Lik 3

Beneyyiŋgeetee Yaaya ma batasayya giimi

(Elloŋ Matiye 3.1-12, Mark 1.1-8, Yaaya 1.19-28)

1-2Wikinne maa ga Yaaya runti Zakariya alɗo goosigeyyo, ga Mella gaareegu beneyyiŋgee. Oko wikinne kaaka pa, ga tattuwe ka tatta ka Rooma maa gu kolaa goo Tiber lekka paaɗe ƴilaakee orro o beeƴa mulunniti. Pons Pilat pa, ay guberner ka kiɗa ta Yudee o Erod#3.1-2 Erod keeke pa ay maa gu kolaa goo Erod Antipas, runti Erod ka Tatta. pa hekemeyyica kiɗa ta Galilee. Sinti kee Pilip pa hekemeyyica kiɗa ta Ituree o ta Tirakonit. Lisaniyas pa hekemeyyica kiɗa ta Abilen. Aan o Kayip#3.1-2 Elloŋ Yaaya 18.13 o Lubaakico N̰amaakeetee Iisa Masi 4.6. pa ay taattuweeco soƴoowee ku saɗikaŋgeyyo oko Mellayi. 3Mileŋ ga Mella gaareega beneyti pa, ga Yaaya wace ga amalɗo kiɗaayee paracco ku saripti ƴiiro ta Yurden ma sorotta diiman. Gaa tasawɗiyo oko giimo gaa: «Meeloŋgu gaartoŋ ku miɗɗa, naa batisiyittoŋ ku maa ga Mella saamiyittoŋgu zunubgeetoŋ.»

4Ma keeke pa ga asaa ga beneyti nabiinice Esaya maa ga ketepeyye min tippa Kitamniti Mellayi gaa:

«Gimu kaƴi beneyya ma raɗɗa kayni gaa:

“Panoŋga botol oko Miltine!

Leeneegu bottolli gu deeɗo cur!

5Sayyoŋgu zubbawwi paracco,

riziloŋgu dambabbi o jappappi paracco.

Bottolli ku kossenta gu dee cur,

cimmoŋgu lawwi ma baɗakka gu bottolli deeɗo samaane.

6Guu giimi paracco asiyya ella gimu maa ga Mella n̰aame, ga asiɗiy najjiya#3.6 Elloŋ Esaya 40.3-5..”»

7Guu giimi maani asawɗe oko Yaaya ku maa ga batisiyɗiy. Gaa beneyɗiyo gaa: «Kuŋ ma ay ronco koykokko! Ay we ma gaaritoŋ paawo min bogorti Mellayi ma akka asa wikinne ka parlanti? 8Deyyoŋ aleŋ ettee ma weewa miici ku daana. Leewoŋ gaari ku samaane ma gaara kadar ku meeliy ma seene gaartoŋ ku miɗɗa. Aɗoŋ lee ɗa kuu gi arakke paaɗe maa ku alɗo ronco rontee Biraayim. Naa beneyyatoŋ kadar ga Mella gederra ga leeɗiy dambee kooko gu deeɗo ronco rontee Biraayim. 9Elloŋ ƴa, boola ka daɗɗiti carco etteyyo aaye appe. Kulla ettu aɗe ma weewa ɗa miici ku daana gu daɗakkaa gu uwwiyya okkati.»

10Guu giimi maani enewɗiya Yaaya goo: «A gaa goŋŋa, ni lee pe nii me?» 11Gaa gata pa tiiliyyoo gaa: «Ma lekka kaɗiŋgee seera, ga bire kaƴi oko giiti ma lekka ɗa, o ma lekka tiyaw ga ɗeddayo oko gittee ma lekka ɗa.»

12Guu sokookee ku miiri asiɗe kulla ku maa ga Yaaya asiɗiy batisiya. Guu inniyya goo: «A nii pa, garaawa, ni lee pe nii me?» 13Gaa tiiliyyoo gaa: «Aɗoŋ ecekka ɗa ƴiila, min oko maa ga tattuwtoŋ ketepeyyitoŋ.»

14Guu asaakargee kulla inniyya goo: «A nii pa kulla, nii lee pe nii me?» Gaa tiiliyyoo gaa: «Aɗoŋ ecekka ɗa gurus min oko giimo ma guu e baŋ pa ma ɗammo. Parhinoŋ soo ma ka koyyeetoŋ maa ku gasakka.»

15Giimi paracco pa ocokkiya Masi, gata maa ga Mella aparre, guu beneyɗo paracco ma galbigeeco ka goo walaŋ ga Yaaya ay gata appe. 16Gaa oko mooyico taata pa, ga Yaaya tiiliyyoo gaa: «Naa, batasayyatoŋ ma ammi. Innasoo, ga kaƴi ma tatta ƴiila min oko naa akka asa. Naata pa, arakke ɗa gu seppee ku n̰urtee na ipiriyyeegu min asintee. Gata kaaka pa akkitoŋ batisiya ma Ruuhanti Mellayi o ma okko. 17Gata pa bakamme pitti asiyaane ka booyiti, ku maa ga jagiɗiy korƴo ma susuma. Maa ga gaamiɗe booyo pa, gaa sawwiyya putuuriti. Gaa timmiɗiy korƴo urditi. Susuma pa, ga akkica oosa ma okko ma batakka ɗa ta kaw.»

