Lubaakico N̰amaakeetee Iisa Masi 5

Ananiyas ma daatti tee Sapira

1Gaa lekkiɗo miiɗi kaƴi aɗe maa gu semeetee goo Ananiyas ma daatti tee Sapira. Guta kotti pa boode gu giɗikkiki gaanco. 2Gaa gurusco daare ga kiiliyya, ma mare pa ga deyyooga bira oko n̰amaakeetee Iisa. Gaari kooko pa, gi daatti oyowwikoo. 3Gaa Piyer beneyyiyyee gaa: «Ananiyas, ayme ki duwiyyee oko Seetanni ga un̰n̰iɗe galbancum? Ki borollitti oko Ruuhanti Mellayi, ki kiiliyya gurus ka daare ka gaan maa ku giɗiki. 4Gaan kaaka maa ki alɗiki geɗekka ɗa, ma ga ay kancum aɗe. A maa ki giɗikkiki pa kulla, maa ga gurus ay kancum aɗe. Ayme ga latta aleŋ keeke asiyyam galbancum? Borolcum keeke ay oko giimo ɗa ka, ay oko Mellayi saa ki borolle.»

5Maa ga Ananiyas giyiyya beneyyi keeke, gaa caaɗiɗe ga galɗe karap ga maatiɗe. Guu giimi paracco ma giyyica kabarre taata, ɓayɗe ta tirta teete. 6Guu ɗibili kappiniyya, guu kaatikkiki gu deeɗiya tina.

7Gaa maa gu nuntiɗe latta ka sahaŋgee subba, gii daatti asiɗe wikirco n̰amaakeetee Iisa. Innasoopa gi lekkiyo ɗa kabarre oko gaari kooko ma deero. 8Gaa Piyer innicca gaa: «Ay keeke appe ay gurus maa ku giɗikkiki gaan e?» Gii tiiliyyee gee: «Ha, ay keeke appe.» 9Gaa Piyer beneyyitti gaa: «Ayme ku boodiɗe ma mitte, ku cokkicca Ruuhanti Mella Miltine? Giyyu! Giimi ma deyya saaya mitte ay guta appe kooko biití burgutti. Kaŋ kulla gu akkikite kaata.»

10Gii caaɗiɗe kaytiŋ ka gi galɗe karap maatenta unti Piyer. Maa gu ɗibili yookiɗe min kayyeyyo pa, guu asicca gassa maatenta. Guu kaatikkiti gita kulla gu deeɗica tina saripti mittí. 11Guu giimi paracco ma temekka saananti Iisa Masi, o giimi daare kulla ma giyyica kabarre taata ɓayɗe ta tirta teete.

N̰amaakeetee Iisa o paraayee

12Mella biryoo gudirane oko n̰amaakeetee Iisa gu lewɗo payya garaawi maani ku ajjibiti aacco giimo. Giimi ma dowwiy galbigeeco oko Iisa Masi pa, temekka diiman paracco girti Mellayi were maa gi Zubaati Suleman alɗo. 13Ma dowwiy ɗa galbigeeco oko Iisa soopa kataa ɗa ma guta, innasoopa gu bakammiy ma karaamane. 14Guu ma dowwiy galbigeeco oko Miltine kee Iisa gayawɗo kulla meene, miɗi o daatti. Guu tapaɗɗo ma gicco ma dowwiy kulla. 15Gaa ma gaari ku ajjibiti maa gu n̰amaakeetee Iisa leewa kotti, gu giimi cemeɗɗiy pe gimco ma parayya, guu ɗereɗɗiy ariŋgeyyo o biriskeyyo renta bottollo, ku maa ga wikinne maa gaa Piyer ƴelaa gu aŋka gi kelemti ka pe kulla uppiyee oko kaƴi min oko paraayeyyo gaa rayyidiɗo. 16Guu lekkiɗo pe kulla giimi daare maani ma ase min gawaagargee ma aaye saripti Zerizalem. Guta pa kulla asawko gimco ma parayya o maa gu awaaradgee negekke. Guu n̰amaakeetee Iisa rayyidiɗiy paracco.

