YouVersion Logo
Search Icon

Lubaakico N̰amaakeetee Iisa Masi 4

4
Piyer ma giiti Yaaya unco taattuwee ku parlanti
1Wikinne maa gu ini Piyer ma giiti Yaaya beneyɗiyo kaaka oko giimo, gu soƴoowee ku saɗikaŋgeyyo o tattuwco taraakee ku girti Mellayi o Saduseyennigee asiyoo. 2Guu boŋosɗe ta tirta, asan gu giyyiy ini Piyer ma giiti Yaaya maa gu garawɗiyo oko giimo o gu tasaayo, kadar ga aleŋ maa ga Mella naɗiyya Iisa, gu giimi ku daare kulla ga akkiy naɗa pe aleŋ taata aɗe. 3Guu bammiɗiy gu issiɗiy daŋayi namma gu walɗe asan gi paato gale. 4Gaa ma kaaka aɗe soopa, ga min oko giimi kotti ma giyyiya beneyyi, gu maani duwiy galbigeeco oko Iisa. Guu ma duwiy galbigeeco kotti oko Iisa paracco deeɗe latta ka alpaŋgee beeƴa.
5Gaa ta sokkonta, gu taattuweeco Yawudigeyyo, o ajaawaŋgee o aalimnigee ku Kitamniti Muusa timmiɗe paracco aatti Zerizalem. 6Min oko giimi kotti pa, ga Aan ma ay tattuwco oko taattuweeco soƴoowee ku saɗikaŋgeyyo o Kayip o Yaaya o Alekzandir o giimi paracco ku balti tattuwco oko taattuweeco soƴoowee ku saɗikaŋgeyyo, guta kulla aayiyo. 7Guu cimmiɗiy ini Piyer ma giiti Yaaya min daŋayi, guu asikkiko unco. Guu inniɗiy goo: «Gimu keeke ku rayyidiya ma gudirane ŋawwa, o ma seme ku we?» 8Mileŋ ga Piyer pa unenta ma Ruuhanti Mellayi, ga beneyyiyoo gaa: «Kuŋ taattuweeco Yawudigeyyo, o kuŋ ajaawaŋgee, 9ku askini meente iŋee untoŋ ku maa ku inninni oko samaane maa ni leyye oko ruŋguyne keeke, o ku aŋka ku ibinɗo baŋ ga rayyide gaa me. 10A keeke pa, ku ibinoŋga parattoŋ, kuŋ o giimi paracco ku Isirayel, ay ma gudirane ta semeetee Iisa Masi ka Nazaret maa ku paape kuruwayi, gaa Mella naɗiyya min aacco giimi ku mattenta, ay gata ma birni botol ga gimu keeke gassicca aapiya untoŋ. 11Iisa pa, ay gata appe maa gi Kitamniti Mellayi beneyye gee:
“Dambu maa ga kuŋ gekeewee uwwe maaƴi,
ay gata appe ma deero dambu ka samaane kee ka diiliti geewiti giiri#4.11 Elloŋ Soom 118.22..”
12«Na beneyyatoŋ ƴa, ay Iisa kayti ka ma gederra ga najjiyinne, asan ga aattí dunuuniti appe ga Mella n̰aamine ɗa payya najjaya kaƴi bala min oko gata.»
13Guu taattuweeco Yawudigeyyo ma caɗaa parlane ajjibiɗe pe ta kaw asan gu lekkiyo aɗe kabarre kadar ga Piyer ma giiti Yaaya ay giimi ma garkayye ɗa maani, guu beneyɗo bala ɓayaw. Guu taattuweeco ibinɗiy aɗe soo kadar ga wikinne maa ga Iisa alɗo gu tan̰n̰e ma gata. 14A mileŋ ga gimu ma rayyiɗe kee pa waraɗɗe saripco Piyer ma giiti Yaaya, kaaka pa gu taattuweeco Yawudigeyyo gasse ɗa payya beneyyi maa gu beneyyiyoo oko Piyer ma giiti Yaaya. 15Guu beneyyiyyoo goo: «Oomoŋ min aatti ger keeke.» Gaa maa gu oomiɗe pa, guu taattuweeco Yawudigeyyo ku parlanti kaltiyɗe aacco ma gaarco. 16Guu waaciɗiy kayyeeco goo: «Giimi kooko ke leeway pe kee me? Guta giimi paracco ku Zerizalem ɗe leelo paaɗe kabarre kadar gu ini Piyer ma giiti Yaaya leyya latta ka ajjibiti keeke. Haŋka pa ke gederra ɗa ke meeliyya. 17Innasoopa, ke aŋka ɗa payya ga beneyyi keeke barimɗo ta ƴiila, gu giimi paracco giyyiya. Toɗɗaniyo ma sartiyo gu alɗo beneyya ɗa payya oko giimo ma semeetee Iisa.»
18Guu jooriɗiy, guu sartiyiyyoo goo: «Ni geewatoŋ ɗa payya ta kaw ku tasaayo oko giimo o ku beneyyayo ma semeetee Iisa.» 19Gaa Piyer ma giiti Yaaya tiiliyyoo goo: «A gaa oko kantoŋ ka, ga ma ɗayaŋ unti Mellayi ay ini me? Ay ni jobbiyya kantoŋ e, e ni jobbiyya ka Mellayi? Aawoŋga ƴa keeke! 20Gaa oko nii, ni gederra ɗa ni ƴaapikkikii maa ni giyye o maa ni elle min oko Iisa.»