18Gaa Yaaya wassiyɗiy ma beneyyiŋgee daare maani payya maa ga tasawɗiyooca kabarre ta daana. 19Gaa makkiyyee soopa oko guberner kee Erod asan ga iccica Erodiyad daatti sinti kee Pilip ma aaye ma hayaatanti, o ga makkiyee kulla asan ga Erod leelo gaari daare maani. 20A mileŋ ga Yaaya makkiyee pa, ga Erod leelo payya latta kaƴi ka miɗɗa. Gata pa, ay baamiti Yaaya daŋayi.

Yaaya batasayyaa Iisa

(Elloŋ Matiye 3.13-17, Mark 1.9-11)

21Maa ga Yaaya batisiyɗiy giimi paracco ma aaye iŋaa, gaa batisiyiyya kulla Iisa. Gaa Iisa diiliɗe ga enewɗiya Mella, gaa oko wikinne kaaka saa, ga samaane iyyiɗe. 22Gii Ruuhanti Mellayi beeriyyee ma sabaaniti hamamti. Gii ur̰e beneyyiɗe min samaani gee: «Kii ay Runtu. Na ƴekkam ta kaw, o parhantu parattí aaye oko kii#3.22 Elloŋ Soom 2.7 o Esaya 42.1..»

Kookuweetee Iisa

(Elloŋ Matiye 1.1-17)

23Wikinne kaaka pa, ga Iisa lekka paaɗe latta ka orooruwee subba ƴila, gaa diiliyya lubbiti ka beneyti Mellayi. Giimi pa, goo walaŋ ga runti Yuusup. Yuusup pa ay runti Eli. 24Eli pa ay runti Mattat, Mattat pa ay runti Leebi, Leebi pa ay runti Melki, Melki pa ay runti Yannay, Yannay pa ay runti Yuusup. 25Yuusup pa ay runti Mattatiyas, Mattatiyas pa ay runti Amos, Amos pa ay runti Nawuum, Nawuum pa ay runti Esli, Esli pa ay runti Naggay. 26Naggay pa ay runti Maat, Maat pa ay runti Mattatiyas, Mattatiyas pa ay runti Semeyin, Semeyin pa ay runti Yosek, Yosek pa ay runti Yoda. 27Yoda pa ay runti Yowanan, Yowanan pa ay runti Reza, Reza pa ay runti Zorobabel, Zorobabel pa ay runti Salatiyel, Salatiyel pa ay runti Neeri. 28Neeri pa ay runti Melki, Melki pa ay runti Addi, Addi pa ay runti Kosam, Kosam pa ay runti Elmadam, Elmadam pa ay runti Eer. 29Eer pa ay runti Yasu, Yasu pa ay runti Eliyezer, Eliyezer pa ay runti Yorim, Yorim pa ay runti Mattat, Mattat pa ay runti Leebi. 30Leebi pa ay runti Simeyon, Simeyon pa ay runti Yudaa, Yudaa pa ay runti Yuusup, Yuusup pa ay runti Yonam, Yonam pa ay runti Eliyakim. 31Eliyakim pa ay runti Meleya, Meleya pa ay runti Menna, Menna pa ay runti Mattata, Mattata pa ay runti Natan, Natan pa ay runti Dawud. 32Dawud pa ay runti Zesee, Zesee pa ay runti Obed, Obed pa ay runti Booz, Booz pa ay runti Sala, Sala pa ay runti Naason. 33Naason pa ay runti Aminadab, Aminadab pa ay runti Adimin, Adimin pa ay runti Arni, Arni pa ay runti Eserom, Eserom pa ay runti Peres, Peres pa ay runti Yudaa. 34Yudaa pa ay runti Yakub, Yakub pa ay runti Isaaka, Isaaka pa ay runti Biraayim, Biraayim pa ay runti Teera, Teera pa ay runti Nawor. 35Nawor pa ay runti Seruk, Seruk pa ay runti Reyu, Reyu pa ay runti Pelek, Pelek pa ay runti Eber, Eber pa ay runti Seela. 36Seela pa ay runti Kayinam, Kayinam pa ay runti Arpasad, Arpasad pa ay runti Seem, Seem pa ay runti Nowe, Nowe pa ay runti Lemek. 37Lemek pa ay runti Metusalem, Metusalem pa ay runti Enok, Enok pa ay runti Yered, Yered pa ay runti Malaleyel, Malaleyel pa ay runti Kenan. 38Kenan pa ay runti Enos, Enos pa ay runti Set, Set pa ay runti Adam. Adam pa ay runti Mellayi.

Currently Selected:

Lik 3: mmy

Highlight

Copy