N̰amaakeetee Iisa o taattuwee ku parlanti

17Gaa tattuwco oko taattuweeco soƴoowee ku saɗikaŋgeyyo ku girti Mellayi o ma giimi paracco ma aaye saripti, guta maa gu kolay goo Saduseyennigee, leeɗiyoo galbigee koo ku namta asan gu giimi paracco bakammiy ma karaamane n̰amaakeetee Iisa. Guu boodiɗe ku maa gu niŋgiyyooga lubbico. 18Guu bammiɗiy gu issiɗiy daŋayi unco giimi paracco. 19Gaa ma aandoŋ ga Mella Miltine n̰aamiɗe malaykat kaƴi ma asiyooca iyya biití burgo ta daŋayi. Gaa cimmiɗiy gaa beneyyiyyoo gaa: 20«Aɗoŋ girti Mellayi, ku deeɗiyo beneyya oko giimo beneyyi ma beraa hayaatane ta marawta.»

21Guu n̰amaakeetee Iisa oyyiyya beneyti malaykaddi. Gaa ƴekker ka ma sossoko gu kaatiɗe girti Mellayi. Guu deeɗe diila gu beneyɗo gaartee Mellayi.

Gaa tattuwco oko taattuweeco soƴoowee ku saɗikaŋgeyyo ma gittee tappiɗiy ajaawaŋgeeco Isirayelitnigeyyo oko timmo ta taattuwee ku parlanti. Guu boodiɗe, guu n̰aamiɗe taraakee ku girti Mellayi goo gu aɗiy cimma n̰amaakeetee Iisa min daŋayi. 22Gaa maa gu taraakee kaatiɗe daŋayi pa gu gassiy ɗa aatti suluulu maa gu eseɗɗiy. Guu yookiyyoo oko taattuwee ku parlanti gu asiyyo beneyya goo: 23«Maa ni kaatiɗe gaa daŋaye agisenta, o taraakee kulla aaye beneeco burgaggi maa gu dowɗiy. Gaa maa ni iyyiɗiy pa, ni gasse ɗa ya gimu were maa gu eseɗɗiy n̰amaakeetee Iisa.»

24Maa ga tattuwco taraakee ku girti Mellayi, o taattuweeco soƴoowee ku saɗikaŋgeyyo giyyiyya beneyyi kaaka, guu alɗo ibina ɗa payya latta maa gu leeɗo. Guu enewɗo paaɗe zeneeco goo: «Ay ini me ma asiyo oko n̰amaakeyyo?» 25Gaa lekkiɗo gimu kaƴi aɗe ma asiyo beneyya gaa: «Giyyoŋ ƴa! Giimi koo maa ku bamme ku issiɗiy daŋayi, ay guta aɗe kotti aaye dooranti girti Mellayi gu garawɗiyo beneyyi oko giimo.»

26Gaa tattuwco taraakeyyo ma gittee kaatiɗe gu deeɗiko asa n̰amaakeetee Iisa. Maa gu kaatiyyoo soopa gu najarriy ɗa, asan gu ɓaye goo walaŋ gu giimi dawakkay ma dambee.