21Guu Yawudigee ma caɗaa parlane alɗiyo gassa ɗa botol maa gu diigiyɗiy, guu sartiyiyyoo payya, guu cappiyyoo, asan gu giimi paracco logokkaa Mella oko gaari kooko ma deero. 22Gimu ma rayyide rayyido ta ajjibiti kee pa, gu ƴilaakeetee ƴiila orooruwee pooɗi.
Giimi ma dowwiy galbigeeco oko Iisa Masi lollokkaa Mella
23Maa ga Piyer ma giiti Yaaya gu cappiyyoo, guu deeɗiy gassa gicco ma dowwiy galbigeeco oko Iisa Masi. Guu gemmiyyoogu gaari maa gu taattuweeco soƴoowee ku saɗikaŋgeyyo o ajaawaŋgee beneyyiyoo. 24Maa gu gicco giyyiyya beneyco kaaka, gaa paracco gu lollikiyya Mella ma galbane kaƴi ka goo: «Miltini, ay kii ma kilgiyya samaane o kiɗa o baharre, o lawwi paracco ma aaye#4.24 Elloŋ Oomiti min Masir 20.11 o Soom 146.6.. 25Kii beneyye ma gudirane ta Ruuhanti Mellayi ma biiti Dawud ma ay kaakatini o ga lubaakacum kii:
“Ayme gu giimi ku kiɗaayeyyo alɗo boŋsenta ka,
guu aŋkiɗo ka miɗɗa?
Ayme gu ballee bodowɗo
ma gaari ma gayee ɗa maatiki?
26Salaataŋgee ku dunuuniti aŋke booka,
o taattuwee timme
ku maa gu poociyya Mella Miltine
o sultan maa ga aparre kee Masi#4.26 Elloŋ Soom 2.1-2..”
27«A beneyyi keeke pa, ay seene appe, asan ga sultan Erod ma giiti guberner kee Pons Pilat kulla timme aatti geegar keeke, o giimi ku Isirayel o ma ay ku Isirayel ɗa kulla timme ku maa gu poociyya lubaakacum kee Iisa ma duwenta ta kaw oko kii, gata maa ki aparre. 28Guu leeɗeega latta maa ki aŋakke liyawti min omma ma gudirancum o ma aŋkicum. 29Haŋka pa Miltini, ni enewwum ki ellicca samaane sartiyco maa gu leeni o ki biraani gudirane oko nii lawweecam, ku maa ni taasiyya beneycum bala ɓayaw, 30o ni enewwum ki gaaricca gudirancum maa gu giimi rayyaɗɗo o gu elelɗo garaawi ku ajjibiti ma kakaayoogu kayyeeco ma semeetee lubaakacum kee Iisa, gata ma duwenta ta kaw oko kii.»
31Maa gu gaamicca lollikico taata, gaa wikirco maa gu temeɗɗe kaaka azirɗe. Guu deeɗe paracco unenta ma Ruuhanti Mellayi o gu diile gu tasawɗiya beneyti Mellayi bala ɓayaw.
Giimi ma dowwiy galbigeeco oko Iisa Masi ma lawco
32Guta pa ma dowwiy galbigeeco oko Iisa Masi kotti paracco gu gaarco kaƴi ka, o galbigeeco kulla kaƴi ka. Lekka ɗa ma leewa gaa gu lawwi kotti ay kuntee. Innasoopa gu lawco paracco gu leewiy saa aleŋ kuu gu ay ku paracco. Lekka ɗa ma bakammiy kuntee oko gata ka. 33Ay ma gudiranti Mellayi gu n̰amaakeetee Iisa beneyɗo saa pe ma gaari ku naɗawti Miltine kee Iisa. Gaa Mella leeɗiyo paracco gidaanuwe maani. 34Gaa alɗo lekka ɗa ya gimu kaƴi maa ga maatiki koyowwiyee, asan gu ma lekka ganna e baŋ gu gerra geɗekkiko guu asawɗikiy gurus. 35Gurus kaaka pa, gu beraayooga oko n̰amaakeetee Iisa. Guu guta pa edeɗɗiyooga ka pe. Kulla gimu aɗe gu beree gurus ma arakke. 36Min oko giimi kotti pa, ga lekka gimu kaƴi aɗe maa gu semeetee goo Yuusup, n̰amaakeetee Iisa pa kolaa goo Barnabas. Seme ku Barnabas kooko pa goo ‘gimu ma esekkayo dekerro oko giimo’. Gata pa ay ka kiɗa ta Sipire. Ta balco pa gu kolay goo Leebitnigee#4.36 Leebitnigee pa ay giimi ku balti Leebi runti Yakub. Guta pa gayay giimi ma soƴaa saɗikaŋgee girti Mellayi.. 37Gaa lekkiɗo pe gaan. Gaa maa ga giɗikkiki, ga asiyooga bira gurus paratti oko n̰amaakeetee Iisa.

Highlight

Share

Copy

None

Want to have your highlights saved across all your devices? Sign up or sign in