaa Mella beneyyiɗe payya gaa: “Ay ɗakko appe ga miiɗi asiɗo ooma min girco tatti ma yaati, gaa deeɗo nunta ma daatti. Gaa serco appe gu deeɗo pe zii kaƴi ka#19.4-5 Elloŋ Diilo ta Lawwi Paracco 2.24..” Ku garkiyiy ɗa aɗe beneyyiŋgee ku Kitamniti kooko e? 6Ay goŋŋa appe gu alɗo ɗa payya seera, guta deero pe zii kaƴi ka. Ga gimu pa ayya ipira ɗa maa ga Mella onokke.» 7Guu guta pa beneyyiyyee payya goo: «A gaa goŋŋa, ayme ga Muusa gaa gaa miiɗi capakkati oko daatti, ga kitipiyati katkat ta cappiti, gaa cappitti?» 8Gaa Iisa tiiliyyoo gaa: «Muusa oyowwitoŋca jagaw asan gu kayyeetoŋ talta. Goneka kee min diilití dunuuniti pa ga ay goŋŋa ɗa. 9A oko keeke pa, na beneyyatoŋ: Gaa miiɗi cappiti oko daatti o gi esekke ɗa miiɗi, gaa icciɗe kaƴi, ga gata kaaka un̰n̰e daatti.»

10Guu jobookeetee beneyyiyyee goo: «A gii ay taata appe ay nuntiti miiɗi ma daatti, gi samaane ƴiila ga miiɗi alɗo icca ɗa daate.» 11Gaa Iisa pa tiiliyyoo gaa: «Ay miɗi paracco ɗa ma gederra gu oyyiyya beneytoŋ ka icciti ɗa keeke, illa ay daare ka maa ga Mella berewwiyoo. 12A guta pa, lekka miɗi ma daa ɗa miɗi min wiyawco saa, daare pa ay giimi ka doolowwiy o daare pa ay guta saa aŋke gu nuntiɗo aleŋ giimi ma deewa ɗa miɗi saanane ka mulunniti Mellayi. Maa gaa gederra ga oyyicca giraane teete ga oyyica.»

Iisa jobay miici ku rootta

(Elloŋ Mark 10.13-16, Lik 18.15-17)

13Gaa wikinne paalta omma, gu giimi daare aɗe itiriyyee miici oko Iisa goo ga gagaayoogu pittee kayyeeco ga inniyyo Mella. Guu jobookeetee pa makaɗɗiyo oko gayyeeco. 14Gaa beneyyiyyoo gaa: «Duwaaniyo oko miico gu asiyyaw. Aɗaaniyo toɗɗa ɗa asan gi mulunniti Mellayi ay oko giimi ma ay aleŋ guta.» 15Gaa Iisa gagiyyoogu pittee kayyeeco oko miico ku maa ga baarikiɗiy. Gaa ƴiiliɗe min iŋaa.

Iisa o ɗibilu ma ay ayaawa

(Elloŋ Mark 10.17-31, Lik 18.18-30)

16Lekka ɗibilu kaƴi aɗe ma asiyee oko Iisa. Gaa inniyya gaa: «Garaawa, na lee ini me ka samaane ku maa na gassicca hayaatane ma gakamma ɗa ta kaw?» 17Gaa Iisa pa tiiliyyee gaa: «Ayme ki enewɗino ma ka samaane? Kaƴi ka ma leewa ka samaane, gata pa ay Mella kayti ka. Kii aŋka ki gassicca hayaatane ma gakamma ɗa ta kaw, ki jobbiy hukumnigee.» 18Gaa gimu kaaka inniɗe payya gaa: «Hukumnigee ay ŋawwa maa na jobbu?» Gaa Iisa pa tiiliyyee gaa: «“Addo dee ɗa gimu ma aaniyo, o ga kii miiɗi addo un̰n̰a ɗa oko daatti giicum o ga kaŋ daate pa kulla ka addo issa ɗa mitti gatte, o ki addo maasa ɗa. Arki arɗa ɗa giicum ma borooli. 19Cipiliy semeetee taccum o ku yaacum” o “ki ƴekkiya giicum aleŋ maa ki ƴekkiyya ziicum#19.19 Elloŋ Oomiti min Masir 20.12-16 o Ɗillico Hukumnigeyyo 5.16-20 o Soƴoowee ku Saɗikaŋgeyyo 19.18..”» 20Gaa ɗibilu kaaka beneyyiyyee oko Iisa gaa: «Na jobokkiy paaɗe hukumnigee kooko paracco. Ay me payya ma koyowwiyaw unti Mellayi?» 21Gaa Iisa tiiliyyee gaa: «Kii aŋka ki deeɗo gimu maa ga lekka ɗa ya maatiki ma koyowwiyee, ki addo ki deeɗiko giɗa lawcam paracco, kii biriyyooga gurus kaaka oko giimi ku saamo. Goŋŋa ga Mella beram ayaawi gonek samaani. Kii yookiɗo ki asinno jobba.» 22Maa ga ɗibilu giyyiyya beneyti Iisa kaaka, gaa yookiɗe ma zorontiyti asan ga ay ayaawa ta tirta.

23Gaa Iisa beneyyiyyoo oko jobookeetee gaa: «Na beneyyatoŋca seene, ayaawa gi raɗɗee ta tirta ga un̰n̰iɗo mulunniti Mellayi. 24Na gayaatoŋ payya: Oko lukumi gi raɗɗee ta tirta ga ɗaamiɗo ma buuliti ƴibirri. Oko ayaawayi soopa gi raɗɗe payya ƴiila ga un̰n̰iɗo mulunniti Mellayi.» 25Maa gu jobookeetee Iisa giyyiɗiy beneyyiŋgeetee kotti, guu ajjibiɗe ta tirta. Guu beneyyiɗe goo: «A gaa goŋŋa ga ay we pe ma gederra ga deeɗo najjiyenta?» 26Gaa Iisa elelɗiy ƴoy. Gaa beneyyiyyoo gaa: «Giimi gederree ɗa ta kaw oko keeke, Mella soopa gederree oko latta paratti.»

27Gaa Piyer beneyyiyyee oko Iisa gaa: «A nii keeke ma cappiyoo oko lawtini paracco nii jobbiɗum, ay ini me pe ma akkini dee?» 28Gaa Iisa tiiliyyoo gaa: «Na beneyyatoŋca seene, oko dunuune ta marawta, ga Runti Gimi akka nunta wikirti ka mulunniti ma garaa darjanti. Kuŋ ma jobbinoo pa, akka nunta ga kuŋ kulla wereeriyee ku mulunniti orro o seera. Kuu asiɗiy hikimiya balleeco giimi ku Isirayel ku orro o seera. 29Kulla gimu aɗe ma capakkayo oko gerratee, oko seneetee ku miɗitta o ku daatta, o oko tatti o oko yaati, o oko rontee o oko gannatee saanantu oko naa, akka gassa miyatiŋ ƴiila o ga gasakka hayaatane ma gakamma ɗa ta kaw. 30Maani min oko giimi ku haŋka kooko ma ay ku omma akka dee ku sulaayi o ku sulaayi akka dee ku omma.»

Currently Selected:

Matiye 19: mmy

Highlight

Copy