27Maa gu asikkikoo wikirco taattuwee ku parlanti, gaa tattuwco oko taattuweeco soƴoowee ku saɗikaŋgeyyo diiliɗe ga loomoyɗiy 28gaa: «Ni wereɗɗitoŋ ɗa aɗe min beneyyi ma semeetee gimu keeke e? Haŋka pa ku elloŋ ƴa! Ku arca Zerizalem ma beneytoŋ keeke. Kuu aŋkiɗo ku yookinniigu baartee gimu keeke oko nii!» 29Gaa Piyer ma gittee n̰amaakeetee Iisa daare tiiliyyee goo: «Ni jobokka ka Mellayi min maa ni jobbiɗo ka giimo. 30Ku deyya Iisa ma paapo kuruwayi, gaa Mella Milco kookuweetine soopa naɗiyya min muuti. 31Gaa cipiliyya gaa gagiyya tiyaawati. Gaa duwiyya ga deeɗe Tattuwe o Najjaaya, ku maa ga biriyyo botol oko giimi ku Isirayel, maa gu meeliɗiy gaarco ku miɗɗa, guu gassiɗo saamiyo ta zunubgeeco. 32Nii soopa o Ruuhanti Mellayi ay suyuudigee saa oko gaari kooko ma deero. Ruuhane taata pa, ay gita appe maa ga Mella biryoo oko giimi paracco ma oyyiya beneyti.»

33Maa gu taattuwee ku parlanti guta giyyiyya beneyyi keeke, guu unɗe ma bogor hep! Guu aŋkiɗo diyawco. 34Gaa iŋaa aacco taattuwee ku parlanti, ga lekkiɗo pe gimu maa gu semeetee goo Gamaliyel. Gata pa ay Pariziyennice, o ga ay aalimne ka Kitamniti Muusa. Guu giimi paracco karmayɗiya ta tirta. Gaa waciɗe unco taattuwee ku parlanti. Gaa beneyyiyyoo gaa gu cimmiy ƴa paalta n̰amaakeetee Iisa renta. 35Maa gu cimmiɗiy, gaa beneyyiyyoo oko gittee gaa: «Kuŋ giimi ku Isirayel, warroŋ maaƴi min oko latta maa ku leewayo oko giimi kooko. 36Ku moyaa aɗe oko ƴilaakee koo, maa ga lekkiɗo miiɗi maa gu semeetee goo Tewudas, ma cepellica pe kayaati, o ga lekka latta kee ka miyaŋgee pooɗi miɗi ma jobokkaa. Gaa ma kaaka aɗe gu deeɗiya, guu gimtee pa tacilɗe, guu gaarco battiɗe. 37Gaa taarti Tewudas, ga lekkiɗe payya kaƴi maa goo Yudas kee ka kiɗa ta Galilee ma timme giimi maani taarti wikinne maa gi hakuuma gemmiɗiy giimi. Gaa maa gu deeɗiya gata kulla, gu gimtee paracco ma jobbiya tacilɗe ta kaw. 38Ay ɗakko appe haŋka na beneyɗitoŋ naa gu giimi kooko ku elloŋgu gonek ka. Duwaaniyo gu addo. Gaa lattaaco maa gu aŋka gu leeɗiya kaaka asaa min oko guta ka, ga akka batta. 39A guu gaarco kotti soopa asaa min oko Mellayi aɗe, ku gederra ɗa ku bittiɗiy. Warroŋ maaƴi! Aɗoŋ cokka ɗa booka ma Mella.»

Guu taattuwee ku parlanti baamiyya beneyti Gamaliyel kaaka. 40Guu kolliɗiy payya n̰amaakeetee Iisa, guu asiɗiy tamma, guu sartiyiyyoo goo gu addo beneyya ɗa payya ma semeetee Iisa, guu cappiyyo. 41Guu n̰amaakeetee Iisa oomiɗe min wikirco taattuwee ku parlanti. Guu ƴiiliɗe ma parhanco asan ga Mella elliy kadar gu gederre gu oyyicca n̰ilaw taata saanane ka semeetee Iisa. 42Gaa ma kaaka aɗe ga kulla meene gu garkayɗiy giimi o gu tasaayooca kabarre ta daana ta gaartee Iisa dooranti girti Mellayi o gerro kadar ga ay Masi, gata maa ga Mella aparre. Guta duwiyee ɗa ta kaw oko beneyyi keeke.

Currently Selected:

Lubaakico N̰amaakeetee Iisa Masi 5: mmy

Highlight

Copy